|
ديوان الشاعر الكبير مساعد الرشيدي مساعد الرشيدي مساعد بن ربيع الخياري الرشيدي (1382هـ / 1962- 14 ربيع الثاني 1438هـ / 12 يناير 2017م) شاعر نبطي سعودي.[1] وضابط برتبة عميد في الحرس الوطني السعودي. ولد في مدينة الدمام عام 1382هـ، وقضى أول فترات طفولته في الكويت. ودرس في خميس مشيط حين كان والده يعمل في الجيش. تخرج من إحدى ثانويات خميس مشيط. انتهى من المرحلة الثانوية والتحق بكلية الحرس الوطني وتخرج ضابطا وعمل في مدينة الرياض حتى وصل إلى رتبة عميد في الحرس الوطني السعودي. بدأ مشواره الشعري قبل أكثر من ثلاثة عقود ونيف على صفحات مجلة «اليمامة» التي احتضنت بداياته الأولى، وفي هذا الصدد يقول الزميل راشد بن جعيثن: وصلتني أول نصوص مساعد عبر البريد عام 1397ه وكانت تنم عن موهبة فريدة وجديدة وبالفعل نشرت أولى قصائده: (حلفت لا ما أقولها لك وأنا حيّ … إلا إذا قلت إنسني قلت لك لا) واستمر تواصله بعد ذلك وكان في تطور ملحوظ يعكس مدى شغفه واهتمامه وثقافته وتشربه للألحان وإتقانه لها إضافة لوعيه العميق وشمولية أسلوبه وأفكاره المبتكرة وصوره الجديدة. فترة المراهقة لاحظ والده ميول مساعد للشعر فنصحه بعدم قراءة الشعر، إلا أن الفطرة الشعرية لديه كانت قوية. له كثير من القصائد القديمة التي لم تنشر. نشأ مساعد الرشيدي في عائلة معروفة بميولها الشعرية، فأمه كانت شاعرةً وعمه ووالده أيضا. ابتعث مساعد لمدة سنة إلى أمريكا، وفي هذه الفترة كان يحن إلي وطنه كثيرًا، فقام بكتابة قصيدته المعروفة: (حزين من الشتا وإلا حزين من الضما ياطير ... دخيل الريشتين اللي تضفك حل عن عيني |
رد: ديوان الشاعر الكبير مساعد الرشيدي من قصائدة الرائعه.. في زمان كنه البرد .. شبيت القصيد قلت ابدفا والليالي تموت ببردها في طريق كنه الموت والحالي وحيد قلت ابحيا والمنايا تبوح بسدها أتقارب هقوة العمر لو كانت بعيد واتغني بالمقابيل واخطب ودها لاقديم الجرح يقوى ولاجرح الجديد يخلف الناس العزيزه عن اللي ودها والله اني ماتنازل .. لي رايٍ عنيد لين أداعب غرة الشمس ..والثم خذها وانزفي ياوردة الشعر .. من دم الوريد لاتجفي في عروقٍ .. تراجف يدها ياقصيدي كان الأشعار سادات وعبيد والله انك من بحور ..غريبٍ جدها ماتقاود مهرة الحرف للقلب البليد ياقصيدي خذ رسنها ..وخلك قدها في طريق كنه الخوف سليت القصيد قلت ابحيا والليالي تموت ببردها |
رد: ديوان الشاعر الكبير مساعد الرشيدي وايضا من قصائدة.. البارحة كل رمش سل شلفاه وانا على نيتي ساهي وشارد مسرح وجمهور متبلد وملهاه يوم انت تطعن حشاي بدم بارد ياسيدي من يقول الموت مأساه والموت بغضايتك خيل تطارد ماعندك الا حلالك وحلا لاه لي اركيت قلبي على سود المبارد الرمش طاغي وانا ماني بوياه صدرت ضامي غلاك وجيت وارد شبيك لبيك قلب العبد لله بين اصبعينك غدا خادم ومارد اطلب وتدلل فداك اللي تمناه لو تطلب الشمس وسهيل وعطارد |
رد: ديوان الشاعر الكبير مساعد الرشيدي كلك تعالي غلا ... والاارجعي كلك بعض الغلا منك مايستاهل الجيه طالت وانا في رجا ليتك..وياعلك أوراق بالذاكره ..واوراق منسيه مابل ثوبك مطر شوقي ولابلك لوعلتك من سحاب الروح وسميه ليه امشي الدرب دامه مايوصل لك تخاف رمضا الضياع اقدام رجليه يابنت تو الهوى ماصرت انا خلك للحين .. مازالت الصوره رماديه ومازال بغض الغموض الشره يحتلك وشلون انا اعشقك واحبك على النيه اشوفك هناك قدامي .. ولاادلك صعب الكتابه ليا صار الورق ميه إن كان شمسك تساومني على ضلك ماعاد ابي منك لا شمس .. ولافيه اما تعالي لقلبٍ .. فز لك كلك والا اتركيني ما ابي لك بالهوى جيه |
