ديوان ويمنعنبذه عن الشاعر مطلق النومسي

24 - 3 - 2022, 12:38 AM

قصيدة حشمة الأجواد - مطلق النومسي

هذه القصيده اهداء الى قبلية مطير

حشمة الأجواد عند اللي يقدر عادة
والرجال اللي تقدّر للوفا معتادة

والوفا .. والصدق .. والتقدير .. زايد تركي
حركن مطلق .. وسيّر رجله من بلاده

صاحبي تركي .. وأقدر صحبته . وأفخربه
ماهي بصحبة شعر .. صحبة وفا وزيادة

لو ما بيني وبينه .. وصل دايم دايم
الغلا من بيننا مبطي ركزت شداده

سم يا هجس القصيد .. وسم يا سامعني
الحفل مليان .. بالشعار .. والنقّادة

مار .. أنا ماني بحي الله .. وعارف وزني
لا تحسبوني حساب العالم القصّادة

أنتقي جزل البيوت .. الندّر المحبوكة
حبكة معلم .. وعندي بالقصيدة .. ريادة

شاعر جاكم من بلاد الكويت الحرة
فوق مسّاح الخطوط .. ولا وقف عداده

صنعة اليابان ياحي البلد .. والصتعة
ما وقف بين الشريطيّة .. ولا الكدّادة

مشتريه .. بحر مالي .. ماهو بعارية
ولا وقفت احايل التاجر .. يطش أقصاده

أصرع الدنيا على الجنب العسير .. وتبرك
والمعين الله .. وربي معتني بعباده

يكفي إني لا زهمته .. قال عونك عونك
والله أنه يعبد الخط الطويل عبادة

لا قفيته .. ماتقول إلا سحاب رادم
ولا نطحته .. ماتقول إلا حفيد السّادة

هيبته .. هيبة ملك عادل .. وسمح وجهه
جالسِِ في ثاني الأعياد .. بين أحفاده

فل أوبشن .. والكفالة من حفيز الساير
فتحة .. وسنسر .. وشاشة عرض .. مع براده

كن كشنه .. لا احتوى جسمك .. وضم كتوفك
حضن ريّانة جسد .. فيها التغنج عادة

مركب الشيخان .. واكرام اللحى المحشومة
ليت ما يبرا له السواق .. بام قلادة

وجهته .. يم الرياض .. وحي هاك الديرة
والهدف .. بالضبط عند مطير يا نشادة

ياسلام الله عليكم يا مطير العزة
ياسلام الله سلام يتعب .. العدّادة

جيتكم ضيف .. وغلاكم شايله بضلوعي
يا الرجال اللي تقود .. ولا تجي منقادة

انتم اللي تكرمون الضيف .. وتحيوا به
وانتم اللي تذبحون الحيل .. ذبح إبادة

وانتم اللي تمّنون الخايف .. المتهيّب
وانتم اللي للحياض المهلكة .. ورّاده

وانتم اللي جاركم .. ما يضهد بجيرتكم
وأنتم اللي .. بالمعارك .. خيلكم طرّادة

من حدود الشرق .. لا نجد العذي .. للحرة
فعلكم .. بيّن .. ولا يبغى سند شهادة

الحصى يشهد قبل لا الناس معكم .. تشهد
مرّ مشذوبه .. ومرّ الصلب .. وإخذ إفادة

يا مطير الله .. خلقكم للشجاعة .. موطن
يا الصقور .. الي تهدّ .. وتنطح الهدادة

جمع ( عبدالله ) يحرك بالحجاز جيوشه
وجمع (علوى) مع (بريه) يشكلون قيادة

ورعكم .. يفطم على الدم الحمر .. من صغره
وكهلكم .. لأرقاب عدوانه .. كما الحصّادة

يا هل الصمان .. مقدام الدير .. وأطيبها
محتمينه .. بالسيوف .. الصقّل .. الجرّادة

يا مطير .. الله يكثّر جنسكم بالدنيا
يا زحازيح الرجال .. أهل العزم والرّادة

