شبكة همس الشوق - عرض مشاركة واحدة

7 - 3 - 2014, 05:09 PM

في المستشفى .. عند الدكتور محمود ودانا ..
د.محمود: انا ابي اعرف ايش حالته بالضبط ..
الطبيب: صراحتا حالته وما اخفي عليك .. جدا سيئه .. وكلمة سيئه قليله بحقه كثير .. حالته دمار ..
د.محمود: يعني كيف ..؟!
الطبيب: هو استنشق الكثير من الغازات .. معضمها خانق وخطير .. وهذا الغاز سبب له انسداد في مجرى التنفس وتضخم بعض الاورده العصبيه .. وتلف في الغشاء الباطني للانف .. واحتكاك واحتراق غشاء المعده الاجوف .. وسبب في تصلخ جدار البلعوم والمريء .. هذا غير عن الجهاز التنفسي اللذي تــ......
د.محمود: بـــــــــــــس .. خلاص يا دكتور ما عاد اقدر اسمع اكثر من جذي ..
وجلس عالكراسي .. وحط راسه على ايده وهو حاس بالذنب .. لو انه ما راح كان اللحين قدر يسيطر عالوضع .. بس خلاص .. فات الفوت ..
حط الطبيب ايده على كتفه وقال: قل لن يصيبنا إلا ما كتبه الله لنا .. هذا قدر ومكتوب .. صحيح ان الحاله خطره جدا .. وعلاجها جدا خطر .. بس مو مستحيل وخل ايمانك بالله قوي .. ان اراد الله له انه يعيش راح يعيش حتى لو الامر مستحيل .. وإن اراد ان يموت راح يموت حتى لو كان في كامل عافيته .. انت ادعي ربك وانشالله تنجح العمليه ..
د.محمود بهدوء: بتصلحون له عمليه ..؟!
الطبيب: ايه .. بس مو عمليه وحده .. احتمال اكثر .. والله معانا ..
فهز د.محمود راسه بتعب وهم وحزن .. فقام وقال: بأتصل بأهله عشان يوقعون على العمليه ..
فراح واتصل بأهلها وبعد ساعه وصلوا .. عرفوا اللي صار ووقعوا عالموافقه ..
في جهه اخرى من المستشفى .. كان سامي ويزيد وصالح وعماد موجودين قدام الدكتور المصري ..
الدكتور: لا لا حالة صاحبكم متل الفل .. ما تخافوش عليه .. صحيح كان في حاله صعبه بس اللحين كويس .. عملناله اعادة تنفس ونبض وصار عال العال ..
سامي: يعني انت متأكد ..؟!
الدكتور: احلفلك يعني عشان تصدئ ..
يزيد: احنا مصدقينك .. بس حابين نشوفه ..
الدكتور: ما ينفعش دي الوئتي ..
سامي: وليش ما ينفعش ..؟!
الدكتور: هو تحت تأسير المهدئ .. وما ينفعش تشوفوه .. لما بيصحى بنادي عليكم .. مفهوم ..
صالح: طيب متى يصحى ..؟!
الدكتور: يمكن بعد ساعه او ثنتين ..
سامي: عيل انا بنتضره ..
عماد: وانا بقعد معاك ..
صالح: انا بروح اودي جنطتي واطمن الاهل وبأرجع ..
يزيد: سامي ما قلت لنا عن عادل .. هو فينه ..؟!
صالح: ايه صح وينه ..؟!
سامي: ما ادري ..
عماد: شلون ما ادري ..
سامي: اللي اعرفه هو ان الدكتور محمود اخذه للمستشفى ..
يزيد: عيل اكيد هو في ذا المستشفى .. لأن هذا المستشفى هو اقرب مستشفى من الجامعه ..
عماد: خلونا نسأل في الاستقبال عشان نتأكد ..
يزيد: طيب تعال معاي ..
فراح عماد ويزيد عند الاستقبال ..
صالح: عيل بيلس معاك لين يردون ..
سامي: لا عادي روح .. محد بياكلني ..
صالح: حلو انها يت منك ..
طالع سامي فيه بدهشه فقال صالح: شفيك مصدوم .. عادي .. يعني انا متأكد انك بترفض فقلت بأختصر الطريج .. بااااااي ..
وراح .. فتنهد سامي وجلس على كراسي الانتضار .. وحاس نفسه مهموم .. كيف ما ينهم وصاحبه واعز اصحابه في المستشفى ..
