مجموع الأوسمة: 17

كانت جالسة جنب أبوها..وإخوانها كلهم مجتمعين ماعدا غادة..
لاحظت صمتهم ونظراتهم الهاربة منها..
ما أهتمت لــهذا الشيء..
وفسرته بمحاولتهم تقبل فكرة رجوعها..
حنت على حال عمها اللي ضمها وتعذر منها..
قدام أبوها وأخوانها..
شافت الندم في عيونه والزعل على حالها وحال أبوها..
أبتسمت له وقالت إنها بخير وماعليها قاصر..
وبعدها صارت تتذكر كم مرة عاتبت عمها بغربتها..
وكم تمنت لو إنه ماقال لها عن غازي وعن شرطه..
أستغربت كلام عمها لما حاول يطمنها..
ويقول لها لاتخاف من شيء..
بيحلون الموضوع بالهداوة والعقل..
في بالها إن الموضوع يخص غازي..
وبيمنعونه يأخذها..مافكرت في شيء أبعد منه..

فزت من سرحانها على صوت ابوها يهاوش..
وأخوانها يضحكون..
ألتفتت بفضول..ووقفت وهي تصرخ..
كان عبدالله داخل عليهم وهو ماسك ذياب من أعلى قميصه من ورى..
ويمشيه على أصابع ارجوله بشكل سريع..ويهدده ويهاوشه..
هديل بقهر\عبييييد وخر عن ولدي...
عبدالله\ولدك مجرم..كان بيفغص أختي الوحيدة..
ويزهق روحها البريئة..
علي\أفا..أفغصه ذا النتفة..كله ولا بنتي..
راحت له بسرعة وهو ترك ذياب وهرب..
كان ذياب بيطيح بس لحقت عليه هديل ومسكته..
كان يشاهق مبسوط ولم يدينه حواليها..
هديل بحنية\فديت ابوي أنا..وش سوى فيك الدوب..؟؟
أوريك فيه ولد أبوهـ..
علي\هههههههه تبين نسكت لولدك وهو يضرب بنتنا..؟؟
هديل\كله ولا ولدي..يبي يفغص بنتك يفغصهامالكم شغل..
يبي يطلع عيونها يطلعها..يبي يشوتها يشوتها..
هو الكبير ويصير ولد عمتها يمووون..
عبدالله من بعيد\يبطي أبو خدود حمر...
هديل\فيك خير تعال..قلها من قريب..
محمد\تبين فزعة تراهـ رافع ضغطي قاطع الطرق..
هديل\إيوه تكفى إذا مسكته كفخه بدالي..
علي\تعال يا ولد أبوك..لاتحط راسك براس الايطالي وأمه..
هديل بغرور\وهـ فديت الإيطالي..يحوسكم يالسعوديين..
عبدالله بنفخة\يعقب..إذا هو كفوو خليه يواجهني..
أعلمه ابو سروال وفنيلة كيف يتعامل مع أبو بنطلون..
أبو علي\لا يابنتي لاتخلين ولدك يروح له..
ترى عبيد فاصل ذا اليومين..
هديل\عشان أبوي سامحناك..
ولا كنت بأخليه يأدبك..
عبدالله يتوعد\معليه بينام عندنا مثل أمس..
واربيه على علووم العرب وسلوومهم..
هادي بضحة\انت وش بلاك على الولد..
وش مسوي لك..؟؟
عبدالله بسخرية\ذا..خله يفقس من بيضته اول..
محمد\لايكون تغار منه..؟؟
عبدالله\يخسي..
هديل بقهر\هيه لا تسب ولدي..كل شوي يعقب ويخسي..
وانتوا مو خواله تسمعونه يسب ولدي..

ضربت الجدة بعصاها على رجل عبدالله اللي نقز مفجوع..
عبدالله\عووذة هذي ثالث مرة تطعنيني في ظهري ياجدة أبوي..
الجدة\إعقل وخل الذيب في حاله..
عبدالله\تراكم تكبرون الفجوة اللي بيني وبينه..
وتسوون تفرقة بينا..فحاولوا قد ماتقدرون تحلون النزاع..
هديل\مانبى قربك..وولدي لا تمسه مرة ثانية..
لا بعصا عسوولة على راسك..

