يمسح الدمعه بشكوى للكاتبه هدوئي

17 - 4 - 2014, 09:18 AM

* الجــزء الســادس عشــر *

[size="4"]

التفتت لرايد ولقيته يطالعني وهو واقف

عمر = صح رايد قبل انسى .. انا بكرة ابتأخر .. تغدى لا تحتريني .. بكرة بعد ماطلع من الجامعة ابمر الشرطة ابلغ على نايف

طالعني رايد شوي وبعدها راح بصمت للكنبه اللي ينام عليها وجلس

وقّـتت جوالي على وقت الجامعة ونزلته على الطاولة الصغيرة ونمت

الاحد ... الساعة 7 ونص

قمت منزعج من صوت رايد اللي يصارخ علي

رايد = عوماااااااااااااااااااار .. قم قم ... منبه جوالك له ساعة يرن وانت مانت حوله ... قم ازعجني جوالك ... قم طفه

جلست وانا اتافف ونعسان بقوة وماصحصحت الا على شهقت رايد

رايد = اوووووه ... عمر شف وجهك وشلون صار

التفتت لرايد اللي قام وجلس على الطاولة الصغيرة قدامي

رايد = شكلها من الهوشة امس مع نايف

قطبت حواجبي مستغرب و قمت رايح للمغاسل اشوف المراية وتبعني رايد

عمر = اوووووه

تضايقت من شكل وجهي ... هذا شكل اروح فيه للجامعة ... اففففف واهلي بعد وش اقولهم .. خاصة جدي

ناقص انا

شفتي السفلية فيها جرح كبير شوي .. و كدمة حمراء كبيرة تحت عيني.. الخياطة اللي براسي مليانة دم يابس .. وخدش اظافر على خدي وجبهتي

التفتت لرايد اللي واقف ويطالعني

عمر = الجامعة ماتعطي درجات على كل هوشة

نزل رايد راسه

رايد = غسلت ثوبك امس .. ابروح اجيبه لك الحين

وراح للحوش

التفتت للمراية وتنهدت .. بسيطة يانايف .. اليوم اببلغ عليك الشرطة وتشوف

وضيت ورجعت للصاله اصلي

وقمت البس ثوبي بسرعة متأخر عن الجامعة

سمعت رايد وراي يلكمني وانا البس ثوبي ومعطيه ظهري

رايد = عمر .. آسف ... آآآ ... احس نفسي عالة عليك .. وووو ... سببتلك مشاكل .. حتى امك صارت ماتقدر تجي هنا بسببي ( وسكت )

التفتت لرايد ولقيته جالس على الكنبة ومنزل راسي بحزن

عمر = حفظت هالكلام .. كم مرة تعيده ؟

كمل رايد كلامه

رايد = كل هوشاتك مع نايف انا السبب فيها ... ( ورفع راسه وهو شوي ويبكي ) اول مرة مع سعد ونايف يوم كنا بالاستراحة .. آآآ ... يوم كنت انت تعبان وتهاوشت معاهم .. مانسيتها كان بسببي ... وبعدها يوم تتهاوش مع نايف هنا ببيتك .. ( ونزل راسه منحرج ) بعد بسببي .. و اخرها امس .. هذا غير امك .. آآآآ ... انا متــاكد انها ماهي راضية وووو .. هي ماتدخل بيتها بسببي ... ( ورفع راسه ودمعته على خده ) انا خلاص ابطلع من بيتك

طيرت عيوني منصدم

عمر = تطلع تروح وين ؟

رفع رايد يده يمسح دمعته

رايد = آآآآ ... ( ونزل راسه و سكت )

عمر = لعمك ؟

رايد = مدري .. يمكن .. آآ ( وهز راسه ) لا لا ... آآ .. ( وتنهد ) مدري يمكن

تنهدت وطالعت ساعة جوالي ورفعت راسي للاهبل اللي عندي

عمر = رااايد

رفع راسه لي يطالعني

عمر = انا مستعجل الحين .. بس ابقولك كلمة قبل اطلع ..

وسكتت احتريه يسألني وش ... بس ساكت و يطالعني

عمر = ابي اشوفك هنا اذا رجعت

رايد بحزن = بس انا اذيتك واااااجد .. بترتاح مني

ابتسمت وعدت الكلام عليه

عمر = ابي اشوفك هنا اذا رجعت

مبرطم ويشاهق وهو يطالعني وساكت

عمر = مستعجل انا .. ( واخذت اغراضي من الطاولة الصغيرة واعتدلت واقف اطالعه ) لا تحتريني على الغداء ... وترا عشانا الليلة ماني جايبه من برا ... انت اللي بتطبخ عشانا اليوم ( وابتسمت ) اوكي ؟

يشاهق وكل شوي يمش خشمه بيده يحاول مايبكي اكثر

بغيت اضحك واعطيه كم طنازة كعادتي بس مستعجل وماني فاضي

طلعت من البيت ورحت للجامعة

بعد المحاظرة الاولى اتصلت على منصور ومشعل وعبدالله وحددت مكان في الجامعة اقابلهم فيهم

ربع ساعة و اجتمعنا .. علمتهم باللي صار امس مع نايف

عمر = يقول بيسلملي على واحد .. عجزت افهم وش يقصد ؟

طالعوا بعضهم مستغربين

عبد الله = واحد ؟ .. ماقال مين ؟

عمر = لو قال ماسألتكم

منصور = يمكن يقصدني انا ... لأنه امس الظهر جاني بالبيت يطلب فلوس بعد .. شكله صدق محتاج

قطبت حواجبي مستغرب

عمر = وشلون يقصدك انت .. هو قال بيسلملي على واحد اهم منهم ... يقصد اهم من الشرطة ( وكملت اتطنز على منصور ) انت ووجهك اهم من الشرطة ؟

حك منصور ذقنه يفكر

منصور = يمكن صار لي منصب وانا مدري

مشعل بتفكير = مااعتقد انه يقصد منصور .. نايف يعرف اننا دايم مع بعض مايحتاج توصيل سلام .. ( وطالعني ) عمر انتبه منه .. شكله ناوي على شر

طالعت مشعل وسكتت شوي

عمر = اكيد بعد اللي صار امس ناوي لي على شر ... حتى انا ناويله على شر وقلت له بوجهه بعد .. و قدامه قلت اني ابروح للشرطة وابلغ عليه .. بس قال بعدها انه بيسلملي على احد ... يعني اكيد بيروح لواحد مثل ما انا ابروح للشرطة .... ( ورفعت صوتي منفعل ) بس مين مدري ؟

عبد الله = عمر هد شوي ... وش فيك ؟ لا يكون صدق خايف منه ؟

لفيت وجهي عنه وزفرت بضيق

عبد الله = لا يهمك ياخي .. ترا نايف لا يهش ولا ينش

اخذنا شوي ساكتين فجأة نغزني عبد الله اللي جالس بجنبي

التفتت له ولقيته يطالع شي قدام

عبد الله وهو يشر براسه = واحد من عيال عمك

التفتت للمكان اللي يطالعه عبدالله

وشفت مصعب واقف بعيد شوي ويشر لي بيده يعني تعال

قمت واقف .. بس سمعت مشعل يكلم عبد الله ومنصور و يحاول يسمعني

مشعل = استعدوا شباب بتصير هوشة الحين

مريت على مشعل وضربت راسه بمزح ورحت متوجه لمصعب

عمر وبدون نفس = خير

اختفت ابتسامة مصعب وشهق

مصعب بصدمة = وش فيه شكلك كذا ؟ متهاوش مع احد ؟

لفيت وجهي عنه متضايق .. نسيت ان وجهي مليان كدمات وخدوش

عمر بضيق = مافيه شي ( والتفتت له ) وش بغيت .. خير مناديني ؟

مصعب بابتسامة = الخير بوجهك ... وشلونك .. عساك طيب ؟

عمر = بخير

مصعب = وشفيك تقولها بدون نفس

عمر = انت الحين مناديني وش تبي ؟

مصعب = اول علمني من مسوي بك كذا ؟

عمر = وانت وش عليك

مصعب = لا يكون اللي يطارد رايد .. ( وكمل بتفكير ) نسيت اسمه .. علمني رايدبس نسيت .. امممم على ما اعتقد اسمه نايف .. صح ؟

