شبكة همس الشوق - عرض مشاركة واحدة - عذبة مثل صوت بو نايف قوية مثل قصيد بن فطيس للكاتبة مؤلفة rwaiii_i

28 - 8 - 2023, 02:01 AM

البارت 17

-مزن-
حر بخاطرها رفض ام جابر وناظرها بهدوء ، ومشت مع جوري وهم يدخلون الغرفة ويقفلون الباب عليهم
جوري بنرفزه : يعني شلون ابي افهم امي ليه مو راضية
مزن وهي تتذكر كلام جابر : جوري ابي جوال جابر
جوري : ليه ؟ بعدين كسره قدامنا شلون اجيبه
مزن : ابي رقم عزام ، ابي اعطيه رفضي
جوري بابتسامة : نجيب رقمه ليه ما نجيبه
مزن : شلون ؟
جوري : خليها علي ، رقم امه عند امي بروح اكلمها واسوي يعنني امي وبطلبها رقمه
ابتسمت مزن وركضت جوري وهي تجيب جوال امها
لفت مزن على جنى الي قاعده على سريرها : ليه ترفضينه ، تزوجي وشوفي حياتك ، سمعتي كلام امي مستحيل يصير بينك وبين جابر شي ، وامي رافضه
مزن : وانا برفضه عشاني مستقبلي
ناظرتها جنى بصمت وسحبت لحافها ، دخلت جوري وهي تركض : ردت ردت
وقفت بجنبها مزن : وشقالت ؟
جوري : صبر ما قلت لها ابي رقم ولدك ، كيف اقول
مزن : عادي قولي ابي رقم ولدك
كتبت جوري وهم ينتظرون ردها بخوف ، ونقزوا من ارسلته ، سجلته جوري بجوالها وطلعت وهي ترجع جوال امها ، ورجعت وهي تناظر مزن : دقي يالله
دقت مزن وهي تناظرها وينتظرون رد عزام ، وصلهم صوته : هلا مين معي ؟
مزن بدون مقدمات : انا مزن ، وحبيت ابلغك اني مو موافقة على زواجنا ، والله يوفقك مع غيري ..
وقفلت بدون ما تسمع رده ، وهي تفكر بجابر
جوري بحماس : ايه كفو ، حتى ما خليتيه يستوعب
—
بالصباح *
انتشر صوت خطبة المسجد الحرام بالبيت ، والبخور يعم المكان
صحت وهي تكح وتناظر جوري الي دخلت بالبخور : خير وشفيه ؟
جوري : وش الي وشفيه ، طقوس يوم الجمعة
قامت مزن وهي تغسل وجهها ، وبدلت ملابسها ونزلت
شافت ام جابر بطريقها توترت وهي تناظرها : صبحك الله بالخير
ام جابر : صبحك الله بالنور
دخلت مزن المطبخ وهي تناظر جوري : جابر ما جاء ؟
جوري : لا اتصلت عليه ما يرد