طلع عبدالله البوك من جيبه واشر لذياب..
نزل ذياب من حضن هديل بسرعة وراح يمشي بإتجاه عبدالله..
ولما وصل له..مسكه عبدالله من قميصه ورفعه على أصابع ارجوله..
عبدالله\خير وش جايبك عندي يا الإيطالي..
صدق من قال القطو يحب خانقه..

قام هادي بسرعة وكتف يدين عبدالله..
وهديل راحت لهم وشالت ذياب..
سدحه هادي على الارض..وهديل جلست ذياب على عبدالله..
هديل\هاه شفت إن ولدي ماهو بهين..
لاتغرك المظاهر وصغر حجمه تراه أسد..
عبدالله\غش..والله غش..يووبه أفزع ..
قام لهم علي يبي يفزع لولده اللي يستنجد فيه..
مسكه محمد وابوهـ ومنعوه مايقرب لهم..
والجدة تشجع ومتحمسة لــ الهوشة..

هادي بحب\وش يقول الشيخ ذياب سامحه..
هديل بخبث\لا أصبر بنفتش جيوبه..
عبدالله\لااااع وخري لاتسرقيني..

طلعت اللي بجيبه..
ومدتها قدام ذياب..أخذ البوك والباقي ماأهتم له..
رجعت اغراضه بجيبه وهي مبسوطة..
هديل بضحكة\هههههههههه بيطلع يحب الفلووس..
ما اخذ الا البووك..خلاص يا هادي سامحناهـ..

بعدت عنهم وجلست جنب جدتها وذياب معها..
علي من تحت محمد\سرقتوا ولدي..؟؟
عبدالله\يوبه ترى في البوك عشرة ريال وخمستين وخمسة ثانية ومعها ريالين..
أبو علي\هههههههههه راحت خذاها الذيب..
عبدالله\ماهو بشايف خير الايطالي..مايعرفها المسكين..
هديل\تحسبه مثلك مصروع على الفلووس..
وبعدين حن مانتعامل مع الكاش..ما نستخدم الا ماستر كارد والفيزا..
عبدالله بصدمة\أبو سنين هذا نعه حساب في البنك..؟؟
هديل بكذب\ايه معه..وعنده شركة باسمه..وش رايك تصير عنده سكرتير..؟؟
وراتبك خمسة يورو في الشهر..
علي\هههههههههه لا توافق هم الخسرانين..

دخلت عليهم أم علي وشافت الصالة كيف معفوسة..
هادي مثبت عبدالله على الارض..
ومحمد مكتف علي ..هديل متخبية عند جدتها وولدها معها..
بس اكثر شيء لفت نظرها وأسعدها..
هو صوت ضحكة زوجها..وملامح وجهه المبسووط..
سنين ماشافته يضحك ومرتاح..وكان الهم مخيم عليه..
لاحظت نظراته على هديل وولدها..
وشافت اخوانها وهادي كيف مبسوطين ويضحكون على كل شيء..
أدركت إن الفرح اللي غاب عنهم رجع برجوعها..
كانوا مسلمين بموتها وعايشين حياتهم..
بس من غير وعي منهم كانوا ينتظرونها ترجع..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛


في وقت ماكانت العائلة مجتمعة بالبيت..
غادة طلعت حديقة البيت تقابل راكان..
قربت منه وهي تحاول تخفي دموعها وتتحكم برجفتها..
رفع راسه لها وشال نظاراته وثبت عيونه عليها..
تأملت عيونه ولا تدري وش بيكون موقفه من الخبر..
أكيد صار عنده خبر من رجوع هديل..
بس هل راح يتقبلون الموضوع أو بيعارضون رجوعها..