هزيت راسي بايه

مصعب = وليش ساكتين عنه .. عذر رايد انه مهدده باخته ومعذور .. بس انت وش عذرك ؟ ليش ماتبلغ عليه ؟

عمر = قال رايد اذا بلغنا الهيئة عليه راح يمسكونه شهر شهرين ويطلع .. والصراحة رايد معه حق ( وتنهدت ) انا اصلا اببلغ عليه كان طلعوه بعد شهر والا بعد شهرين .. المهم نفتك من سالفته

مصعب = طيب فيه حل ... خل نايف هذا يعرف ان التبليغ منك بأي طريقة مو من رايد .. بكذا نايف بيعرف ان رايد ماله دخل .. ( وسكتت شوي يفكر ) والا اقول نايف مايعرفني خلوني انا ابلغ الهيئة بمكانه واقولهم انه كل شوي يجيكم بالبيت

سكتت شوي وانا اطالع مصعب وبعدها رفعت راسي بتعالي احاول احرجه

عمر = لا مانبي منك شي .. قلت لك قبل هالمرة ... انا ماني بحاجتكم ..

سكت مصعب شوي وهو يطالعني وكأنه زعل .. وبعدها هز راسه

مصعب = ماتخلي طبعك .. مغرور وشايف نفسك

عمر = المهم اخلص علي وش تبي مناديني ؟

مصعب بتنهيدة = كلمت جدي ومها يجون عندنا اسبوع او اسبوعين ... وبكرة ان شاء الله بعد ما اطلع من الجامعة اوصلهم لبيتنا

عمر = جدي وافق ؟

مصعب = اول شي ماوافق .. بس قلت لبوي يكلمه ووافق ( وابتسم )

هزيت راسي بأيه ونزلت راسي بصمت

ياحظه ... واضح انه مستانس .. امه وابوه واخواته واخوانه وامي .. كلهم ببيت واحد ... عايلة كبيرة .. وبيجيهم مها وجدي وجدتي فوقهم ... اظن مصعب مايعرف شي اسمه وحدة ... ( وابتسمت بحزن ) هه انا ماعندي الا رايد ويتهدد يطلع من عندي .. وفوق هذا اصله مو اخوي ... بس والله ملى علي البيت .. مابي رايد يطلع .. ماعندي الا هو يخلصني من وحدتي ويرد لي الصوت .. القى احد اتكلم معه .. واتطنز عليه .. واتهاوش معه .. ناكل مع بعض .. نتفرج

رفعت راسي لمصعب ... اتمنى اكون بمكان مصعب ولو يوم ... اجلس بين اخوان .. يحبوني واحبهم

انتبهت على يد مصعب اللي حطها على كتفي

مصعب = وش فيك عمر .. لا تنسى الفكرة منك .. وانا نفذتها بس .. وش فيك كأنك زعلت

عمر بتردد = مـ .. مصعب .. آآآ .. عمرك .. آآآ

ولفيت وجهي عنه و سكتت .. ابي اسأله عمره حس بالوحدة مثلي والا لا ؟

بس ماتجرأت اسأله ... مابيه يحس بمعاناتي

مصعب مستغرب = وش فيك سكتت .. كمل .. عمري وش ؟

سكتت ومارديت .. اكيد مايعرف شي اسمه وحدة وشوله اسأله اصلا .. بس اشمته فيني على الفاضي

مصعب مستغرب = وش كنت تبي تقول ؟

التفتت له وصارخت بوجهه

عمر بعصبية = ياخي انت الحين وش تبي .. مناديني من عند خوياي بس عشان تعلمني ان جدي وافق .. ماتعرف ترسلها بجوال والا تأجلها لين نخلص انا وخوياي .. لازم يعني تقومني من عندهم .. صدق انك درج

وعطيته ظهري ورجعت للشباب

جلست بمكاني وطالعت مصعب اللي واقف بمكانه ولقيته الى الحين يطالعني مستغرب

اخذ شوي واقف ومشى بطريقه

جلسنا نكمل سواليف وسحبنا على المحاظرة الثانية .. ناوين نفطر برا ونرجع للمحاظرة اللي بعدها

طلعنا نمشي حنا الاربعه ويوم وصلنا عند البوابة شفت معاذ ومعه خويه .. شافني معاذ و اشر لي بيده يعني تعال

زفرت بضيق ... افففففففف اللهم طولك ياروح ... خلصت من واحد جاني الثاني .. لفيت وجهي عنه احط نفسي ماشفته ومنها يحس اني سفهته

بس عبد الله مسك يدي مستغرب

عبد الله = بسم الله .. هذا مو ولد عمك اللي قبل شوي ... توني شايفه ورانا .. مسرع يوصل هنا

حطيت اصبعي على الجرح اللي ببرطمي و ضحكت على عبد الله ... اكثر الشباب مايفرقون بين عيال عمي بسبب الشبه الكبير بينهم ... مع ان مصعب لابس نظرات ومعاذ لا .. وفوق هذا الشباب يلخبطون بينهم

عمر = هذا معاذ ... كم مرة اقولكم اللي عليه نظرات مصعب والثاني معاذ

وقف مشعل قدامي و خلاني اضطر اوقف عن المشي

مشعل = اللي قبل شوي ماعليه نظرات بعد

صح ..... مصعب قبل شوي ماعليه نظارات .. كان منزلهم ... بس مدري وشلون اعرف افرق بينهم ... اعرف هذا مين وهذا مين حتى لو من بعيد وحتى ولو مصعب ماعليه نظراته .... مع ان العلاقة بيني وبينهم ماهي ذاك الزود

منصور = رح لهذا يشر لك من اليوم

التفتت لمعاذ ورحت له مو لسواد عيونه .. عشان كلام خوياي بس

وصافحت خويه وتبادلنا السلام مع اني مااعرفه الا من الوجه .. دايما اشوفه مع معاذ

والتفتت لوجه العنز
عمر = خير

اشر معاذ على وجهي والتفت لخويه وهو يضحك

معاذ = شف .. سيماهم في وجوههم ههههههههههههه .. سبحان الله من وجهه تعرف اخلاقه ( والتفت لي وهو مبتسم ) متهاوش مع مين هالمرة ... انت مايسلم منك احد .. اعرفك ياولد العم

عمر بعصبية = طالع .. انت مناديني الحين .. عشان تقولي هالكلام ( وصارخت بوجهه ) وش تبي ؟

معاذ = اشوفها حلت لك السالفة ... متى بترجع لي سيارتي

عمر = والله .. متى ماخلصت سيارتي ذيك الساعة افكر ارجع سيارتك

معاذ = غصب عليك ترجعها ... يكفي مكافأتي ومكافأة مصعب تاخذها كل شهر

ابتسمت احاول اغيضه

عمر بابتسامة = عاد تصدق جازت لي سيارتك .. مريحة .. شكلي اباخذها خلاص .. وانت خذ سيارتي بعد ماتطلع ... طاح نص قيمتها

معاذ بعصبية = وشووووو ... ( وصارخ بوجهي ) اعرفك تسويها .. انت ماحد سالم منك ... وشكلي سكتت عنك واجد ... سيارتي ترجعلي غصب عليك

ابتسمت ورديت عليه بهدوء اغيضه

عمر بابتسامة = تبطي عظم

مسك معاذ ياقة ثوبي ورفع قبضة يده بيضربني بس مسكه خويه يمنعه

خوي معاذ = بس فضحوتنا بالجامعة .. كل ماتقابلتوا لازم تتهاوشون ( والتفت لي ) عمر رجع سيارة الرجال .. تبي الصراحة تصليح السيارات ماتطول هالكثر وش معنى سيارتك طولت .. خاصة ان سيارتك ماهي متضررة مرة

ابتسمت بنذاله ... انا قايل للعامل التركي اللي يصلح سيارتي .. ياخذ راحته بالشغل .. وقلتله لو جت سيارة بعد سيارتي عادي صلحوها قبل سيارتي .. والتركي المسكين على نياته يحسبنها طيبة مني وقعد يمدحني ... مادرى انها نذاله في معاذ

عمر = الكلام هذا تقوله للورشة ماتقوله لي ..

