روايه روحي لك وحدك للكاتبه ريم الحجر روايه رائعه لا تفوتكم

18 - 1 - 2015, 11:43 PM

في مكان ثاني وقبل كم ساعه , وصل راكان مع نايفه لبيت مشاعل ,
فتحت لهم مشاعل الباب وبضحكه رايقه : حنا قلنا تفضلوا على العشاء مب على السحور , بالله وش اخركم ,
نايفه : امي وصلت يا قلبي ,
مشاعل : اللي ماخذ عقلك يتهنى به حتى حلوة اللبن نساك اياها ,
راكان : ايوووه اشتغلت الاذاعه , الحين وراك تدققين , تعرفين زحمة الرياض ما تنطاق
مشاعل : اما عاااد زحمه , اللي يسمعك بيتك اخر الدنيا ترى كلنا نفس الحي ,, روح المجلس ابوي شكله زعلان عليك , هز راكان راسه مستغرب من اللي تقوله مشاعل ,
دخل عليهم وبروح مرحه حاول يلطف الجو ,
علاقته مع ابوه فيها نوع من الجديه , عكس علاقته مع امه اللي مريح فيها نفسه
تكلم ابوه بصوت واضح : انت ما تشوف انك خذت اجازه طويله ,
راكان بثقه : طال عمرك انت عارف وضعي , بس انا اتكلم مع المدير العام يوميا , وحسب علمي ان كل شي يتم بالصوره المطلوبه
ابو راكان : خلك من المدير العام , اذا انت ما وقفت على شغلك بنفسك امورك بتضيع ,
بكره الصباح تطلع لجده , فيه مندوب من شركه خليجيه , نبي نتفاوض معهم عشان المصنع الجديد .
تفاجئ راكان من امر ابوه وحاول يرد بطريقه مناسبه : بحاول اشوف حد من الشركه
وقطع ابوه الكلام فجأه : انت بنفسك تتطلع بكره لجده , ما راح اعتمد الا عليك ,
راكان بأذعان : ابشر طال عمرك ,,
كان يفكر طول الوقت بنايفه , مو عارف كيف يقولها ,, خايف على مشاعرها , احساسه انه بيبعد عنها عذبه , فكر فيها وقرر يكلم امها تجي عندها من بكره ,,
دخلوا الرجال يتعشون , وراحت مشاعل عند نايفه في المجلس , مر راكان على امه , وكانت خالته ام نايفه جالسه , بعد ما سلم عليها طلب منها تجي بكره عند نايفه .. وطلب منها ما تقول الحين أي شي لنايفه , يبي يقول لها بنفسه ,,
بعد ما وصلوا للفيلا حقتهم .. لمح نايفه في احلى اشكالها , تفتت قلبه انه بيسافر ويتركها بالحالها , مو عارف كيف يفتح الموضوع , لاحظت نايفه حيرته وبهدوء
نايفه : راكان وشفيك , فيه حاجه ,
تعجبه في جرئتها في الامور العامه .على خجلها في الامور الخاصه بس هذا يبين تناغم صعب قدرت تحققه بصبرها وعزمها وتربية امها ,,
راكان : عندي مهمه بكره جده ومو هاين علي اسافر واخليك هنا بالحالك ,
انقبض قلبها وسئلته بدون ما تحس : جده ,,
مسك يدها بحنان : عندي شغل ولازم اطلع بنفسي ,
سكتت نايفه , وقامت تبي ترتب عبايتها في الدولاب , قام راكان ومسك يدها : ترى السفر اصعب على نفسي اكثر منك , تدرين ما اقدر اتنفس الا هواك وما احب اصحى الا على عيونك
عشان خاطري , لا تتضايقين
نايفه بأرتباك واضح : انا مستحيل اني اتضايق من شغلك , بس هاذي اول مره تسافر
شعوري طبيعي , بس اذا ماعندك مانع انا ابي اقعد عند امي ,
مسك راكان خصرها : انا طلبت من خالتي في العشاء انها تجي تقعد معك , انا بطمن اكثر اذا كنتي هنا ,
انقبضت نايفه : وانت مقرر انك تسافر وما قلت لي
راكان يهمس في اذنها : ابوي طلب مني الليله على العشاء , وكمل بهمس :
نايفه يا بعد حالي انسي موضوع السفر ابي الليله ذي تكون غير عاديه .همس في اذنها بكلمات
وضحكت نايفه على تعليقه بقوووه , وانسحبت في هدوء وسط نظراته العاشقه ,,

