شبكة همس الشوق - الكفو يبقى كفو مهما تقول الرخوم

الكفو يبقى كفو مهما تقول الرخوم

ياليل لو تاهت دروبك نعرف النجوم=ندرك دروب الوطا بمعلقات السما
ناصل هدفنا ولو تاصل لدق الخشوم=جعل الضعيف يموت ولا يجيله نما
الكفو يبقى كفو مهما تقول الرخوم=عنده كبار البلاوي كنها شرب ما
وأكبر مصيبه تجيه يلفها فالكموم=إما كذا يسمو الرجال ولا لما
يعيش بين الرجال وهو صوت وهدوم=يبيّن الرجل من شبه الرجل عندما
يحل وقت الشدايد ثم تبين العزوم=فالموقف المحرج إن كان الوطيس إحتما
الحر يبقى على اسمه حر والبوم بوم=الوقت علمني إبما لم اكن أعلما
من لاتعلم من دروس الدهر كل يوم=لعل عينه وسمعه للعما والصما
يامكبرين المراكي للحكي والشحوم=يجمعكم الحكي ويفرقكم اللازما
ياطيبكم فالرخا ياقشركم فاللزوم=مثل الغرى في حلوق إرجالكم مثلما
وانا ليا شفتها عوجا ختمت الختوم=صدرتها عاجله حتى تسيل الدما
انا احمد اللي قسم لي من خيار القسوم=ماهي بلقمة ضعيف ٍ ماتصل للجما
أسج رجلي مع أرض الله وأدك الحزوم=اموت ماانظر ورى واعيش ماني كما
رجل ٍ يكمل فراغ وهو ماله لزوم=مايقدم ولايوخر شي وسط الحما
لاصار يربطني فبعض العرب (دوت كوم)=ياجعلها للذهايب والفنا إنما
يربطني الطيب والنخوه وخوة قروم=ماهي بخوة عما يقود رجل ٍ عما
النت مايضيع إمن أهل السلوم السلوم=وإن ضاع درب الوطا عندك دروب السما