لاهو مساء الخير عندي ولا النور
أنا مسائي كله أحزان وشحوب
خالد يقول أشفيك يابوي مكسور
وأقول ياخالد وانا بوك مغلوب
أيامنا بتدور وتدوروتدور
لا الحرف مرفوعٍ لا الحرف منصوب
حزن أكتبه بسطور وامحاه بسطور
لكن وربي ما البس الثوب مقلوب
لو ماقدرت أكتب ولا حرف معذور
طعناتها طعنات في سلم وحروب
مكذوب وقتٍ مابه أحساس وشعور
مكذوب ياخالد وأنا بوك مكذوب
من طاح بيدينه وأنا ابوك مقهور
من طيحته لو قام بيقوم مرعوب
مهزوم حتى لو يشوفون منصور
مكتوب لحظاتٍ وساعات مشطوب
الهرج يا خالد وقف داخل الزور
لاقادر أتكلم ولا الصمت مرغوب
مكثور خير الظلم مكثور مكثور
حاول يتوبني عن الناس ما توب
ياكاشفين الستر والحال مستور
ألبس شماغي وأثرني لابس عيوب
قدمت لصحابي رياحين وزهور
واثار لي أسلوب والغير أسلوب
بنيت بيتي عالي الطيب والسور
لاهو زجاج ولااحذف الناس با لطوب
الليل في عيني متاهات وبحور
وانام مسروقه حقوقي ومسلوب
بعض الخطايا مالها ذنب مغفور
يفتح لها الشيطان بيبان ودروب
صارت قلوب الناس أجداث وقبور
وش في قلوب الناس ماعادت قلوب
ياليتهم مازادوا الحمل والجور
ياليتهم صبّولي الحب في كوب
مجبور أودعهم من القلب مجبور
أقولها من جد ماهي بملعــوب
في زاوية بيتي والأوجاع بالدور
أرقب غروب الشمس وفـ.دمعي غروب
يابوك من يكرهك يابوك فـ.يغور
خلك فـ.صوب وخله يروح في صوب
أبوك أبعد من مدى نظرة العور
لاهو بسكرانٍ ولاراعي حبوب