معاذ بعصبية = زين نمر الورشة ونشوف وش اخرتها معك

عطيتهم ظهري ورحت للشباب

امممم لازم اتصل على التركي واكد عليه انه لو جاه احد يسأل عن سيارتي يجيبله أي عذر مقنع بطريقته ...

ودي بأي شي يقهر معاذ ومصعب ... مثل مايقهروني بالفرق بيني وبينهم

17 - 4 - 2014, 09:18 AM

الساعة 2 ونص

طلعت من الجامعة وانا تعبان من هالمحاظرات ... افففففف المشكلة لازم الحين اروح للشرطة .. مالي نفس لهم ولاجرائتهم

ياحياة الشقا

دخلت قسم الشرطة .. وبلغت على نايف بس كالعادة لازم دليل على انه كل شوي يزعجنا .. علمتهم ان الهيئة تدور عليه ... بس الضابط طلب مني اروح لفرع الهيئة اللي عندها ملف نايف

عمر = وانا وش دراني أي فرع .. بريدة مليانه فروع للهيئة ؟

الضابط = طيب عطني اسمه كامل .. نتأكد ونشوف ... تقول هو دايم يجيكم بالبيت ؟

عمر = ايه

فجأة رن جوالي

القيت نظرة عليه ( الراس الكبير يتصل بك )

التفتت للضابط استاذنه

عمر = لحظات ( ورديت على الجوال ) هلا جدي

ابو فهد = عمر وانا جدك ... تعال بعد اذان العصر على طول .. بيجوني رجال وابيك عندي

بغيت ابكي ... توني طالع من الجامعة .. ودي اناااااااااام

عمر بضيق = لازم يعني ... خلهم يجون المغرب .. توني طالع من الجامعة ونعساااااااان .. بي نووووم

جدي = الله يهديك بس الساعة 3 .. الحين يذن العصر .. تعال الله يصلحك

عمر = اففففف ... طيب طيب

وسكرت عنه والتفتت للضابط متنرفز

عمر = هاااه وش كنا نقول ؟

الضابط = خلاص حنا بنتواصل مع الهيئة اول وبكرة راجعنا

لفيت وجهي عنه متضايق .. بعد فيها مراجعات .. فاضيلهم انا

قمت عنه واول ماطلعت من قسم الشرطة أذن لصلاة العصر

ودي اصييييييييييح ... نعسااااااااااااااااااااان وفوق هذا ماتغديت ...

حركت السيارة لبيت جدي ..

شهقت .. صح

رايد ...

اليوم الصبح قال يبي يطلع من بيتي .. عليه تفكير مدري وش يبي ... اجل يبي يطلع عشان ما اتهاوش مع نايف

انا قلتله .. ابي ارجع والقاه بالبيت .. بس مدري احس بيطنشني ويسوي اللي براسه ... ملى علي البيت مابيه يطلع

طلعت جوالي واتصلت على بيتي اتطمن

رن .. رن .. رن ... ولا رد

عدت الاتصال ولا رد

عدت الاتصال مرة ثالثه ولا رد

.. اووووووه لايكون طلع

عدت الاتصال ولا رد

وطوال الطريق لبيت جدي وانا اتصل على بيتي

وفرحت لما رفع احد التلفون

عمر بفرح = الووووووووووووو رايد

مافيه صوت

استغربت

عمر باستغراب = الوووووووووو

اخيرا سمعت همس وصوت خفيف

رايد = عمر ؟

عمر = ايه انا عمر .. طول صوتك .. من اليوم اتصل ليه ماترد

رايد = خفت يكون احد من اهلك ...

سكتت وانا مبتسم بفرح .. الحمد الله ماطلع

فكرت بعذر ابرر فيه اتصالي .. مابي ابين له اني اتصلت اشوفه اذا طلع والا لا

عمر = اممممم .. رايد انا ابطول شوي .. جدي محتاجني .. تقريبا ماارجع البيت الا المغرب

رايد بهدوء = طيب

عمر بابتسامة = تبي شي اجيبه معي ؟

رايد = لا

عمر = ترا مثل ماتفقنا عشانا اليوم عليك ...

رايد = ان شاء الله

سكرت عنه ... صوته هادي كأنه ماله نفس يتكلم ... ادري نفسيته تعبانة ومتضايق من وضعه بس وش بيدي اسويه واثباته مع عمه

اكلم عمه بنفسي .. بس بصفتي ايش اطلب كرت عايلتهم

بيشوتني عمهم على طول

وصلت بيت جدي ومالقيت احد بالمجلس ... شكلهم الى الحين بالمسجد

دخلت على عمتي مها بالمطبخ .. ولقيتها واقفة عند الفرن وتدبر

عمر = السلام عليكم

وبدون ماتطالعني

مها = لا تكلمني ...

عمر مستغرب = افاااا .. ليه ؟

مها = انت واحد اناني .. ماهمك الا نفسك ( والتفتت لي معصبة ) ليييييه مافاتحت ابـ ( وشهقت لما شافت وجهي ) وش هذا بعد ... انت كل يوم تجينا مضروب ... اول رجلك وبعدين راسك والحين هذا اللي بوجهك ( وقربت عندي ) وش منه هذا ؟

التفتت بضيق ... اففففف اكره شي عندي التحقيق ... الحين مها .. وبعد شوي جدي .. كأني عارف

عمر بضيق = تهاوشت مع واحد

مها = ادري انك متهاوش مع واحد ... بس وش قصتك انت ... كل يوم تجينا بشكل جديد واصابة جديدة ... ( وسكتت تفكر ) اكيييييييد تلاحقك عصابة .. ( وباعدت بين رجليها ورفعت قبضة يديها الثنتين واستعدت كأنها بتلعب كارتيه ) علمني باسم العصابة والحين اخلصك عليهم بضربتي القاضية

طالعتها من فوق لتحت وانا فاتح فمي مفهي

عمر = تقضين عليهم بضربتك القاضية !!!

اعتدلت مها واقفة وراحت للفرن تطفي عن القهوة

مها = توني شايفة فيلم ياباني هههههههههههههه والا انا ماعندي الا الدجة

ابتسمت

عمر = المهم قوليلي انتي ليش زعلانه ؟

التفتت مها لي معصبة يوم تذكرت ..