-قصيد-
كانت تستمع لسوالفهم بكل صمت ، وهي تأكل حلا بهدوء
ام معن : بكره يا بنتي عندنا عزيمة ، حبيت اخبرك حتى يكون عندك خبر
ابتسمت قصيد بوجهها وهي تهز راسها بالايجاب
رفعت راسها وهي تناظر معن وهو يضحك مع عيال ويسولف مع بنات عمه ، عقدت حواجبها من علاقتهم وميانتهم مع بعض ، ولفت على ابو معن من قال : اعذرينا على الي صار بالمطار
قصيد وهي تبتسم بوجهه : م صار الا كل خير
ولفت بوجهها وهي تنتبه للي يناظرها ومتجاهل سوالف الي حولينه ، نزلت نظراتها وتسحب جوالها الي اتصل ، ناظرت الكل الي اتفلت لها ونطقت : عن اذنكم
وقامت وهي تطلع من المجلس ، وطلعت لجناحها
وهي ترد على رهام : الحمدلله انك اتصلتي
رهام : ليه شفيك ؟
قصيد : وش ما فيني طفشت من القعدة ، وكلهم ساكتين معاد الا الشيخ داق حنك مع البنات والعيال
رهام بصدمه : اما عادي يكشفون على بعض ويقعدون مع بعض
قصيد : انصدمتي مثلي ، والله الكل قاعد عادي
رهام : يمكن عاداتهم عادي
قصيد بعصبية : حتى لو عاداتهم ما توصل يقعدون بجنبه وضحكتها واصلتني ، واذا ولد عمها تستحي شوي ، تمام متقبله فكرة انهم عادي ينزلون بدون حجاب حتى ، بس الميانه والضحك خير ؟؟؟
رهام : اخس اخس ، الحين انتي معصبه من عاداتهم ولا عشان بعض الناس
قصيد بتصريف : وش دخل ، بس قلة ادب
رهام بضحكة : يعني انتي طلعتي عشان تقولين ذي السالفه ؟
قصيد : ايه ، واحس ما راح ارجع طفشت
رهام : اقول ارجعي بس ، الضيفة انتي
قصيد : خليك صاحية اذا رجعت بصور لك وش البس عندهم عزيمه بكره
وقفلت منها وهي تناظر اشعار معن : وين رحتي ، العشاء جهز تعالي
ما ردت عليه ونطقت وهي معصبه : لو مو جيعانه كان ما نزلت
ونزلت وهي تدخل صالة الاكل تقدمت وهي تقعد معهم
ناظرت الي قاعدة بجنبها ومقابلها معن ، عصبت من ضحكتها وكلامها معه
اميرة بابتسامة : معن تذكر لما ابتعثت معي ؟
رفعت نظرها قصيد وهي تناظره ، بادلها النظرات ورد على اميرة : وشلون ما اذكر ، اكيد اذكرها
العنود بضحكة : انتم الاثنين ما تصلحون تسافرون مع بعض ابدا
ضحك الكل باستثناء قصيد الي كانت متنرفزه من موضوعهم ، ولفت على ام معن من قالت
ام معن :،شفيك يا بنتي ما اكلتي ، بخاطرك شي معين ؟
انتبهت قصيد لنظرات الكل ونطقت بهدوء : ، الله يسلمك بس مو مشتهية شي حاليا
وقامت وهي تترك صحنها نفس ما كان : بالعافية عليكم
وطلعت وهي متنرفزه ومعصبه ، دخلت جناحها وسحبت قارورة الموية الي قدامها ، وهي تناظر اشعار معن : فيك شي ؟ ليش قمتي وانتي حتى ما اكلتي لقمة ؟

