كنك ورق غصني وأنـا في وقفتي مثل الشـجر
طحتي من غصوني ونـا وياك لا يمكن أطيـح

الحب بأشواق العمر يامـا تهيـج وانفجـر
وإنتي ولا إنتي داريه لو أشتكي همي وأصيح

يا بنـت ما عشتك غلا لجلك تموتينـي هجـر
إن مت بعيون الهوى ببقى بهالدنيا جريـح

كنت أحسبنك تصبري لو كان من شعرك أجر
ما تتركيني بالهوى مرضان وبهمي طريـح

دامك تبعتي عاذل ٍ منطوقه أسلـوب الغجـر
فتحملي كل الألم لو جـرك لحـدّ الضريـح

لونك عطيتي خامسه وألجمتي بفمـه حجـر
وخليتي أحلام الهوى داخل فؤادي تستريـح

ما كانك سمعتي غلط أو بعض أنواع الزجـر
من خل حطك بالصدر من غير مانك تستميح

كان بتعيشي بالهنا وتودعـي كـل الضجـر
وتقولي آمر وش تبي آنـا على صوتك أسيح

وآسافرك وإنتي معي وأوصلّك حدود المجـر
وأكتبك بألواني شعر من حبر عينك ما يبيح

يا بنـت أنـا ليل الهوى وبصحبتي نور الفجـر
يـا بنـت أنـا مثـل الشجـر أمـوت لكـن مـا أطيـح