مها = ليش مافاتحت ابوي بموضوع القرض .... ياااااااااااااخي لا تقتلوووون طموحي

زفرت بضيق .... انا وش اللي خلاني اذكرها .. كان خليتها على فلمها الياباني

عمر = مها حنا مانقتل طموحك ولا شي حنا خايفين عليك .. انتي فكري فيها من كل الجهات وبتشوفين ان كلامنا صح ( وقربت عندها وحطيت يدي على كتفها ) وش رايك تشيلين القرض من بالك واخذي من عمي عبد العزيز او عمي فهد ... و انا بعد اقدر اسد الناقص على شوي شوي من راتب ابوي

مبرطمه وساكته

عمر = هاااه وش قلتي ؟

مها بزعل = ابروح اصلي .. احسن من مقابل وجيهكم .. تحطموووووووون الواحد

وطلعت معصبة

تنهدت .. غصب تصير تاجرة هذي .. مصدقه روحها

طلعت من المطبخ ... صح انا بعد ماصليت ... اصلا نسيت الصلاة كلش .. ماتذكرته الا من مها الحين

افففففف ليش هذا حالي مع الصلاة .. دايما اما اخرها او انساها او اجمعها مع الصلاة الثانية ... الملتزمين بايش احسن مني هم ... ليش دايما انساها ... رايد وهو اصغر مني يحافظ عليها بشكل احسن مني

ماعمري شفته يجمع صلاتين مع بعض .. واذا تأخر يصير بسبب النوم .. مو مثلي اتأخر عنها بدون سبب ... ليش انا كذا لييييييش

رحت للصاله ... ولقيت جدتي نايمة على الارض وشكلها هذي قيلولتها ماقامت منها الى الحين

احسن خلها نايمة ... اخاف تشوف وجهي وتفتح معي تحقيق ... خلني اصلي واطلع على طول قبل تقوم

واول ماخلصت من الصلاة سمعت صوت جدي بالمطبخ وينادي مها

قمت ورحت اعرج بسرعة متوجه له ولقيته طالع من المطبخ و يدور مها

عمر = السلام عليكم ... هاااه الرجال بالمجلس الحين والا باقي ماجوا ؟

التفت جدي لي وبدون مايرد السلام وواضح عليه مستعجل

جدي = الرجال بالمجلس الحين .. يله بسرعة هات القهوة لهم .. لا تتاخر

ومر من عندي يبي يتعدى بس وقف يوم انتبه لوجهي وطالعني مستغرب

صار وجهي معلم اثري مو وجه .. كل واحد يوقف ويتطلع بمنحوتات نايف الابداعية

جدي بخوف = وش هذا .. وش فيه وجهك .. من مسوي فيك كذا ؟

ياربي وش اقول الحين ... جدي مو مثل مها... تسأل بس ماتلح بالسؤال ... اما جدي لا ... يسأل لين يعرف كل شي

اقوله كنت العب كورة وطحت .. لا لا .. حلى هو ... الاصابة اللي برجلي قلت لهم العذر اني العب كورة .. بعد هذي اقول نفس العذر بيشك كذا

طالعت جدي و ضحكت ضحكة مب بوقتها

عمر = ههههههه جدي عادي .. شفنا ثنين يتهاوشون وفرقنا بينهم ... بس

طالعني جدي بنظرات حازمة كعادته وكأنه ماعجبه الكلام

جدي = هات القهوة يله

وراح ...

اففففف .. ادري بيستلمني بعد مايرحون الضيوف

عشر دقايق ورحت للمجلس ومعي الضيافة وتفاجأت بعم رايد من الموجودين ...

سكتوا لما شافوني وبعد السلام رجعوا لحديثهم .. وانصدمت من اللي يقولونه

كلهم يسألون عم رايد ( ابو بندر ) عن سيارته وتفاجأت فيه يتهم رايد بانه السبب

بالبداية مافهمت شي .. بس من كلامهم واسئلتهم لأبو بندر عرفت ان سيارته زجاجها مكسور ... وهالظالم يتهم ولد اخوه

التفتت لجدي اسأله

عمر = سيارة ابو بندر مكسورة ؟

رد علي احد الرجال = ايه ... سيارته الجيب .. يقولون انه رايد ولد اخوه

نزلت راسي احاول اتذكر

امس رايد اخذ اخواته يتمشى ... يكذب هالشايب هذا .. متى رايد كسر سيارته ... اصلا رايد مارجع الا اخر الليل وفوق هذا كان منتفخ وماله نفس يتكلم ...

تدخلت بالكلام بعد مامديت الفنجال لاحد الرجال

عمر = وانت يابو بندر وش دراك انه رايد هو اللي كسر سيارتك .. يمكن واحد من البزارين

رفع ابو بندر راسه لي وانا واقف بحكم اني الصباب

ابو بندر = امس لا بارك الله في العدو جانا وحاسنا انا وبناتي ( والتفت للموجودين ) كل شي سويته لهالولد بس اللي مايهديه الله ماتقدر تهديه

احد الموجودين = الله يصلحه ويهديه

جدي وهو يهز راسه = لا حول ولا قوة الا بالله ... ماكان رايد كذا .. كان هادي .. ماينسمع صوته .. وش غيره ؟

مسكتت الدله بقوة منقهر من ابو بندر .. ودي احط هالدله براسه ... يكذب عليهم وهم مصدقينه حتى جدي مصدقه ... انا متأكد انه مب رايد اللي كسر سيارته ... صح امس انا واياه موجودين بالحارة .. بس رايد من العصر الى اخر الليل وهو مع اخواته يتمشون ... و رجع ونفسيته تعبانه كالعادة ...

ابو بندر = انا عشانكم بس ماني مبلغ عليه ( وسكتت شوي ) صدقتوني الحين يوم اقولكم هالولد مبهذلنا .. وانتم كل واحد يلومني من جهه لاني طردته من بيتي ... مبهذلنا هالولد

جدي = هذي ماهي عادة رايد .. اكيد انه ماشى دشرن واخذ منهم ... الله يصلحه

احد الرجال = والله هذا ينخاف على عيالك منه يابو بندر ... الله يعينك

عضيت على شفايفي منقهر من هالشايب الكذوب .. والمشكلة الشيبان الثانين مصدقينه ...

وقفت قدام ابو بندر والدله بيدي مشتهي افرغها براسه ... من عذر رايد يهج من البيت اذا كان هذا راعيه

عمر = خلنا نفرض ان رايد هو اللي كسر سيارتك مثل ماتقول ... مع اني انا متأكد انه مو رايد ... بس نقول فرضا انه هو ... تتوقع ليش سوا كذا ؟ ... مافيه احد يكسر سيارة عمه بدون سبب ... اكيد الولد منقهر من شي ..

ونفخت صدري احتريه يرد علي

اللي مايستحي من احد ويكذب على الناس .. لا تستحي منه

والله لأفضحه قدامهم

بس هالشايب وجهه مغسول بمرق .. يرد علي وكأنه واثق

ابو بندر = وش ينقهر منه .. وحنا شفناه عشان نسويله شي ... من يوم ماطاب وقدر يمشى طلع من البيت

ضحكت بسخرية

عمر = هه .. وراتب ابوه .. واثباته اللي انت حارمه منه .. والضمان الاجتماعي اللي تلهفه انت وعيالك

طير ابو بندر عيونه فيني والتفت للموجودين منحرج

جدي = عمر .. وش تقول انت .. وش دراك عن اللي داخل البيوت ... لا تتهم الرجال

التفتت لجدي بتحدي

عمر = لا اسمحلي جدي ... ادري .. ( والتفتت للموجودين ) بالعقل .. ولد بالمتوسط طرده عمه وحارمه من كل شي ... ياكل راتب ابوه .. وباع بيتهم .. وفوق هذا الضمان الاجتماعي اللي يصرف له ولاخواته ياكله هذا هو وعياله ( واشرت على ابو بندر ) .. وش تبون رايد يسوي .. ولد .. بزر .. توه طالع من المتوسط ... لا بيت يضفه ولا وظيفه تقبله ... وفوق هذا ابو بندر معيي يعطيه اثباته ( والتفتت لعم رايد ) كلامي صح والا غلط يابو بندر ؟

سكتوا كلهم وماحد رد علي

ابو بندر مرتبك = ماني حارمه من شي .. فتحتله بيتي ... واصرف على اخواته ... وهو بعد حياه الله ببيتي ... بس هو اللي طلع وش تبيني اسويله ... اروح اطارد وراه ( والتفتت لجدي مرتبك ) سكت ولدك يابو فهد ... كلامه كله غلط .. ( ورفع راسه لي معصب ) اثباته اكيد عندي .. رايد الى الحين بكرت عايلته ... هو واخواته بنفس الكرت ... اذا عطيته الكرت اخواته من وين لهم اثبات .. ( وصارخ بوجهي ) ماتقول ؟

عمر = وليه ماتعطيه حصته من الضمان الاجتماعي ... حق البنات كيفك خذه ... بس رايد عطه حقه ...