جيتكم مندوب للويلان .. عصبة راسي
ربعي كبار الفعول .. مخزّمين القادة

جيتكم وأنا الفرح متهلّلِ بعيوني
والوفا بين الرجال الطيبين .. عبادة

قلتها قبل رمضان .. ودعوةِِ من قلبي
جعلكم يا مطير .. من صوّامه وعواده

24 - 3 - 2022, 12:39 AM

قصيدة هنا .. هنا - مطلق النومسي

قصيده مطلق النومسي بعبدالمجيد السبيعي

هنا .. هنا .. للموقف الإلزامي
غنيّت قافي ... وانطلق قدامي

أسج ساعة ... وأتكدّر ساعة
هذي لياليي .. وذي أيامي

النار .. تطلع من حشاي وترجع
وأصبح حطبها .. من دقيق عظامي

ولحقت على عيني .. وشبّت فيها
وبدت فصول .. المشهد الإدرامي

أفكّر بعبدالمجيد .. وحاله
وأصد .. وأمسح .. دمعتي بإبهامي

ياليت .. ماصرت بمثل هالموقف
أو ليت قبل .. أحضره .. حلّ إعدامي

عبدالمجيد .. إسمع وأنا بن عمك
صوتك على هالمنبر الإعلامي

أصيح به .. وأنخى .. وأطش عقالي
وأجثي على ركبّي ... وراسي زامي

مدام لي لابة .. ليا صكّوا بي
قالو دخيل البيت .. ما ينضامي

يا لابتي .. يا عيال وايل .. جمعا
يا عزوتي ... يا مسندي .. يا حزامي

يا منبع الفزعة .. ويا مرجعها
يا أهل البطولة .. والمقام السامي

يا حاكمين أرض الجزيرة ... مبطي
ولهالزمن وأنتم بعد حكامي

فزعاتنا ماهي .. بحاجة شاهد
والشاهد الله ... ما عليها كامي

تذكّروا ... فزعاتنا للصيحة
يوم إن ضرب السيف .. حامي .. حامي

واليوم هذي صيحةِِ .. تشبهها
صيحة ( سبيعية ) ولا تنلامي

تبكي ولدها ... وتحلم برجوعه
بأحلامها ... وأحلامكم ... وأحلامي

قوموا .. لها مقام .. رجلِِ واحد
رجلِِ على شيل الحمول .. عصامي

كل عنزي .. مسؤول عن دمعتها
قدام .. أهل الكوكب .. المترامي

هذى ... شرفنا .. عرضنا .. عورتنا
وحنا على .. عرض القصير .. نحامي

لازم نحامي .. والحميا عادة
فينا ... ولا فينا عفن وهلامي

واللي ما يفزع .. لا انتخت به حرّة
لا يشرب الفنجال .. بين أعمامي

خلوه .. يلبس .. ثوب بنتٍٍ مجوز
وتحرم .. لمثله لبسة البسامي

ذي حزة الفزعة ... ولامن صدة
عن مثل هذا .. الموقف الإلزامي

يا عيال وايل .. مرجلة .. وحميا
ويامر عليها .. ديننا الإسلامي

مدّوا يديكم .. علّني فدوتها
وأنتم كرام .. ومن عروق .. كرامي

باقي عن المدة .. شهر .. وشوية
مافيه وقت .. نراجع الأرقامي

عشرة ملايين .. ونفك رقبته
هذا عنزي .. ماهوب قطعة خامي

وليا انتهينا ... صوتوا ... بالدحّة
نامي.. هنيّة ( يا سبيعية) ... نامي

24 - 3 - 2022, 12:39 AM

قصيدة شمر وشعر - مطلق النومسي

هذه قصيده الشاعر مطلق النومسي بمهرجان الشنان بشمر

هب الهوى واتعب هوى مرسوله
والشعر ما بل الصدر هملوله

يبرق شمال وبارقه يزعجني
وليا انزعجت اطاوله واطوله

لي وقت ما غنيت يا سامعني
علة ولاهي علة مجهوله

شعّار هذا والوقت يا كافينا
ما هيب عما تفعله مسؤوله