بعد ما صلت الفجر , جاتها دووخه , جسمها منهك , ومشاعرها متوتره , طالعت جوالها ودقت رقمه ,
توقظت مشاعرها بعد ما سمعت الرنين , وارخت اذنها , سمعت صوته خافت : الو
حاولت تمسك نفسها انها تنفجر فيه , بمجرد انه سمعت صوته عرفت انه بخير , خافت ما تشوفه مره ثانيه ,
ردد سلطان : الو , عبير ,
سكرت شفايفها بقووه وغالبت تهدج صوتها وبصعوبه قدرت تتكلم : ليه تسوي كذا ,
انت وينك فيه الحين .
سلطان لما شاف رقمها نبضاته صار لها رفيف سريع , شاف انه يعني لها شي , لما سمع انفاسها المتوتره انقبضت مشاعره , غمض عيونه مع تنهديه بسيطه قطعت قلبها : انا في حايل ,
عبير بقلق : في حايل !!,
كمل سلطان : ودي اغير جو , وحبيت اشوف البيت ,
انعصرت مشاعرها وحست به يسحقها , حاجته للأموات في قمة ضعفه دمرت قوتها ,
تبي تغذيه بمشاعرها الحقيقيه , بس غموضه وترها ,
عبير : اخليك على راحتك . فمان الله ,
سكرت , بعد ما ولد عندها شعور انه محتاج انه يحس فيهم , مشتاق لشوفتهم ,
وهي اللي تنبض بالحياه وكل نبض فيها ينطق بأسمه كبرياءه منعته انها يعترف لها بحبه مباشره بدون اوراق ,
راقب الجوال وحب يدق عليها مره ثانيه , لكن قفلتها اكدت له انها ما راح ترد عليه ,,
شعورها بالخوف عليه وصل له بنبرة صوتها ,
خذ شماغه وطلع لسيارته واتجه للرياض ,
ليه نعذب انفسنا , ونقسى عليها , وش اللي يمنعنا اننا ننطلق بمشاعرنا , ونعبر بحبنا بدون ما نصنع حواجز وهميه , من الكبرياء والكرامه والعزه , الحب الحقيقي , لا يقبل القسمه على اثنين , بل هو معادله سهله جدا , فالحب اذا غزى الأرواح , اصبحت لأجله روح واحده ,
من بعد العمليه ونفسها صايره ضعيفه , كل شي يحزنها , كون انها فقدت ثمره غاليه منه ,
بحد ذاته سبب لها انهيار في حياتها ,
حبت تكون عنده الاثيره وما يحتاج في حياته الا لها , لكن انطوائه على مشاعره ضيعت قرارتها ,
دخلت في السرير , وصاحت بشكل موجع , اتعب كل جسمها ,
قبل الظهر بشوي كانت ام صالح رافعه رجلها للكرسي اللي حطته عشان تمد رجولها كل شوي ,
ونادت على نينا تسئلها عن عبير .
ام صالح : اطلعي فوق قولي لها ماما تبيك انزلي تحت ,
نينا : حاضر .
طلعت نينا وسمعت ام صالح صوت سياره , وبعد لحظات شافت سلطان يطل عليها من الباب .
ماعرفت وش حست به لحظتها مشاعر الام اللي ربت مثل مشاعر الام اللي ولدت , ما تختلف في أي شكل ,
كان شكله مرهق اليومين ذي عطته شكل اكبر من عمره مع ازدياد شعرات الشيب , ودقنه اللي مستوي اثقل من الديرتي شوي ,
كان حاط شماغه على كتفه , ولمحها وعلى طول حب راسها وقعد بجنبها يسئلها عن اخبارها ,
رجعت نينا وبصوت واطي : مدام عبير تاخذ شاور ,
ام صالح : جهزي لها اكل كويس , من جات لحد الحين ما ذاقت شي ,
سلطان : افاا , وليه يمه ما قلتي لها تاكل .
ام صالح فتحت عيونه بزعل : انا قسيت عليها صح لمصلحتها , ومن بعدها وهي مسكره عليها الغرفه ,
سلطان : يمه انا قلت لك عبير لها وضع خاص وابوها مدلعها من صغرها , ما كان ودي تزعلين عليها
ام صالح : اجل اشوفك تضيع عشانها واسكت , هي كلمه وحده , اذا ما اهتمت عشانك الف وحده تتمناك , وانا عشانها بعد , ما راح تلاقي مثلك والا انا غلطانه ,
سلطان قبل راسها في هدوء : يمه لا تحملينها الغلط بالحالها , وانا بعد مشترك فيه , عن اذنك بشوفها وبننزل نتغدى معك
رمشت ام صالح بعيونها مستغربه من دفاعه , ودعت انه الله يؤلف ما بينهم ,
كان يمشي بسرعه مشتاق يشوفها , قلبه يدف بقووه , كأنه مراهق واول مره يشوف حبيبته ,
فتح غرفتها , وانصدم انها مظلمه , وما فيها أي حياه ,
رجع لغرفته , وبخوف دخل بصمت , شاف سريره مو مرتب , ولمح صورتها والكتاب عند طرف السرير , خذ نفس , عرف انها كشفته ,
كمل خطواته يبحث عنها , ودخل غرفة الملابس ,ولما شافها بالوسط , تجفف شعرها ,
وقف مثل الصنم , ما عرف وش يسوي ,
كانت ملتفه بفوطه كبيره , وجالسه عند تسريحته اللي بالوسط وظهرها للباب ,
كانت تخصل شعرها بيدها وتجففه برواق , طالعت المرايه وشافته وراء ظهرها ,
تبنجت يدها , ونزلت المجفف , وتحركت تضم نفسها بيدها بهدوء وهمست : وصلت
نظرته لها تحمل شوق طاغي , وعتب قوي , ونظره محزنه خايف يفقدها , نظرته اللي احتارت تعبر عنها , نظره يتيمه , تدور احد يحن عليها ,
سلطان يحرك شعره بيده : اسمحي لي ماكنت عارف انك هنا ,
سكرت شفايفها بقوه في حركه متوتره , وتحركت تبي تروح لغرفتها ,
اول ما وصلت عنده وعيونها بالارض سحب يدها اللي تضم خصرها ,
وهمس : اشوفك ترتاحين بالغرفه هاذي , ماعندي مانع نتبادل , طالعته بنظره اخرست كل صوت في قلبه يبني به حواجز جديده وتكلمت : غرفتي مريحه ,مو عارفه ليه نمت هنا , اكيد كنت تعبانه ,
تحركت وسد طريقها بحركه لا اردايه : تقصدين ما يعني لك المكان أي شي ,
نزلت عيونها في الارض وبخجل : عن اذنك ابي ابدل , ما قدر يمنع نفسه منها وهي تمثل في نظره اساسيات الشوق والوله والحب واللهفه , فحضنها بطريقه مفاجئه ودفن وجهه في عنقها
وبصوت خافت : عبير انا بدونك ولا شي ,
كانت بين يديه بااارده على شوقها اللي يغلي وبتردد : انا رجعت لسبب واحد , مابي افقدك
واعتقد انها فرصه لنا نفهم بعض اكثر ,
سلطان : اللي يريحك يا بنت مساعد .. شعر ببرودتها , ولف من طريقها وفتح باب الدولاب يظهر له لبس , يبي ياخذ شاور وظهره كان لجهة عبير , وقفت تراقبه في سكون ثم تحركت تبي تاخذ ملابسها من الغرفه الثانيه ,
طلعت لها بنطلون لغينز , معاه فستان قصير من الكريب بلون الفوشيا , رفعت شعرها بتلقائيه على فوق , وحددت شفايفها بزهر غامق , لبست لها فلات مريح , واستعدت انها تنزل عند ام صالح تحت , بعد ما تعطرت بكثافه , وجت بتطلع دخل سلطان غرفتها , شكله مثير في كل حاله , شعره مبلول ولابس ثوب وللحين ما سكر ازراره كأنه مستعجل يلحق عليها ,
لما شافها ارتبك بعفويه وضاعت الحروف وفي لحظه استجمع قوته وناظرها بثقه ضيعت فيها
قوتها اللي تتاظاهر بها , ارتجفت وسرت بردوده في مفاصلها , اذا لمحته تضرب طبول العشق في قلبها , وخذت نفس عميق لما شافته يقرب منها اكثر , من لحظات كاد عناقه السريع يقضى على اخر معاقل الكبرياء , ناظرته بثقه كأنها تسئله وش فيه ,
رجعت يدها وراء ظهرها في حركه عفويه لاحظها دايم تسويها ,
وقرب منها اكثر وناظر عيونها في شوق : عبير ,,
اسمها بين شفايفه له طريقه ثانيه , حبت اسمها اذا ناداها , رمشت بتوتر وهمست : نعم
قرب اكثر وسحب يدها اللي وراء ظهرها وجمعهم مع بعض في قبضه يده , وخذ نفس عميق وتكلم : انا ما اطلب منك ترجعين وتعامليني مثل ما ابي بذا السرعه , حنا فاهمين وواعين لكل شي , احنا لو بعيد عن العالم , ما راح اضغط عليك في أي شي لكن بوجود اهلنا , لازم نكون اكبر من كذا ونتحمل مسؤليتنا , ابوك وامك يهموني كثير , وفي المقابل بعد ام صالح ابيك تهتمين بها , انتي مو ملزومه صح بها لكن عشاني ,
عبير بضيق : انا ما قصرت فيها , وبالعكس حبيتها , مع اني المفروض تكون لي حريتي الشخصيه ,
سلطان يضغط على يدها اكثر : كل الحق معك بس هاذي في مقام امي , وعارف انها تقسي عليك , بس تأكدي انها بعد تحبك ,
عبير : ابشر ولا يهمك , شعر ببروده في صدره من ردها خذها وباس جبينها وبحب : مقدر لك كل اللي تسوينه , انفلتت بسهوله وبخجل : انا بنزل عندها لين تجي ,
طلعت وتركته لاول مره ينرسم في قلبه شعور بالارتياح , خذ نفس عميق وشم عطرها , وفي لحظات رجع المشط وفرشاة شعرها للتسريحه , ونزل بفرح للمجلس يبي يملى عينه من شوفتها
نزلت عبير ببطئ بعد نصايح امها لها , لا تمشين بسرعه ولا توقفين , ولا تشيلين شي ثقيل ,
دخلت وشافت ام صالح ماسكه المسبحه وجالسه بطمأنينه , تقدمت منها وحبت راسها ,
ام صالح : نينا نيييييييييييييينا ,
عبير : بغيتي شي ياخالتي ,
ام صالح : وشو اللي ما بغيت , انتي تدرين انك ما كلتي شي من امس وخزياااه بس الحين امك اذا شافتك بتزعل علي اللي ما غذيتك كويس ,
عبير : خالتي لا تقولين كذا , انا منسده نفسي من الاكل , بس لا تفكرين الحين باكل معك وبتغذى زين ,
ام صالح بتريقه : اكيد الحين بتاكلين شفتي ابو الشباب , انفتحت نفسك , بس قولي امين ,
عبير بهمس : امين
ام صالح رفعت يدها تطلب : الله يؤلف ما بينكم ويبعد عنكم عيال الحرام يا رب,
عبير بخجل امين ,
دخل سلطاان وتكلم بصوت عالي : اااامين , ضحكت ام صالح : أي هذا اليوم المبارك اللي رجعت فيه لبيتك ,
سلطان : الله لا يحرمني منكم , وتعمد يجلس بجنب عبير ويقرب منها اكثر , مد يديه على الكنبه وراء ظهرها , وصار يحرك اصابعه على كتفها بعفويه منه لكن حركاته كانت تضرب على احاسيس واشواق عبير اللي محتاجه له هالمره اكثر من كل مره ,
حاولت تتحرك شوي منحرجه من ام صالح وجت بتقوم تسئل عن الغداء ,
طلعت من المجلس وشافته وراء ظهرها يمسك يدها : ليه متوتره ,
عبير : لا بس حبيتهم يحطون الغداء ,
غمز لها سلطان : عبير ترى انتي شفافه لي , اعرفك زين , انا حبيت اتعامل عند ام صالح عادي , عشان ترتاح نفسياً , اتمنى اني ما ضايقتك ,
عبير بوضوح : لا عادي بالعكس انا حابه الوساوس اللي براسها تروح , استئذنت منه وتحركت للمطبخ وهو مازال يناظر خيالها اللي لازمه وخدر مشاعره بوجودها ,

18 - 1 - 2015, 11:44 PM

كانت الغرفه تسبح في الظلام والهدوء التام , حرك يديه يبي الجوال , وشاف الساعه تأشر على الساعه اثنى عشر , تنهد بقووه وشاف الوقت راح من يده ولسى ما سوى شي , تمنى انه يصحى بدري قبل تقوم ربى ويتأملها وهي نايمه , تحرك وخذ الملحف من جسمه , وفتح النور المضيء على ناحيته , وبتردد التفت على الكنبه يبي يشوف ربى حصل مكانها خالي ,
خذ شاور ولبس رياضه , ونزل يشوف وين اختفوا , مالهم صوت ,
سئل الشغاله وقالت له انهم في بيت الجيران , شافها فرصه يكلم ريما وعلى طول دق عليها
لما شافت ريما الرقم على طول : هلا والله منصور كيفك اليوم وش الاخبار و
منصور : بالراحه كل اسئلتك مره وحده شكلك تبين االفكه
ريما بضحكه تريقه : تقدر تقول عندي بحث ولازم اخلصه
منصور : زين ريوووم بسئلك سؤال بس اوعديني يكون يننا بس
خافت انه يسئلها عن ربى وهي ما تقدر تساعده بشي لأن ربى تحيط نفسها بسياج جدا قوي ومستحيل أي احد يقتحمه ,,
ريما بتردد : ابشر اذا اقدر افيدك ,
منصور : تعرفين صديقي فواز
ريما دق قلبها بسرعه وبتوتر : وشفيه
منصور بهدوء : يبي يخطبك وسكت يبي يشوف وش ردة فعلها
صخت ريما من المفاجأه وسكتت ما قدرت ترد عليها
وبضحك كمل منصور : يقولون الصمت علامة الرضا
ريما : لا ما قصدت انا قصدي اني تفاجئت
منصور : شوفي ريووم اني ما اقدر اعرف انتي وش تفكرين فيه بتسمعين نصيحتي ما راح اصفط لك احد احسن من فواز , مو عشان صديقي لا مع الكل هو راعي فزعه ويعتمد عليه وصلاته قويه , اكيد الانسان مو كامل لكن فكري زين وردي علي ترى الرجال محترق يبي يعرف ردك
ريما بابتسامه خجوله : طيب ....
سكر من ريما وكلم فواز عطاه العلوم , وتواعد معه على المساء , خذ الأبريق يصب لنفسه الشاي , وشاف امه والبنات داخلين ,
كانت عينه تراقب ربى بس , كأنها عالم لحالها , رفعت الطرحه وفتحت شعرها ترتبه , كانت ترجع غرتها على فوق مع شعرها بأنسيابيه , سلم على امه وقعد على الكنبه مره ثانيه , ترددت ربى هل تقعد معهم والا تطلع فوق للغرفه , لكن خالتها قررت قبلها : ربى تعالي بجنبي هنا , جت بتقعد وتكلمت خالتها : نزلي عبايتك وراك لابستها ,
ربى : خالتي انا لابسه ضيق وممكن سلمان يدخل ,
ام محمد : وين سلمان يا قلبي من البارح سافر الشرقيه مع ربعه يبون الشاليهات
منصور : ماعندي خبر . صحيح سافر ,
ام محمد : الله يحفظهم ان شالله تعرف الشباب ,
قامت ربى وفصخت عبايتها تحت الحاح خالتها مره ثانيه , وعيون منصور تلتهم كل زوايه فيها , حست بحراره من نظراته اللي شعرت فيها اعجاب قوي , وصبت لخالتها شاي ,
مد منصور كاسة الشاي لها وهمس : ابي ثاني ,
طالعتها ربى بحرج , نظراته لها مغزى وهي عارفه انه يبي يقتحم خصوصياتها بروواق و يبي له نفس طوويل عشان تجاريه , وهي ماعندها مانع لكن خوفها من ضعفها سبب لها رعب نفسي , نظراته ما قدرت عليها والحين بدى يتكلم برموز واضحه , خافت انه يتحول لفعل , تذكرت وعده لها البارح واسترخت وهي تمد له البياله وصوته : جنان , طالعته وكمل : اقصد الشاهي ,
قامت منحرجه وجت تطلع من المجلس تشوف العنود والتفتت لخالتها اللي تنادي عليها :ربى وش رايك نروح الاستراحه نقعد فيها يومين نغير جو ,
ناظرت ربى منصور , وشافته يحرك السكر بضحكه خبيثه ويغمز لها بضحك : انا ماعندي مانع , اعتذر من فواز ونطع العصر اذا تبون ,
هزت ربى كتفها : اللي تشوفونه ,,