مسح ابو بندر لحيته منحرج ومرتبك ومايدري وش يقول

ابو بندر = آآآآ .. احد شافه اصلا ... هذا انتم شايفين جانا البارح وحاسنا وراح

جدي بحزم = عمر

التفتت لجدي ولقيته يطالعني بحزم

جدي = من وين تعرف رايد .. ؟

سكتت ... مابي اقول انه ساكن معي عشان هالشيبة الظالم مايوصله

عمر = شفته مرة باستراحة شباب ... ثيابه متقطعه ووسخه... وماعنده اللقمة ياكلها ... متشرد من شارع لشارع ... وتبونه بعد هذا كله مايكسر سيارة عمه ... الصراحة من عذره ... ولو بمكانه انا ابسوي اكثر من كذا

التفتوا الرجال لابو بندر واستلموه

احد الرجال = انت تاخذ الضمان الاجتماعي حق عيال اخوك يابو بندر ؟

ابو بندر مرتبك = اخذه بس اصرف عليهم منه .. ماني حارمهم مثل مايقول هذا ( واشر علي )

عمر = هه .. ورايد تصـ

وصارخ علي ابو بندر مقاطعني

ابو بندر = بس انت اسكت ... اذا تكلموا الكبار ... الصغار يسكتون ... ( والتفت لجدي ) سكت ولدك يابو فهد ... ترضاها لي يجيب كلام من راسه ويلفقها علي

عمر بعصبية = هذا مو كـ

وقاطعني جدي يسكتني

جدي بصرخة = عمممممر

بلعت لساني بعد صرخة جدي علي وانا انفاسي سريعه منقهر من هالشايب

ابو بندر بعصبية = هالجيل التالي مايحترم احد ... ( والتفت لي ) الضمان الاجتماعي اصرف على عيال اخوي بطيبة نفس ... مانبي الا الاجر من ورا هالايتام ... اما اللي يطلع من بيتي برضاه يطلع .. وش تبيني اسويله ... وراتب اخوي الله يرحمه على قلّه .. ما اخذ منه ريال واحد ... يعني لازم اعلمك وش اصرف ووش مااصرف ( والتفت للموجودين ) هذا اللي ناقص ... هالجيل يحاسبنا

مسكت الدله بقوة منقهر من كلامه .. المشكلة ما اقدر اقول شي

احد الموجودين = طيب ليه ماتعطيه اثباته يدبر نفسه ؟

ابو بندر = والبنات من وين لهم اثبات ... هم كلهم بكرت العايلة ... اذا كبر الولد اقصله بطاقه ... بس الحين كلهم بكرت واحد

وقعدوا يتكلمون .. وانا قاعد اكل في نفسي ... ودي ارد عليه .. والمشكلة بدا يقنعهم بكلامه ... اللهم الاثبات قالوا له اخر شي .. يعطيه رايد لين يلقى وظيفه ويرجعه لك ... ووافق وجه العنز

ابو بندر = طيب اعطيه اثباته لين يلقى وظيفة بس ماعرف مكان رايد وين

عمر = عطني اياه انا اوصله له

سالني احد الموجودين

احد الرجال = تعرف مكانه الحين وين ؟

التفتت لجدي اول ولقيته يطالعني بحزم ... طنشته والتفتت للرجال اللي سأل

عمر = اعرف استراحة اخوياه

17 - 4 - 2014, 09:19 AM

التفت جدي لابو بندر

جدي = خلاص يابو بندر هات كرت العايلة حق عيال اخوك وعمر يوصلها له

التفت لي ابو بندر بحقد وسكت

نفخت صدري وانا اطالعه بتحدي وابتسمت

اخيرا اثباتك بيوصلك يارايد ... راح تنحل كل مشاكلك وترتاح

التفتت للموجودين اذكرهم بحق رايد بالضمان .. فرصه بما ان هالشياب الظالم مسوي فيها طيب قدامهم

عمر = وحق رايد بالضمان ... رايد مايوصله ريال منه

رد علي ابو بندر وهو ماسك نفسه والود وده يحفر قبري بمكاني

ابو بندر = خله يجيني ... انا ماعندي مانع يرجع يسكن عندي ... هو اللي طلع من كيفه

عمر = هو مايبـ

وقاطعني جدي يكلم ابو بندر

جدي = خلاص يابو بندر .. لنا كلام معك ومع رايد لما تجتمعون ( والتفت لي وعطاني نظرة )

الله يطلعني سالم من بيت جدي اليوم ... شكله بيستلمني بعد مايروحون الرجال

نص ساعة واذن المسجد لصلاة المغرب

طلعوا الرجال من المجلس وجدي معهم .. كان على بالي بيروح معهم للمسجد بس تفاجأت فيه رجع

جدي = عمر يله مشينا للمسجد

طالعت جدي مستغرب

وش صار بالدنيا بالعادة يروح جدي بدون مايطلب مني اروح معه

عمر مستغرب = آآآآآ ... رح انت للمسجد وانا الحين الحقك

جدي = لا .. ابي اتكلم معك وحنا ماشين

ايوووووة قل كذا من البداية وابتسمت بوجه جدي بخوف .. الله يعدي الليلة على خير

طلعنا انا وجدي من البيت متوجهين للمسجد... وعلى طول سألني

جدي = اول شي وش منه اللي بوجهك ؟

عمر = قلتلك هوشه بين ثنين وفرقنا بينهم ..

جدي = هو نفسه اللي ضربك مع راسك

سكتت ومارديت .. جدي ماهو مصدقني انها هوشة

جدي = والله مادري وش سالفتك ياوليدي ... كل يوم داخل علي بحاله ... وسيارة معاذ لي مدة اشوفها معك ... سألت عمك عبد العزيز وقالي عيال عم ويتفاهمون ... بس اشوف سيارة معاذ طولت معك ... ماتقولي سيارتك وينهي ؟ وكل يوم داخل علي ملفوع ... ( والتفت علي ووقف عن المشي ووقفت مثله ) قلي ياوليدي انت مديون ؟ ... بايع سيارتك... احد يطلبك ؟

التفتت لجدي وانا ابتسم

عمر بابتسامة = ابد والله لا مديون ولا شي .. راتب ابوي مكفيني وزيادة وفوقها مكافأتي بعد

جدي = اجل سيارتك وينهي ... ووش منه اللي بوجهك والضربة اللي براسك ؟

زفرت بضيق وسكتت

و يوم ماشاف مني رد .. مشى وهو يهز راسه بقلة حيلة

جدي = لا حول ولا قوة الا بالله ... ( وتنهد ) طيب الله يصلحك ابي اكلمك الحين عن اللي قبل شوي .. واضح ياوليدي انك تعرف رايد ... وبعد الصلاة بنروح لابو بندر ناخذ كرت عيال اخوه وانت تعطيه رايد مثل ماقلت قدام الرجال ... بس قبلها ابيك تعلمني كيف عرفت رايد ؟ الولد له اربع شهور من طلع من الحارة ومانعرف عنه شي ... كيف عرفته انت ؟

اخاف اقوله انه كان باستراحتنا بس اعرفه جدي مايحب شلتي .. ودايم يحذرني منهم .. اقوم الحين اقوله ان رايد كان معنا ... اعرفه جدي بيقول خربتوه ومن هالكلام اللي يسم البدن
والمشكلة اخاف اقوله الحين ببيتي ويعلم ابو بندر بمكانه بما انه عمه ومسؤول عنه

انتبهت على صوت جدي

جدي = هاه ما انت معلمني ؟

اخذت نفس .. خربانة خربانة ... خلاص ابقوله ويصير اللي يصير اهم شي الزم عليه مايعلم عمه بمكانه

