شبكة همس الشوق - عرض مشاركة واحدة

12 - 3 - 2014, 12:03 AM

عند بوابة الجامعه كان واقف ومتكي عالجدار وكل شوي يطالع في ساعته ..
كان واضح انه ينتظر احد ..
دخل ايده في جيبه وهو يطالع في الطلبه الداخلين ..
تأفف وهو يقول: تأخر .. لا يكون غايب ..؟!
شال هالاحتمال من باله على طول لمن شافه داخل مع البوابه ..
بسرعه راح ووقف قدامه وهو يقول: اهلييين بطارق .. اخيرا شفناك ..
طالع طارق فيه بعدين ابتسم وقال: كيفك انس ..؟!
انس: اذا علي فأنا تمام .. امس ليه رجعت آخر الليل واليوم طلعت مع الفجر ..؟!
طارق بإستهزاء: آسف يا امي .. صدقيني ما راح اعيدها ..
انس بعصبيه: ططارق لا تستخف دمك ..
مشي طارق وهو يقول: انت اللي تستخف مب انا .. تسألني بصيغة كأنك امي ..
مشي انس معاه وهو يقول: طيب صار خير .. المهم انا طوول امس افكر فيك وفي الولد اللي اسمه مهند .. مستحيل اتركك لين تقولي السالفه ..
طالع طارق في الطلاب وقال: ما تحس ان الجامعه هاديه اليوم على غير العاده ..
انس: طارق لا تحاول تغير الموضوع .. منو مهند ذا ..؟!
طارق: .............................
انس: شف انا امس كله افكر فياء في بالي السالفه اللي قلتها لي اول .. اللي قلت فيها انك قتلت احد .. هذا له دخل فيها صح ..؟!
تنهد طارق وسكت لفتره بعدين قال: خلاص بأقولك بس مو اللحين .. ورانا محاضرات ..
انس: لا قول اللحين لأنك لو ما قلت ما راح اقدر اركز في الشرح وبجذي احتمال ارسب بسببك .. ترضاها على صاحبك ..؟!
رفع طارق حاجبه وهو يقول: الله واكبر يالبكش ذا .. بترسب عشانك ما ركزت في محاضره وحده ..؟! انس قول كلام معقول ..
انس: ياخي انا ماراح ارسب عشان محاضره .. بس انا قلت جذي كنايه عن ان السالفه مهمه وماخذه تفكيري وابي اعرفها ..
ابتسم طارق فقال انس: امش امش نيلس ..
جلس انس على احد الكراسي فطالع فيه طارق وجاء عنده وجلس ..
طالع انس في جواله بعد ما سمع صوت فشاف طلب قبول رساله بلوتوث ..
ضغط انس رفض بعدين طالع في طارق وقال: شنهي سالفة مهند ..؟!
طالع طارق فيه بعدين تنهد وقعد ساكت فتره طويله يطالع في الطلاب بسرحان ..
شوي تكلم وقال: قبل لا نسافر للخور كنا نسكن هنا .. وفي ايام ثاني ثانوي كنت مسجل في نادي .. نادي تعلم الرمايه والتصويب بالمسدس .. كانت هذي هوايتي وعشان جذي دشيت هالنادي ..
انس: ما قد حكيتني عن هالنادي ..
طارق: لأني ما كنت ابي اتذكره ..
انس: ليش ..؟!
سكت طارق شوي بعدين كمل: المدرب اللي كان يعلمني اسمه عبد الحليم .. والمدرب هو نفسه ابو مهند ..
تفاجئ انس بعدين قال: ايه وبعدين شصار ..؟!
طارق: كنت اتدرب على ايد هالمدرب وهو كان له الفضل الاول في نجاحي ..
طالع انس فيه فتره بعدين تردد وقال: مادام له الفضل فهذا يعني انك ما قتلته صح ..؟!
ابتسم طارق بإستهزاء وهو يقول: للأسف كلامك خطأ .. انا فعلا قتلته وانهيت حياته ..
لانت ملامح انس وهو يقول: بس اكيد بالغلط .. انت مستحيل تكون قاتل .. ما راح اصدق حتى لو شفتك تقتل بعيوني ..
