شبكة همس الشوق - عرض مشاركة واحدة

12 - 3 - 2014, 12:01 AM

|$[ البآرت الحادي عشر الجزء الاول ]$|

هزت راسها بلا بعدم تصديق ..
شلون صديقتها ورفيقتها تطلع لقيطه ..؟!
اكيد .. اكيد هذي اشاعه ..
عصبت وانقهرت ..
مين الوقح هذا اللي يتجرأ يسوي مقلب زي كذا ..؟!
قرأت الرساله مره ثانيه اللي كان نصها ::

(( لا يفوتـــــــــكم خبر خطيييير ..
وحده اسمها اسيل عبد الرحمن فيصل الرملي سنه اولى شعبه ب ..
حقيقه خطيره عنها وهي انها بالأصل مب بنت عبد الرحمن الرملي ..
تربت معهم تحت اسم بنتهم الميته وهي بالأصل::
لقـــــــــيطـــــــــه .... : )
اللي مو مصدق او حاب يستفسر اكثر يجي يسألني ..
انا ناصر في نفس الكلاس ..
اتمنى انها ما توقف هالرساله عندكم وانشروها اكثر لأن هالواطيه بنت الحراام تستحق الفضيحه ..
سلاااااام لكل الطلاااااب والطااالبااات )) ..

ضغطت عالجوال بعصبيه وقالت: شكله هو نفسه ناصر اللي اسيل ما تطيقه .. حسبي الله عليه .. صدقت اسيل لمن قالت انه واطي ..
اتجهت للشله ولمن شافت اشكالهم عرفت على طول انهم عرفوا عن اسيل ..
ندى: السلام عليكم ..
لفوا عليها وقالت لين بسرعه: سمعتي شنو صاير ..؟! شفتي ناصروه الواطي وش صلح ..؟!
هزت ندى راسها بهدوء وجلست ..
سارا: اقسم بالله ان هالحقيير لازم يتربي .. يالله قاهرني قاهرني وايد .. شوي وابجي من حركته .. حسبي الله عليه ..
ليان: المفروض ما يشوه سمعتها جذي ..
وسن: اكيد غلط .. اسيل مو جذي صح ..؟!
لين: تكيد غلط .. هالوااطي يبيله تربيه .. حقققيير ..
طالعت ندى فيهم فتره بعدين قالت: هو واحد من اثنين .. اما ان يكون صاج فـ.....
قاطعتها لين: مستحيــــــــــــــــــل ..
اشرت ندى بإيدها بمعنى انتضري وكملت: اما يكون صاج في كلامه واما تكون جذبه ودنائه منه .. لازم اولا نسأله ونشوف ..
سارا: اكيد جذاب .. شلون تكون لقيـ... آآه حقيير وايد ..
ليان: خلاص خلونا نسأل مع اني متأكده انها جذبه عشان يستفز اسيل وبس ..
لين بقهر: الناس يجذبون بس مو جذي .. واططططي ..
سارا: ياخوفي يكون جذاب ولمن نسأله يجذب ويقول ايه ان الكلام صج ..
ليان: عيل ما نقدر ناخذ منه جواب اكيد ..
تنهدت ندى وآلاف الافكار تجي في راسها ..
ليش اسيل عيونها غيير عن اخوانها ..؟!
ليش مافي شبه بينها وبين تؤمها فارس ..؟!
ليش غايبه لها اكثر من عشر ايام وموبايلها مغلق ..؟!
ليش وليش وليش ..؟؟!!!!
هزت راسها تبعد هالتساؤلات اللي تشككها في حقيقة رفيقتها اسيل ..
ندى: تعرفون منو اللي عنده الجواب الصج ..؟!
ليان: منو ..؟!
ندى: اسيل .. انا بروح اليوم لبيتها وأتأكد بنفسي ..
لين: ايه بلييز يا ندى واللي يسلمج اسأليها لأنه بجد الخوف دخل لقلبي ..
سارا: اول ما تتأكدين اتصلي علي وطمنيني .. ما فيني اصبر لباجر ..
ندى: اوكي ..
طالعوا لبعض وقعدوا فتره ساكتين وتفكيرهم كله في ::
صـــديـــقـــتـــهـــم اســـيـــل ..
خبر فاجئهم ومو مصدقين بس المشكله ان قلبهم قارصهم وكأنه يقول ان الخبر صدق مو كذب ..

