من عز نومي صحيت وشفت في عيني
دمع تهادى على جفني وانا غافي
سترت دمعي بكمي قبل يغريني
واخذت هذا الجسد من باقي لحافي
وسريت تايه ورى خطوات رجليني
لاالوجه وجهي ولاأوصافي هي أوصافي
أمشي واقول لطريقي لاتوديني
لعيون ناس تبي تدري عن الخافي
أمانتك...خلها مابينك وبيني
خابرك يالدرب خوة عمر واسنافي
ماودي الناس تدري وش يبكيني
كرامة النفس ورث ابوي واسلافي
أمشي واحس الخناجر في شراييني
والبرد يمشي وراي وينهش اطرافي
وحيد والليل بردونه يغطيني
تقول كن البلد روح بها السافي
إلين ماأوحيت صوت يناديني
صوت أعرفه مثل ماأجهل وش خلافي
قمت أتلفت وانادي لاتخليني
ماغيره...الصوت هذا صوته الدافي
ولمحت زوله من أقصى الدرب لافيني
مدري وش اقول لكن حي هااللافي
تعال...شف غيبتك كيف أثرت فيني
تعال...شفني وانا أغرق عقب مجدافي
تعال...خذني ورح بي من عناويني
تعبت أعدي على جمرك وانا حافي
تعال واقطف بصوتك زهرة سنيني
كل المواعيد عقبك شمعها طافي
تعال وشفيك خايف؟ أنت ناسيني؟
قطعت صوتي عليك وطال ميقافي
حتى بديت أشعر ان الحب معميني
وأن أنت حلم عثى فيني وانا غافي
لكن أمانه ترى اللي فيني كافيني
إن رحت منك كذا مارحت متعافي
بصدق الحلم واحذر لاتصحيني
في خاطري كلمتين إن قلتها كافي
أمانة الله عليك ان غبت عن عيني
لايكون قلبك مثل قلب الزمن جافي
مع كل دمعه تذكر رعشة يديني
ومع كل ضحكه تذكر قلبي الوااااافي
او 
لمشاركة اصدقائك!
عضويتي
من عز نومي 
العرض المتطور