قلة أدب على تبجح زايد
على حركات ما هي مقبوله

منهم من يماري بغمزة عينه
وإن زاد قام يماري بمجدوله

ما باقي إلا يقول أنا مثل اختي
واقول عفيه جهزوا مريوله

ومنهم من يهابد ويرفع صوته
وإن صاح وهبّيل العرب صاحوله

ينقز على الكرسي وهي تنقز له
مهبول وافق له بشر مهبوله

ومنهم من يكابر على دين الله
والدين عنده مشكلة محلوله

أقول شف مكه وشوف محمد
يقول شف عيسى وشف معلوله

وإن قلت ويش الغول بيجاوبني
الغول أبوه الغول وامه غوله

ومع ذلك استثني فئة محدوده
فئة لها صولة إبداع وجوله

كرهت شعر النظم مع شعّاره
وفضلت أعيش بساحة معزوله

لكن بعد ما وصولو لي دعوة
من ديرةٍ بالمرجلة مأهوله

حلفت لا أجيها شعر واغني
بالصوت وإن وصل الصدى فزوله

دار الطنايا حي هاك اللابة
قبيلةٍ على الكرم مجبوله

شمر وشعر ما يفوز بشمر
خسارته مضمونة ومدبوله

إي والله أمدحهم واخلد شعري
فيهم وأكرر بنيته واقوله

قوم لهم سمعة وصيتٍ ضارب
ما هيب والله كلمةٍ معسوله

هذا الصحيح وكل حيٍ يشهد
كلمة نعم بين العرب منقوله

وشمر لو إني ما أعرف مسكنها
من صيتها لأقول شمر دوله

أسمع ذكر سلمى مع أهل الاردن
واسمع ذكر سلمى مع أهل اليوله

وسلمى جبل مثل الجبال الأخرى
مجمع حصى مار الحصى من حوله

حوله الاسلم ورفعوا من شانه
لين اشتهر بين العرب بفعوله

أهل اللحيسه متعبين القرح
الموت هذا عندهم تعلوله

حماية البل في نهار الغاره
لا ثوّرت والحرب دق طبوله

يا عنك ما يفلح خصيم الاسلم
إن كان الاسلم كلهم لفو له

طنياتهم صارت علامة جوده
شمر طنايا كلمةٍ مقيوله

والنعم يا شمر ولا تكفيكم
ما هو جزاكم كلمةٍ مدهوله

وأنا من اللي لا غزاها الغازي
تجيه بالموت الحمر مسطوله

ربعي بني وايل ركون القمة
والكل منهم قمةٍ مأموله

وصلتكم ضيف بعباة معزب
ومشوار ماهو يمكم وشهو له

سلام يالاسلم سلامٍ حالي
وألذ من تعسيلة القيلوله

باعيد ما قلته قبل وارده
مشوار ما هو يمكم وشوله

24 - 3 - 2022, 12:40 AM

قصيدة يامحلا طاروق الدحه - مطلق النومسي

يامحلا طاروق الدحه لا وافق له صوت وبحه
صفين وحاشي ومصنع وبيوت الشاعر ممليه

متون تدحم بعضها وقلوب زايل مرضها
وأصوات سباع بتاعة ميه ميه ميه ميه

غناها عمي مع خالي وأنا أغنيها ل عيالي
تاريخ وبصمة معروفة أصلية من بطن أصليه

لعبة حرب ولعبة هيبة ما فيها حاجة معيبة
لا والله نفخر لا قلنا دحيه يا أهل الدحيه

ماهي لعبة هشك بشك مصيونة عن نيات الشك
محشومة من حشمة وايل ماهي دبكات شامية

وأنا طاريها سلاني وقمت أرددها ب لساني
ولا صحيت ألا الترفة تشبك يديها ب يديه

تضحك وتعضض مبسمها والضحكة ذابت من فمها
قالت لي تكفا يا مطلق أبغى دحه شمالية

قلت الغالي يطلب غالي قومي حوشي لي ب عقالي
يالله نبدا يالله نبدا نبدا بداية فعلية

يا بنية قومي غني لي يا ويلي منك يا ويلي