.................................................. ..........

نزل من سيارته وقفلها وراه بقوه ..
مزاجه هالصباح زززفت جججدا ..
دخل الجامعه وهو يمشي بعربجيته المعهوده المعروفه ..
اكيد هو راشد الشعلان ..
ماشي وهي تفكيره كله في شادي ..
راشد في نفسه: " بزر وااطي .. وين بتهرب مني .. بأطلعك من تحت الارض يعني بأطلعك .. ما اكون انا راشد الشعلان نار وبركان ان ما أدبتك .. اللحين هالبزر هو سبب كل المصايب اللي تصير لي ..؟! هييين" ..
جلس عند شلته من دون سلام ولا كلام ..
راشد في نفسه: "والست شهد تقول مدري وين راح وتمثل علي بجم دمعه .. والله اني متأكد انها عارفه بس انتظريني يا شهدوه .. ان ما خليتج تعترفين ما اكون ولد الشعلان" ..
ايمن: هيييه يا ابو الشباب رد علينا وعبرنا ..
راشد في نفسه: "الله يقطعك يا شادي انت والبويه حقتك .. جسمي احرقني من كثر ما فركوا فيه عشان يطلعوه .. آخخ من هالبزر النتفه" ..
عزوز: راشــــــــــــــــــد ..
راشد في نفسه: "زودتها شهد بزياده .. المشكله اني ضاربها ومهزئها لأنها يابت اخوها وسيم فما اكتفت ويابت الثاني .. ما عاد باجي غير الثالث والرابع .. اكيد مويودين في بيتي" ..
متعب: شفيه الاخ مسافهنا ..؟!
سليم: شوفوا كيف علامات الغضب على ويهه ..
ايمن: ههههه عادي هذي مو اول مره يعصب ..
عزوز: رشــــــــــــــــــود ..
طالع راشد فيهم وقال: خييير ..
سليم: شفيه ويهك جذي ..؟!
راشد: شدخلكم ..؟!
عزوز: شكله صار شي في البيت خلاه يعصب ..
ايمن: اقول راشد عندي لك خبر خطييير وطازج ..
طالع راشد فيه وقال: اكيد خبر تافه ..
ايمن بإبتسامه: لا ابدا .. مو انت تتسائل ليش اسيل غايبه ..؟!
راشد بإهتمام: عرفتم ليش ..؟!
ايمن: كل الجامعه عرفت مو بس احنا ..
راشد بإستغراب: كل الجامعه ..!! شسالفه يا ايمن ..؟!
ايمن: انت ما تدري ان البنت بالاصل ماهي اسيل ..
زاد استغراب راشد وهو يقول: شتقصد ..؟!
ايمن: البنت مات ابوها وبعد ما مات انكشفت كل الاوراق .. اكتشفت من بعدها انها ما كانت بنته ابدا .. بإختصار اسيل لقيطه وعبد الرحمن رباها تحت اسم بنته اللي ماتت ..
فتح راشد عيونه بصدمه وهو يقول: لقيطـــــــــه ..؟؟؟؟!!!!
ايمن: وهذا الامر انتشر بالبلوتوث في كل انحاء الجامعه .. وعلى قولت اخواننا المصريين: دا فضيحتها بئت بقلاقل ..
سليم: شكله هذا هو السبب الرئيسي اللي خلاها غايبه كل هالمده ..
عزوز: خجلانه من نفسها ومن فضيحتها هههه ..
متعب: ياخي احسن انها غايبه .. محنا ناقصين وحده من الشارع تيي وتشوه سمعة هالجامعه ..
سليم: معاك حق .. بس كان بودي اشوف ويهها حاليا كيف صار ههه ..
طالع ايمن في راشد السرحان وقال: هيـــــــــه في مين سرحان ..؟!
طالع راشد فيه وقال بعدم اهتمام: واذا كانت لقيطه عادي .. هالامر ما يهمني ابدا ..
ايمن بدهشه: هذا هو ردك .. توقعت بتطير من الحماس والفرحه ..
راشد: صحيح اني شري ومشكلجي بس مو لدرجة اني اتشمت بوحده لقيطه .. معليش يكفي الشماته اللي سويتها لمن توفيت ام شهدوه .. احس هالشي حرام ..
ايمن: هيه شباب الحقوا .. راشد الشعلان يقول حرام ..
متعب: لا لا معقوله عندك قلب ..؟!
عزوز: اكيد هالحجي طالع من ورى قلبك صح ..؟!
سليم: ههههه فهمت انت قاعد تتشمت بس بطريجه ملتويه ..
تأفف راشد وقال: سخييفيييييين ..
قام ورفع شنطته وابتعد عنهم ..
اتجه لكلاسه وهو يقول في نفسه: "لقيطه ..؟؟!!! اسيل لقيطه .. لا لا اكيد جذب .. هذي ميرد اشاعه جاذبه" ..
دخل كلاسه وتفكيره كله في اسيل ..