-جابر-
طلع من المركز وهو يمدد عضلاته بتعب ، انتبه لاتصالات جوري ورسايلها ، تجاهلها وهو يقفل جواله ، انتبه للي نزل من سيارته وتقدم لعنده بعصبية : انت السبب صح ؟ الي غصبتها ترفض ؟
جابر بتعب : والله شف الشمس معورتني براسي ، لا تخليني افرشك بالشموس هيا فارق عن وجهي
عزام بحدة : رفضتني مره ، برد اخطبها مره ومرتين وثلاث
جابر : الله يقويك ، بس ركز على الترقية يالملازم
عزام بعصبية : مالك شغل تفهم
دفه جابر من كتفه ومشى وهو يركب سيارته ، وحرك
——
كانوا يفطرون بكل صمت باستثناء ام جابر الي تتنهد وتنطق : لا حول ولا قوة الا بالله
جوري : يمه انتي عارفة عناد جابر ، وكم مره رفضتي له طلب ورجع لنفس فعايله يعني انتظري شهر ويدخل عليك وهو هيكل عظمي
جنى بضحكة : شهر بس ؟ اتحداك اذا شهر
ناظرت مزن في ام جابر من قالت : انا الحين وين اودي وجهي ، كل ما قلت للعرب بنجي نخطب ، يطلع لي اعذار ،ثالث مره وانا اردهم والسبب اخوك
جوري : وانتي يمه الله يهداك ، لازم لازم ديما ، خلاص الولد ما يبيها ليه تجبرينه
ام جابر بحدة : ما ياخذ الا الي ابيها
كملت مزن فطورها ولا كأنها سمعت
جوري وهي تناظر امها : بعدين يمه خلينا نكون واقعيين ، من متى حاجزين ديما اول مره اسمع فيها ، ولا عشان زوجة عمي مدحت ولمحت قلتي حاجزينها ؟
ام جابر : انا ابيها لولدي ، وانا ادرى باللي يناسبه
جوري : تبين الصدق مع احترامي لديما ، والله مافيها من مدح امها شي ، بنت عادية بس انتم موصلينها للسماء
ام جابر : لا تتدخلين انتي وافطري
تدخلت جنى : اول مره اتفق مع اختي ، صح انها بنت عمنا ونحبها ، بس اوفر كلامكم عنها ، والصدق ما توصل لجمال اخوي ولا تناسبه
سكت الكل من انفتح الباب ودخل جابر بكل هدوء وطلع لغرفته ، فزت وهي تلف بسرعه وتناظره من دخل وهي متجاهله نظرات الكل من فزتها
ام جابر وهي تدق جوري : قومي نادي اخوك ، وخليه يفطر
جوري بخوف : والله ما اقوم اخاف يصفقني ما شفتي وجهه
-
بعد دقايق شالوا الصحون ودخلوا البنات وهم ينظفون المطبخ
جوري وهي واقفه بجنب مزن ويغسلون الصحون : يعنني سنعه قدام امي هاه
مزن يضحكة : يعني اخليك تغسلين لحالك ، ابشري
ولفت على الي دخل ويكلم جنى : جهزي شنطتي
ولف على امه الي دخلت من وراه وهي تسأله : افطرت ولا اسويلك فطور ؟
جابر بهدوء : شبعان
ام جابر : الحقني الغرفة ابيك بموضوع

"صلوا على محمد"

-مزن-
ناظرت البنات بتوتر من طلع جابر وهو يلحق امه
جوري بفضول وهي تترك الصحون : امشوا امشوا نسمع
ركضوا البنات وراهم ، وقربوا من غرفة ام جابر وهم يتسمعون
-
داخل الغرفة جلست على سريرها وجلس جابر بجنبها
ام جابر بهدوء : تذكر وش وصاك ابوك الله يرحمه قبل يموت
ناظر امه وتنهد : اذكر يمه
ام جابر : لا علمني ، ما قالك امك وخواتك بذمتك ما وصاك على رضاي ورضا خواتك ؟ مات وانت صغير وما توقعت اني برجع اذكرك بوصاياه
جابر بهدوء : وش جاب الطاري يمه ؟
ام جابر : ابيك تسعى لرضاي وتاخذ بنت عمك واوعدك ازوجك الي تبيها ، بس تأخذ بنت عمك وتبيض وجهي
جابر بصدمه : تبيني اتزوج الثنتين يمه ؟
ام جابر : ايه شفيها ، الشرع محلل اربع بس انا ابيك تاخذ ديما اول وسامحه لك وبرضى عليك تاخذ الي تبيها الثانية
جابر : اعذريني يمه بس انتي مستوعبه الي تطلبينه ؟ طلبك على عيني وراسي ورضاك اوجب ما علي ، لكم اسمحي لي طلبك صعب ولا راضي على نفسي اخذ ثنتين قبل ارضاها عليهم ، انا ابي وحدة وانتي رفضتيها وما راح اجبرك توافقين ، ومتى ما بغيتي تفرحين بولدك فانا جاهز بس الي ابيها والي اخترتها ..
ام جابر بعصبية : مزن مانك ماخذها ، وقعدتها عندنا ماهيب عاجبتني ، انخطبت البنت وجاها ونصيبها ووقفت بطريقها ، مابيها لك وابي الي يناسبك ، وش يقولون الناس عنا قتل زوجها وتزوجها ، بنت عمك اقرب لك وتناسبك
جابر بعصبية : يمه يرحملي والدينك، البنت ما يعيبها شي وانا ابيها وغيرها مانيب متزوج
وقام وهو معصب واستوقفته امه من قالت : اليوم تطلعها مابيها في بيتي
لف على امه : وين اوديها يمه ؟ البنت ما جاء منها شي ، وانا الي قاعد اصرف عليها مثل خواتي
ام جابر بهدوء : يا ولدي اسمعني وخذ الي ابيها واوعدك ازوجك مزن بنفسي
غمض عيونه ونطق بنفس هدوء امه : انتي رافضة وتبيني اتزوج ديما عشان ما تتفشلين لاني رفضتها ؟ انا بكلم عمي وبقوله انا الي رفضتها والله يوفق بنتك مع غيري ، يمه طلبتك لا توقفين بطريقي عشان الشرهه والقيل والقال ، نصيبها مو موقف علي ، بس انا نصيبي متوقف على مزن وغيرها مانيب ماخذ
وتقدم وهو يفتح الباب وشاف البنات وهم يركضون للمطبخ ، عرف انها سمعت كلام امه وتنهد ونزل

