شبكة همس الشوق - عرض مشاركة واحدة - ليه عمري مالقى لبرده دفى الا دفاكي للكاتبه ذكرى نجديه

6 - 1 - 2015, 07:38 AM

.................................................. ........

بعد ماخلص بعض شغله نزل لامه وابوه تحت كلمته امه .. متى راح تجيب نوف ؟؟
.. يمكن بكره ان شالله اروح اجيبها
تكلم ابوناصر يسئله .. وشلون ابو سلمان
.. الحمدلله تحسن وطلع من المستشفى
رفعت ام ناصر جوالها وابتسمت .. الطيب عند ذكره " الــو
كانت تتنفس بسرعه .. هلا خالتي وشلونك
.. هلابك يايمه الحمدلله بخير انتي وشلونك وشلون اهلك
.. الحمدلله بخير
.. زين الحمدلله "بس وش فيه صوت يرتجف انتي تعبانه
.. لالا ياخاله مافيني الا العافيه
.. اجل وش فيك ؟؟
ناصر كان يتابع المكالمه ومستغرب ماتدري كيف تقول .. خالتي ناصر عندك ؟؟
.. أي عندي وش فيك تبين شي
.. طيب ليش مايرد على جواله
ابعدت الجوال عن فمها وسئلته .. نوف تقول انك ماترد على جوالك
عقد حواجبه وتحسس جيوبه .. الظاهر ناسيه فوق " ليش وش عندها
رجعت لنوف .. يقول ناسيه فوق " وش فيك يانوف صوتك ماهو طبيعي
.. صدقيني ياخاله مافيني شي بس من الفرحه
ابتسمت ام ناصر ابتسامه مجهوله تنتظر نوف تكمل .. خاله اليوم انا رحت للمستشفى >> ام ناصر كانت تستناها تكمل وقلبها يرقع بقوه .. وقالت لي الدكتوره اني حامل >> بدون شعور منها شهقت ووقفت تحس قلبها وقف من الفرحه وصارت يدها ترتجف .. صدق والله يانوف ترى قلبي مايتحمل
.. أي ياخاله كنت شاكه والدكتوره اكدت لي
كان ناصر وابوه جالسين ورافعين ارقابهم لها وينتظرون كلمه يفهمون منها السالفه لكن ام ناصر ما بينت لهم شي لين سكرت الجوال وجلست
سبق ابو ناصر .. وش فيك ياام ناصر وش فيها البنت
.. اصبر خلني اخذ نفس
.. تاخذين نفس !تركضين انتي ؟؟ قولي وش فيك وقفتي قلوبنا
.. نوف يابو ناصر نوف
.. يابنت الحلال تكلمي عارف انك تكلمين نوف وش فيها
قبل تقول كلمتها ناصر كان قابض الكنب بيده ويتمنى تخلص هالسالفه وتتكلم .. نوف حامل
كلمه ماقدر على غيرهامن كثر فرحته ..صدق يمه !!
.. صدق ياوليدي اخيرا راح اشوف عيالك الف مبروك
.. الله يبارك فيك يمه
ابو ناصر بردته الفرحه ولاانتبه انه ساكت لين باركت له ام ناصر .. الله يبارك فيك " متاكده ياام ناصر
.. وش فيكم تبوني اكذب نفسي قوم ياناصر كلمها وتاكد وريح ابوك
مارد راح يركض على الدرج وتركهم يهنون نفوسهم

.................................................. ...................................

.. هاه تجهزتي ؟؟
.. لاوالله استنى لبكره راح تجي ساره عشان اسحبها معي
.. يعني نايف راح يجيكم
.. أي بكره " بس ماادري راح يكفيني الوقت
.. ياحبيبتي انتي ماشالله عليك جاهزه ماينقصك غيري انا راضي فيك كذا بس انا خليت لك شهر ونص عشان مايقولون مشفوح
..ههههههه والله انك فاضي " انت الحين وش قاعد تسوي
.. ابد والله انا ماعندي شي اسويه غرفتي وهالعجوز كل يوم طاري على بالها سالفه وجارتني وراها للسوق
.. عاد هذي امك لازام ترضيها
..اكيد يامها امي لو تطلب عيوني مااقول لا
.. اول مره احس انك تتكلم بجديه
.. الا امي مافيها مزح
.. فهد ترى اغار
ضحك عليها .. لاعاد انتي شي ثاني
.. تسلم بس لاتصدق انا لايمكن ازعل من اهتمامك باامك
.. مشكوره حبيبتي " يالله امي تناديني طول اليوم جالسه لحالها اكيد خطرت ببالها فكره جديده
..اوكي سلم عليها
.................................................. .............................