.................................................. ................

ماشيه بين الطلاب وعينها تلف فيهم ..
قاعده تدور عن الشخص اللي في بالها ..
هي جايه اليوم وتفكيرها كله في فيها .. تبي تقطعها بأسنانها ..
مقهوووره وحالفه انها ما تخليها بحالها ..
طلعت جوالها واتصلت عليها .. وكالعاده مغلق ..
قفلت الجوال بقهر وهي تقول: ما ترد هالجلبه .. مقفله موبايلها عشان تفتك مني .. هين ما اكون انا حموود ان ما قطعتج بأسناني يا بيشوه الحقيره ..
رجعت الجوال في شنطتها واتجهت لكلاس بيشو ..
دخلت وجت عند وحده وقالت: هيه انتي ..
طالعت البنت فيها وقالت: نعم ..
غيدا: وين بشرى الطالبه اليديده الغبيه اللي في كلاسكم ..؟!
البنت: قصدج بشرى الـ******* ..
غيدا: ايه هي ..
البنت: سحبت ملفها لأنها كانت راح تنطرد اصلا ففضلت انها تسحب ملفها ..
غيدا بقهر: ملعوووونه .. متى سحبت ملفها هالوقحه ..؟!
البنت: امس ..
غيدا: عساها بيني يمسها وما يطلع منها ..
طلعت والبنت تطالع فيها بإستغراب بس بعدين طنشت ..
خرجت غيدا وهي تقول: سحبت ملفها .. اللحين وين بلقاها ..؟! كله من تحت راس راكانوه .. هو اللي هددها بالطرد ..
وفعلا اتجهت لمكتب الدكتور راكان .. معصبه وتبي اي شي تفرغ غضبها فيه ..
فتحت الباب وشافت الدكتور جالس وحاط سماعات الآيباد في اذنه ويدقدق فيه ..
وقفت قدامه وقالت: دكتور ..
رفع راسه يطالع فيها وقال: نعم يا غيدا .. شبغيتي ..؟!
غيدا: ابي احاجيك ..
د.راكان: طيب تحجي ..
غيدا: طيب شيل السماعات عشان اقدر اتكلم ..
د.راكان: ليش .. مضايقتج ..؟!
غيدا: ايه ..
د.راكان: عيل انطري لين يخلص هالمقطع ..
تأفف وجلست عالكرسي تنتظره ..
طالعت في الغرفه بعدين طاح نظرها على اوراق فوق مكتب راكان ..
غصب عنها قزت في الاوراق شوي فأنصدمت لمن شافت انها حقت الاختبار حق يوم الثلاثاء ..
رفعت نظرها للدكتور وشافته منشغل بالآيباد ..
لعب الشيطان بعقلها وطالعت في الورق وهي تحاول تلقط لها كم سؤال ..
قفل الدكتور الآيباد فشالت نظرها عن الورق بسرعه ..
شال السماعات وحطها على جنب وقال: ها شبغيتي ..؟!
اخذ نفس وبعدها قالت: دكتور انت كنت راح تطرد بيشو صح ..؟!
د.راكان: هههههههههههههههههههههههههه ..
غيدا بقهر: شفيك تضحك .. ابي افهم ليش قلت لها انك بتطردها ..؟! لو ما قلت جذي جان ما تركت الجامعه ..
د.راكان: ههههههه ذيج البنت تحفففه .. هههه قلت اني بأطردها بس كان هذا ميرد كلااااااام .. لأني فعلا ما اقدر اطردها هههههههه .. انفجرت ضحك لمن سمعت انها سحبت ملفها ..
انقهرت غيدا اكثر وشوي وتبكي من القهر وهي تقول: طيب ليييييييه جذي يا دكتووور .. ليييه ..؟! ححراام علييك يا دكتوور ..