رجع الاتصال يتكرر وهو في مقر الشركه , وفي فترة البريك , اتصل عليها وبصوت كله تهديد : انا سبق وقلت لك لا تتصلين ,
.... راكان طلبتك بس عندي شي مهم ابي اوصله لك ,
راكان : شي , وشو بيطلع يعني ,
...... : نسيت الصور اللي في المزرعه وبعد فيه شي مهم لازم تعرفه ما ينفع بالتليفون ,
انا بنزل الرياض عشان نتقابل , واقولك على كل شي ,
راكان : لا تنزلين ولا شي انا في جده عندي شغل , تعالي في المقهى اللي اشوفك فيه , واذا تاخرتي عن الساعه اربع , ما راح انتظرك دقيقه وحده ,
سكر وضاق منها , خاف ان الصور توصل لنايفه بأي طريقه وتتخرب حياتهم , ما توقع ان البنت لئيمه , وغيرتها عمتها انها تشوف الطريق الصح , مع انها صور عاديه لكن وجود البنت معه فيها راح يترك علامة استفاهم عندها ,
حب انه يعطيها مبلغ ويسكتها , عشان يفتك من وجهها ,
ما توقعت البنت انها راح تشوفه بذا السرعه كانت راسمه لها خطه على مدى ايام لكن هالحين لازم تستغل كل دقيقه لحد العصر ,
قامت بأتصالاتها على بيت اهله , وقدرت تستغل الشغاله وكلمتها بالانجليزي انها من طرف شركة شحن , وتبي توصل لبيته طرد من اوربا , بعد ما عطتها رقم البيت ,
كلمت وسمعت صوت نايفه وقالت لها انها غلطانه بالعنوان , ما باقي عليها الا انها تضبط حبكة الموقف مع راكان , هي غاسله يدها انه يرجع لها , لكن مثل ما خربت حياتها وانفصلت من زوجها عشانه لازم بعد تخرب حياته بأي طريقه ,,
غيرت في خطتها شوي وفكرت انها لازم ترسمها مضبوط عشان تقضي عليهم ,

19 - 1 - 2015, 10:09 PM

(( الجزء الرابع والعشرين ))

في عصر ذلك اليوم كان للجميع مشاعر جديده , منصور يحاول قدر المستطاع انه يحسس ربى انها بأمان , سلطان شعوره اليوم غير , فرح بشوفة عبير وخوف من عنادها انه يخرب عليهم لحظه جديده .
نايفه الهدوء ما قبل العاصفه , عبير مشاعرها اليوم كأنها مولوده من جديد برجوع سلطان ,,
وربى القلب الحنون , راح تخفي مشاعرها عن منصور لحين ,
لكن راكان اليوم لن ينسى له وحادثه ستحفر الرعب في قلبه حتى اشعار اخر ,

دخلت ربى باب الاستراحه ونزلت عبايتها على الكنبه , سمعت صوت خالتها تناديها في المطبخ ,
ام محمد : ربى حبيبتي شوفي العنود دخلت الغرفه وما جت ابيها تزين القهوه
ربى : خالتي , شدعوا انا بصلحها ,,
ام محمد : ما ابي اتعبك , حنا جينا هنا نبيك تغيرين جو من كل شي , انا بزين القهوة بس شوفي منصور يمكن يبي شي ,
طلعت ربى تشوف المكان , وشافت المدخل اللي يودي للغرف , كانت اول غرفه على يمينها مفتوح بابها طلت بهدوء شافت منصور قاعد على طرف السرير ,
وقفت عند الباب وتكملت : انت بتقعد هنا
منصور : قصدك حنا بنقعد هنا , هاذي راح تكون غرفتنا , انا شفت الغرف كلها وهاذي انسب وحده ,
ربى : بس هاذي ما فيها كنب , والارض مافيها سجاد , بشوف الغرف ثاني وطلعت لكن منصور تكلم : تعالي كل الغرف ما فيها كنب , وبعدين انتي ليه خايفه مني انا قلت لك ما راح اضايقك , لا تحسسيني عادي اني مجرم ,
رمشت ربى بهدوء / ما قصدت كذا بس انا ابي يكون لي خصوصيه شوي لا اكثر ,
منصور : انا ما راح ادخل الغرفه الا وقت النوم , ريحي بالك ,
سكتت بهدوء وخافت انها ضايقته من ردة فعلها ,
صوت ام محمد تنادي عليه عشان القهوة ,, فقام منصور من السرير , وتحرك يبي يمسك العصا , طاحت من يده على الارض , وبعفويه نزلت ربى خذتها , وجابتها , مدتها له ومسك يدها متعمد وضغط عليها بقوه وبهمس : فديتك .

تمددت عبير , في سريرها العصر , الضعف اللي في جسمها مزعجها ,تحسست بطنها ,
تمنت انها ما سقطت , كان ممكن يكون فيه شي يقرب بينها وبين سلطان , عجزت تفهم مشاعرها , تحبه بجنون , بس غموضه يرددها انها تدخل عالمه وتجبره انه يعترف لها بمشاعره ,سمعت صوت طق خفيف على الباب ,
عبير :نعم
انفتح الباب وشافت سلطان واقف يطالعها بشوق : ممكن ادخل ,
ارفعت جسمها من المخده تبي تقعد : تفضل ,
قاطعها سلطان : لا تتعبين نفسك , وظلت مكانها , ومشى سلطان لحد ما وقف على طرف السرير ,
وكمل كلامه : متأكده انك تأكلين علاجك زين ,
عبير : اكيد .
سلطان : باين عليك الضعف وجهك شاحب مره ,
عبير بخجل : اكيد , من بعد العمليه ما كلت زين , بس ان شالله تتحسن الامور
سلطان : كلمني مدير الشركه بأمريكا , وقررت اسافر مره ثانيه
فتحت عبير عيونها بأندهاش : وليه ما يرسل مندوبهم , حاولت انها تقول أي شي بس انها تثنيه عن فكرة السفر ,
سلطان : عرضت عليه يجي ويشوف الشركه بس , رفض وحاب اننا نوقع معاهم في
في بلدهم
عبير تنهدت وكمل : وبالمره ترتاحين الفتره ذي ,
شبكت عبير يدينها في بعض تبي تستجمع قوتها ما صدقت انه يرجع عشان تبتدي معه صفحه جديده , لكنه راح يتركها ويسافر , وراح تدور في حلقة غموضه وتعابيره الغامضه ,
مثل ما دخل بلطف , تركها بهدوء تام , تغالب مشاعرها الحزينه , شعورها بدى يطغى على كل كيانها وواضح للي يبي يشوفه, انها عاشقته حتى الثماله , تمنت لو ظروفها احسن من كذا انها تسافر معه ,

