,,
الصبح لون البياض وطاهر الغيمه
يمرّ في ساحة اجوائي ويسعدني
تتويج ليل وجبين الشمس تكريمه
من نظرة الصبح كنّ الشمس ترصدني
لاصرت في عالم اشراقه وترنيمه
ماكنّي الاّ من اشياءه يعدّدني
ماباقي الاّ نبات وبه أثر ديمه
لاهلّ غيم السهر من شان يوجدني
صدر العتب ريّح ركابك ورى الخيمه
مفقود لو زفرة انفاسي تفقّدني
تلقى على جال همسك ذود ومحيمه
ولاّ حبال الملامه ماتورّدني
ياساكن القلب يوم القلب له قيمه
مدري غريب الزمن ولاّ تعوّدني
أتبع نداء الهوى وامشي على تيمه
وأصيح لازاد ظلمك " ياهوى زدني "
وابرح مكاني واجي محلّ له شيمه
حتى صدى الصوت في قلبك يردّدني
حتى الخيال الذي بانت مقاديمه
شحّت عليه المقادير ,,, وتحشّدني
ان كان ماحلّ شرع الحبّ ومْقيمه
ياحظّ هاك الذنوب اللّي تحمّدني
وان قالوا الناس " كل دقّه بتعليمه "
عمر المشاريه ماتبعد ولاتدني
السُهد لو بان في وجهي تقاسيمه
مدري على ويش بعض الناس تحسدني
وان طاب نبض الغروب وزاد تعتيمه
ماشفت غير المكان اللّي توجّدني !