لاحظ رجفتها وإرتباكها..
وأدرك وش اللي مخوفها..
ماينكر غضبه وقهره من الخبر..
وكيف تهاوش مع سلمان وهادي وعلي وعلت اصواتهم كل واحد يتهم الثاني..
ماقدروا يكسرون بقلوب شيبانهم ويواجهونهم بكلام قاسي..
لان الزمن طول السنين اللي فاتت ماقصر معهم..
والندم اللي كانوا يشوفونهم فيهم عرفوا السبب فيه..
ما يفسر تصرف ابوه وعمه بالشهامة او العدل..
كيف هانت عليهم..
صح زوجوها له..بس إشهار موتها وغدرهم فيها ما ينغفر لهم..
وحتى لو هددهم إنه مابيرجعها لهم مالهم حق يعلنون موتها..
لو عذروه إنه بلحظات غضب وإنتقام قال اللي قاله..

لا راكان ولا أحد عرف عن طلب غازي الأول..
لما طلب هديل تكون جارية له ورفض الزواج..
الشيبان قرروا يظل الموضوع بينهم وبين هديل..

أجبر نفسه يبتسم لها إبتسامة بسيطة يطمنها فيها..
ما يبي يكسر فرحتها بأختها..
راكان بحنية\مبرووك رجوعها بالسلامة..
شهقت بفرح وضمته بقوووة وبكت بصوت عالي..
غادة بحزن\ماصدقت..إلى ألحين مو مصدقة..
فرحانة فيها بس أبي أفرح أكثر..
أختي حية ياراكان ماماتت..
راكان يبتسم\الحمدلله اللي رجعها بالسلامة..
لاتخلين التفكير أو شيء ثاني يخرب عليك فرحتك برجوعها..
إن شاء الله بعد الليلة ما بتخافون من شيء..

رفعت راسها وناظرت بعيونه..
غادة بإستفهام\ليه وش بيصير الليلة..؟؟
راكان بهدوء\بنشهر خبر رجوعها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

تنهد بضيق وهو يكتم عصبيته..
امه وشوق ماهم براضين يفهمون عليه..
ام غازي بحدة\ما بأنتظر أكثر..
بأروح لها اليوم أشوفها واشوف ولدك..
غازي\يومه الله يسعدك إنتظري لحتى تهدى الأمور..
وبعدها روحوا لها بكيفكم..
شوق\ليه حن مو غريبين عنها..أهل زوجها..
غازي بسخرية\شوق لاتضحكين على روحك..
ماجعلها غريبة الا أهل زوجها..
أم غازي بقلة صبر\يعني متى اقدر أشوفها..؟؟
إذا مارحت اليوم بأروح بكرهـ..
غازي\اليوم إنسي الموضوع..
انا والجماعة بنروح لهم الليلة..
هلها بيشهرون خبر رجوعها..
وأكيد بنشهر خبر الزواج..
وجماعتنا كلها صار عندهم خبر..
شوق\اممم طيب وش تتوقع ردت فعلهم بتكون..؟؟
غازي بجمود\الغضب شيء أكيد..وبعدها الرضا باللي صار..
هي زوجتي ومعها ولدي..واللي عنده مانع يواجهني..
أم غازي بغضب\لاتلومهم ولا تتحداهم..
إللي سويته أنت ماهو قليل في حقهم وحق بنتهم..
ماتت وتقبلوا العزاء فيها..وأنت مغربها بآخر الدنيا..
تحمل نتيجة قرارك ياغازي..
غازي بهدوء\وهذا اللي بيصير..
باتحمل نتيجة قراري..بس فرار غيري مالي شغل فيه..
أم غازي\غيـــرك..؟؟
غازي\تزوجتها وأخذتها معي..
وشيء طبيعي الزوجة تكون مع زوجها..
بس خبر موتها من كان قرارهـ..؟؟
قرار ابوها وعمها..وهم موتوها..
أم غازي بصدمة\ماهو أنت السبب في اللي صار..؟؟
انت اللي قطعت الرجاء فيهم..وحلفت ماترجعها..
غازي\صح انا قلت ..بس هم ماكانوا مجبورين بكلامي..
لو أشهروا الزواج وقالوا زوجنا بنتنا وراحت بسبيلها..
ام غازي\بتظل قاسي ومستحيل تتغير..
غازي\مابريت نفسي من الذنب..
وبالنسبة لي زوجتي وبعدها الطوفان..مايهمني غيرها..
شوق بحذر\وهي موقفها العكس منك ..
غازي بواقعية\يحق لها..