بعد صلاة العصر في فيلا راكان , كانت ام نايفه جالسه تنتظر بنتها عشان يطلعون لأم راكان في بيتها ويتعشون معها ,
كلم الحارس , الفيلا وقال لنايفه انه فيه واحد من طرف شركة شحن معه شحنه بريديه لراكان من اوربا فيها اوراق مهمه ولازم تستلمها بنفسها ,
استغربت نايفه من الموضوع , لأن راكان ما قد تكلم عن شغل الشركه , قالت له يأخذ الشحنه ,ولما وصلتها لقت ظرف كبير مفتوح , فتحت طرفه لقت ورقه ومظروف مسكر , سحبت الورقه تبي تعرف من أي شركه عشان تقول لراكان ,
انصدمت بالكلام اللي في الورقه , حست بنار تسري في مفاصلها وعيونها تحرقها من الخوف ,
جمله بسيطه مكتوبها بخط يد ( في داخل المظروف كل شي , وعشان تتأكدين راح يوصلك اتصال يؤكد وجود زوجك معاها , كوني متواجده عند التليفون )
بدون وعي فتحت المظروف الثاني , وانصعقت من قوة الصدمه , راكان معاهبنت , ومصور معها في كذا صوره وهو حاضنها بيده وراء كتفها ,
ارتجفت بقووه وامها تسئلها وش الاوراق , ردت عليها نايفه بأرتباك واستئذنت تودي الأوراق فوق ,
فتحت الظرف وشافت الصور , معقوله راكان راعي ذي السوالف , معقول ومتى , انا معه طول الوقت , الصدمه قضت على تفكيرها , ومو عارفه كيف تتصرف , انتظرت عند التليفون , واعصابها متوتره , ممكن تكون ذي الصور قديمه . بس معقول راكان معها الحين , تشتت تفكيرها وصارت تحسب كل ثانيه .
وصلت البنت للمقهى قبل راكان بشوي , وكلمت واحد من خوياها اللي خدمها ونزل بالمظروف بنفسه , عشان يتم كل شي قبل ما تشوف راكان ,
جاها اتصاله وهو يضحك : كل شي تمام , متى الخطوه الثانيه ,
.....: دقايق ويكون هنا , اذا جاء برسل لك مسج طيب ,
بعد دقايق شافت راكان وجت عنده ,
كانت مشتاقه له حييل على المصيبه اللي راح تضربها على راسه , جت تبي تاخذ منه بوسه لكن راكان مد يدها يمنعها : انتي عارفه اني بطلت الحركات ذي ,
قعد على الكرسي وبوضوح : شوفي ترى لا تحاولين تسوين لي فيها حركه , انا وعدتك ارسل لك مبلغ اذا انتي محتاجه لكن شكلك تبين تبتزيني بالصور اللي معك ,
::: : راكان معقوله انا تطلع مني ذي الحركات , اجل شلون حبيتني ,
راكان : وين الصور ؟
وفي نفس الوقت ارسلت مسج للولد اللي معها , وكملت , المشكله مو كذا , تدري ان صديقتي نسختها وعطتها خويك اللي كان في المزرعه , وهو يهددني , انه بيفضحني عند اهلي اذا ما طلعت معه , وفي الاثناء ذي جاها اتصال وتكلمت : شفت هذا هو كل شوي يكلمني ويهددني ,
رفعت الخط بعد ما حطته على السبيكر : الوووووو
::::: هلا يا حلووو , وينك فيه ,, للحين ما شفتي راكان ,
::::: االا انا معه هالحين تبي تكلمه , لحظه بس , ومدت الجوال وعطته راكان يكلمه عشان يخلص الموضوع ,
:::::: هلا والله براكان , من طول الغيبات جاب الغنايم , بذا السرعه نزلت عشانها ,
راكان من دون نفس : انت للحين في دجتك ,
وبسرعه رد عليه الولد : وانت للحين تشوف حبيبتك انا بضيع في دجتي ,, وقطع الخط من عند نايفه عشان ما تسمع باقي المحادثه , سكر الخط من عندها بعد ما اتصل وقال لها تسمع كل شي عشان تتأكد ان راكان في جده مع حبيبته ,
كانت شبه منهاره وهي تسمع صوت البنت اللي تظهره بكل انوثه , ولما سمعت راكان يحكي , خلاص انهارت مقاومتها , اتصلت عليه وعيونها كلها ضباب من الدموع
مره مرتين ما رد عليها , قفلت جوالها ودخلت تاخذ شاور عشان ما تحس امها بشي ,
ما تدري وش تحس به , مصيبه كبيره راح تقضي عليها اذا ما تصرفت بحكمه ,
حاولت انها تكون قويه بأي طريقه , واذا وصل راكان راح تواجهه بكل شي . صدمتها فيه مسحت من بالها كل اللي راح معاه من ذكريات حلوه وصارت في عينها اشباح من الماضي ,
نزلت وطلعت مع امها لبيت ام راكان وفي السياره
ام نايفه : وش فيك صاير شي منتي على بعضك
نايفه : اتصل راكان ومو عاجبه شغل الشركه هناك وضاق صدري عشانه
ام نايفه : الله يساعده ان شالله تزين يا قليبي تزين ,
تنهدت من الكتمه اللي طبقت على صدرها , وشافت ان الوقت مثل وقف في الساعه ورفض يتحرك , ويلم جروحها , او يطمنها ويأكد لها انها من الماضي ,
وصلت بيت خالتها ونزلت من غير نفس , الصباح تكلم معها راكان وقال لها بيجي بالليل ,
يا ترى وش راح تكون ليلتهم , فراق والا انهيار , والا وش مخبي لها الليل , كل شوي تتنهد والكل ملاحظ تغير فيها لكنهم كان يهمسون انه اول مره يسافر راكان ويتركها ,
بعد المغرب كان راكان جالس في غرفته في الفندق واعصابه متوتره بعد ما هزئ البنت وخذ الصور وهو يهددها اذا رجعت تتصل عليه هو اللي بيرسل الصور حق ابوها عشان تتوب انها تهدده مره ثانيه , تكلم مع خويهم الاولي وقال له ماله شغل في مشاكلهم , ما كان متطمن على الوضع , السالفه فيها شي , البنت كانت رايقه , ومو خايفه مثل ما تقول ,
كلم نايفه اكثر من مره بس جوالها مسكر , ولما اتصل على امه , ردت عليه وقالت نايفه دخلت تصلي العشاء , زعل عليها , لانها مسكره الجوال وهو مشتاق يسمع صوتها ,
خذ الصور وحرقها في مغسلة دورة المياه , وتخلص منها , وظب شنطته وطلع للمطار وهو ما يعرف أي شي عن الصاعقه اللي بتواجهه ,
بعد ما رجعت نايفه , قعدت مع امها تحت ولما جاء وقت نوم امها استئذنت منها وطلعت فوق ,
قررت تضرب على الحديد وهو حامي , لازم يعرف راكان كل شي وانها عرفت بكل شي ,
خذت المظروف , وحطته على الطاوله , ما قدرت تبدل ملابسها من التوتر ,
انتظرت على الكنبه وشافت جوالها يولع بأسمه , ما قدرت ترفع الخط , فيه شي اكبر من انها تبادله كلمات الترحيب ,
لازم تشوفه وتحكي معه بكل شي ,
انتظرت ساعه كامله وفي منتصف الليل سمعت خطوات رجله تقرب من الباب ,
اعصابه تلفانه من تجاهل نايفه لأتصاله , وش صاير فيها , دخل الغرفه وشافها قاعده على الكنبه بشموخ اقوى من كل مره , وبهدوء : نايفه ,
قامت من مكانها وقالت بثقه : الحمدلله على السلامه , انبسطت معها
راكان بأرتباك : منهي , انتي وش تحكين عنه
نايفه بدون تردد : اللي انت نازل عشانها جده ,
راكان : انتي وش قاعده تخربطين , مب صاحيه , انا نازل لجده عشان وحده!!! وانتي عارفه عشان الشغل ,
نايفه : أي نايفه بزر أي كذبه بتمشي عليها ,
راكان بصوت اعلى : ورب البيت اذا ما كلمتني زين تشوفين شي ما يرضيك
نايفه بحزن : وفيها شي ما يرضيني . انا شفت اللي ما يرضيني خلاص , مالعبتها صح يا راكان , حاولت تقنعني انها من الماضي وتمثل علي وتكلمها عندي انها ما تعني لك أي شي
وانت لو صادق في كلامك كان خذت لك رقم ما فيه احد يعرفه من بنات الحسن والجمال ,
راكان : لاااااا انتي زودتيها عاااد , الشك ملى قلبك لين اعمى عيونك عن الصدق اللي قلته لك
نايفه : الشك !!!
رفعت المظروف وفتحته وشافها تطلع الصور وترميها على الطاوله ,شاف راكان الصور بروع دف قلبه بسرعه وهو يمسك الصور وتكلم : من اللي جاب ذي الصور
نايفه : اسئل نفسك , وش يعرفني من اللي جابها ,
راكان : تكلمي عدل !
نايفه : ليش ما رديت على اتصالي العصر ؟؟
ارتبك راكان وكملت نايفه : عشان كنت معها ,
راكان قطع عليها وكمل : مب صحيح الكلام ذا , انتي ما تعرفين السالفه اصلا ,
نايفه : اللي اعرفه اني سمعتك وانت تتكلم معها وسمعت كل شي من انت للحين ضايع في دجتك , والا بتقول انه واحد ثاني
وبصوت عالي تكلم راكان : ياعيال .... والله انهم يبون يخربون بيتي ,
نايفه بصدمه : انت اللي خربته بنفسك , وكان تقدر انك تمنع اشياء كثيره . لكن حبك لها منعك من تصحيح الغلط كله .
راكان : نايفه ورب البيت السالفه مو مثل انتي فاهمتها ,
نايفه : يعني اكذب عيوني وسمعي واصدق تبريرك , ما اعتقد ان فيه شي نحكي فيه ,
تحركت تطلع من الغرفه وقطع عليها راكان الطريق : وين رايحه
تكلمت نايفه : بروح انام عند امي وفي الصباح بروح معها ,
راكان : اذا طلعتي من البيت لا تفكرين برجعك ثاني له ,
طالعته نايفه بأحتقار , يغلط عليها ويهددها , هذا اللي قالوا يقتل القتيل ويمشي بجنازته ,
نايفه ناظرته بحزن وطلعت من الغرفه ما تقدر ترد عليه بأي شي ,
راكان قعد على الكنبه وتوتر من الزعل , لعبوها صح وقدروا يخربون عليه ,
دخلت جنب امها في السرير , لما حست بها امها تكلمت بهدوء : وصل راكان والا بعد
ردت نايفه : تأخر لبكره , نامي يمه ,
كانت ترتجف من البكاء بصمت عشان ما تزعج امها ,, لكن امها كانت حاسه بكل شي وتوقعته شوق لزوجها اللي اول مره يبعد عنها ,,

19 - 1 - 2015, 10:11 PM

قبل كذا في الاستراحه , كان الجميع يتعشون في الحديقه الصغيره وبعد ما قربت السهره على الاخر قامت العنود ومنصور يتمشون على اطراف الحديقه , وربى تراقبهم بهدوء بعد ما نامت خالتها ,
قربت منها العنود وبصوت ضحك : ربى تذكرين لما نتسابق ,
ربى بضحك : اكيييد .
العنود : تقهريني كل مره تغلبيني ,,
ربى بضحكه خجوله : بس انتي ترسمين احلى مني , وكنتي تشاركين في مسابقات الانشاد وتفوزين بالمركز الاول ,
العنود : يعني تبين تبردين علي
ربى : مو كذا بس اذكرك ,
العنود مسكت يد ربى : تكفين قومي نتسابق شوي ,
توترت ربى من عرض العنود : الحين بذا الليل , لا لا , ارتجفت وخافت ارتباكها يكشفها ,
منصور عيونه عليها , ناظرته بهدوء وشافت نظرته الفضوليه ,