د.راكان: هههه بالعكس سويت خير لمن ابعدت وحده عن خويتها ..
تأففت وقالت: خلاص ما صارت خويتي .. كنت ابي اقططططعها بأسسسناني .. بسبتك فلتت مني ..
رفع حاجبه بإندهاش بعدين قال: برضوا صلحت خير بالبنت عشان لا تقطططعيها بأسسنانج ..
تذمرت في نفسها بعدين وقفت وقالت بقهر: مشكوور يا دكتور لأنك ترتكتها تفلت بذيلها .. شكرا جزيلا لك ..
د.راكان: ههههه لا شكر على واجب ..
خرجت من المكتب واتجهت لشلتها وهي معصبه ..
وصلت عندهم فقالت خلود: الحمد لله عالسلامه .. ليش هذا الغياب .. مو من عادتج ..
غدير: فاتج يا غيدا .. يوم السبت يت عندنا بيشو وقعدت تسب وتشتم فيج وتقول وينها هالجلبه ..
تهاني: شصار بينج وبينها ..؟!
جلست غيدا وحطت رجل على رجل وقالت: تخانقنا انا وياها .. بليييز لحد ييب طاريها .. والله لو يبتم سيرتها مره ثانيه راح يكون هذا آخر ما بيني وبينكم ..
طالعوا فيها بإستغراب وفضول وودهم يعرفون وش هالسبب ..
بس بطلوا لأن غيدا كانت جااااده ..
سكتوا فتره وعم الهدوء لدقايق وبعد شوي قالت خلود: سمعتي آخر الاخبار يا حموود ..؟!
غيدا بعدم اهتمام: وشو ..؟!
خلود: اسيل بنت ييرانكم طلعت لقيطه ..
طالعت غيدا فيها وما ردت .. فقالت غدير: انا اول ما سمعت الخبر انصدمت .. معقوله صار جذي .. بجد ما صدقت ..
تهاني: يمكن تكون ميرد اشاعه جاذبه ..
خلود: لا يا حبيبتي محد ينشر اشاعه جاذبه بذي الدرجه .. واااضح انه صج وخصوصا ان لها فتره طويله غايبه ..
غدير: خالد معاه حق .. حتى اللي نشرها حط اسمه وهذا يدل انه واثق ومتأكد ..
تهاني: بكيفكم بس المسأله ما دشت مخي ..
تكلمت غيدا وقال: لا فعلا صج .. انا ييرانهم ومتأكده ..
طالعوا فيها فقالت غدير: من امتى تعرفين ..؟!
غيدا: من الاسبوع اللي فات ..
طالعت خلود في تهاني وقالت: ها صدقتي ..
تهاني: مادام حمود قالت فهذا يعني انه صج .. بس بصراحه ذي صدمه كبيره .. اسيل كانت تعرف ولا لا ..؟!
غيدا: لا .. اول ما عرفت هربت من البيت ..
غدير: صحيح اني اكرهها وما اطيقها بس بصراحه حزنتني .. يوووه مستحيل اتحمل لو كنت بمجانها ..
تهاني: الله يعينها ..
طالعت غيدا فيهم فتره بعدين قالت: لحضه كأني بديت استوعب .. شتقصدون بأشاعه انتشرت ..؟!
خلود: نقصد انه انتشر هالخبر عبر البلوتوث وغير جذي يتني رسايل في الواتس عن هالخبر ..
غيدا: منو ذا اللي انشرها ..؟!
غدير: واحد في نفس كلاسها ..
غيدا: حركته بقمة الوقاحه صراحه ..
خلود: غريبه تدافعين عن اسيل ..
غيدا: هو مو حكاية دفاع .. بس نفس الحركه ما عجبتني .. ما دامه عرف فالمفروض يستر عليها ما يفضحها ..
غدير: فعلا معاج حق ..
خلود: انا اتوقع انه متهاوش معها وعشان جذي صلح جذا ..
تهاني: بصراحه غبي ..
هزت غيدا راسها وهي تقول: وايد ..