وأنا أصفق لك وأغني يا بنيه ميلي يا بنيه

حبيني يا ريحة جدي تراني جيتك متحدي
اللى عن دربي يحدونك أهل النيات الملوية

أبا تفنن بأوصافك لأجل يشوفك من لاشافك
وصف حي وتمشي روحه من روح الشعر وراعيه

مان ب وصف عيونك باحل عينك بحر ورمشك ساحل
لا بحرتي بي واغضيتي تركبني مية جنية

وخدودك بيض ومفروشة من ورد الجوري مرشوشة
أفتح من حب الرمانة وأغمق من شمس العصرية

وشفاتك لمة حبايب كانت فرقاهم غصايب
الفوقية فيها معاند والطاعة عند الحدرية

وحجاجك مبري ومقوس ورموشك ل رضاه تهوس
وإن طار وكسر جبينك أغديت الحسنة بالسية

واللى على متنك دايم دمه مي وقلبه نايم
متشيخ والشيخة جاته لا ورث ولاهي عاريه

وإن جيتي تمشين وعجله وعيونك ب عيوني خجلة
والقذلة تضحك للغربي والغربي يضحك عليه

كن القاع تعد خطاتك وإلا تحلف لك ب حياتك
شي ماقالو لي عنه شوفة ذي وشوفة ذيه

شفافة ذوق ولبيسه لبسك ملبوس برنسيسه
وإن تلثمتي بالشيلة كنك من أهل الشرقية

يقلدونك خواتك حتى في لبست عباتك
لكن قولي لي من يجمع بين الشمس وبين الفية

يوم الله خلقكم فرق ما غرب بالزين وشرق
خصه فيك وعمه فيهم سبحانه جزل العطية

والحين أبغى رايك فيها من أولها لا تاليها
عساني مرضي غرورك يا ام العيون السحرية

قالت تعرف رأيي مبطي لا تخطي تكفا لا تخطي
ما ذوبني غيراشعاركفديت الشعر وراعيه

أنا ضحية قصيدك لكن لي شرط ب جديدك
أبغي من اليوم وطالع تلعب دحة شمالية

24 - 3 - 2022, 12:41 AM

قصيدة أكذب بيوت الشعر - مطلق النومسي

أكذب بيوت الشعر بيت اللي يقول
ما الحب إلا للحبيب الأولي

وأكبر دليل إنك معي أربع فصول
وألغيت كل الناس ياريحة هلي

ألغيتهم وأنا أحسب إن مالي ميول
إلا لأول حب بالقلب الخلي

بس إنت ماخليت للماضي قبول
وعلمتني بالحب مقدار جهلي

وسميت بإسم الله عليك من النضول
واللي يهدم البير من فوق الدلي

هلا هلا يافزة الظبي الجفول
يامن لك الخافق يفيض ويمتلي

حقي عليك تحبني حسب الأصول
وإن كان أنا ماوفيت لك حقك علي

أشغلت فيك الناس وأصحاب العقول
ماغير أسولف عنك وأفليها فلي

سموني المهابيل مهبول
وأنا هبالي لك وثقل العقل لي

وش لي لاوالله مالي شيء مول
يامول عن شعب الإمارات أوملي

أخذتني كلي وأنا كلي ذهول
مدري غلا ولا غلو ولا غلي

مثل الخليفة والأمه ذات الحجول
يوم سمعوا صوت صفير البلبلي

مالك سوى تامر وأنا لأمرك عجول
حتى ولو أمرك هدم مستقبلي

أقول إيوه وإن بغيت الإيه أقول
ولا على قولة هل البصرة بلي

معك معك دايم ورغم أنف العذول
أعلن موافقتي وشرطي مايلي

إنك ترضاني إليا جيتك زعول
وإنك تزعلني إليا غاب زعلي

وإنك تقاضالي من الرمش الكسول
وإنك تلحفني الجديل المخملي

مانك موافق زين يالظبي الجفول
باقي معي كلمة بصدري تصطلي

تبي الصراحه عاد صادق من يقول
ما الحب إلا للحبيب الأولي