-قصيد-
قرأت رسالة معن وقفلت الجوال وهي ترميه بدون رد
وتقدمت وهي تطلع لها لبس ، رجعت سحبت جوالها
وهي تتصل على رهام ، ردت وبدات تصور لها اللبس
رهام : لا لا البسي الاحمر بيطلعك فخمة ومن مستواهم
قصيد بعصبيه : عشتوا والمستوى ، مابي الاحمر بلبس الكحلي احسه يناسب
رهام : طيب البسيه وصوري اشوف
سحبت الفستان ودخلت دورات المياة وهي تلبسه
طلعت وهي تسحب جوالها وتصور لرهام : ها شوفي احس ضيق ما حبيته
رهام : الله الله روحي روحي وراك اشوف
رجعت قصيد عن الكاميرا لجل تشوف رهام
رهام بانبهار : يا حيوانه وش مسويه من وراي ؟ وش الرشاقه ذي
قصيد : لي يوم مو ماكله شي
رهام : والله حلو وراسم جسمك البسيه يويلك تغيرينه ، والبسي كعبي الي عطيتك اياه وشعرك خليه على طبيعته
قصيد : على خير ، هذا اذا صحيت
رهام : صدق ما اكلتي ؟
قصيد : اي وبنام وانا جيعانه للمرة الثانية
رهام : وش دعوه والله لو اني بدالك لاضرب بالخمس وعساه يكلم بنات ادم كلهم اهمشي بطنك
قصيد : انسدت نفسي ، بس انقلعي برجع انام
وقفلت منها وهي تغير لبسها وجهزت فستانها وتقدمت للسرير وهي تنام
-
بأخر الليل *
طلع من جناحه وهو يرسل لها ، ما وصلها ردها واتصل عليها وبعد تكرار الاتصالات ردت بعصبية : خير محد ينام ؟
معن : بسم الله وشذا النفسيه ، اطلعي ابيك
قصيد بنرفزه : ما راح اطلع
وقفلت قبل تسمع رده ، وهي تتقلب بالسرير وتحاول ما تفكر فيه
انصدم من قفلت ، وتقدم لجناحها وهو يدق الباب
تنرفزت من دقاته للباب وارسلت له : ماني طالعه ولا ابي اشوفك افهمها
معن : اها دامك كذا معانده ، جهزي نفسك بالصبح بنروح نطلع لك جواز ، وبترجعين لاهلك بالليل
قصيد : يكون احسن اذا استعجلت
معن : افتحي الباب ابي اكلمك
قامت وهي تفتح الباب ووقفت عنده وهي تناظره : نعم؟
ناظر شكلها بالبجامه وشعرها الي فاكته وشفايفها الوردية
انتبهت لنظراته ونطقت : وشذا النظرات خير ؟
بلع ريقه ونطق وهو يصرف : ساعه تفتحين انتي ؟ وليه قمتي وما تعشيتي ؟
قصيد ببرود : ابد كنت ابيك تكمل سوالفك معها براحه
معن وهي يناظر شفايفها ويتأمل ملامحها : ليه لا يكون تغارين لا سولفت مع غيرك؟