.................................................. ...............

تنهد بسام بتذمر وهو ماسك كتابه يذاكر في الكلاس ..
مو من عادته يتذمر من اي ماده لأنه بصراحه انسان متفوق جدا ..
بس ذي الماده الوحيده اللي معقدده بقوه ..
يكره يذاكرها لأنه ما يفهمها إلا بعد ما يجيه الصداع ..
رفع نظره عن الكتاب وهو يطالع في الكلاس ..
طلاب كلاسه هاليوم مو طبيعيين بنظره ..
يحس انه في سالفه مهمه يحكون فيها ..
عقد حواجبه يخمن الشيء المهم ..
بسام: يمكن فاز احد في برنامج ستار اكاديمي .. لا لا الوقت باجي بدري .. اممم يمكن فضيحه انتشرت لأحد الممثلين او المغنيات .. او نزل ألبوم يديد لأحد المطربين ..
سكت شوي فقال: ههههه اصلا كل يوم ينزل ألبوم .. يوم للمغني الفلاني ويوم للمغني العلاني ..
انتبه لطالبه جايه عنده ..
وقفت وقالت بإبتسامه: ممكن ايلس ..؟!
ابتسم وقال: ايه عادي .. تفضلي ..
جلست عالكرسي حق بندر وقالت: انا اسمي لجين ..
بسام: يا هلا .. شخبارج ..؟!
لجين: تمام .. وين رفيجك بندر ..؟!
بسام: راح يي بس تأخر شوي ..
لجين: آها .. اقولك شي يا بسام ..
بسام: قولي ..
لجين: ما شاء الله عليك انت انسان غييير عن كل اللي في الكلاس .. مرره خققه وذووق وكشخه ورزه وواضح انك من عائلة العاصي من اكبر العائلات في قطر .. بجد انا من اكثر المعجبين بشخصيتك ..
ابتسم بسام بإحراج وهو يقول: هذا من ذوقج ..
لجين: حتى اسلوبك في كلام ذوووق .. يعني فعلا مميز بكل بكل شي ..
بسام: تسلمي والله ..
لجين: اممم تسمح اني اكون صديقتك .. او اكون احد معجباتك ..؟!
بسام: ايه عادي خذي راحتج ..
وكمل في نفسه: "معجباتك ..؟! حسيت نفسي توم كروز او براد" ..
ضمت ايدها بفرح وقالت: ثانكس .. امم طيب ممكن اسولف معك ..؟!
بسام: ههههه شفيج كل شوي تقولين ممكن .. عادي خذي راحتج في كل شي ..
لجين بإبتسامه: ما شاء الله عليك متواضع جدا .. المفروض واحد بمستواك يكون متكبر ومغرور بس انت غييير .. تعجبني بكل شيء ..
اكتفى بإبتسامه وهو حده منحرج منها .. ما يحب احد يقعد يمدحه قدامه ..
جاء بندر في هالوقت وقال: السلام عليكم ..
بسام: اهلييين .. شفيك تأخرت ..؟!
قامت لجين وقالت: انا استأذن .. باااي ..
بسام بإبتسامه: باااي ..
راحت وتابعها بندر بنضراته بعدين لف على بسام وهو يقول: من ذي ..؟!
هز بسام كتفه وهو يقول: مدري .. اسمها لجين وتقول انها معجبه فيني ..
بندر: وشو ..؟!!!
بسام: هههه حتى انا تعجبت مثلك .. يعني اول مره تصير وتييني وحده وتقول انا من اشد معجبينك .. بالعاده تيي وحده وتقول حبيتك او تتميلح عندي .. بس ذي البنت غريبه .. حسيت نفسي فنان مشهور وعندي الكثير من المعجبين ..
جلس بندر وقال: طيب شصار بينكم ..؟!