قطع عليهم بكلامه : يالله تعالوا داخل عشان ننام , تحركنا وشعرت انه انقذني برده ,
دخلنا الغرفه , وكملت العنود طريقها وفي اخر الممر وقفتني وقالت: ربى وش رايك تنامين عندي الليله ,
طالعت منصور ابي اشوف ردة فعله , وحبيت اقول أي شي ابي اروح معها
لكن منصور تكلم : وتتركني عشانك , خير ان شالله وش صار في الدنيا
العنود : ول ول ما قلت شي ,
كملت ودخلت وراه والتفت لي : تبين امي تسوي منها قضيه اذا نمتي عند العنود
ربى : ما تستاهل القضيه , انا فكرت ان العنود يمكن تبي تسهر وتبي احد يسولف معها
منصور : انتي عشان العنود ووالا خايفه مني , خلاص ولا يهمك بروح انام في الصاله ,
كان منصور متعمد يقول لها كذا عشان يأنبها ضميرها وفعلا , تكلمت ربى : انت من جدك
انت كذا بتخلي خالتي تسوي قضيه فعلاً , انا بدخل ابدل ,
تركته في وسط الغرفه الصغيره , وخذت ملابسها ودخلت تبدل , انتظرها على طرف السرير ,
وفي فمه ابتسامه انه قدر يضغط عليها شوي , ومن ذا المدخل راح يستأثر بقلبها ,
انتظرها بتلهف كأنه راح يشوفها اول مره , طول اليوم وهم مع اهلهم , لكن الحين راح يكونون بالحالهم ,
طلعت ورفعت شعرها بيدها في حركه متوتره , ما طالعته , جت تفتح الدولاب تعلق ملابسها ,
بيجامتها القطن مضفيه عليها شكل مغري , وقفت مواجهته , وكلمها : ممكن تساعديني , ابي تطلعين ملابسي من الشنطه , توترت ربى , اول مره يطلب منها شي خاص ,
ما عرفت وشلون ترد وبهمس : مب عارفه وش اطلع لك ,
منصور بصوت خافت : بيجاما ,
مشت تشوف ملابسه للحين بالشنطه , وارتجفت وهي تفتحها , قدرت تطلعها بسهوله ,
ومدتها له بيد مرتبكه ,
انسحبت في هدوء وسط نظراته اللي تزيد في كل مره , ودخلت في فراشها تبي تنام قبل يجي ,
غمضت عيونها تحاول تستجدي النوم يغزي عيونها لكن قلبها رفض رجاءها , وترقب روحه يبي يحس بوجوده
غمضت عيونها ونامت على ظهرها , وطالعت للسقف وهي لسى مغمضه , قدرت انها
تتنفس بشكل طبيعي , حست بدخوله للسرير , وهدوئه انه ما يزعجها , حست بالظلام ينتشر في الغرفه , وكملت تمثيلها , وحاولت تركز على انفاس منصور متى بتهدأ وتدخل في جو النوم ,
سمعت منصور يكلمها بصوت خافت : ربى
ما قدرت ترد عليه , كملت تمثيلها , وسمعته يواصل : وجودك جنبي يعطيني دفعه قويه اني
ممكن ارضيك في يوم من الايام ,
سكتت ربى وانتظرته يقول أي شي زياده لكن ,انتظام انفاسه كان نهاية حديثهم ,
مو عارفه كم كانت الساعه حست بشي ثقيل على كتفها , التفتت شافت راكان يميل على كتفها ويده على بطنها , زمت شفايفها بتوتر ,, تبي تتحرر لكن ما تقدر الا انها تصحيه , كانت على اخر طرف السرير وهو بجنبها وتارك المساحه كلها , شعوره انها بجنبه , حسسه بالامان , ما كان في وعيه ابد , تحرك في وسط الليل , ولما شافها نايمه بجنبه ما قدر يملك نفسه انه يشعر بدفئها , وتحرك بدون ما يزعجها ودفن راسه بكتفها ,
تسارعت دقات قلبها واذنها تتسمع لكل همسه , لكن لما تأكدت انه فعلا نايم , رجعت تكمل نومها بهدوء ,

19 - 1 - 2015, 10:13 PM

على طاولة الطعام , توزع الفطور بشكل شهي , كانت تعليمات ام صالح صارمه , تبي تغذي عبير بأي طريقه ,
وصل سلطان , وشاف ام صالح قاعده ,قبل جبينها , وسئلها عن احوالها ,
وبعد فتره كلمها : يمه انا بسافر بكره لندن , وبعده على امريكا ,
ام صالح : وشو , ليش يا ولدي ,
سلطان : انا عندي شغل , ومحد راح يخلصه الا انا , بس طلبتك يمه , انتبهي على عبير ,
مو عاجبني حالها ,
ام صالح : ابشر وانا امك , عبير في عيوني , انتبهوا لصوت عبير كانت واقفه عند الباب ,
دخلت وتكلمت بهدوء : صباح الخير , باست جبين ام صالح , وعيون سلطان عليها ,
قعدت لمحت عيون سلطان , ونزلت عيونها في الصحن لما شافت نظرته المتعبه ,
سلطان بمرح : انا بروح المكتب اخذ اوراقي , بكره الصباح رحلتي , وبالمره ابي اشوف ابو الجوهره ,
ام صالح : ليش ما نسوي عشاء لهم ويزورنا هنا , عشان عبير ما تقدر تطلع وتدخل عادي ,
طالعها سلطان يبي يشوف ردة فعلها وكمل لما شافها ساكته : خلاص انا بمر ابو الجوهره في المكتب , وبعزمه , قام لما شاف عبير للحين ساكته , واستأذن منهم ,
ماكان لها نفس تأكل شي لما عرفت انه راح يسافر , اصرت عليها ام صالح تأكل من كل شوي حبه , وبالغصب قدرت تخلص ربع الصحن ,
بعد ما طلع للمكتب , استئذنت من خالتها ام صالح , ودخلت غرفته , لأول مره ما تبي نينا تجهز شي , من اغراضه , برغم ضعفها , قدرت تطلع الشنط وجهزت ملابسه , قدرت تخلص كل شي في ساعتين , بس على اخر شي كان الضعف سيطر عليها ودوخها ,
تمددت على السرير بدون ما تتلحف , ومدت جسمها تبي تحس ان الهواء يكفي رئتها ,
غمضت وراحت في نوم عميق ,
بعد ما رجع من شغله دخل غرفته , وتفاجئ انها نايمه , تقلصت مشاعرها وانقبضت ,
هل وجودها هنا في غيابه يعني لها شي , الأمر صار يتكرر ومستحيل تكون كل مره صدفه ,
جاء بهدوء ووقف عند راسها , تأملها وملى عينه منها , مسح خدها بحنان , وفتحت عيونها بثقل , لمحته وغمضتها ثاني ,
قامت واتكت على يدها لكن سلطان مسكها وساعدها تسترخي ,
سلطان : اليوم تأكدت ان الغرفه ذي او صاحبها تعني لك شي ,
عبير ارتبكت من مباغتته : اكيد تعني لي شي , حبيت اجهز شنطتك , وحسيت برغبه في النوم ,
انتبه سلطان لكلامها , والتفت للجهه الثانيه , لقى شنطتين على الارض , وكامله التجهيز ,
سلطان : انتي بالحالك جهزتيها , نينا تقدر تجهزها , ليه تتعبين نفسك ,
تضايقت عبير من ردة فعله يعني كان ممكن يشكرها ويسمعها كلمه حلووه , ردت عليه : بس انا كنت فاضيه وماعندي شي ,
قامت تبي تنزل من السرير بس سلطان تكلم : ارتاحي انا عندي شغل بالمكتب , بدخل اجهز اوراقي ,
عبير : مافي داعي , وقفت تبي تطلع من الغرفه سمعت سلطان : الوالد راح يتعشى معنا
رجعت عبير وشافته : صحيح , خلاص انا بنزل عند خالتي , تحت عن اذنك ,

19 - 1 - 2015, 10:14 PM

ما غمضت عينها ابد طول الليل وهي تكتم شهقتها , لما طلعت الشمس , وشافت امها قاعده في مصلاها , جت عندها وبحزن تكلمت : يمه
كانت ام نايفه تقرأ في المصحف . سكرته وطالعت في بنتها وقالت : يا عمري
نايفه بوضوح : يمه في موضوع بيني وبين راكان وصارت لي معه مشكله , وبروح معك للبيت
ام نايفه : موضوع , وبروع نايفه وش فيك يا بنتي انتي ماغمضتي البارح , وانا راح فكري بعيد , وش صاير يا قلبي
نايفه بتردد : يمه موضوع ما اقدر احكي فيه امشي لبيتنا , وبعلمك ,
قامت ام نايفه بزعل : وتتركين بيتك , وش هالكلام ,, لا لا , ما يصير , حلي مشاكلك في بيتك ,
نايفه : يمه لاتزيدينها علي المشكله ما راح تنحل والا تبين انذل له ,
ام نايفه : يا بنت هذا مو كلام يا قلبي,,
وطلعت تبي تشوف راكان ,
لحقتها نايفه ومسكتها عند مدخل المجلس , وراكان نازل من الدرج وبصوت هادي تكلمت ام نايفه : راكان وش المشكله , ليه نايفه تبي تروح معي ,
راكان بزعل : اذا طلعت نايفه من البيت لا تفكر اني راح اجري وراها وارجعها , لو انا غلطان , معليش مالها الا اللي يرضيها لكن انا ماغلطت في أي شي ,
تكلمت نايفه : انت مالك حق تقلب الحقيقه على كيفك , ليه ما تقول لأمي وش المشكله ,
ام نايفه : قولوا لا اله الا الله , كل مشكله ولها حل ,
عصب راكان , وما قدر يملك اعصابه مثل كل مره وكمل : انا قلت اللي عندي عاجبها زين مو عاجبها الباب يوسع جمل , ورجع فوق مره ثانيه ,
طالعت نايفه مكانه , رجعت وخذت عبايتها , وطلعت للسياره برى تنتظر امها ,
راكان ماسك راسه اللي بينفجر , والغضب متمكن منه , من اول ما شاف الصور واللعبه القذره اللي صارت , كان متوقع ان حبه لنايفه واضح وصادق ومستحيل انها تتركه او تصدق أي كذبه عنه , ليه ما فكرت انهم ممكن يسوون أي شي عشان يفرقونهم , ليه تتركه وتروح ,
انا حبيتك من قلبي يا نايفه , معقوله تصدقين فيني ,
طلعت مع امها وسط صدمتها من كلامه , هل هذا هو الوجه الثاني لراكان , هل الحب عنده غرفة نوم وملابس وكلام حلو وبس , بدل ما يوقف بجنبي ويثبت لي ان كل اللي صار كان
كذبه , بدل ما يعطيني شعور الامان يرميني كذا , تنهدت بقووه ومسكت نفسها ما تبي تنهار عند امها ,
قعدت مع خالتها تنتظر العنود ومنصور , لسى ما قاموا من النوم , رجعت لها رغبتها انها ترجع , استئذنت من خالتها وقالت لها بتجيب فاكهه من المطبخ ,
دخلت دورة المياه وصارت ترجع بقووه , غسلت وجهها , وطلعت عيونها محمره , شافت الفاكهه وصارت تحط بالصحن بدون شعور , ومسحت عيونها , مره ثانيه ,
بعد ما جت لخالتها , شافت منصور متكي بجنب امه , حاولت انها تكون طبيعيه ,
ماتبي تذكر سالفة البارح , اكيد كان نايم وبدون ما يحس , نزلت الصحن على الطاوله ,
وتكلمت بخجل : صباح الخير ,
منصور وعيونه بتلتهم كل نظره فيها : صباح الورد يا الورد ,
ام محمد : ما نقدر على دلعكم , لا يكون خربنا عليكم انا والعنود ,
ربى : خالتي الله يسامحك , يمكن لو بروحنا ما نستانس مثل الحين , خالتي انتي تسوين روح في المكان , الله لا يحرمني منك
منصور : ايوووووووووه العبي على امي بكلمه حلووه واسحبيها مني وضحك بتريقه , وغير الموضوع , بسرعه وكمل : يمه
ام محمد : يا دنيتي ,
منصور يطالع ربى : البارح حلمت حلم حلووووو ,
ام محمد بصوت فرح : خير ان شالله ,
رفعت ربى عيونها فيه وهي تشوف جرئته وكمل : خليه بقوله لكم بعدين الحين حدي جوعان , ربى ابي شاهي من يدك ,
قامت ام محمد تشوف العنود وتسمح لهم بخصوصيه , وبدون ما يشعر منصور كمل : وربي انها احلى نومه البارح , من زمان ما ارتحت في رقاد كذا ,
توترت ربى من غزله الصريح , سكتت وسمعت منصور يكمل : ضايقتك بكلامي ,
طالعته بحذر : لا تتوقع مني رد الحين , وقامت تدخل الغرفه , قلبها صار يضعف كل يوم ,ودها تستقر حياتها , لكن لازم يشعرها بالامان الحقيقي وانه يحبها لذاتها مو تكفير ذنوب ,
منصور بأحباط : متى اقدر اكسب ثقتك يا ربى , تنهد بحزن وقام يطلع للحديقه ,
اتصل على ريما يبي يسئلها بعد ما كثر فواز اتصاله ,
وجاه صوتها وبخجل : منصور انت متأكد انه يصلح لي ,
منصور : اللي اشوفه وخوتي معه السنين ذي رجل محترم , يعني وافقي وانتي مغمضه ,
سكتت ريما وسمعت منصور يقول : اجل بأخذ له موعد مع ابوك وبنجي مع بعض ,
طلعت ربى للحديقه , وشافته يتمشى , مشت بخطوات هاديه وجت بجنبه , وتكلمت :
منصور
منصور انقبض قلبه وهو يسمع اسمه منها وبدون شعور : لبيه ,
كملت : احنا اتفقنا على شي , يعني لا تتوقع اني اقدر اتعامل معك طبيعي واكسر كل الحواجز اللي انت بنيتها ,
منصور : تدرين وش الحلو فيك
التفتت ربى له وسمعته يكمل : قلبك شفاف وواضح , انتي تبين تعاقبيني بجفائك , بس قلبك مو راضي ,
ربى بخجل : يمكن !!! وصلهم صوت العنود وانقطع كل الحديث اللي ابتدى ,,