قعد طارق ساكت فتره بعدين قال: في ايام ما كنت في النادي كان مهند يي اكثر من مره وعشان جذي انا اعرفه وهو يعرفني بس ما كان فيه بيننا اي احتكاك ابدا ..
سكت شوي وبعدين كمل بهدوء: وفي يوم الاحد وفي الساعه خمسه العصر ... مستحيل انسى هاليوم .. كنت اتدرب كالعاده وطلبت من المدرب اني استخدم سلاح خطير وما ينفع يستخدمه إلا امهر الماهرين في استخدام الاسلحه .. كان نفسي استخدمه من زمان .. لمن طلبت من المدرب رفض وقال هذا خطر عليك .. حاولت معاه بشتى الوسائل بإصرار ..
كمل بنبرة حزن: ابتسم لي وقال من عيوني يا طارق بس انتبه على نفسك .. طيب .. كان وايد طيب وحنون .. كان لي مثل الاب اللي فقدته وانا صغير .. كنت احبه بشكل ما تتصوره يا انس ..
سكت طارق وانس يطالع فيه بحزن ..
تنهد طارق بمراره وكمل: مسكت المسدس وكانت هذي هي المره الاولى اللي امسكه فيها .. رفعت ايدي عشان اصوب على اللوحه اللي قدامي بس طاشت ..... الرصاصه طاشت وما وقعت في اللوحه .. وقعت في صدره ..
وسكت بألم وهو يتذكر هالموقف وقال بضعف: كان خايف علي ويقول انتبه على نفسك وما خاف على نفسه .. كان واقف قريب من اللوحه ومو خايف من الرصاصه .. وقتها تمنيت ان الرصاصه اخترقت صدري انا مو صدره .. ليتها قطعتني ولا اشوف هالمنظر .. ولا اشوف هالمنظر اللي مو راضي يفارق خيالي ..
حط انس ايده على كتف طارق وهو يقول: استهدي بالله .. هذا قضاء الله وقدره ..
سكت طارق فتره طويله جدا يهدي من نفسه بعدين قال: تعرضت للمحاكمه بس افرجوا عني لأنه كان قتل الخطأ .. عرف مهند عن الامر وجاء عندي لين بيتي وهاوش وخاصم وشتم وفي النهايه هجم علي بيقتلني عشان ينتقم لأبوه .. امي اول ما شافته ناوي يقتل اتصلت عالشرطه وبعدها يوا ورحنا انا وياه للمخفر .. انكرت سالفة انه كان يبي يقتلني وقلت انها مهاوشه صغيره .. في النهايه طلعنا كلنا وقالي لا تحسب انه بكرمك ذا راح اعفو عنك وبعدها راح ..
تنهد وكمل: امي هاوشتني لمن عرفت اني ما قلت الصج وطلبت مني اروح اشتكي عليه بس انا رفضت .. وفي يوم من الايام وانا راجع من المدرسه كان منتضرني وطلع مسدسه ناوي يقتلني قدام انظار بعض الناس .. بالصعوبه تفاديت الطلقه الاولى والثانيه بس الثالثه اصابتني في كتفي وبعدها تجمعوا الناس حوالي وهذا اللي منع مهند من انه يطلق اكثر ..