24 - 3 - 2022, 12:41 AM

قصيدة ياشي مالك شي دامك ولاشي - مطلق النومسي

ياشي مالك شي دامك ولاشي
ومقابل اللاشي والله غميضه

سكرت أذاني عن صدى المنطق السي
وقلت اتجمل والجماله فريضه

حاولت اعزك مير عي ولد عي
والعي ناقص والمراجل نقيضه

ياوي من وقت التعاجيب ياوي
اثر القلوب بشوف زولي مريضه

خذها على جبهتك خذها كما هي
وتعرف وش كبر الشعيب ومفيضه

الاوله تنجض على قلبك الني
والثانيه نيه ونفسك نجيضه

ترى اليهودي نجس وينجس شوي
لاصار جدانه قبيلة قريضه

ياللي خذيت الميت في زلة الحي
ذبح السلوقي ماينجي عضيضه

ولا صار مالك من جبال اليمن في
وشلون تطمع بالشمال ومقيضه

سمعت راغب قال يماي يابي
بس انت ماتسمع وش يقول عيضه

يقول متن طويق يسند جبل طي
والبغض واجب للوجيه البغيضه

افهم يمال الهشل والضعف واللي
وحاول تبرق بالخطوط العريضه

وان مافهمت اخر علاج لك الكي
يابا العيون الناعسات الغضيضه

وبكره تجي محقور وتقبل يدي
واقول بدري والحضيضه حضيضه

ياشي والله بالحقيقه ولاشي
حتى ولاشي اعتبرها غميضه

24 - 3 - 2022, 12:42 AM

قصيدة ضحكي بيديك - مطلق النومسي

ضحكي بيديك ودمعتي برضو نواصيها بيديك
تقدر تضحكني وتبكيني وتلحق مشتهاك

الله عطاك وسلمك أمري وأمري محتويك
إحفظ حقوقي وإلطف بحالى بعد ما الله عطاك

العفو عند المقدرة والعدل شيمة والديك
وأنا ولد هادي معك وأكبر مشاغب من وراك

هنا اتفرق منك وهناك اجتمع واذوب فيك
والخوف جايز من هنا والموت حتمي من هناك

وأكبر دليل إني ليا حاولت يوم أزعل عليك
لقيت قلبي كل ما يزعل يدور عن رضاك

وإذاك تذكر يوم كنا بين أجيك أو ما اجيك
وشلون قلبي كسر الرهبة تحت صدري وجاك

ما جاك يهلك في نجاتك جاك ينجى بك هليك
لن النجاة بما تنص اللائحة عندك هلاك

ياللى هلاكك مبتكر على نظام الهيدروليك
مهما يكن حجم الألم يمنع وجود الإرتباك

لبا الهلاك اللي كذا يوم انتهي به وأبتديك
وألقى نظام الطيش يرسمني على فوضة صباك

وأنا ولا أدري ليه أنا أظما لك وأنا أقدر أرتويك
تدري أقولك شي أحلا شي يوم أروى ظماك

أبيك ياعمري وإذا ما تعجبك كلمة أبيك
خذها بلهجة ساكنيين دبي ياعمري أباك

يكفيك لامن غبت مالك إسم غير إسم المليك
وإن جيت عقب غياب مالك إسم غير إسم الملاك

حشمة غلا وإلا غلا حشمة وذيك تعز ذيك
غلاك يفضح حشمتك وبحشمتك يستر غلاك

24 - 3 - 2022, 12:43 AM

قصيدة الهاتف المجاني - مطلق النومسي

من ثلاث سنين وأكثر .. والقدر يحداني
عنك .. يا طب الخفوق المشتهر بأوجاعه

وأنت .. عنّي .. حدّك اللى حدّني .. وأقصاني
أمر من ربّك .. ولا للرب غير .. الطاعه

والبلا إنك .. كل ليل تشوف .. كل أخواني
إلا أنا ما كان لي حظِِ .. طويلِِ باعه

وإن لقيتك .. ما عرفتتك .. وأنت .. لو تلقاني
ما انت عارفني .. ولو نجمي تشوف ..إشعاعه