بسام: ما صار شي .. قعدت تمدح فيني وانا حدي منحرج .. مدري شأرد عليها ..
بندر: ههههههههههههههه ..
بسام: خلنا من سالفة لجين وقل لي وش اللي أخرك اليوم ..؟!
بندر: لا ابد بس وقفت سيارتي اعبي بنزين ..
بسام: طيب ليه ما اعطيتني خبر .. اقلقتني والله ..
بندر: ههه سوري .. اقول بسام ما يتك رسالة بلوتوث على موبايلك ..؟!
بسام بإستنكار: بلوتوث ..؟! ايش العصر الحجري اللي عايش فيه ..؟! خلاص الناس بطلوا بلوتوثات من زمان .. هههه الله يقطع ابليسك ضحكتني .. قال ايش قال بلوتوث هههههه ..
رفع بندر حاجبه اليمين وهو يطالع فيه فقال: اذا خلصت استهزاء اعطني خبر ..
بسام: ههههه .. خلاص قول اللي عندك ..
بندر: حبيت اقول انه فيه اشاعه منتشره عبر البلوتوثات في الجامعه .. هذه الاشاعه صارت حديث الطلاب .. بالاصح اسمها فضيحه مو اشاعه ..
انفجر بسام ضحك وهو يقول: ههههههه وربي ان قلبي كان حاسس انها فضيحه لأحد الفنانين ههههههههههههه ..
طالع بندر فيه وقال: بس هي مو لأي فنان ..
وقف بسام ضحك وقال: عيل لمين ..؟!
بندر: لطالبه في الجامعه ..
اندهش بسام وهو يقول: طـــــــــالبه ..!!!
تنهد بندر وقال: ايه .. وشكل هالطالبه لها علاقه بالسالفه اللي حكيتها امس لأن الاسم متشابه ..
بسام: تقصد سالفة البنت اللي قابلتها عند البحر ..؟!
بندر: ايه ..
بسام باهتمام: شتقصد بحجيك ..؟!
بندر: اسمع .. الاشاعه تتكلم عن بنت اسمها اسيل عمرها ١٩ اتضح انها لقيطه ..
انصصصدم بسام وطالع فيه بدهشه لفتره طويله يحاول يستوعب الكلام اللي سمعه ..
شوي خلخل اصابعه في شعره وهو يقول بلخبطه: لقيطه ..؟! اسيل ..؟! هذا الاسم سمعته واايد ومن اشخاص مختلفين .. اسيل ..! مر علي هالاسم كثير .. عمرها ١٩ ..!! اتضح انها لقيطه ..!!
طالع في بندر وهو يردد: عمرها ١٩ ولقيطه .. هل هذا يعني انها .....؟!
وما كمل سؤاله وآلاف الافكار والاشياء تتصارع في راسه ..
هز بندر كتفه وهو يقول: يمكن ايه ويمكن لا ..
دخل ايده للمره الثانيه بين خصلات شعره وهو يتلفت بنظره في كل مكان ..
مافي مكان محدد يطالع فيه ..
كان ملخبط وبقوه ..
تفكيره .. عقله .. مخه .. كل ششيء فيه ملخبط ..
في الاخير لف على بندر وسأله: وين اسيل ذي ..؟! ابي .. ابي اشوفها ..
بندر: اوكي نسأل عنها ونقابلها عشان تشوف ..
هز بسام راسه ووقف وهو يقول: طيب ياللا ..
بندر: لا ما اتوقع يمدينا .. باجي ربع ساعه عن المحاضره ..
بسام: ما همتني المحاضره ولا همتني الدراسه .. ابي سجى فاهم .. ابيـــــــــها ..
بندر: اوكي براحتك .. ياللا ..
وفعلا خرج بسام باحثا عن طيف فتاه قد تكون ابنة اخته الوحيده ..

.................................................. ...............