أحسب السالفه ‘‘ نظرهـ ’’ و احسب ان الغرام ’’ اعجاب ‘‘
........................ الين ان صرت بـ غ ــيآبـهـ / اضيق بـ داخل ثيابي

خلصت تسوق واخذها يشربون شي وهو يدري اان مالها رغبه لكن صار يستمتع بالوقت الي يجلس معها ويكتشف خفاياها الي اعماه عنها الحزن والانتقام حطت اغراضها على الاراض وجلست ساكته تفرك عيونها تحس بشوية صداع .. ساره اذا محتاجه شي احنا ماطلعنا اشتري الي تبين
ابعدت يديها عن عيونها .. انا ماكنت ابي شي من الاساس كثر الله خيرك ماقصرت
ضايقته باسلوبها مايبي يحس انه يسوي شي مو لازام يسويه وهالرسميه باسلوبها بنت حواجز كثيره تمنعه من الوصول لها قبل يناقشها بطريقتها قرر يكتسبها .. ها فكرتي بالي قلت لك !!
.. انا من زمان مفكره فيه بس كل مافكر بطريقه القى نهايتها مسدوده مادري وش هي
ناظر لها ببرود .. وش الطرق الي فكرتي فيها
.. اني اعيش واربطك فيني ولا اتركك افتح على نفسي باب انت تعرفه
طبعا فهم قصدها .. يعني تخافين تنغصبين على واحد غيري
.. هذا انت فاهم " الحل الوحيد انك تتركني زي ماانا وتتزوج الله يوفقك
قرب جسمه منها وحط يديه على الطاوله ..مافكرتي انا نعيش مع بعض عادي ونكمل حياتنا مع بعض
مااعترضت على كلامه وسكتت بس اخرجها من الصمت اتصال نوره .. هلا نوره
.. مطوله ماتجين ؟؟
ناظرت له وهو يراقبها تتكلم وواضح انها مستحيه من وجوده .. ماظن "ليه ؟؟
.. عندي لك خبر حلو
.. والله وشو
.. نوف
.. وش فيها ؟؟
.. نوف حامل
دفعت الطاوله من حركة جسمها وابتسمت واعتلت وجهها الفرحه .. والله متى عرفتوا
.. بعد مامشيتي راحت للمستشفى
.. طيب انا جايه بعد شوي
.. لا لا خليك ليش تجين
.. زين يالله سلام
حطت الجوال فـالشنطه .. يالله خلنا نروح
..خير وش الي خلاك مبسوطه وتورينا ابتسامتك الي اول مره نشوفها
ماحست بقوة ملاحظته الا اليوم بالاول الفستان الاسود الي ماخلاها تاخذه لانها دايم تلبس اسود او لون غامق وتعليقه على ابتسامتها .. وش فيك سرحتي
..مافيني شي " يالله خلنا نروح
.. ماقلتي لي وش قرارك
فكرت وفكرت وطلع معها كلام ماتدري كيف طلع .. اذا قلت لك خلنا نفترق راح تكنسل السفر وتتركني عند اهلي وتروح لجده لحالك
مافهم لايش راح ترمي وفكرة الفراق اوجعته بس بغاها تكمل .. لا اظن اذا هذا قرار بعد مانرجع
..طيب تسحلي اطلب منك طلب مع اني وعدتك مااطلب منك شي بعد ماجبتني هنا بس مادامنا رايحن لجده ولك حق انك ترفض

مقدمه طويله وتمهيد لشي ماقدر يفهمه ..خير وش تبين ؟؟
قعدت تلف طرف شيلتها على اصبعها .. من زمان نفسي اروح عمره
ابتسم لها طهر نقاء حتى بطموحاتها وامانيها اشر على عيونه حركه مفاجئه منه شرحت صدرها .. من عيوني ""
انكسر قضيب من القضبان المتعامده داخلها ودخلت منه كميه اكبر من الامل والتفاؤل .. مشكور " والحين ياليت توديني للبيت
..صح ماقلتي لي وش الخبر الي فرحك
ربطت نقابها ونزلت تلم اغراضها .. اختي نوف حامل
سبحان مقلب القلوب ما شكل له هالخبر الافرحه من فرحتها الشحيحه .. مبروك ان شالله
وقفت تعدل عبايتها .. الله يبارك فيك

زارني في وحشتي مقدار من الانس وابتسمت لااحزاني الايام لتنفرها مني فهل هي مهاجره ؟؟

الف الف الف مبروك حبيتي
.. الله يبارك فيك " فرحان ياناصر
.. فرحان !! فرحان كلمه ماتعبر عن الي داخلي انا الاراض ماهي شيلتني من الفرح راح اصيرابو لطفل انتي امه
انتبهت لربطه لها بفرحته الغامره ..ماتتصور وش كثر مبسوطه شفت الفرحه بعيون امي وبصوت امك وبصوتك شي حلو انك تصير مصدر فرح لغيرك
.. طيب نوف ماسئلتي الدكتوره اذا تقدرين تسافرين
هزت كتفها ..مدري والله ماجا على بالي اسئل
.. خلاص اذا جيت نروح ونسئل
..واذا كان يضر
.. راح اخليك لين تولدين حتى للجامعه ماراح اخليك تروحين
ضحكت عليه .. مو لهالدرجه اشوف حوامل يروحون ويجون عادي
..ماعلي من احد المهم اهتمي بنفسك والي ببطنك
..ان شالله "انت متى تجي
.. بكره باذن الله

.................................................. ...