كانت امسيه سعيده في فيلا سلطان بحضور ابو الجوهره واهله , تحاملت عبير على نفسها
وحاولت تكون طبيعيه مع الكل , ابوها طول الوقت عينه عليها وعلى سلطان , يحمل همها بشكل ما تتوقعه عبير , قام سلطان بعد ما جاه اتصال من رقم ما عرفه , ورفعه وسمع ام عبدالرحمن على الخط ترحب فيه , كان يكملها بهدوء وسمعته عبير وهو يقول : ابشري يا خالتي الجوهره غاليه علينا وراح اشوف لها حل ,
تضايقت عبير من المكالمه , كان سلطان للحين واقف في المدخل , فدخلت عشان تطلب العشاء
مرت من عند سلطان , وسمعته يتكلم انا بسافر بكره واذا رجعت ان شالله ابشري ولا يهمك ,
وقفت عبير مستغربه من تصرفه هاذي اول مره يقوم من عندهم ويتكلم بشكل خاص , ما قدرت تقاوم رغبتها بالسؤال فقالت : ام عبدالرحمن تبي شي ,
سلطان : أي تكلمني تبي اشوف للجوهره شغل ووعدتها خير ,
طالعته عبير : بس تبي شغل ,, والا زوج وشغل ,
سلطان : لا يروح بالك بعيد اصلا ما تهمني , ابوك هنا وابيه ينبسط اوكي ,
بعد ما خلص العشاء وطلعوا اهل عبير , طلعت عبير فجأه فوق بدون ما تستئذن ام صالح وسلطان , دخلت غرفتها وقعدت على السرير وهي تغلي من الغيره
هذا هو قدر يقول كلام حلوو لهم قدر يقول انها غاليه وانه راح يحل الموضوع , وانا متى بيحل موضوعي والا لسانه يعبر للناس ويوقف عندي وينشل ,,
صارت تقلب هواجيسها وخدودها تطبخ من الحراره اللي ارتفعت لحد ما وصلت لقمة راسها
دخل سلطان وفتح بابها بهدوء : وشفيك طلعتي تحسين بشي ,
وقفت عبير وبدون مقدمات : مستغربه منك .. تقول انك ما تعرف تعبر , لكن ما شالله زينت حصة تعبير لأم عبدالرحمن وبنتها المصون , ترى سمعت كل شي ,
وقف سلطان بوسط الغرفه : انتي ليه تكبرين الموضوع وتشوفينه مثل ما تبين انتي وبس
ارتفع صوت عبير : لانه هذا اللي صاير , انت ما عندك دم ولا تحس , عشان تطلع لي كلمه حلوه لازم تصير مشكله كبيره وتعترف فيها على ورقه اني مهمه لك ,
سلطان : هذه طبيعتي ,
قاطعته عبير بحده : لا مو طبيعتك , انت تعاقبني عشان فقدت اهلك , انا وش ذنبي تعاملني كذا , انا انسانه عندي مشاعر , مو جدار ,
سلطان : واذا انتي مو عاجبك طبيعتي ليه رجعتي , بصراحه كل مره انصدم فيك ,
كل مره نقرب من بعض لازم تصير مشكله وتبعدنا عن بعض
عبير تصرخ : انت السبب ,
سلطان بضيق : وطي حسك , احنا في بيت فيه ناس مو بالحالنا , انا تعبت فاهمه ,
تعبت من عنادك ودلعك وشوفتك لحالك , هاذي مو حياه ,
وطلع من غرفتها وصفق بابها من الزعل عليها ,

19 - 1 - 2015, 10:16 PM

دخلت نايفه مع امها بيتهم الصغير , شعورها بجدرانه الدافئه خفف من معانتها , احتواها في صغرها وحمل كل الذكريات المؤلمه في حياتها , ولن تكون مشكلتها مع راكان اكبر من فقد ابيها ويتمها ,
دخلت سريرها مصدمومه من الوضع اللي تم بصوره سريعه , امس الصباح كانت تودع راكان ودموعها على خدها مشتاقه له , والحين تودع راكان بدموع الهجر , تخلى عنها بسهوله وكأنها قطعة اثاث يمتلكها , غريب ايها الانسان , لماذا تملك لنفسك الحق ان تكون على الصواب وغيرك على الخطأ الا يكون هناك التقاء لتلك الارواح المنجذبه حتى تتخلى عن ذلك
الكبرياء حتى في ارائها ,
ضمت رجلها واحتوت يديها بين صدرها وبكت حتى تغسل قلبها من الم الذي لن يختفي بسهوله ,