-مزن-
طلعت مع البنات للغرفة وهي تحاول ما تظهر لهم ان كلام امهم حز بخاطرها ، التزمت الصمت وهي تناظر جوري الي قالت : انا اعرف مين يجيب راس امي
واتصلت على خالتها وهي تكلمها وتعزمها اليوم عندهم
قفلت منها وهي تنقز : يس خالتي وافقت تجي يارب امي توافق
مزن بهدوء: انا بنام اذا اذن العصر صحيني
—
بالليل لبست وهي تضبط شعرها ولفت على جوري الي دخلت : خالتي جات يالله تعالي
نزلوا ثنتيهم وهم يسلمون على خالة جوري
هند وهي تناظر مزن : ماشاءالله زوجتوا جابر من ورانا
جوري بضحكة : واحنا طلبناك عشان تزوجينه
هند : ازوجه ! من ازوجه
جوري وهي منتبه لنظرات امها : والله يا خاله تبين الصدق ، جابر اخوي يبي مزن بس اختك جابرته على بنت عمي ديما ، والولد حالف ما يتزوج غير مزن
ام جابر : وانتي متى تبطلين تتدخلين في امورك اكبر منك ؟
تدخلت هند : الي سمعته صدق يا ام جابر ؟
ام جابر : وانتي ما تعرفين جوري وسوالفها
جنى بتدخل : ايه صدق يا خاله ، بالله ترضين اخونا يتزوج وحده ما يبيها ؟
هند : لا والله ما ارضاها لا عيالي ولا عيال اختي ، وليه رافضه البنت وش زينها ، ناظريها طول وحسن وزين خلي عنك بنت سماح
ام جابر : البنت حاجزينها ولا ابي اتشرهه في الناس
هند : وليه تحجزينها الله يهداك ، الولد ما يبيها وليدك وحيدك تجبرينه على وحده ما يبيها وتظلمين المسيكين ، لا توقفين بطريق احد يا منيره ، الولد اختار وخليه يتحمل اختياراته لا يجيك بكره ويقول انتي اخترتيها
ام جابر : وانا شقول للعرب وين اودي وجهي ، كليوم اقولهم بكره بكره ، البنت ابيها لولدي
هند : يا بنت الحلال لا تتدخلين في حياة ولدك ، خليه يختار بنفسه ، وش حلاتها البنت الي اختارها ، خلي عنك بنت سماح ، نصيحه يا خيتي لا تجبرين ولدك على وحده ما يبيها ما تدرين يمكن يطلقها من اول ليله ، وما اذكرك يا منيره رديتي لجابر طلب دايم والكل شاهد طلباته اوامر عندك
ام جابر بتنهيده : وانا ما جبرته الا من حبي لولدي ، والله يهديك يا هند ما يغير قراراتي غيرك
ابتسمت جوري وبصراخ : يعني وافقتي يمه ؟؟؟
ام جابر وهي تناظر مزن : ايه ، والله يكتب لهم الخير
صرخت جوري وهي تركض : وين جابر بروح اعلمه
انتبهت مزن لنظراتها ولزمت مكانها وهي ود ودها تلحق جوري وتشوف جابر ، اخفت فرحتها قدامهم وهي مستحيه من نظراتهم لها

"صلو على محمد"

