يالله ياعالـم بمـا ابديـت واخفيـت=ياحـي باقـي ماتغـيـره الازمــان
يا واحد من فـوق عرشـك تعليـت=خالق ورازق معشر الانـس والجـان
خلقتهم من ماء ومن طين واحصيـت=فصيح واعجم في فسيحـات الاكـوان
من شئت عزيته ومن شئـت ذليـت=كـل تطولـه قدرتـك ويـن ماكـان
والارض باسطها ومن فوقها ارسيـت=شم الجبـال العاليـه فـوق الاوطـان
رافع سماواتك ومن تحتهـا اجريـت=بحار عاشت وسطها اشكـال والـوان
لونت فيها الحـوت وابدعـت جليـت=واخرجت منها لول صافـي ومرجـان
وانزلت غذب الغيث مدرار واسقيـت=ظامي شجرها واورقت خضر الاغصان
احييت ميت الارض بالمزن واطفيـت=لهيب فـي قيعـان جـرداء وكثبـان
واطلقـت تيـار الهبايـب ومشيـت=ريـاح تتحـدى بـحـارٍ وبـلـدان
يامخرج يونس من الحوت واشفيـت=ايـوب مـن بلـواه ياحـي مـنـان
ياواحـد سبحـت باسمـك وناديـت=يا الله انـا طالبـك عفـو وغفـران
زادت ديوني مـن حقوقـك وذليـت=يا اللـي حقوقـك ماتقابـل بنكـران
جيتك بذنبـي معتـرف لـك وقرّيـت=تعفي عـن المديـون ياخيـر ديـان
تنظر لضعف الحـال يـارب وعفيـت=لولاك تعفي مايـرى الجنـه انسـان