3 - 1 - 2025, 10:35 PM
|
| |
|
قال الذي في تالي الليل سهران
 
قال الذي في تالي الليل سهران
عزاه ياقلب تزايد شطونه
كله سبب ناس من القوم عدوان
جعل المنية حوضها ياردونه
ناس على المطلوب ماتقضي الشان
واليا نصاهم صكوا الباب دونه
سبحان رب غير الحال سبحان
عقب المعزة والغلى يبغضونه
قلت الحقيقة دون زود ونقصان
وتسمعوا ياهل القلوب الفطونة
حدتني الحاجات لفلان وفلان
يم النفوس القاسية والحنونة
نصيتهم والدمع من فوق الاوجان
مثل السحاب اللي تهامل مزونه
بلاي من دنياً بها صرت بلشان
الله يفرج لي بكافه ونونه
واقولها من خاطري سر واعلان
جذع شجرتهم يابسات غصونه
شافت و عافت عيني اشكال والوان
نمونة ياشينها من نمونة
شانت طبوع الناس حضر و بدوان
مالوم عيني لو تصير مغبونة
الا ومع هذا بني عم واخوان
وكلن يعامل صاحبه بالخشونة
واخص شخص تالي الوقت خوان
يعل راسه ينشلع من متونه
جيته وانا مانيب راضي وزعلان
وقلت السلام وقام يومي بشونه
عقب السلوم الطيبة صاحبي شان
وشفت الغدر مابين ضحكة سنونه
واصبحت انا في ماقفي منه حيران
خيب ظنوني خيب الله ظنونه
قلت انت نذل ومن يراعيك غلطان
شوشتك من سود الفعول محسونة
لاشك انا من بعض الافعال ندمان
يوم اني اتبع من تقافت ضعونه
من باعني بعته ولانيب خسران
نفسي عزيزة مارضت بالمهونة
أنا عريب الساس جدي عدنان
ماارضى بها والقلب ما طاب كونه
والله لابيعه في رخيصات الاثمان
لا صار ميثاق العهد مايصونه
واتبع هل الطولات ذربين الايمان
اللي ليا جا ضيفهم يكرمونه
في قصر عز بالمطاليق مليان
الاوفيا اللي تنطحك بالمعونة
دور على الخل الوفي وين ما كان
عس المكان ان كان زلت حتونه
والاقعد اللي في عطاياه منان
حذراك تاكل لقمة من صحونه
يبلاك في دعوى على غير برهان
وانته على شانه فرسك معنونة
واللي تسبب بالقطاعة والاحزان
له ليلة فيها المثل يضربونه
راسي عنيد وقاسي ما بعد لان
يبغى مع العالم شوية مرونة
ياناس للموضوع قيس وميزان
مير الكلام الصدق ما تقبلونه
حاولت أكن السالفة قدر الامكان
يومنها بين الضلوع مخزونة
لكن عجزت وخالج النفس شيطان
يومي بها مثل الهبوب وسكونه
واصبر واتعامل معاكم با لاحسان
واقول صيور الحطب تنطلونه
يقوله اللي يفهم العلم نيشان
وعما جرى تكفيه شوفة عيونه
عبر عن شعوره وما بالحشى بان
يوم المعاني جره في لحونه
واختامها صلوا على نسل عدنان
محمد اللي للهدى تتبعونه
الموضوع الأصلي :
قال الذي في تالي الليل سهران || الكاتب :
همس الشوق || المصدر :
شبكة همس الشوق  
آخر تعديل الــســاهر يوم
4 - 1 - 2025 في 02:05 PM. |
الأعضاء الذين قاموا بتقييم هذا الموضوع : 0
عضويتي
العرض الشجري