-قصيد-
انصدمت من سؤال معن وبلعت ريقها : وين الغيرة في الموضوع ، خليتك تسولف معها وتاخذ راحتك اخاف وجودي يزعجك
معن : لو كان يزعجني ما جيتك ، المهم ما تبين تاكلين؟
قصيد وهي تخفي جوعها : مصحيني من النوم عشان تسال ذا السؤال ؟
معن : قلت يمكن جيعانه
قصيد : ماني جيعانه
معن بهدوء : تشربين كوب قهوة معي ؟
بلعت ريقها : وين ؟
معن : بمكتبي بخلص كم ورقة وانتي عرفيني عليك
قصيد : بفكر وبعطيك خبر
وسع عيونه من قفلت الباب بوجهه ، وتوجه لمكتبه
-
ركضت وهي تسحب جوالها وترسل لرهام وتتصل عليها
رهام بانزعاج : هاهه خير وشتبين ؟
قصيد : قالي تعالي اشربي معي قهوة ، اروح ولا بسرعه ؟
رهام : روحي روحي ، يمكن يجيب شي مع القهوة يسد جوعك
قصيد : بس اتوتر اقعد معه لحالي
رهام : قولي اتوتر اكلمه بهدوء وبدون هواش ، اقول روحي بس
قصيد : بروح على مسؤوليتك
رهام : سوي نفسك ثقيله لا تكبين العفش
-
طلعت من محادثتها مع رهام وارسلت لمعن : اشرب قهوة عربية اذا ما عندكم اشرب شاهي
قرأ رسالتها وعرف انها وافقت وكتب : ثالث غرفة على يسارك
قرات رسالته وبدلت بجامتها وسحبت جوالها وطلعت
وهي تدور الغرفة الي يقصدها ، عدت الغرف ووصلت عند الثالثه وهي تدق الباب ، وصلها صوته ودخلت
وهي تشوفه جالس بمكتبه والاوراق والملفات قدامه
تقدمت وهي تناظر المكتب ونطقت : كل ذي المساحة في الاخير ما يدخلها غيرك ؟ وشذا التبذير
معن وهو يوقع الاوراق : المساحة ذي محد قد جرب يدخلها غيري
ابتسمت وقالت : بس انا دخلتها
معن وهو يرفع راسه لها : عساك فهمتي ليش سمحت لك تدخلينها من بين كل الناس ؟

-جابر-

كان بالمجلس ويصلي العشاء، وهو حاس بجوري الي دخلت وهي تركض ووقفت عنده : خلص خلص
كان يصلي بكل خشوع ومتجاهل الي بجنبه وتناقز
ناظرت جنى الي دخلت بحماس : جابر اخلص عندنا خبر يخليك تسجد سجود شكر
جوري بحماس وهي تناظر جابر وهو يسلم: سلم سلم
رفع راسه لها : وشعندك فوق راسي ؟
جوري بحماس وبصراخ : امي وافقت تتزوج مزن
وسع عيونه وفز وهو يوقف قدامها وبعدم تصديق : بذمتك ؟؟
جوري: وربي البيت
ضمها وهو يشد على ضلوعها ودار فيها بالمجلس بوسط ضحكات جوري وصراخها ، تركها من قالت :المفروض تحضن مزن مو انا
جابر بفرحه : وينها ؟؟ وينها فيه ؟
جنى بضحكة : بالصاله مع امي
طلع بسرعه وطلعوا وراه البنات ، ناظر امه والابتسامة شاقه وجهه ، تقدم لعندها وهو يبوس راسها
هند : بغيتي تحرمينا ذا الابتسامة يا منيره
ابتسم جابر وهو يسلم عليها ، ولف على الي قاعدة وناظرها بابتسامة وهو وده يضمها ، انتبه لنظرات خواته وقعد بجنب امه وهو يحاول يمسك نفسه
ام جابر بابتسامة : ما وافقت الا لرضاك وفرحتك ، الله يوفقك يا وليدي
جابر : اهمشي انتي راضية يمه
ولف على جوري الي قالت :يالله متى الزواج ؟ ابي ارقص
ام جابر بضحكة : بالاول نكتب كتابهم
جوري : بروح ابشر البناات
ناظر الي قامت وهي تلحق جوري وهي مستحيه
-
جوري بضحكة وهي توصف الموقف لمزن : تخيلي كان يصلي وقلت لها وقام ضمني اهخخ يحلو حضنه بس ، ما كان الا شوي ويدخلني بين ضلوعه
مزن : احسني مستحية من اخوك
جوري : ، الظاهر بيجيك الي اكثر مني وازود
لفوا ثنتيهم على الي يدق الباب ، توترت من سمعت صوته
جوري : ما تقدر تصبر انت ؟
جابر : امي تبيك انتي
جوري : تبيني ولا تصريفه منك ؟
جابر : بتنزلين ولا ادخل
جوري : نازله اصبر
وناظرت مزن الي تأشر لها وتهمس لها "لا تخليني لحالي"
جوري بهمس : شدعوه تستحين وهو بيصير زوجك
وتركتها وهي تطلع

يتبع.....

شَمسُ البلاد معجب بهذا