البارت 126


في بيت ابو خالد ..

ام خالد تأشر لولد بُشرى : تعال هنا هنا
ضحك الولد وهو يبعد عن جدته العاجزه عن الحركة رمته بعلبه المناديل وغرق بضحكاته
بُشرى ابتسمت بتعب : هييييه اسمع كلام جده
تقدم لجدته بهدوء تلبسه بجامته وهي تتكلم ببحه : من الليل رافض ينام الحين يلبس وينام غصباً عليه
ضحكت بُشرى وهي تضم طفلتها الصغيره ذات الملامح المحمره لحضنها
" جابتها قبل وقتها بشهر في أحد مستشفيات الطائف وطلعتها من حضانه المستشفى على
مسؤوليتها بعدها سافروا من الطائف للرياض والحين عند اهلها "
همست لامها : تتوقعين عادي ؟ عمرها ثلاث ايام ومسافره فيها
ام خالد بنص عين : ترى مر يوم واحنا فالرياض توك تتذكرين انك سافرتي فيها !
ضحكت بُشرى وهي تبوس
كتف امها اللي جنبها : ادري بس وش السواه توني افكر
سمعوا صوت خطوات تقرب منهم جايه من الباب الرئيسي للبيت
ام خالد بغمزه : شكله عبدالله جاء من جابك وهو كل ساعه ناشب لي
ذكرني ببداية زواجكم
استحت بُشرى وتجمدت ملامحها وعيونها ع الباب
رفعت سبابتها واشرت : يمممه
التفتت امها للباب وهي مبتسمه واختفت ابتسامتها بصدمه وهي تهمس : خلودي !
ضحك وبلهفه : عيون خلودي وروحه وقلبه ركض لها وجلس مقابلها يبوس كفوفها وكتفها
ورجولها : يانبضه انتي
الرياض منوره وجوها يشلع القلب من حلاته اثرك فيها ي يمه فديتك انا وفديت راسك ورجولك
ام خالد تضمه لها وتبوسه والغصه واقفه بحلقها : فقدتك حيل والله لك مكان بقلبي
ي خلود طلعت بموت بدونك
خالد بسرعه : يومي قبل يومك يمه يومي قبل يومك ..
بُشرى بنص عين تناظره : هلا هلا وش جايبك ؟ هاه ! كم مره نتصل وماترد قلة ادب ، رجال وش طولك نخاف عليك لا يكون صار لك شيء
او خطفتك وحده من البنات من كثر جمالك
غمزت له بقصد " ختام "
وخالد يناظرها بدهشه :هوب هوب وش هاللسان ! توي اشوفك يالظالمه طيب سلمي علي اول !
تجمدت ملامحه من شاف اللي بحضنها : وش ذا ! بُشرى سبلت بعيونها بدلع : بنتي
خالد توسعت عيونه : هاه !
ام خالد بضحكة : بسم الله عليك توها ولدت بس حتى وهي ماتتحرك
لسانها وش طوله
ضحك خالد وانحنى لبُشرى يسلم عليها ويطقطق على بنتها : وش ذا الطماطه !
بُشرى صدت عنه وهي تاخذ بنتها : تغار منها ي الدب
وقف خالد وهو يلتفت حوله : ابوي فالمجلس !
ام خالد وهي تبتسم له وشوي وتاكله من كثر الشوق : ايه فديتك هناك
خالد ناظرها بحنيه وانحنى باس جبينها بعمق ورفع راسه : احبك
خرج لابوه وبُشرى تتكلم بصوت عالي : شفتي شفتي الكلام الله ي الدنيا تغير خويلد صار
رومانسي خال الطماطه
ضحكت ام خالد : تسبين بنتك ؟
بُشرى ضحكت معها . ..