فتذكر اروى فقال: ياترا ايش صار لها ..؟!
فأخذ جواله واتصل عليها .. بس محد يرد ..
نرجع لدنو ..
وقعوا عالعمليه .. فدخلوها غرفة العمليات .. وعادل وامه جالسين قدام غرفة العمليات والام مقطعه نفسها من البكى ..
عادل: يمه خلاص ما يصير جذي .. البجي ما راح يغير شي من الواقع .. المفروض تدعين لها مو تصحين ..
الام ببكاء: هذي بنتي الوحيده .. تعرف شنو يعني بنتي ..؟! ياويل حالي عليج يابنتي .. وعلي عليج يا دانا ..
عادل: يمه كافي بجي .. ادعيلها .. هي محتاجه دعاج يايمه ..
فبدت الام تدعي وتبكي في نفس الوقت ..
وبعـــــــــــــد ســـــــــــــاعـــــــــــــتـــــــــــــيــــــ ـــــــن
طلع الدكتور من الغرفه فقامت الام جري عنده وقالت: ها بشر .. شفيها بنتي ..؟!
الدكتور: صراحتا صدمتوني .. ليش ما قلتولي من البدايه انها بنت عشان نكتب في ملفها انها دانا ..
عادل: سوري بس انا واختي نتشابه .. فدكتور جامعتنا حسبها انا .. وعشان جذي قال انها ولد واسمها عادل ..
الدكتور: اها ..
الام: دكتووووور بنتي شفيها ..؟!
الدكتور: الحمد لله صلحنا العمليه وتمت بخير .. بس باجي لها عمليتين غير هذي ..
الام: لييييييييييييييييييش ..؟!!!!!
الدكتور: قلت لكم قبل كذا ان حالتها حيل خطره .. وتحتاج ثلاث عمليات ..
فجلست الام على الكرسي بإنكسار وقالت: يا حياتي يا دانا .. الله يجازي اللي كان السبب .. لا حول ولا قوة إلا بالله ..
وبكت فقال الدكتور: استهدي بالله ياخاله .. انشالله ما بيصير إلا كل خير .. واللحين بنوديها للعنايه المركزه ..
عادل: والزياره ..؟!
الدكتور: معليش بس الزياره ممنوعه لين تخلص كل العمليات ولا بيكون هذا خطر عليها ..
الام: وليش .. انا ابي اشوف بنتي ..
عادل: يمه ما يصير تشوفينها .. العمليات متصله ببعضها وخطر عليها انج تشوفينها ..
الام: هذي بنتي يا عادل وابي اشوفها ..
عادل: يقولون خطر .. يمه انتي تبينها تموت ..؟!
الام: لا ..
عادل: عيل اصبري كمن يوم بعدين تشوفينها ..
فبكت الام وقالت: بصبر بصبر ..
خرجوا دانا من غرفة العمليات وودوها العنايه المركزه .. اما عادل فكان طول هذي الفتره متوتر وياكل في اظافيره ..
وبعد مده قامت الام وقالت: ياللا يا عادل خلنا نروح البيت ..
عادل كان سرحان وما سمعها ..
فحست فيه وقالت: عادل ..
عادل: ها ..
الام: في شنو كنت سرحان ..؟!
عادل: في دانا والجامعه ..
الام: وليش ..؟!
عادل: اخاف الدكتور اللي يابها يجي مره ثانيه عشان يطمئن عليها فيقول له الطبيب انها بنت .. وبجذي راح تنكشف دانا وتعرض للمحاكمه ..
فشهقت الام وقالت: شنــــــــــــــــــــــــــو ..؟؟؟!!!!!!!
فهز عادل راسه وهو حاس بتوتر وخوف وارتباك ماله حدود ..
فعض على اظافره وقال: اكيد حيجيبون لها الشرطه عشان يحققون معها في سالفة الجامعه والغاز فيعرفون انها بنت .. يعني جذي ولا جذي بتروح دانا فيها .. انا هو الغبي لأني وافقت .. غبـــــــــي ..
فجلست الام عالكرسي وبكت وقالت: ليه يصير لج كل ذا يا دنو ليش ..؟! يعني مافي حل .. مافي حل ..
فطالع عادل فيها وقعد يفكر بحل مع انه متأكد مليون بالميه انه مافي حل ..

