ياعلي لا نشدوك اش قصته منطوي
قلهم ما بقلبه للسعاده مكان
اختلف عقب ماهو كان شخص سوي
وانحرف عقب ماهو بقمه الاتزان
ماهم اللي يقولون البقى للقوي
لو تراهنت معهم كنت كسبت الرهان
والله اني قوي لاشك ماتستوي
قوه مع خيانه من عطاك الامان
امس طاح الوفى من دوون صوت ودوي
طيحه ماسمعها الا الزمن والمكان
يوم جتني من اقرب صاحب تلتوي
كل شي تحطم في عيوني وهان
طعنه من خوي في زمن فوضوي
لا كتمها خفوق ولا نطقها لسان
قبلها لي خفوق صادق يحتوي
نص كله وفا ونصه الاخر حنان
عقبها كن وسطه ذيب غدر يعوي
منه بيض النوايا استاحشن يافلان
بيض الله وجه الموقف الملتوي
يوم بين رفاع ويوم بين طمان
ياعلي كن رجلي في جليب تهوي
غشني جالها ماكنت اظنه دفان
غلطتي دنيتي ماعشتها فهلوي
كان ماخانت الرومله يدين الحصان
ياعلي شفت طعنات الخوي للخوي
مالها بالوصوف الا طعون الزمان
اه..وان جتك طعنه من ايدين بدوي
مابقى للمراجل في زمنا امان
حمد السعيد