بعد الفقر جابت شريحة وجوال
يسعد مسا جوالها والشريحه


كانت تجيني تشتكي قلة المال
وتصيح لاجا طاري الفقر صيحه


تقول أبويه دايم الدوم رحال
وأمي كبيرة سن دايم طريحه


وأنت الوحيد اللي لك القلب ميال
دايم يصارحني وأنا له صريحه


طفله وأنا معشوقها بين الأطفال
جريح حب وطاح له في جريحه


كنا سوى نرسم على التربه آمال
وأحلام تقتلها الحياة الشحيحه


كم دمعةٍ كانت على الخد تنهال
وإذا نزلت ضاقت على الفسيحه


الله كم صرخة وهمسه وموال
الله كم جادت علينا القريحه


خيل لوما في السماء برق وخيال
وأقول أنا (عزازي) وأنتي مليحه


تقول لا حطيت لك بشت وعقال
وسخر لك الرحمن عيشه مريحه


أخاف تتركني على عثرة الفال
للفقر ووجيه الحياة القبيحه


وحبيتها بين الخلايق والأزوال
حبٍ يطول الوقت محدٍ يزيحه


وسلمتها قلبٍ تباريه الأهوال
وطاح الخفوق وطيحة القلب طيحه


راحت وخلتنى مع القيل والقال
شاعر صواريف الدهر تستبيحه


ودار الزمان وغير الحال بالحال
وجاها الزمان بكل ورده وشيحه


فلة وخدامه ولكزس وجوال
وأنا عجزت أدفع رسوم الشريحه