خلك على جفن السهر وحداني*
مايرجع اللي راح مهما لمته*
نفسي جفولٍ ما تطيع عناني*
وقلبي سبقني للجفا في صمته*
ذي عادةٍ مما ترك جداني*
ماعود عن شي وانا عزّمته*
سلمت لجنون الهوى جنحاني*
لو تخّر الميعاد وان قدمته*
كم كنت اقلك يا الحبيب اقراني*
في دفترٍ ما تسمع لهمهمته*
شعرٍ لو انه ما يمر لساني*
ماعلق بصدر القصيد اوسمته*
سمعوا به الشعار في الميداني*
واللي تراخى قام شد احزمته*
لو كان ذنبي تبت من عصياني*
واظهرت شيطان الشعر واعدمته*
انا تركت الشعر حتى جاني*
ضيفٍ حشمته بالبها واكرمته*
صبيت له من دلتي شرياني*
وارخيت له راس الطلي وشحمته*
ابوي قال الله في ضيفاني*
لو يطلب اغلى ما امتلك قدمته*
اعطيته اغلى العمر ويش اعطاني*
واحرمني من النوم ويش احرمته*
لكن بيبقى والزمن برهاني*
ﻻقصى السنين المقبله سلّمته*
هذا الزمن لو رضي بي ما ارضاني*
انا هنا والشعر في ملزمته*
ماهمني نذل نسى عنواني*
وﻻّ حسودٍ دنيته فاهمته*
وان دارت الدنيا وصح لساني*
تاقف لي احفاده وينطق صمته