لين صحّاك القصيد .. اللى بعد صحّاني
وجيتني مثل الشمال .. وهفهفة ذعذاعه

عاد تدري ؟؟ .. جد والله؟؟ .. أنت عالم ثاني
محتويه الطيب الأول .. في جميع انواعه

مرحبا .. مليون والله.. يا بعد حِيّاني
أنت وينك؟؟ لعن أبو حي الهوى وأتباعه

سوّد الله .. وجه تاريخ الزمان .. الفاني
قد حرمني من .. لقاك .. ولذّته .. وإمتاعه

علّها خيرة .. ودفعة شر .. يا وجداني
عنّي ..وعنّك .. وعن ..روح الغلا الملتاعه

حوّل ..بقاع .. الخفوق .. الموحش .. الوحداني
وأسقه ..دموع السحاب .. وعيد لي مرباعه

عّل تفداك ..الرخوم .. وعّلها.. تفداني
وقّف الساعة .. هنا .. يا جعلها أبرك ساعه

لين ..أفكّ .. حروف صوتك .. وأتركه يقراني
وأقنعه .. منشان يكتبني .. وأزيد إقناعه

ياجلالة صولجان .. الوالي العثماني
كان مالك كل قلبي ؟؟ لك ثلاث أرباعه

ياروا قلبي .. بطلّة وجهك الربّاني
ويا ظما عيني .. لغمزة عينك اللمّاعه

بك شفافية .. لحن .. بيتهوفن الألماني
وبك قساوة ..باتعِِ .. وسلالته .. بتّاعه

عّل .. يفداك القصيد .. اللى يقول لساني
وإن بغيت .. تجدده .. حط الجمر بأصباعه

وفل مجدولك .. وغنّ... ويرتقص شيطاني
وإن رقص .. جاته شياطين الشعر منصاعه

وجدّد الفنجال .. وإفتح لي بكت .. دخاني
ومدّها لي في شفاك .. وعطني الولاعه

وخلّني .. ساعة زمن .. كان الولي أحياني
وأنت لا حسيّت بالضيقة قبل هالساعة؟؟

ماعليك إلا تجيب الهاتف المجّاني
ولمّس صبعك ...الردايل ...وأرفع السماعه

24 - 3 - 2022, 12:44 AM

قصيدة أحلى ليال الصيف - مطلق النومسي

بمناسبة تخرج الشيخ / أحمد العواجي (أحد أبناء المرحوم الشيخ / صالح بن الأمعط العواجي) ..
من كلية الملك خالد العسكرية .. وتعيينه برتبة (ملازم) ..

أقيم حفل بهذه المناسبة ..بمنزل الشاعر الكبير وصاحب المواقف النبيلة ..
الشيخ / فهد الركاد النومسي .. والد النجم / مطلق النومسي ..

والجدير بالذكر .. أن الشاعر مطلق النومسي .. جعل مسائهم غير مساء ..

بقصيدة لامعة كعادته الفذة ..

إليكم ماجعل المساء (غير) .. مسائكم شعر ..

