شبكة همس الشوق

قل لي وش اللي غيرك لاتكابر

أصبحت انا لك روح وانته لي جروح
وانا اندب الفرقى واجامل وصابر

الى متى اقبل على الباب واروح
احسب مسافاتي واعرف المعابر

وانا الذي غنيت مع ساجع الدوح
وعليت لك من فيض شعري منابر

احرص على عشقك واعلي به صروح
وجزيتني كني معك شخص عابر

اجي وانا مجروح واروح مجروح
خابر بنياتك ولاني بخابر

الجسم حي وداخله قلب مذبوح
وكسرت رجلٍ مالقى اليوم جابر

كانك تبيني افضح السر وابوح
والوم دور الوقت واقول غابر

حنا عرب والسر من دونه الروح
وصدورنا للهم مثل المقابر

مانخلف النيه ولو فيه مصلوح
والغدر ماله عندنا أي دابر

وان كان جايك من على الهرج مشفوح
اللي على النمه لهم شبر شابر

بعطيك علم وعادتي ابعد الشوح
ترا المظاهر ماتعكس المخابر

بصبر ولو صدري على حبك يفوح
وابقى على الهقوه كتوم و مثابر

عل الفرح في مقبل أيامنا يلوح
وانسى الهموم اللي عليه تسابر

وان كان همك تستمع لي وانا انوح
فانا همومي ماحوتها المحابر