وقف وطلع من البيت..
مايحتاج منهم يذكرونه بشيء هو مانساهـ ..
يحتاجون منه يأكد لهم رجوعها له..رضا ولا غصيبة..

سمع صرخة باسمه..
رفع راسه وشاف رشا تناديه وتركض له..
مد يدينه لها وضمها بقوة وهو يضحك لها..
رشا\حبيبي..فديتك وحشتـــــني..
غازي يبتسم\ياقلب اخوك..
قبلته على جبينه\والله مبسووطة بشوفتك..
فقدتك كثير يالغالي..
غازي بحنية\ماتفقدين غالي إن شاء الله..
وهذا انا رجعت وبعون الله مانبعد مثل قبل..
وين غازي..؟؟
رشا\مع راجح ألحين بيدخلون..

رفع راسه عنها وشاف راجح ماسك يد غازي وداخلين الحديقة..
تجاهل راجح وركز نظره على غازي ولد أخوهـ ..
أبتسم بشوق لما شافه يركض له ويصرخ باسمه..
نزل بجسمه ضمه بقوة ورفعه لفوق..
غازي بفرح\هلا وغلا بالشيخ..
غازي يضحك\أروح معك...
غازي يعقد حواجبه\ههههههه توك واصل وين تروح معي..؟؟
كيف حالك..؟؟
غازي يتعلق فيه\بخير..بأروح معك..
رشا\ههههههه مالك حل..
غازي\أبشر تروح معي..بس بعدين..
ألحين بأروح عندي عمل وبعدها ارجع لك..
غازي الصغير\قل والله..
غازي بتفكير\امممم طيب ماهو الليلة بكره ان شاء الله اخذك معي..
غازي الصغير\قل والله..
غازي يتنهد\ياليل الجلطة..قلت إن شاء الله..

خذته رشا وهي تضحك على شكل غازي..
رشا\وين رايح أبي أجلس معك..وأعرف اخبارك..
غازي\مشوار وبأتاخر فيه..
إنتي نامي عندنا الليلة واسهر معك..
رشا\اوكى بس بأستئذن راجح اول..

مارد عليها ورفع راسه يناظر براجح اللي واقف بعيد عنهم..
وشكله ينتظرهـ .. طلب منها تدخل عند أمه وشوق..
وهو توجه لراجح..وقف قباله..
راجح\عاش من شافك..
غازي\عاشت ايامك..
راجح بهدوء\برسالتك قلت بكرهـ موعدنا..
وش صار وخلاك تحطه اليوم..
غازي\هلها مجتمعين الليلة..
وأبو نايف قال إذا اقبلنا عليهم الليلة يكون أحسن بما أنهم مجتمعين..
راجح بتاييد\رأي طيب..تمشي معي بسيارتي ولا..؟؟
غازي\مابعد نسيت شوارع الرياض..
راجح\عشرة عمر كيف تنساها..
غازي ببرود\والعشرة ماتهون الا على الخاين..
راجح يرفع حاجب\مابه مشكلة أكون بنظرك خاين..
على الأقل أنا خنتك ماخنت نفسي مثلك..
غازي\كل شيء بحسابه ياراجح..
صد عنه راجح\عمـــك راجح ..

طلع من البيت وارتسمت إبتسامة جافة على وجه غازي..
رفع راسه وناظر السماء..
وهمس\الحمدلله إنها حية..وهذا يكفيني..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