================================================== ==================

/.. عند قصر آرثر ..\
وقف سيارته في كراج السيارات .. وراح ودخل القصر وهو حاس بضيق شديد .. اتصل عليها اكثر من مره بس ما ترد ..
حاس الجامعه كلها وهو يدور عليها بس ما لقاها .. سأل صاحباتها بس ما يدرون عنها ..
من الصباح لييين الساعه ٥ العصر وهو في الجامعه يدور عنها .. بس فضت الجامعه وهي مالها اثر .. فتوقع انها راحت للبيت ..
لعن نفسه وحركاته اللي قبل .. لو ماكان كذا كان اللحين كل شي تمام ..
رمى نفسه عالكنبه بتعب فجت اليزا وقالت: اهلا عزيزي آرثر .. لماذا تأخرت اليوم ..؟!
طالع فيها وبعدين لف وجهه عنها بضيق ..
جلست جنبه وحطت ايدها على كتفه وقالت: لما انت غاضب ..؟!
فطالع فيها فتره .. فتخيل بدالها اسيل جالسه وتقوله شفيك معصب .. فأبتسم .. بس تلاشت الابتسامه اول ما استوعب انها اليزا ..
فقام وقال: سأصعد لغرفتي ..
اليزا: هل تناولت غداءك ياحبيبي ..؟!
آرثر: لا ولا اريد ..
وطلع لغرفته ..
فجلست عالكنبه بإبتسامه وقالت: انه غاضب .. هذا يعني ان سهى قد اخبرت اسيل بكل شي امام ناضريه ههههههههههههههههههههه ..

جلس آرثر على سريره بتعب .. فقام وشغل اغنيه من اغاني "آريانا" عشان يهدي من نفسه ومن توتره ..
يفكر ويفكر .. ما يدري ايش يسوي .. ما يدري كيف يقنعها .. ما يدري كيف يفهمها .. هو كذب عليها من البدايه ..
فتذكر محادثه دارت بينه وبينها ..

:::::::::::::::::::::::::::::::::::::::::::
اسيل: آرثر بسألك سؤال ..
آرثر: اسألي ..
اسيل بهدوء: آرثر .. انت اول قلت لي في الموبايل انك عرفت بنات كثير .. يعني انت من جد زي ما يقولون انك حق بنات ..
فسكت آرثر وما رد ..
فطالعت فيه اسيل وقالت: نبغى نكون من بدايتها على صراحه .. لأني انا اكره اللي يجذب .. مهما كانت الحقيقه مره اهون عندي من الجذب .. واللي يجذب علي انا ما اسامحه ..
آرثر بإرتباك: اسيل انا ..
اسيل بإبتسامه: انت اكيد عرفت بنات قبلي .. بس اكيد ما صار بينكم شي ..
آرثر: .......................
اسيل: صح يا آرثر ولا لا .. لانك انسان مسلم ومستحيل تسوي شي حقير زي جذا .. صح ..؟!
فسكت آرثر فتره طويله وبعدين قال: صح ..
اسيل بإرتياح: ووووه حلو .. توقعتك من ذي الفئه من الناس .. لأني ما احب اللي يتلاعب بالبنت بالطريجه الحقيره ذي و....
آرثر: اسيل غيري السالفه ..
اسيل بإستغراب: ليه ..؟!!!
آرثر: .....................
اسيل: اوكي خلاص .. اغير السالفه ..
:::::::::::::::::::::::::::::::::::::::::::::::::: ::::::::

