مجموع الأوسمة: 18

البارت 95

رفعت عيونها لأبو زوجها اللي كان ينظر لها بنظرات كره وولده علي وعياله وافقين والسواق والممرضة وافقين عندها حاولت تصفي حنجرتها وهي تتكلم .
: انا اعرف ان كلكم شايلين علي في قلوبكم شين كبير وحتى لو مانطقتوا به..اشوفه في عيونكم صح انا غلطت غلط كبير وإذا فات الفوت ماعاد ينفع الصوت .،!
انا ربيت بناتكم وحبيتهم اكثر من روحي تعبت وشقيت عليهم كانت فرحتي تكبر كل ما يكبرون قدامي .،!ومن قبل مايموت ولدكم وهو يسافر ولا يجي إلا مرة او مرتين في الشهر وخلا في وجهي اربع بنات ولا معي قليل ولا كثير الا حلالن تركه ابوي لي ..
دخلتهم المدرسة كنت اخذهم من بعد صلاة الفجر .،! وانا اشيل خزامى وهي صغيرة والباقي قدامي وامشي بهم الى طرف الطريق علشان احصل سيارة تنزلني ابها واوديهم المدرسة.،!واجلس معهم الى انهم يخرجون.،!واخذهم معي واوقف على الطريق الى ان الله ييسر لي ابن حلال يركبنا.!وارجع البيت اطبخ غداهم واغسل ملابسهم .؟
وفي العصر اخذهم واوديهم عند امام المسجد الباكستاني يدرسهم لاني لا اعرف لا اقرأ ولا اكتب .،!
ويوم الخميس والجمعة اخبز واطبخ ايدمات واسوي شاي وقهوة واجلس على الطريق وابيع لناس علشان اقدر اوفر لهم اكل وشرب .،!
ضحيت بكل شي مات اخوي وهو زعلان مني لاني رفضت اسافر معه واخلي بناتكم .،!
يسر الله لي ابن حلال اعطاني سيارة وسواق واكفاني هم كبير..؟!
ماعمري رفضت لهم طلب ولا اقدر احط لقمه في بطني إلا بعد مااطمن انهم اكلوا وشبعوا وبعدين اكل بعدهم .،!
كنت اخاف اني آكل لقمه وخاطر وحده منهم فيها .،؟ ولا انام إلا بعدهم .،؟
مات ولدكم ولا عندي إلا غرفتين وحوش صغير ..! كنت اخاف عليهم من الدواب والهوام.،؟
اخاف احد يدخل علينا تالي الليل .،؟وانا بمكان قفره مابه احد غيرنا.،!
اخذت لي علب قزاز وكسرتها واخذت كيس اسمنت وعجنته بيدي اغرز القزاز في حواف الحوش علشان محد يقدر يتسلق وينزل علي .،؟!
كم من قزازه دخلت يدي وسال دمي.ولا اهتميت .،!
كلهم كانوا من المتفوقين بفضل الله كبروا وكبر حبهم في قلبي .وتعلق قلبي فيهم .،!
اذا رحت اسوق بحلالي ولا ارتاح الى اني ارجع واشوفهم قدامي.؟
اشواق وندى خلصوا الثانوي وكل وحده كانت الاولى على دفعتها وعلى مستوى المدرسة .،!
حاولت تاخذ نفس وهي تحس انها تختنق وهي تتكلم لفت وهي تناظر البنات اللي لابسين عبايتهم وذحين بناتكم عندكم واستروا على ماوجهتكم مني وهي تأشر للممرضة تحرك كرسيها وتساعدها تركب .!
محمد اللي كان واقف يراقب المشهد بصمت الكل ساكت يسمعون تبريرات واهيه بنظرة مهما سوت تظل بنظرة مجرمة لو بيده كان ذبحها وماراح يبرد حرق قلبه ذبحها وكان ناوي يبهذلها وبيده كل الأدلة بس لأجل عين تكرم مدينة علشان بنات عمه رفع عيونه
يدور اللي اخذت جزء منه وجزء باقي مابين حب وكره عرفها بطولها المميز ملتفه بعبايتها كان قلقان عليها ولا عرف كيف يطمن عليها خاصة بعد اللي سواه فيها.،،
كانت واقفه مثل الصنم بين اخواتها اللي يبكون وهي ساكته تسمع كلام أمها بعيون جامدة لين شافت أمها تركب السيارة بمساعدة الممرضة والسيارة تتحرك خارجة من البوابة شافها تحط يدها على صدرها وفي اقل من ثانية شافها تتهاوى بين اخواتها حس روحه تطيح معها وهو يتحرك بسرعة لها مايدري كيف شالها
الأرض وهو يدف اخواتها وابوه وجده ماكان يهمه إلا هي وبس شالها بسرعة وعلى السيارة وهو يسمع اصوات اخواتها صوت جده وجدته اللي ينادون عليه فتح الباب الخلفي وهو يحطها ويرفع نقابها انهزم فيه كل شي داخله وهو يشوف عيونها الغايرة وجها المتغير لونه الشاحب قفل الباب وهو يشوف جدته تفتح الباب اللي جنبها وتركب
ركب بسرعة وحرك سيارته وهو يلتفت لها وراسها في حضن جدته اللي شوي تقرأ عليها وشوي تبكي رجع يشوف الطريق مشى بسرعة وهو يتجاوز السرعة القانونية ويسمع جرس السيارة اللي ينبهه لازم يخفف السرعة ولا اهتم وهو كل شوي يلف ورا يناظر لها انتبه لصوت جده اللي يقول له
محمد ولد انتبه لسيارة ياولد..حتى جده مايدري متى ركب مايشوف شي إلا هي منظرها وهي تتهاوى قدامه اخذ جزء كبير من قلبه سقوطها قدامه هزه هز قوته وثباته رجع لف يناظر جدته
: جده حطي يدش عند خشمها شوي تتنفس..!
جدته وهي تبكي : ان شاء الله ماعليها شر والله اني كنت متأكده انها بتطيح كذا اسبوعين والبنت ماهي طيبة لا آكل ولا شرب ولا نوم ماغير تشتغل وتدور علينا تسأل وتراعي وتهتم لنا ونسيت نفسها
وبعبرة خنقتها والليلة روحت أمها كملت الناقص.!
الجد محمد بحزن : حسبي الله عليها عايشة حسبي الله البنت ياخوفي تروح منا متعلقه في أمها كثير.؟