وقفت قدام جدي و خليته يضطر يوقف عن المشي

عمر = ابقولك بس اوعدني ماتعلم الخايس الكلب عمه ابو بندر

طالعني جدي وهو ساكت يحتريني اكمل

عمر = احم .. رايد كان معنا باستراحتنا .. جابه مشعل عندنا بعد ماطرده عمه

طير جدي عيونه فيني منصدم

جدي = وشلون ؟ مشعل جابه لهالشلة الصايعة ... ( ورفع صوته علي معصب ) انا الحين اهاوشك عنهم ابيك تبعد عن الفساد تروحون تجرون هالولد اليتيم .. انتم تبــ

قاطعت جدي قبل ما يستلمني

عمر = شلتنا اللي ماهي عاجبتك هي اللي ضفت رايد من الشارع ... وش سويتوا انت والشيبان اللي قبل شوي عندك ورايد غايب عن حارتكم اكثر من ثلاث شهور ؟ سألتوا عنه .. دورتوا عليه ؟

سكت جدي ولف وجهه عني مايدري وش يرد علي فيه

جدي = امش تأخرنا عن الصلاة

ابتسمت بانتصار ... شعور حلو لما تغلب اللي اكبر منك بالكلام ومايقدر يرد عليك

مشيت بجنب جدي اللي رجع يسألني

جدي = ووشلون رايد الحين مرتاح بالاستراحة ؟ .. لا يكون خربتوه .. تكفى ياوليدي تراه يتيم

اخذت نفس عميق ... الحين جا وقت الخبر الثاني

عمر = رايد ماهو بالاستراحة الحين ... رايد عندي بالبيت له اكثر من شهر

وقف جدي والتفت لي منصدم

جدي منصدم = اللي ساكن معك بالبيت هو رايد ؟

عمر = ايه ( والتفتت لجدي اترجاه ) بس الله يخليك جدي لا يدري عمه

جدي مستغرب = مو تقول ان اللي ساكن معك واحد من اخوياك يدرس بالجامعة

ابتسمت بحرج

عمر = ماهي اول مرة اكذب ...

ابتسم جدي بفرح

جدي = يعني رايد عندك الحين بالبيت

هزيت راسي بايه

جدي وهو يطالعني باعجاب

جدي بفرح = الله يجزاك خير عنه ياوليدي ... ويكثر من امثالك ... والله فرحتني بهاليتيم ( وسكت شوي يفكر ) بعد الصلاة نمر ابو بندر وناخذ الكرت واروح معك لبيتك واسلم على رايد

ابتسمت لما شفت فرحة جدي وهزيت راسي بأيه

عمر بابتسامة = صااااار ... بس اهم شي لا يدري عمه انه عندي

صلينا و طلعنا من المسجد انا وجدي ومرينا بيت ابو بندر ودخلنا مجلسه ... طلبنا منه الكرت وعطاه جدي وملاحظ عليه انه ماهو معبرني ... والدليل يوم مديت يدي ابي اخذ الكرت سفهني ومده على جدي ... ضحكت مستانس واضح انه منقهر مني

طلعنا من عنده ... وتنهدت بضيق .. كنت اتمنى اشوف دانه ... وينهي ؟ ... بالعادة تلعب المغرب بالشارع ... وحنا ببيت ابو بندر قبل شوي كنت كل شوي اتلفت يمكن اشوفها

بس ماشفتها لا ببيت ابو بندر ولا بالشارع

ركبنا سيارتي انا وجدي وطلعنا من الحارة متوجهين لبيتي

التفتت لجدي ومديت يدي

عمر = عطني البطاقة انا بعطيها رايد

عطاني جدي البطاقة .. وقعدت اقراها وانا اسوق واشوف تاريخ ميلاد كل واحد منهم

مريم
رايد
دانه

امممم مريم هذي اصغر مني بسنتين .. مادري ليه كنت اتخيلها كبر عمتي مها مع ان رايد قاللي مرة ان عمه رافض يدخلها الكلية .. بس غصب عني ارجع واتخيلها انها كبر مها بالثلاثين

البطاقة صغيرة من الشكل الاخير المعتمدة لكروت العايلة ... دخلت البطاقة ببوكي وحطيتها بجيبي

وطوال الطريق افكر كيف افاجأ رايد بأثباته ... ودي بمقلب اسويه فيه قبل اعطيه الكرت ... وابتسمت بنذاله يوم طرا ببالي مقلب يرفع ضغط رايد شوي

* رايد *

بعد صلاة المغرب

طلعت من المسجد مهموم ... المفروض ارجع لمريم واوديها للمستشفى بس بعد ماصار امس من عمي مالي جرأة اخذ اختي ... ومااعتقد مريم لها جرأة تطلع مرة ثانية من بيت عمي

دخلت بيت عمر وانا شوي وابكي من الهم وسكرت الباب وراي ....

وفوق همي هم

عمر فتح لي بيته وفوق هذا ماهو سالم مني ... بسبب هالعله نايف ... كل يوم وعمر متهاوش معه بسببي ... عمر صح دفش بس والله مايستاهل ... فتح بيته لي وامه ماتجي لبيتها كله عشاني ... ياليت عمر وافق اطلع من بيته يوم قلته اليوم الصبح

مابي اسببله مشاكل اكثر من كذا ...

مادري وش يبي مني عمر ...

انا ما استاهل

انا عاله على عمر .. ومافيني فايدة لمريم ... وما اقدر احمي دانه .. ومالي اثبات انفع نفسي على الاقل ( مديت يدي ابي افتح الباب الداخلي بس سمعت صوت حركة بالحوش وقطع علي افكاري ..

التفتت ورا اشوف مصدر الصوت بس ماشفت شي ... طالعت باب الشارع ولقيته مسكر

رجعت لنص الحوش مستغرب احاول اعرف مصدر الصوت

عجيب ... انا متأكد اني سمعت شي ... رفعت راسي لدرايش ابو احمد ( جار عمر ) ولقيتها انوارها شغاله بس كلها مسكرة ... طالعت الممر اللي يودي للحوش الخلفي وماشفت شي .. هزيت راسي اطرد الوهم من راسي .. يمكن اتخيل

رجعت للباب الداخلي وفتحته ودخلت وسكرت الباب وراي

رحت للصاله وفتحت ازارير ثوبي عشان انزله بس سمعت صوت حركة مرة ثانية

التفتت وراي بخوف وطلعت من الصاله وانا اعدل الازارير

واستغربت لما شفت الباب الداخلي يفتح على شوي شوي

همست مستغرب

رايد بهمس = عمر ؟

وشهقت لما شفت راس نايف يطل من الباب

شافني نايف قدامه وجاني يركض .. ومسكني بعنف ولصقني على الجدار

نايف بعصبية = وين عمر ؟

رفعت راسي اطالعه وانفاسي سريعة من الخوف ومن دخوله المفاجأ

رايد = مـ .. مــ .. مو هنا ... وووو ... وشلون دخلت انت ؟

قرب نايف وجهه مني معصب

نايف = ادري انه مو هنا ... من الظهر وانا احتريه ... وين ذلف .. ليه الى الحين ماجا من الجامعة ؟

سكتت مدري وش اقول ... مااقدر اقوله ان عمر عند جده عشان ما يأذيه

رفع نايف يده وعطاني كف وصرخ بوجهي

نايف = تكللللم .. وين رااااح ؟

سكتت بعناد .. ماني معلّمه يكفي عمر اللي جاه من وراي

شفت نايف يدخل يده بجيبه وطلع منها حاجة وغزها على رقبتي

شهقت بقوة يوم حسيت بألم السكينة على رقبتي .. ورفعت راسي اطالعه اترجاه

رايد بترجي = نااايف

نايف = علمني وين عمر ... هو بيجي اليوم والا لااااااا ؟ من الظهر وانا احتريه وييييييييينه ؟