رمى آرثر جواله عالارض بعصبيه .. هو الغلطان لو اعترف لها في ذاك الوقت كان ما صار اللي صار ..
مسك راسه اللي بدأ يصدع وقال: ليه سكت ..؟! ليه ما تكلمت واعترفت ..؟! ليه كنت جبان وخواف ..؟! ليـــــــــــــه يا احمـــــــــــــق ..؟!
فقعد يتردد في باله كلام اسيل ..
::::::::::: نبغى نكون من بدايتها على صراحه .. لأني انا اكره اللي يجذب .. مهما كانت الحقيقه مره اهون عندي من الجذب .. واللي يجذب علي انا ما اسامحه .. :::::::::::::
فحط ايده على راسه لأنه يحس بصداع شديد ..
انــا ما اسامحــــه
انــــا ما اسامحــــــه
انــــــا ما اسامحــــــــه
انــــــــا ما اسامحــــــــــه
انــــــــــا ما اسامحــــــــــــه
انــــــــــــا ما اسامحــــــــــــــه
انــــــــــــــا ما اسامحــــــــــــــــه
انــــــــــــــــا ما اسامحــــــــــــــــــه
انــــــــــــــــــا ما اسامحــــــــــــــــــــه
هذي الجمله ترن وترن وترن في اذنه بقوه وتواصل ..
رفع على صوت الاغنيه وما زالت هذي الكلمه ترن في اذنه والصداع يزداد ..