19 - 1 - 2015, 10:18 PM

(( الجزء الخامس والعشرين ))
اجتمعت العايله الصغيره ملتفه على برنامج شهير , وام محمد مستمتعه الى اقصى حد ,
وجود منصور معها ينسيها كل الهموم , اتكى منصور بجنبها على الكنبه بعد ما مد رجله , ومسك الريموت بيده , غير القناه وصوت العنود يرتفع : منصور عاد لا تخربها , هالحين بيخلص البرنامج ,
منصور بضحك : ومحد راح يتكلم الا انتي ,
التفت لربى , والتقت نظراتهم في سكون , رجعت تشوف الشاشه وتلتهي بفوضوية مشاعرها من رؤيته ,
تبي تسأله عن دفترها لكن كل مره تخجل من سؤالها , رجعت لجهته بنظره خاطفه , انصدمت انه للحين يشوفها ,
ارتجفت يدها وسرى خدر بسيط من الالم في يدها , نظرته مليئه بالشوق لكن ما عندها أي استعداد تبادله مشاعره , سرح في شكلها , بتظل طول عمرها فاتنه ,
كانت قاعده على الكنبه بطريقه اسحرته , حطت مخده صغيره بحضنها ورفعت بيدها عليها ونزلت وجهها واتكت عليها عشان تشوف البرنامج , لبسها اليوم اضفى عليها فتنه غير عاديه ,
اول مره يشوفها بعبايه ملونه , من الحرير الثقيل , وعند خصرها التف عليه حزام دقيق , ابرز مفاتنها له , فكر انها تلعب بالنار كذا , وتعطيه اشارات غير واضحه , او يمكن من كثر شوقه لقى لنفسه العذر بذا التفكير ,
لما ركز نظراته عليها ونسى من البرنامج , التفتت له ولمحت عيونه اللي تنتقل لكل مكان فيها ,
حبت تقوم , وتتمشى في الحديقه , وتبتعد عن نظراته شوي , قامت وكلمت العنود: تعالي نتمشى برى ,
العنود : ربى لحظه بس بيخلص البرنامج ونطلع سوى ,
منصور تحرك وقام قبل تغير ربى رايها , ومسك العصا ,وبهدوء : انا ابي اتمشى , يالله تعالي ,
مشت بجنبه وشافت انها راحت للخطر بأرادتها , منصور عارف بكل اللي في نفسها , لكنه حب يتصرف بشكل صح , حتى ما يخسرها مره ثانيه ,
ابتدى منصور الحديث : فيه موضوع كنت ابي اقولك عنه بس على طول اهلي عندنا ,
تعجبت ربى وبهدوء : خير ان شالله ,
منصور : صديقي فواز .
ربى : ايووه وش فيه ؟
منصور : يبي يخطب ريما , التفت لها يبي يشوف ردة فعلها , ... ملامحها كانت عاديه , وكمل : اتصلت على ريما وقلت لها تفكر ,
ربى : ما قالت لي ريما شي ,, وقف وقابلها : ليه تحبين تهربين مني ,
ربى بأرتباك : انا ,, وش تتكلم عنه , حنا في ريما ,
منصور : ليه قررتي تطلعين تتمشين , مو عشان ما تبيني ,
ربى : لا , ابي اشم هواء بس ,
منصور : ااااهآآآآ كذا , وش رايك بفواز ,
استغربت من انتقاله بين المواضيع , وردت عليه بهمس : اللي تبيه ريما , هاذي حياتها وراح تعيشها بنفسها ,
سمعوا صوت العنود : يا نااااس , تعالوا هنا , نبي , نشرب الشاهي ,
التفت منصور لها وأشر بيده انهم بيجونها , ورجع يناظر ربى ومد يده لها ترددت تمد ها له
وهمس : عنود تطالعنا , عادي لا تكبرينها ,
مدت يديها ليده , شعور بالامان سرى في قلبها , وقررت انها تكون طبيعيه , بعد ما وصلت لخالتها والعنود , قعدت على الكنبه , وقعد منصور بجنبها , صبت العنود الشاهي في الاكواب , لكن ام محمد استئذنت منهم ودخلت عشان تنام ,
العنود : كح كح , شكلي فضوليه بينكم , ما راح اشرب شاي عشان ما اسهر يالله بالأذن .
ربى : عنيد عن السخافه عاد . والا تبين تتغلين ,
منصور : والله انا انصحك وبشده روحي نامي ,, ضحكت العنود وطالعت ربى : اقولك اخوي انا ادرى فيه ,,
طلعت العنود والتفتت ربى لمنصور : ليه كذا بتزعلها , مافيه شي خاص اصلا عشان تتركها تروح .
منصور : خلها تنام ابرك ,
رجعت ربى كاسة الشاي وقامت : انا بدخل انام عن اذنك , مسك منصور يدها ورفع عينه لها : وتتركيني هنا بالحالي , هزت كتفها من الاحراج , وقف وبهمس : روحي نامي ,
انسحبت بسرعه من الموقف , ودخلت غرفتها ,
زهق منصور من ثقلها , وقعد يشوف التلفزيون , يبي يقضي الوقت , متأكد انه لو دخل الغرفه الحين ما راح يملك نفسه , ويمكن يتطور الموضوع ويغصبها على شي , ويكرر مأساتها ثاني , تنهد بعمق ومد جسمه على الكنبه , وبدون شعور غفت عينه من التعب ,
لبست بيجاما حرير , ورفعت شعرها بعشوائيه مثل كل مره , نظفت وجهها من المكياج الخفيف , وتعطرت ودخلت في فراشها , بعد ما راحت للطرف الاخير منه , غمضت عيونها تبي تشعر بالنوم قبل يجي منصور , لكن تفكيرها فيه وفي ريما , وفي حياتها استحوذ عليها ,
مرت ساعه , واستغربت ان منصور للحين ما دخل الغرفه , اكيد تضايق من اسلوبها معه ,
شافت ساعتها اللي كانت على الساعه ثنتين ونص , بدت تقلق , خافت لا ينام في الصاله وتشوفه خالتها وتصير مشكله , او لا يكون طاح ,بسرعه نطت من السرير , وطلعت من الغرفه بهدوء , تسحبت للصاله بخطوات هاديه , وشافته نايم على الكنبه ومنظره يقطع القلب , كان ضام يديه الثنتين على صدره , , قربت منه , وهمست : منصور ,
ما رد عليها . قربت اكثر ونزلت لمستواه وشافت هدوئه , ورددت منصور , ما تحرك , خافت لا يكون فيه شي , مدت يدها لقلبه تبي تحس بتنفسه ودقات قلبه , وحطت راسها تبي تسمع , لما سمعت دقات قلبه تنهدت من الخوف , وهمست : الحمدلله ااااه يا رب ,

19 - 1 - 2015, 10:19 PM

فتح منصور عينه بعد ما حط يده على يدها في صدره : لذا الدرجه خايفه علي ,
انصعقت منه وحست بالقهر انه يختبرها وطلعت للغرفه وتلحفت ما تبي تحكي معه كلمه زايده ,
بعد لحظات دخل منصور في الفراش وطالعها متلحفه , ابتسم بعد ما تطمن انه ما بقى على رضاها الا خطوات بسيطه ,

انهارت بعد ما طلع , مب عارفه كيف تتفاهم معه , بيسافر على الفجر واكيد هو بمثل شعورها يحس بالتوتر والضيقه , فكرت تروح له بس نفسها ما طاوعتها . شعور قاسي انك تستجدي عواطف انسان هو في حاجتك اصلاً لكن نشأته كانت السبب الرئيسي في غموضه , بدلت ملابسها وخذت لها شاور ينشط خلايها الضعيفه , لبست لها قميص من القطن الخفيف , مزين بتطريز رقيق على اعلى الصدر , وبكم قصير يتدلى من اطرافه الجبير الدقيق ,
, تعطرت بكثافه وتمنت انه يكون في الغرفه , لكن خيبتها كانت كبيره لما شافت غرفتها فاضيه , توقعت انه يمكن يرجع , يفصلهم عن السفر ساعات , مشت للباب ,وقررت انها تروح له , تتكلم معاه أي شي بس ما يكون اخر لقاء لهم كله جفاء ,
بعد ما فتحت الباب ,ارتجفت حيا ,من شكلها , وتراجعت خطواتها مره ثانيه ورجعت غرفتها , ترددها ارهقها , حياها منه , مشاعر كثيره سيطرت عليها في لحظه ومنعتها تسوي الشي اللي هي تبيه ,
بعد ما دخلت في فراشها , استرخت على المخده , وغمضت بعيون متعبه , صورته في بالها , شكله , كل شي يحيطه مر في بالها , تسارعت دقات قلبها بقووه , حبها له واضح , بس
تمنت منه انه يتقدم خطوه ويشعرها ان كل اللي صار تحت ماله معنى وانها اغلى انسان بحياته , تمنت يقولها كلمه بسيطه , يا قلبي , يا دنيتي , يا روحي , أي شي بس ينطق ,
توترت اصابعها ورفعت الملحف , ونزلت من سريرها بهدوء , حركت شعرها على فوق بدون ترتيب , نزلت خصلها على خدها بطريقه خياليه , وطلعت من الغرفه , ,فتحت باب المدخل المطل على جناحه , الهدوء يسيطر على المكان ,
تسارعت دقات قلبها اكثر واكثر وصارت رجفتها تمشي بهدوء في مفاصلها , زمت شفايفها ,,
وطقت باب غرفته بهدوء ما سمعت رد , توقعته بيكون نايم , ففتحت الباب بهدوء تام , انصدمت ان سريره مرتب , وخالي وبرودة الغرفه طغت على المكان , سكرت الباب , وتراجعت للباب اللي يدخل على المكتب , بدقه خفيفه ما تذكر , اصدرت صوت على الباب وجاها صوته : نعم .
فتحت الغرفه بهدوء تام , واصبحت المواجهه بعد ثواني ولازم تتماسك وتدور الكلمات المناسبه ,عشان تتكلم معه , كانت الغرفه تسبح في ظلام الا من ضوء المكتب ,
شافته جالس يكتب , ولسى بثوبه , شعره الكثيف معطيه شكل خيالي ومو طبيعي , بانت الهالات من انعكاس الضوء على وجهه , وبأمكانها تشوف كل شي بشكل واضح من مكانها ,
تقدمت بخطوات اكثر وانتصفت في وسط الغرفه ,
نزل القلم من يده على الاوراق اللي قدامه , وشبك يديه في بعض , لما شافها دخلت , تسارعت نبضاته , والتزم الهدوء عشان يقدر يتحكم في مشاعره ,
ناظرها بعيون مثقله من الوجع , وارتباكها كان واضح جدا , هزت كتفها ورفعت يديها تبي تتكلم , نزلتها بضعف والتفتت للجهه الثانيه تحاول تدور الكلمات المناسبه اللي تبتدي بها حوارها ,
رجعت تناظره مره ثانيه لكن عيونها كانت مليئه بدموع الالم والضعف والشوق , نظرتها كانت شفافه , هزت راسها بعفويه ورفعت يدها لشفايفها تبي تضغط عليها ما تطلع صوت بكائها ,
وقدرت بصعوبه تنطق : انا تعبانه ..,
قام من كرسيه بسرعه وبخطوات سريعه قرب منها وحضنها من خصرها , ورفع يده الثانيه لشعرها يهديها , بطريقه ابويه , وبهمس : لا لا يا بعد عمري لا تصيحين , كله ولا دمعتك غاليه علي , طلبتك ,
ما قدرت عبير تمسك نفسها وكلماته تسقط في قاع فؤادها , وارتجفت بقووه بعد ما دفنت وجهها في صدره وصوت صياحها غالب على هدوء المكان , حضنها اكثر واكثر وهو يحاول يشعرها بالامان , لحد ما استكانت بين يديه وهو يمسح دموعها بيده , وبكم ثويه , وبهمس اكثر : ارجوووك لا تزيدين علي , ترى اذا شفتك متضايقه احس بغصه تذبحني ,
عبير وانفاسها المتوتره واضحه : مو لازم تسافر , اعتذر منهم قلهم أي شي , ابيك معي , انا بدونك حياتي مالها معنى , ضمها بقووه وكلماتها تؤثر في نفسيته وترفع من معنوياته
سلطان : عبير انا لازم اسافر , هذا شغل مهم وماراح ائتمن عليه احد , واللي غرس غلاك في قلبي ,اني راح اخلص بسرعه وارجع لك ,
رفعت يديها وتعلقت برقبته وريحت راسها على كتفه وبخجل : ما اصدق اني معك الحين , احس اني في حلم ما ابي اقوم منه , وبهدوء : سلطان
ضمها بقوه اكثر : لبيه ,
عبير بخجل : كل المشاعر ذي في قلبك وحرمتني منها ,
رفع وجهها بيده وناظر عيونها : طلبتك تنسين الماضي , ونبتدي صفحه جديده ,
همهمت بموافقتها وضمته تبي تشعر بحقيقة الموقف , ذهولها من صراحة سلطان معها , كانت كبيره , بس قررت انها تفديه بروحها وتكون له رووحه اللي تحتويه , حررت نفسها بعفويه وتكلمت :اكيد سهرتك , بخليك تنام احسن وراك سفر ,
مسك يدها وبصوت واطي : ما راح انام الا بجنبك , خذيني معك ,
ضحكت عبير بحياء , ورجعت لغرفتها , دخلت فراشها وراحه تغمرها انها قدرت ترضيه قبل ما يسافر وتكبر الفجوه بينهم , ارتسمت بسمتها على شفايفها , تذكرت احتضانه لها من لحظات , غطت وجهها بيدها , واحمرت خدودها وهي تسترجع االهمسات اللي بينهم ,
وفي لحظه سمعت صوت الباب وسلطان , واقف عند الباب يطل براسه وبصوت مبحوح : ممكن انام هنا ,
ارتفعت عبير من المخده ,وبأيماءه من عيونها التقت نظراتهم , ودخل سلطان سريرها وبهمس
: لو كنتي بس مو طالعه من عمليه كان سهرتك للفجر ,
ضحكت عبير بدلع : ابي اسولف معك طيب ,
سلطان بحنان : يا رووحي , انا كلي لك , تعالي بقولك شي ما ابي أي احد يسمعه غيرك , ضحكت عبير اكثر وقربت خدها له تبي تعرف وش راح يقول لها لكن همسات سلطان كانت اقوى من كل الكلام ,

