البارت 147


في الرياض ..
عند خالد وختام ..

في مطعم هادئ تجلس مقابله وهي تبتسم له : كويس ان الشغاله جابت عبايتي او مابتكون خذيتني
ضحك خالد وهو يقرب كفها لفمه ويبوسه بعمق : اخذك لو اغطيك بشماغي
ابتسمت له : اوه قد ايش انت جميل
خالد رفع راسه وعيونه بعيونه : بس جميل ؟
ختام بشغف حقيقي: لا تخليني اخربها
ضحك خالد بقوه واردف : مصطلحاتك صايره غريبه كنتي بريئه ماتعرفين هالكلام
ختام كشرت : انت السبب
خالد تنهد وهو يوقف : يلا نطلع ابي نروح مكان سري
ختام وقفت بسرعه وهي تلبس شنطتها الصغيره وتطلع عطر وترش على كفوفها وعبايتها وتدخله بدون ماترفع عينها لخالد
اللي يناظرها بعمق وصمت انحنت تقفل اخر ازرار عبايتها ووقفت لتتضح اقدامها البيضاء
بين فواصل العبايه السوداء
ثبتت حجابها بأهمال
ورفعت راسها وابتسمت : خلصت
خالد تنهد بضيق واتجه لها وهو يعدل حجابها : اولاً ذا المفروض مايطلع
شعرك من تحته
ثانياً ليش تعطرتي ؟ دخلتي بحكم الزانيه
ترى مايجوز تتعطرين قبل تطلعين من البيت
والمره الجايه ي ليت تلبسين شيء سنع من تحت العبايه
ختام رفعت حاجب وهي تكتم انفاسها بصبر : طيب اوامر ثانيه بابا ؟
خالد ابتسم : سلامتك ماما بس أنا اريد ابدأ اعدل وارويكي وين الصح وين الخطأ أخاف عليكي من غضب الله يلا امشي ..
طلعوا من المطعم وختام متحمسه تبي تعرف وش المفاجأه اللي مجهزها
لها وقف اخيراً وهمس : دقيقه بس
نزل ودخل محل مقابلهم وختام انشغلت في جوالها
تصور سنابات وتعلق على صور صديقاتها
ركب خالد وتنهد وهو يشوفها تصور : بااااي
قفلت جوالها وابتسمت له
خالد رفع كفوفه على فوق بأستسلام : استسلم انتي فُزتي
ختام : وش سويت خالد مافهمت الموضوع اللي تتكلم عنه
خالد نزل راسه ع المقود : يعني مافيه امل تتغير هالتصرفات ؟
ختام كشرت : من اول ماطلعت وانت تنتقدني مو عاجبتك ؟ طيب ليش اخذتني
خالد توسعت محاجر عيونه بدهشه من كلامها : افا انتي مو عاجبتني انتي تدرين بمكانتك بقلبي ي شيخة الغيد
بس تصرفات الامريكيات ما ابيها انتي لي ولا ارضى احد يشاركني فيك ولو بنظره بس ..
ختام ابتسمت له اول مره تسمع مثل هالكلام ما عمر احد نصحها او نبهها على حجابها او ملابسها مايهتمون اصلاً هي حيه
او ميته بس الله عوضها بشخص يخاف الله
فيها ويغار عليها ..


في هولندا ..
عند ريتان
جلست في الشاحنه وهي تفتش الاسلحه بصدمه كيف جاب هالعدد كيف مرت من الحدود ؟
كيف هربها ؟
معقوله مايفتشون ؟
تجمدت وهي تحس بحركة وراها التفتت بربكة
وسكتت من شافت رامز واقف ومتكتف وعيونه حمراء وابتسامه غريبه مرسومه على شفايفه
تُصنف تحت مسمى حقد او كُره
او انتقام
بلعت ريقها بصعوبه وهي تسمعه يتكلم بخبث : تذكرين اللحظه اللي قلت لك فيها ابوك وصاني اتزوجك ترى كنت سكير وقتلته بدون عقل كيف ادري اذا وصاني او لا من اللحظه اللي كذبت عليك فيها وانا متأكد انك غبيه وماتفكرين اجل ابوك وصاني مالقى يوصى الا الشخص اللي بيقتله ووش الوصيه ليتها فيها خير الا يتزوج بنته ؟! شيء ما احد يصدقه الا الاغبياء مثلك اللي عايشين جو فراق الابو انتي لو تحبينه ماخليتي اخوك يتنازل عني كان قتلوني وصلى الله وبارك انتي لو تحبينه ما وافقتي على اخوي انتي لو تحبينه
ارتفعت صرخه ريتان بحده : بسسسسس
رامز ضحك : حامل صح !
ريتان شهقت وانكتمت انفاسها من كلامه وش يقول ذا !
رامز تمسك بالباب وركب في الشاحنه
وريتان رجعت على وراء بخوف وتعثرت وطاحت ورامز يقرب لها : ولدك بينزل وعلى ايدي زي ماقتلت ابوك بقتل ولدك
يعني يلحق جده ههههههههههه
ريتان ارتفعت انفاسها
وكفها اليمين يتحرك بعشوائيه قريب منها وكأنها تبحث عن شيء
رامز وقف مقابلها وهي جالسه عند رجوله بين الكراتين الممتليئه بالاسلحه
رامز التفت لراشد اللي صرخ فيه : سيارات الشرطه جايه
رامز بصدمه : ايش ؟
التفت لريتان بسرعه وانحنى لها يرفعها دفته وهي توقف وتناظره
بحده ومسدس بكفها الايمن : بتنقلع تسلم نفسك او انا اسلمك لهم
رامز ابتسم : مافي مجال اهرب بدونك ي روحي تتوقعين بطلع من هنا بدونك مستحيل ترى انتي اول وحده بتهرب معي
ريتان رفعت السلاح بوجهه : بعد عني
رامز ابتسم وقرب لها والسلاح يتثبت على جانب صدره الايسر
راشد من وراء : طال عمرك بسرعه
رامز طنشه وعيونه بعيون ريتان المرتبكة
راشد ابتعد هارب وتارك رامز مع ريتان
رامز مد كفوفه ومسك راس ريتان
وريتان بحده تكلمت : ابعد والا وربي بفضيه بصدرك
رامز بنظرات غريبه : انا وروحي فداك
شهق وارتفعت انفاسه من حس بالرصاصه تستوطن صدره
رجع ع وراء ورفع كفه لصدره وهو يتنفس بقوه وتعرقلت حركته
وطاح من فوق الشاحنه للارض ليتلطخ وجهه وملابسه بالتراب والدم
ريتان طاح السلاح منها وهي تشهق ودموعها نزلت : مـ...ـات
ارتجفت وهي ترفع كفوفها وتشد شعرها بقوة ..