طالع طارق في الطلاب وكمل: صلحت عمليه وفي هالاثناء اشتكت امي على مهند وبعد ما صحيت قالت لي امي انها اشتكت وقالت لو انكرت راح تتبرى مني .. قالت انها خايفه علي ومو قادره تنام الليل من الخوف انها تفقدني في اي لحضه .. بس انا مابي .. احس ان مهند مو غلطان .. انا الغلطان والمفروض آخذ جزائي .. انا عاذره في كل اللي يسويه .. من حقه يصلح اللي يبيه .. المهم يت الشرطه تستجوبني وفي هالوقت اضطريت ابلغ عنه فمهما كان رضا الام اهم .. تعرض للمحاكمه وانسجن اربع سنوات بتهمة الشروع في القتل .. ومن بعدها امي نقلت للخور ونقلت معهم وخلصت الثانوي وبعدها طلبت اكمل دراستي الجامعيه هنا .. امي رفضت لأنها خايفه مهند يطلع من السجن بس انا طمنتها انه بيطلع بعد عشر سنوات وبجذي درست هنا .. والسبب الرئيسي اللي خلاني انقل هنا هو مهند .. طول دراستي الجامعيه وانا اهتم بأهله .. اخته الصغيره وامه المريضه .. حسيت نفسي انا المذنب في اللي صار لهم .. سجلت رزان في المدرسه وفي باص .. امه حاولت فيها اني اعالجها بس رفضت وبشده .. تقول انها كلفت علي كثير وما تبي تكلف اكثر .. كل شهر اعطيهم فلوس كمصروف لأن فلوسهم كلها في البنك في حساب مهند وعشان جذي ما عندهم شي يصرفون منه غير ورث الام والبنت .. وبس .. هذا كل السالفه اللي بيني وبين مهند ..
انس: غلط .. اللي يسويه مهند غلط .. وسكوتك عنه غلط .. كل هذا غلط .. انت يا طارق ما قتلت .. كان قتل خطأ وهذا ماله اي ذنب ..
طارق بإبتسامه باهته: زوجته ترملت .. بنته تيتمت من صغرها .. ولده انسجن .. كل هذا وتقول مالي ذنب .. حتى لو كان قتل خطأ .. في النهايه اسمه قتل ..
انس: لا يا طارق لا تقول انك مذنب .. هذا قضاء الله والمفروض تؤمن بالقضاء .. ان قدر الله شيء فما يحق لأي انسان انه يحمل احد او يحمل نفسه الذنب ..
ابتسم طارق وهو يطالع في انس ..
استغرب انس وقال: شفيك تبتسم لي ..؟!
طارق: ما ودك توجه هالنصيحه لك لأنها تنفعك في حكايتك مع راكان ..
لف انس وجهه وهو يقول: هذا غيير .. وكمان ماله دخل في سالفتنا يا استاذ ..
طارق بإبتسامه: المهم خلنا نغير الموضوع ..
سكتوا فتره وقال انس: طيب اللحين وش بيكون موقفك مع مهند .. وش بتصلح ..؟!
طارق: بحاول افهمه ان اللي يسويه ما راح يفيده .. بأحاول يشيل فكرة الانتقام من راسه عشان لا يلطخ ايده بدماء .. وخلاص خلنا نغير الموضوع ..
انس: طيب شصار معاك في حكاية اولاد عمك ..؟!
تنهد طارق وقال: قبل امس قدرت اطلع مجان مدرسة شادي ووسيم الحاليه وحطيت امس في بالي اني اروح بس حصلت ضروف ونسيت .. ان شاء الله باجر اروح واحصلهم ..
انس: ان شاء الله ..
جاء فهد وهو يقول: ســـــــــلام .. سمعتم آخر الآخبار المنتشره بالجامعه ..؟!
طارق: ايه عارفين والخبر قديم وايد ..
فهد بإستغراب: بجد .. بس انا توني اسمعه اليوم ..
طارق: عن الجذب لأنك سامعه امس ..
انس: فعلا وقعد تعلق عليهم كمان ..
فهد: انتم عن ايش تتكلمون ..؟!
انس: عن المتفجرات الوهميه حقت شلة سامي ..
فهد: هههههههههههه لا لا هذا خبر يديد وتقريبا كل الجامعه تعرفه .. ما يتكم رساله عالبلوتوث ..
انس: ياني طلب قبول بس رفضت ..
فهد: وانت يا طارق ..؟!
طالع طارق فيهم بإستنكار وقال: من يوم ما اشتريت الجهاز ما فتحت عالبلوتوث ابدا واكيد اسم بلوتوثي هو اسم الآي فون .. شيء قديم جدا .. محد صار يستخدم البلوتوث يا جماعه ..
رفعوا حاجبهم يطالعون فيه وقال انس: خف علينا يالكائن الفضائي المتقزز من الاسلوب القديم ..
فهد: ما عليكم المهم هو ان الخبر عن وحده تعرفوها ..