================================================== ==================

.. عند لبنى .. وفي المغرب .. وداخل غرفتها ..
كانت منسدحه عالسرير وتفكر .. تفكر في اليوم واللي صار اليوم .. ابتسمت لمن جاء في بالها فارس .. ماتدري ليه تبتسم كل ما جاء طاريه على بالها ..
فتذكرت كلام اسيل لمن تقولها ان فارس يسلم عليك وانه يحكيني عنك كثير ..
قطع تفكيرها صوت الباب يدق .. فقامت وفتحت الباب فشافت انها اختها بشاير ..
بشاير: سنه تفتحي الباب ..
لبنى: شو بدك ..؟!
بشاير بحقد: امي تبيك ..
لبنى: ليش بدياني ..؟!
بشاير: وانا شدراني وياللا انزلي وبلا كثرة حكي وهرج ..
ونزلت بغرور وثقه زايده شوي .. فتنهدت لبنى بعدين نزلت وراها للصاله .. فشافت الام جالسه هي والاب ..
جلست بشاير وقالت: أهي يت ..
الام: صح النوم .. جان تأخرتي شوي .. باجي بدري ..
فجلست لبنى وقالت: نعم ..
الام: نعامه ترفسج لين تموتج عشان نفتك منج ..
لبنى بصوت منخفض: انشالله لإلك عشان ارتاح ..
الام: شنو قلتي ..؟!
لبنى: لا سلامتك ياعمتو ..
بشاير: انا متأكده انها سبتج .. بس خساره ما قدرت اعرف وش قالت ..
لبنى: احسن ..
الاب بعصبيه: لبنـــــــــــــى .. خليج محترمه فاهمه ..
لبنى: طيب ..
الام: احنا ناديناج عشان نعرف شصار اليوم في الجامعه بالضبط ..
لبنى بإستهزاء: ليه .. الجاسوس بتاعك ما خبرك ..؟!
الام بعصبيه: لبنوه وصمخ .. سكتي لا اتوطى ببطنج ياجليلة الحيا ..
الاب: لمن عمتج تسألج سؤال تياوبين بأدب لأكسر لج راسج فاهمه ..؟!
لبنى: طيب ..
الاب: ياللا ياوبي شصار اليوم ..؟!
لبنى: طلع لنا غاز من مخــ.......
الاب: انا ما اقصد ذا ..
لبنى: اذا شو قصدك ..؟!
الاب: انا اعرف اللي صار .. بس سؤالي كان عن شصار لمن تجمعتم في القاعه ..
ففهمت قصده وقالت: اها .. انت عم تسألني اذا احتكيت بأي راجل .. اطمئن ما صار شي من اللي ببالك ..
الام: جذابه ..
فطالعت لبنى فيها بتحدي وقالت: ليه عندك دليل يا مرت ابي ..؟!
الام: ما يحتاج دليل ما دامج بنت نورا ذي الفاجره ..
فأنفعلت لبنى وبقوه .. بس مسكت نفسها وقالت بإستهزاء: انا اعرف ليش عم تسبي امي كل شوي .. عشانك بتغاري منها .. فإمي احلى منك ووجها صافي مو متل وجهك اللي كلو نبش وحروق وحبوب ..
فعصبت الام وجت بتصارخ بس سبقها الاب اللي قال: لبنــــــــــــــــــــــــــى ....
فلفت لبنى على ابوها وقالت: نعم ..
الاب بعصبيه: بسرعه وبدون اي كلمه روحي سلمي على راس عمتج وتأسفيلها وإلا مايصير لج خير ..
ففتحت لبنى عيونها بصدمه وقالت بإستنكار: انا .. انا اعتذر ليها ..؟!!!!!
الاب: انا قلت بدون اي كلمه ..
فلفت لبنى على الام اللي كانت تصطنع انها زعلانه ..
بشاير: اتوقع سمعتي ابوي شقالج ..
لبنى بنرفزه: حطي لسانك جوات حلقك واسكتي ..
بشاير بزعل: بابا .. شوفلها ..؟!
الاب: لبنـــــــــــــوه وويعه ..
لبنى: آسفه بابا بس ما بدي اعتذر ..
الاب: اذن ترفضين يا لبنى ..؟! عيل طلعي لغرفتج ولا تخرجين إلا لمن اييج ..
لبنى: طيب ..
وطلعت غرفتها فقالت بشاير: ابوي .. ليه ما خاصمتها لأنها سكتتني ..؟!
الاب: لأنج انتي الغلطانه يا بشاير .. انا ما احب احد يتدخل في اي موضوع وانا موجود .. فلا اشوفج تعيدينها يا بشاير وانا موجود فاهمه ..؟!
فعصبت بشاير وطلعت فوق .. فقالت الام: ناصر .. ليش زعلتها ..؟!
الاب: يا حبيبتي انا ما قصدي ازعلها .. بس هي زعلت والسبب تافه وما يستاهل ..
الام: شلون ما يستاهل ..؟! يعني كأنك بجذي تفضل لبنى على بشاير ..
الاب: لا ابدا .. ما قصدي جذي ..
الام بزعل: بس اللي يسمع كلامك يقول ان قصدك جذي ..
الاب: ولا يهمك .. بطلع اراضيها اوكي ..
الام بإبتسامه: مشكور حبيبي ..
الاب: يا حياتي انا ..
اما بشاير فطلعت وهي معصبه .. معصبه لأن ابوها سافهها وما خاصم لبنى .. راحت لغرفة لبنى ودقت الباب عليها .. وبعد شوي فتحت لبنى الباب ..
لبنى بإستغراب: بشاير ..؟!
بشاير: ايه بشاير .. انا يايه اقولج كلمتين ورايحه .. راح تندمي .. تعرفي شنو يعني راح تندمي ..؟! ما عاش اللي يتسبب في زعلي يا لبنى .. وحتشوفي الويل مني ..
لبنى: اها .. جايه تهدديني ..!!! ايييه تصطفلي انتي والويل بتاعك .. على اساس انك بتخوفيني اللحين ..
بشاير بعصبيه: اوكي يا لبنوه وحتشوفي .. وبعدين تقولين بشاير قالت ..
فقفلت لبنى الباب في وجهها .. فعصبت بشاير ورفست الباب برجلها وراحت لغرفتها ..

================================================== ==================