رد: ديوان الشاعر الكبير مساعد الرشيدي على كثر الكلام، وكثر ماقبل الكلام جروح سكت، ومالقيت الكلمتين الي علي بالي أخاف إن قلتها، ماقلتها، وان قلتها بوضوح توسدني ملامات الرفيق وشرهة الغالي كذوبه يالهوجس اللي على الخاطر تجي، وتروح بغيت أزبن ذراها، واستريح وماتهيالي ورحت أتلي شتاتي، واترجي صوتي المبحوح تموج بي الدروب ومسندٍ كفي على ظلالي عسي مانتي رجايه يابروقٍ في سماي تلوح يشرهبني رعدها والضما بالصدر همالي نقلت جروح ماعرفها بقلبٍ مرهف مجروح تنطحت البياض، وسود الله وجه عذالي |
رد: ديوان الشاعر الكبير مساعد الرشيدي ولع رماد الشوق يامعذبي نار !!من كان يحلم باشتعال الرمادي ؟ ماكنت احسب انه يكون اللقا حار لين التقينا واشبكتنا الايادي وقامت لنا الذكري تغني على الطار تنساب باسماعي نغم حب هادي حسيت شي لفني مثل الاعصار واستيقظت نشوة غلاك بفؤادي اخذت لي سجه وانا شبه منهار بين الخيال وبين علمٍ وكادي وفزيت يوم انى تنبهت وش صار مثل الذى توه صحي من رقادي تغير الموقف بلا سابق انذار وغير المشاعر جت مشاعر جدادي رديت لك عقب التجافي والانكار وطويت صفحات الزعل والعنادي وتبددت ذيك المبادي والافكار ايه جنون افكار وايه مبادي تراي انا مليتها لعبه النار ما احد لعبها قبلنا واستفادي من رد للجنه عقب صالى النار حتى السموم يصير عنده برادي |
رد: ديوان الشاعر الكبير مساعد الرشيدي آخر عباراتي وداع ..وآخر مشاويري رحيل جيتك وبي لفحة ضما واقفيت كبدي ناشفه اصعب كلام أصعب خبر صرخه عقب صمت طويل مثل الهدوء اللي سبق لحظة هبوب العاصفه وأنتي بمتناول يدي ... تبدين مثل المستحيل في عشرتك صوت العقل يقتل طموح العاصفه الحب ماهو كل شي إليا وقف حظٍ بخيل قلوبنا مثل العسل بس الظروف مخالفه لاللندم ..لاللعتب .. أوشي من هذا القبيل وانتي ماجا منك خطا حتى تقولي اسفه من غير ليه .. استسلمي ..واستلهمي صبرٍجميل ولاتسأليني وش جرى مالك بطول السالفه قولي لهم ياعزوتي ماعابنا موت النخيل اللي يوافيها الأجل وتموت لكن واقفه آخر عباراتي وداع آخر مشاويري رحيل جيتك وكبدي ناشفه واقفيت كبدي ناشفه |
رد: ديوان الشاعر الكبير مساعد الرشيدي الطريق المظلم المهجور مساعد الرشيدي تخوفني مشاوير الطريق المظلم المهجور واليامني ذكرتك قلت طولي يامشاويري عزاي انك رجاي العذب لو كل الدروب عثور وصلت اوماوصلت اعرفك ما انته منتظر غيري حبيبي ..وكل الله لاتحسب إني بليد شعور لو انت المستحيل الصعب .. ماابدي لك معاذيري احبك ..رغم تجريح الليال لقلبي المقهور اشوف الجرح يكبر وانت تكبر وسط تفكيري احبك .. لو يموت الحب وتصير القلوب قبور احبك كلمة لو حرموها .. حل تفكيري احبك من هنا حتى طلوع الفجر ..حد النور صحيح انك قدر محتوم بس اجمل مقاديري بعذر اللي يحبك لو يصير الشاعر المشهور لأنك تنهمر حلو القصيده في تعابيري احد ربي يحطك له حبيب ..ومايجيه غرور ؟ وانا مهما بغيت استوعبك ياقل تقديري هلا بك من قدمك ... لغرتك لي شعرك المنثور هلا في كل شيٍ فيك وانت اغلي مساييري أثر صدق الغلا يجبر حطام الخاطر المكسور وانا مهما منحتك من غلاي اشعر بتقصيري ولو طالت مشاوير الطريق المظلم المهجور انا لامن ذكرتك قلت..احبك يامشاويري |
رد: ديوان الشاعر الكبير مساعد الرشيدي الله يعطيك العافيه على مجهودك الرائع |
رد: ديوان الشاعر الكبير مساعد الرشيدي يعطيك العافية أنتقاء مميز كل الشكر لهذا الإبداع والتميز لك مني كل التقدير دام نبضك وبآنتظار روائع جديدك بكل شوق |
| الساعة الآن 02:48 PM |
جميع الحقوق محفوظه للمنتدى
HêĽм √ 3.1 BY: ! ωαнαм ! © 2010