أحلى ليال الصيف هالليلة ولا فيها كلام
وبحيل رب البيت يامن تسمعون وقوته

إني لاسمعكم قصيدة تعتلي فوق السنام..
وتميزون العالم الحية من المتموته

شاعر ولي وزني ولا ينقص منه ملي غرام
والشعر جبته حوت وأسماك الشعر متحوته

ماجيت بالتصويت وأفزع ياعويد وياغلام
ولا وقفت أرقب وصول الصوت واللي صوته

أكحل عيون البيت وأطلع به على متن الغمام
وإن ماضوى بالطيب حضرت الجنون وضوته

معطيني الله موهبة والموهبة مثل الحسام
يعيش في كف الولد ولا الجبان يموته

وأنا مزاجي رايق الليلة ولا فيه أنقسام
حتى ولو قلبي مشاهيب الليالي كوته

سعيد هالليلة عسانا بالسعادة كل عام
والله يحيي من يعرفون الرجال مروته

هلا هلا ماغرد القمري وماطار الحمام
ترحيب مكسي طيب من ساسه إلى ترقوته

يامرحبا بأحمد ولد صالح مواريث الكرام
أحمد ولد صالح ويكفيك الاسم وسموته

هذا ولد صالح وصالح يرحمه رب الأنام
راح وترك لي في عياله فزعته وحموته

واليوم جينا نحتفل بأحمد بعد لبس الوسام
والنجمة اللي خاوت متونه تمنى خوته

يستاهل النجمة ويستاهل معاها الاحترام
نسل الشيوخ وشيخته ماهي عليه مفوته

هذا غصن شجرة عظيمة ظلها برد وسلام
يمنى حجيوي نبتت ويدين صالح سوته

من وين مادرته محكحك من خوال ومن عمام
رابي على العزة ومن رباه صان ربوته

قولوا لعبدالله جلالة سيدي نسل الإمام
أبشر برجل بالمواقف ماتغيب جروته

سيف مجرب مايقص إلا صليبات العظام
وقلبه جبل ماهزة السعلو ولا سعلوته

ماني مبارك له وأبارك لعنزه شرق وشام
أحمد شنار لعنزه وعيال وايل قوته

إي والله إنّا قوته ودروع جنبه والحزام
مثل اللغم جاهز على التفجير حسب عبوته

ياحلو جمعتنا وفرحتنا على حسب النظام
بالليلة اللي غايب عنها الردي وذوته

أقولها باسمي وباسم أبوي في مسك الختام
الله يحيي من يعرفون الرجال مرووووته

24 - 3 - 2022, 12:44 AM

قصيدة أعوذ بك ربي - مطلق النومسي

أعوذ بك ربي من الحسد والغيره
وأدعوك تعمي عيون اللي يحسدوني

وألوذ بك عن مقام النقص والعيره
أو طيحتي عند ناس مايدانوني

عبدك تعصم بحبلك يالله الخيره
رزقك ومدتك والماعون ماعوني

وش دخل الناس بالغصن وعصافيره
والله يلوم اللي بهذي يلوموني

ياناس للدم جار وللدمي جيره
وللشاعر أبعاد بالشعر المراثوني

وأنا أكثر اللي يثير الشعر ويثيره
وأنا أول اللي لياعدوا يعدوني

مبطي وأنا مطبق الشعر بحثافيره
قدام در الحليب ينبت سنوني

أهتم بالشعر وأهتم بجماهيره
والساحه وشد وأقطع مايهموني

أطلع على متن مطلق ما أطلع بغيره
ياعل كل المتون فداك يامتوني

أخذت ماقلت من جمهور هالديره
اللي سمعوا بي قبل حتى يشوفوني

وأنا لهم جيت جيت قومٍ مغيره
نجدية الفعل والتخطيط صهيوني

ماجيت مساح جوخ بضرب تأشيره
ولا قلت ياناس شيلوني وحطوني

جيت أهدم الرجس وأكسر مزاميره
وأحطم امال كل اللي يعادوني

أنا هنا يعني أكتب مبتداء السيره
وعلم بها اللي هنيا مايعرفوني

أنه أنا اللي يحشم الشعر ويثيره
والساحه وشد وأقطع مايهموني

المواضيع المتشابهه لموضوع: ديوان ويمنعنبذه عن الشاعر مطلق النومسي لموضوع: ديوان ويمنعنبذه عن الشاعر مطلق النومسي
الموضوع	كاتب الموضوع	المنتدى	مشاركات	آخر مشاركة
ديوان و نبذه عن عبدالرحمن العشماوي	حنين الأشواق	همس دواوين الشعراء	136	2 - 6 - 2022 01:09 AM
ديوان ونبذه عن الشاعر تركي الميزاني	همس الشوق	همس دواوين الشعراء	18	15 - 2 - 2022 12:57 AM
ديوان الشاعر ضيدان بن قضعان	دلع الشوق	همس دواوين الشعراء	12	27 - 9 - 2021 01:33 AM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM
ديوان و نبذه عن حياة الشاعر على محمد القحطاني	همس الشوق	همس دواوين الشعراء	33	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

ديوان ويمنعنبذه عن الشاعر مطلق النومسي

همس دواوين الشعراء