رايد بخوف = و .... وش تبي منا ... آآآآ ... خلنــ

قاطعني نايف وهو يقرب وجهه مني

نايف = ابي عمر ... وينه ؟ ابوي تبرا مني وهو اللي فتّن علي عند الهيئة وفضحني ... قبل على بالي انه انت ... بس انت ورع كم كف تخليك تنتفض قدامي ... اما عمر غير ... واليوم حطيته برااسي ( وسحبني ودفعني على الجدار بقوة وهو ماسكني ) وين عمر ... متى بيجي ؟

سكتت وانا اتذكر كلامي مع عمر امس

)))))))(((((((
رايد = عمر انت اللي بلغت الهيئة ؟
عمر = لا
رايد = بس انا سمعتك تقول لنايف انه انت
التفت لي عمر ورش على وجهي ماء
عمر = عشانك ياخبل ...
)))))))(((((((

طلعت دموعي وانا اتذكر كلمته .. كذب على نايف عشاني والحين بيدفع ثمن هالكذبة .. بعد عشاني

رفعت راسي لنايف وانا مااقدر اشوف من الدموع

رايد = تكفى لا تسوي بعمر شي ... مو هو اللي بلغ .. يكذب عليك ... والله يكذب عليك .. تكفى لا تسوي فيه شي

نايف = اهااا بس .. مب لعبه عندكم انا ..

رايد = والله مب هو

نايف = هو قال بنفسه انه هو اللي بلغ ... عمر اعرفه نذل ... وشري ( وغز السكينه برقبتي اكثر ) متى بيجي ؟

رايد = مدري

ولفيت وجهي عنه وبكيت اكثر

ياليت مايجي عمر ... ياليته مايجي ... بس مشكلته اتصل علي وقالي بيجي المغرب ... يارب يارب مايجي

تحرك نايف للباب الداخلي وهو يجرني معه

نايف = اجل نحتريه عند الباب لين يشرّف ( وسكر الباب الداخلي برجله ولصقني على الجدار بجنب الباب والتفت لي ) نحتريه هنا احسن عشان اول مايدخل تكون هالسكينة بوجهه ( ورفع السكينه قدامي ) ابوي طردني من البيت وتبرا مني ... لولا عمر كان انا وسعد ما انفضحنا ولا تبرا مني ابوي .. تبهذلت بسبته و الحين ابي اطلعها من عيونه ( والتفت للباب ورجع التفت لي ) من الظهر وانا احتريه بالشارع .. اكيد عند الشباب الحين .. احتريه هنا احسن وين بيروح يعني ...

نزلت راسي وانا اتذكر كلمه عمر لي امس

عمر = عشانك ياخبل

ياليته ماكذب على نايف .. بس عشاني كذب .. ليش كل ماروح بمكان يصير فيه مشكلة بسببي ... دخلت بيت عمي وتغير علينا مع انه ماكان كذا بحياة امي وابوي .. دخلت استراحة الشباب وانطردوا كلهم منها .. دخلت بيت عمر وتسلط نايف وشكله هالمرة ماهو ناوي على خير

بكيت بيأس

وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب

تعبت من الوقوف و جلست ببطء عى الارض وانا اسحب ظهري على الجدار

سمعت صوت نايف يكلمني

نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟

ضميت ركبتي لصدري وغطيت وجهي وانا ادعي الله ان عمر مايجي

17 - 4 - 2014, 09:20 AM

* الجــزء الســابع عشــر *

وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب

تعبت من الوقوف و جلست ببطء عى الارض وانا اسحب ظهري على الجدار

سمعت صوت نايف يكلمني

نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟

ضميت ركبتي لصدري وغطيت وجهي وانا ادعي الله ان عمر مايجي

مر ربع ساعة ثانية وحنا ننتظر .. ونايف رايح جاي يحتري ..

نايف بعصبية = وييييين ذلف هذا ؟ ...

سكتت ومارديت عليه وانا ادعي الله تدعي هالليلة على خير

فجأة سمعنا صوت باب الشارع يسكر

شهقت بقوة ورفعت راسي لنايف بخوف ..

ركض نايف راجع لمكانه ووقف لاصق بالجدار جنب الباب ...

جلست على ركبي ومسكت رجلين نايف اترجاه

رايد = تكفى .. الله يخليك لا تسوي شي بعمر .. والله مب هو .. مب هو ... يكذب علييييييييك

مسكني نايف بشعري وخلاني اوقف

نايف بهمس = اششششش .. اسكت .. ياويلك اذا طلع منك صوت .. ما ابيه يدري عنا ... تفهم .. قسم بالله لاذبحك

عضيت على يدي بخوف وترقب

مسك نايف عضدي ولصقني بالجدار بعنف بجنبه ورفع السكينة باستعداد يحتري عمر

طليت من ورا نايف اشوف مقبض الباب بترقب وانا عاض على يدي بخوف وادعي الله ان مايصير شي لعمر

ودي اصرخ باعلى صوتي واقول ياعمر لا تدخل ... ودي انبهه بس مااقدر نايف بيذبحني

وقف نايف قدام الباب مباشرة والسكينة بيده موجهها و مستعد ويشر لي بيده على رقبته يعني ياويلك اذا تكلمت ... حبست انفاسي خايف من اللي بيصير

رفعت راسي لنايف وانا اهز راسي بلا بصمت اترجاه وكأني اسمع عمر يكلم احد وهو يقرب او من الخوف يتهيألي

واول ما انفتح الباب وشفنا عمر الغافل وقبل ما ينتبه للي قدامه .. فاجأه نايف بحركة سريعه وطعنه على بطنه

قدامي

شهقت بقوة ...

رايد = لاااااااااااا

واقف بجنبهم واشوف كل حركة

طيرت عيوني بصدمه وعيني على السكينة ببطن عمر ...

ابتعد نايف عن عمر وعيني على السكينة بيد نايف وهو يسحبها بعد مادخلها بعمر

سمعت صرخت عمر وركع ماسك بطنه

وقف نايف وشهق منصدم وهو يشوف شي ورا عمر

ولأني بجنب الباب وعيني بخوف على عمر ماهتميت لنايف وعلى وش يشوف

همي على اللي انطعن بسببي ...

و صورة السكينة وهي تدخل وتطلع تكرر ببالي

طاح عمر على ركبه وهو ماسك بطنه بألم

تحركت بسرعة وجلست على ركبي قدامه ومسكت عمر اساعده وانا ما اشوف من الدموع

رايد = عمر

مغمض عيونه بألم

نزلت نظري اشوف بطنه ... الدم مغطي ثوبه الابيض ويديه ...

رايد وانا ابكي = عمر هذا نايف

سند عمر بثقله علي وراسه على كتفي .. مسكته مع اكتافه .. وانا احس شوي واطيح انا وعمر على ظهري بسبب ثقله بالنسبة لي .... بصعوبة ساعدته يستلقي على بطنه

عمر بألم = آآآآآآه .. بطني بطني

ماسك بطنه ويتلوى ويحرك رجله اليسرى بالارض

حطيت يدي على يدين عمر فوق بطنه .. مدري وش اسوي

رفعت راسي بس شهقت لما شفت ابو فهد واقف قدامنا وهو متساند على حافة الباب الداخلي .. واقف مثل الصنم وعيونه على عمر بصدمة

بسم الله من وين طلع هذا ... واضح من شكله انه منصدم .. التفتت ادور نايف بس مالقيته .. طالعت باب الشارع اللي قدامنا ولقيته مفتوح بالكامل

هج الكلب ... بس وشلون .. كيف مر من جنب ابو فهد .. وليه ما مسكه

التفتت لابو فهد ولقيته يطالع عمر وشكله مافاق من الصدمة الى الحين ومتساند على الباب بضعف

حاولت ابرر لنفسي لابو فهد

رايد = هذا ... هذا نايف ... والله .. كان يحتري عمر .. والله

جلس ابو فهد ببطء بمساعدة يديه عند عند عتبه الباب وزعمر ممدد رجليه باتجاه جده وراسه باتجاهي