19 - 1 - 2015, 10:21 PM

كان اسوأ يوم مر عليها في حياتها , ما تقدر تستوعب اللي صار كله . نامت ساعات بسيطه لا تتجاوز الثلاث بعد وصولها لبيتهم , ما فتحت جوالها من بعد ما وصلت لأن صدمتها في راكان كانت كبيره وردة فعله على الموقف كانت اكبر من احتمالها , بعد ما قامت اليوم , شافت مكان امها خالي , مسكت ساعتها اللي كانت عند راسها وشافت الوقت يأشر على تسع الصباح ,
رفعت ملحفها وقامت من السرير , بدلت ملابسها وخذت لها جلابيه قطن ناعمه وطلعت تشوف امها ,
لقتها في المقلط وعندها صينية القهوة , ومتمدده على جنبها بالها بعيد ,
خذت نايفه نفس عميق لأنها ما تكلمت مع امها من البارح ,,
وحاولت تكون قويه , جثت بركبتها جنب امها وقعدت على جنب متكيه على يدها وشافت امها وبصوت خافت : صباح الخير لأغلى ام في الدنيا ,
ردت عليها امها : صباح الخير يا قلبي , ومسحت دمعه , وقعدت بهدوء تبي تتشجع اكثر
نايفه : افاااااا , لا تصيحين يا يمه , اللي خلقني ما راح يضيعني , اذا الله كاتب لي نصيب معه , بتنحل اموري , واذا الله مو كاتب , مو نهاية الدنيا , بكمل دراستي وبشتغل , وبصرف على نفسي , تكفين يمه لا تتكدرين ,
تكلمت ام نايفه بحزن وهي تقلب المنديل بيدها وعينها بالارض : يا قلبي , انا راضيه باللي من عند ربي لكن راكان ما خبرت عليه شي يخرب علاقتك معه , وش ذا المشكله اللي منتي راضيه تقولين لي عنها , يمك انتي تنقصك الخبره وبعدك صغيره , الحرمه ما تترك بيت زوجها عشان أول مشكله , عطيه فرصه يثبت اذا هو على حق او لا ,
خذت نايفه نفس عميق وتنهدت : وانا ما عطيته فرصه ,, انا طلبت منه يحكي عندك وهو رفض , واصر على موقفه , ولا يستشهد بأمثال تغث ,
يمه اللي صار يخصه هو , لكنه رافض يعترف بالخطأ, طيب اذا كان كل شي مو صحيح , ليه يتنرفز ويعصب بدون داعي , خليها على الله يمه ,
ام نايفه بخجل : طيب انتي ما قلتي لي وش السالفه يا عمري ,
نايفه بثقه : طلبتك يا يمه انسي الموضوع , وربي راح يفرجها علي , انا من عرفته ما قد اخطيت بحقه , تنهدت مره ثانيه , وخذت ترمس القهوه تصب لأمها ,
تمدد على كنبة الصاله , ورجع يده تحت راسه وناظر السقف , من دخل البيت اول البارح لحد اليوم الصباح ما ذاق شي , يطالع مكانها كل شوي , سريرها ملابسها , عطورها , كلها تتكلم عن فقدها لصاحبتها , اجل وش يقول هو , اللي يمر الوقت بحضورها كأنه ثانيه , وبغيابها كأنه دهر ,
راجع تصرفاته وكلماته المتهوره , طول عمره عصبيته فالته , بس يرضى بسرعه ,لكن اليوم كان موقف يصعب احتماله , خذلته نايفه لما صدقت كل شي وتركت بيتها ,
تذكر نظراتها , كان فيها شي مؤلم , كانت رغبته انها تكذب كل شي وتصدق كلامه هو فقط ,
لكن هجومها عليه احزنه بشده , رجع يتخيلها , تمنى انه في كابوس ويقوم منه الحين ,
تمنى انها تدخل الحين , وتغمره بعاطفتها , يبي يهمس لها عن شوقه لها , صار له ايام ما شم ريحتها , تنهد بقوووووه وغصه بحنجرته من فقدها , وبعد لحظات شاف اتصال من مشاعل , كان اخر شي يبي يشوفه ,
كررت الاتصال وبعد فتره رد عليها بدون نفس : مرحبا
مشاعل : وش فيك تقولها بدون نفس , وين نايفه ما ترد على جوالها ,
راكان بحزن : اااه , مدري ,
مشاعل بتريقه : سلاااامتك من الاه يا خوي , وشفيك , لا يكون نيوف زعلانه عليك وانت متعذب عشانها ترى بسنعها لك , كانت تتكلم بضحك واخر شي يبيه راكان في ذا الوقت المزح ,
راكان بحزن : نايفه في بيت اهلها ,
مشاعل بروع : وشو , ليش , وش السالفه ,
راكان : مشاعل سكري الحين راسي مصدع ومابي اتكلم ,,
الصداع رهيب وكل ما مر عليه الوقت يحس بينفجر من الالم اللي في جسمه , شعور صعب ,
ونفسيته طاحت في القاع ومنظرها في اخر لحظه لمحها قطع قلبه من الالم ,
اتصلت مشاعل بسرعه في بيت ام نايفه وجاها صوت والدتها بهدوء : هلا يا مشاعل
مشاعل بقلق : خالتي وش المشكله , وش صاير طمنيني فديتك ,
ام نايفه بهدوء : والله يا بنتي مدري عن شي ونايفه رافضه تتكلم , خليها يمكن تهدى اعصابها شوي وبعدين تحكي ,
مشاعل : ممكن ازوركم يا خالتي ,
ام نايفه بحزن : البيت بيتك يا قلبي ,,
كانت نايفه تقطع شرائح الفلفل , والبصل , ودموع عينها تنساب بهدوء من اثرها
جهزت الصحون والاكواب , ووضعت مقادير الطبخ في قدر الضغط , وانتظرت على كرسي المطبخ وهي تسبح في عالمها , راقبت المطبخ الصغير , رجعت له بعد غياب فتره ليست , طويله , اشتاقت للهدوء , ولوحدتها في عالمها الخاص , اشتاقت ان تغسل صحونها بيديها ,
دللها راكان وكأنها اميره مترفه ,
تسائلت ماذ يفعل , ومتى نام , , ام شاركها تلك المشاعر واضرب معها
في التقاء روحيهما على بعد ,
بعد ما انتهت من المطبخ , دخلت تأخذ شاور , حتى تجهز صينية الغداء لأمها ,
لفت الفوطه على شعرها المبلول , وطلعت تسكر على القدر الصغير , تفاجئت ان مشاعل في منتصف صالة البيت الصغير تحادث والدتها ,
سلمت عليها بحب , واعتذرت منها ترتب نفسها , دخلت للمطبخ ومشت بشكل آالي ,
جهزت كل شي بشكل سريع ,
دخلت لغرفتها وجففت شعرها بسرعه ,
ودخلت عند مشاعل في المقلط , تقدمت بخطوات هاديه وجلست بجنبها , بعد مالمحت امها تمسح دموعها , تكلمت بثقه : وشرايكم انكب لكم الغداء ,
مشاعل : نايفه اتركي الغداء وكل شي , يا قلبي , انا مب راضيه انك تتركين بيتك , عشان شي ما يسوى اكيد ,
طالعت نايفه حجرها ومسكت اصابعها بعجز : متأكده انه ما يسوى ؟
مشاعل : ما راح اكذب عليك انا سئلت راكان لكنه رفض يتكلم معي , انا ما قدرت اقعد في بيتي ثانيه وانا عارفه انكم بينكم مشكله ,
نيوف ترى يمكن عشان اخوي كبير عليك صعب تفهمينه , انا بشرح لك ..
قاطعتها نايفه بهدوء : صدقيني العمر ماله دور ابداً ,,
مشاعل : نايفه يا عمري , انتي اكيد عاقله وراح تفهمين عذر راكان لك , احنا مو عارفين المشكله بس عطيه فرصه يثبت لك وجهة نظره ,,
تكلمن نايفه بضيق : لا تحاتين , ربك بيحلها ان شالله ,
مشاعل : طيب عشان خاطر الوالده قومي معي نروح لبيتك..
طالعتها نايفه بحزن قضى على كل مشاعر الامل : انا ابي ارتاح عند امي , سامحيني ما اقدر ارجع , ربك يفرجها ,
قامت نايفه تجهز الغداء ومشاعل تحاول تمسح دموعها بعد ما شافت مقدار الالم اللي غمر نايفه من دقائق ,

المواضيع المتشابهه لموضوع: روايه روحي لك وحدك للكاتبه ريم الحجر روايه رائعه لا تفوتكم لموضوع: روايه روحي لك وحدك للكاتبه ريم الحجر روايه رائعه لا تفوتكم
الموضوع	كاتب الموضوع	المنتدى	مشاركات	آخر مشاركة
روايه	خفہَ’ـايِـِـا	همس لمدونات الاعضاء	2	4 - 1 - 2016 05:16 PM
روايه ودك تنامين نامي	سجات التهاويل	همس للقصص وحكايات وروايات	301	13 - 4 - 2014 07:42 PM
روايه تتكلم عن م ساتي	سجات التهاويل	همس الشعر والقوافي	8	7 - 12 - 2013 05:35 PM
روايه بعت الجسد	الحب ياسمين	همس للقصص وحكايات وروايات	8	12 - 6 - 2013 01:31 PM
عفت الغلا عفت الغرام و رواجه	أعشق تفاصيلك	همس الشعر والقوافي	4	2 - 10 - 2011 04:29 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

روايه روحي لك وحدك للكاتبه ريم الحجر روايه رائعه لا تفوتكم

همس للقصص وحكايات وروايات