اشر على طارق وقال: وخاصتا انت يالواثق السخيف ..
طارق: اللحين انت ليه تسبني ..؟!
فهد: لأني كل ما اتذكر حركاتك معها احس انك سخيف ..
انس: اخلص وقول عن مين انت تتحجى ..
فهد: عن اسيل الرملي ..
طارق بتفاجؤ: اسيــــــل ..؟؟! وش هالخبر المنتشر عنها ..؟!
فتح فهد جواله وهو يقول: لحضه افتح لك الرساله ..
انس: وش هالاهتمام المفاجئ ..؟!
طارق: سخيف ..
اعطى فهد طارق الجوال وهو يقول: خذ طالع ..
اخذ طارق الجوال يقرأ الرساله وانس جنبه يطالع معاه ..

صــــــــــــــــــدمــــــــــــــــــه
طالع انس في الجوال بصـــــــــدمه وهو يقول: مو معقول ..
فهد: فعلا .. انا انصدمت اول ما شفتها .. والله تكسر الخاطر ..
انس بقهر: سخيييف .. اللي نشر هالخبر سخييييف .. وبكل بجاحه كاتب اسمه كمان ..
فهد: اللحين كل الجامعه تحكي عنها .. اللي يقول مسجينه واللي يقول الله يقرفها واللي يقول الله يفكنا ويبعدنا عن اشكالها واشياء جدا سيئه ..
انس: والله هم المقرفين مو هي .. غباء ..
فهد: فعلا ..
لف انس على طارق وشافه يطالع في شاشة الجوال بصدمه ودهشه كبيييره ..
فهد: طارق ..
ارتجف الجوال في ايد طارق وطاح عالارض ..
طارق بصدمه: مو معقول .. لا مو معقول ..
خلخل اصابعه بشعره وهو يطالع في الجوال الطايح عالارض بذهول ..
هز راسه وهو يقول: جذب .. كل هذا جذب .. اسيل مو جذي .. لا اسيل مو جذي ابدا ..
انس: طارق شفيك ..؟!
طالع طارق فيه وقال: سامع هالاشاعه القذذذره على اسيل ..
كمل بقهر: قـــــــــذر وواطـــــــــي .. ليييـــــــــه يقول جذي عن اسيل ليييييييه ..؟؟!!!!
طالع انس فيه وهو مستغرب من تصرفه ..
حط طارق راسه على ايده وهو يقول: مو قادر استوعب .. لا مو قادر ..
رفع راسه وقال بعصبيه: ذا الســــــــافل يبيله تربيه .. خسيس وغبـــــــــي .. لا .. ما يحق له يقول عن اسيل جذي لااااا ..
فهد: خلاص اهدئ .. انا مو فاهم سر عصبيتك ..
طارق بصراخ: شلـــــــــون تبيني اهدأ وهذا الواطي يقول جـــــــــذي عن اسيل شلـــــــــون ..؟!
انفجع فهد وقال: طيب انت شفيك منفعل جذي ..؟!
طارق بعصبيه: يعني انت مو سامع هالسافل شنو يقول عن اسيل ..؟! هذا .. هذا انسان واططي .. لييه جذي .. لييه يقول عن اسيل جذي .. اسيل هذي .. اسيل ..
عض على شفته وكمل: اسيل هذي الوحيده .. الوحيده اللي حبيتهـــــا .. ايه احبهــــــــا .. احبهــــــا ومو قادر اسمح لأحد يتكلم عنها جذي ابدا ..

انصــــــــــــــــــدمـــــــــوا انــــــس و فهـــــد منه ..
انس: تحبها ..؟؟؟!!!!!!
خلل اصابعه في شعره وقال بهدوء: ايه احبها .. اسيل ذي غير .. غير عن كل اللي قابلتهم .. غييير ..
طالعوا انس وفهد في بعض فتره بعدين لفوا يطالعون في طارق وهم في قمة دهشتهم ..

<B><FONT size=5><FONT color=royalblue face="Century Gothic">شلون يحبها وهو دايم يكره طاريها واكثر من مره اهانها بالكلام ..%