بَعَدُوكي خَلاص عنِّي ولامُوكي على حُبِّي..!!؟..
ولا انتي اللَّى اختارتي تَسْتَغني عن قلبي..!!؟
واللهِ كان يَفْرِقْ..
لو قلبِك يَسْمع لي أو يُنظر لدموعي
والخدَّ اللِّي بَيَغْرَقْ
لكن دايماً بينَّا أشخاص بتفرَّقنا..
بالقوه بتبعدني ومنعاني أتكلمْ.

لو عَنَّك راحَ اخبِّي لوعات ساكنه جَنبي..
طَبْ رُوْحِي اسألي قلبي
أهوه سهران بينادي على قلبِك من غُلبي
من بعد م كان شادي ..
كسَّرني وحطَّمْني .
و حَ اقول لِكْ أيه عنِّي..
غَير إنِّي بَاتعذبْ
وَعَذابي ماهوش عادي
والنَّاظر لأمورِك من فعلِك يَسْتعجبْ.

جَاوبيني آنستي..
مَحْبُوبتي مَ تجاوبي
هوَّه انتي أنْسَيَّه طَبْعك سَهل وعَاذبْ..؟..
وشعورك مُوش كَاذبْ..؟
ولا انتي جَنَّـيـَّه ..؟..
بَتْشَرَّقْ وتغَرَّبْ
ناويه لي أتعذَّبْ..؟.

بتألم من شَكِّي وانا صاحي وانا نايمْ..
مَ تقولي حَبَّيتكْ لو مَرَّه بلسانِكْ
د انا تايه فَ بحوركْ..
وشعورِك مُوش فاهمْ
جَاوبيني آنستي..
مَحْبُوبتي مَ تجاوبي
من قلبِكْ بَتحَبَّي..؟..
صَرْحيني أنا شاري
ولا انتي حَنَّيتي للمَاضي وبَتْدَاري..؟
وان كان ظنِّي مُخطئ ..
سمحيني بأعذاري
أوعاقبْي لوترضي
مَ انا جَاهل بَمَشاعرِكْ ..
وعقابِكْ استاهلْ.

بَعَدُوكي خَلاص عنِّي ولامُوكي على حُبِّي..؟..
ولا انتي اللَّى اختارتي تَسْتَغني عن قلبي..؟
واللهِ كان يَفْرِقْ..
لو قلبِك يَسْمع لي أو يُنظر لدموعي
والخدَّ اللِّي بَيَغْرَقْ .

بقلم الشَّاعر/
د.عبدالحميدالباجوري