ابو فهد = عمر وليدي ( وطلعت دموعه بصدمة )

بكيت وانا اشوف ابو فهد يبكي قدامي ... اكيد بيكرهني اذا عرف ان كل هذا بسببي

نزلت نظري لعمر وشفته يحاول يتنفس بصعوبة

انحنيت عليه اكثر و حطيت يدي على صدره وهزيته

رايد = عمر .. تسمعني ؟

عمر بألم = آآآه .. بطنيييي

خفت وانا اشوف عمر يطالع السقف ويحاول يسحب نفس بصعوبة .. طيرت عيوني فيه نفس اخوي ريان بانفاسه الاخيرة كان يطالع السماء ويشاهق ووجهه مليان دم

رايد = عمر لا تمووت

بكيت مدري وش اسوي ... انتبهت على فخذ عمر اللي يعرج منها مليانة دم ... لااااااا .. صح هو جلس على ركبته قبل يطيح على الارض واكيد انفتك الخياطة وانفجر الدم من الجرح

ياربي كل اللي يصير لعمر انا السبب

سمعت صوت ابو فهد يكلم عمر بصوت ضعيف

ابو فهد = دزني وماقدرت امسكه ... عمر مين هذا ( وحط يده على رجل عمر) حسبي الله ونعم الوكيل ( وبكى اكثر وهو يهز رجل عمر )

عمر = آآ .. أأبـ .. أبو احمد

التفتت بسرعة لما سمعت عمر يتكلم بصوت ضعيف وبألم

رايد = وشو

التفت عمر لي و حط يده المليانة دم على صدري

عمر وهو يتنفس بصعوبة = رح لابو احمد .. ابو احمد

رايد = مين ابو احـ

وسكتت لما تذكرت ... ايوة صح ... ابو احمد جار عمر بالبيت

رايد = تقصد جارك اللي بجنب البيت ( واشرت على البيت اللي بجنب بيت عمر )

هز عمر راسه بايه

عمر بألم = ناد احمد .. ابي احمد ... خلـ

رايد = طيب طيب .. الحين

وقمت بسرعة وركضت برا البيت اسابق الريح

وتوجهت لبيت الجار ابو احمد ... دايم اشوف ابو احمد هذا يصلي معنا بالمسجد .. ودايم اشوف ولد كبر عمر يدخل بيتهم ... بس مااعرف اسمه .. اظن هو اللي يبيه عمر ... جيران عمر ماعرفهم ولا اهتميت ولا عمري سألت عمر عن جيرانه .. مين هذا ومين هذاك

بالصدفة عرفت ان الجار هذا اسمه ابو احمد ... حتى عياله ما اعرفهم زين مع اني اشوف اللي يطلع واللي يدخل لما اكون واقف عند الباب طفشان

قعدت اضرب باب بيت ابو احمد واصارخ بصوت عالي

رايد = افتحوا البااااااااااااب بسرررررررعة

وقعدت اضرب واصارخ .. فجأة فتحت الباب بنت صغيرة ونقزت على ورا خايفة وعيونها على ثوبي

رايد = رووووحي نادي ابوك .. بسرررررررررعة روحي ... بسرررررعة ونادي احمد ( ودفعتها داخل البيت استعجلها )

ركضت البنت داخل البيت وهي تنادي ابوها

نزلت نظري اشوف وش اللي خافت منه البنت

ولقيت ثوبي ملطخ بدم كثير .. غمضت عيوني بألم وهزيت راسي احاول اطرد صورة عمر عن بالي

طلع ابو احمد ووراه ولدين والبنت اللي قبل شوي

و انصدموا من شكلي

ابو احمد = بسم الله وش فيك عسى ماشر

تكلم الولد اللي كبر عمر

= وش هذا اللي بثوبك ؟

رايد = تعالوا تعالوا بسرررررعة ... عمر طعنه نايف ... بسرعة تكفون تعالوا

انصدم الولد الكبير وشهق

= وشلون ( وراح يركض لبيت عمر ووراه الولد الثاني وابو احمد )

ركضت بسرعة وراهم ... ولقيتهم متجمعين عند الباب الداخلي

الولد اللي شكله كبري بس ادب مني مرتين ساد نص الباب والنص الثاني ساده ابو فهد وهو جالس

دفعت الولد ودخلت البيت

ولقيت ابو احمد وولده الكبير جالسين بالارض و منحنين على عمر ويكلمونه

وابو فهد على وضعه عند عتبة الباب و جالس عند رجلين عمر ويديه تتراعد

سمعت الولد الصغير يهمس بصدمه

= يمه وش هذا ؟

طلعت دموعي بألم وانا اشوف عمر يسبح بدمه ... بلاط الارضيه مليان دم داكن

انا السبب ... ليتني مادخلت بيتك ياعمر ... ياليتني ماعرفتك

انتبهت على عمر يكلم الولد الكبير بصوت متقطع

عمر بضعف = اااا .. احـ .. احمد .. بلغ عن نايف... نايف .. كـ .. اللي كان معك بالثانوي

صاح ابو احمد علي وعلى ولده الثاني الدب

ابو احمد = روحوا هاتوا مناشف ... بسررررررررعة

ركض الولد لبيتهم وانا ركضت للدرج ورحت لغرفة عمر فوق .. وفتحت دواليبه ادور على مناشف

ومالقيت الا منشفة وحدة كبيرة ... اخذتها ونزلت على طول

عطيتها احمد وحطها على طول على بطن عمر والتفت لابوه

احمد = يبه اطلب الاسعاف بسرعة

قام ابو احمد وهو يسألني

ابو احمد = وين التلفون ؟

ركضت للصاله وهو وراي واشرت على التلفون وراح للتلفون

رجعت لعمر وجلست عنده ومسكت يده بخوف

الى الحين يسحب نفس .. وفمه يابس ويتنفس بصعوبة

التفت عمر لاحمد

عمر بألم = احمـد

قاطعه احمد بسرعة يمنعه عن الكلام

احمد = خلاص فهمت ... نايف اللي كان معنا بالثانوي ... عرفته خلاص لا تتكلم

جا الولد الدب من بيتهم و معه مناشف وعطاها اخوه

صاح احمد على اخوه بعد مااخذ المناشف منه

احمد بصراخ = محمد رح هات مقص بسرعة .. اركض

محمد = من بيتنا ؟

احمد بعصبية = اييييييييييه بسرعة رح

ركض محمد الولد الدب وراح لبيتهم يجيب مقص

مد احمد علي المناشف

احمد = خذ ... خلهم معك لين يجي محمد

اخذت المناشف وعيني على عمر اللي بدا يفقد وعيه وراسه مايل ناحيتي ويأن

قعد احمد يفتح ازارير ثوب عمر وهو يكلمه

احمد = عمر تحمل شوي الحين يجون الاسعاف

التفتت لاحمد .. ابي اسأله وش يبي بالمقص بس ماتجرأت اسأل

شوي و جا محمد وعطى المقص اخوه

قام احمد واقف وجلس بين رجلين عمر وبدا يقص ثوب عمر بالطول لين وصل للازارير

وبعدها قص الفنيلة الداخلية وكشف عن بطن عمر وصدره

شهقت لما شفت الدم يطلع من الجرح .. ورجع علي صورة السكينة وهي تدخل وتطلع ...

طلعت دموعي ندمان .. ليتني طلعت اليوم من بيته ولا سمعت كلام عمر .. كان ماصار اللي صار

اخذ احمد المناشف مني وحط منشفتين على بطن عمر ووحدة على فخذه

وطلب مني امسك المناشف واضغطها على بطن عمر .. ونفذت بيدين ترتعش

صاح علي احمد

احمد بعصبية = اضغط زييييييين

ضغطت وانا اهز راسي احاول اطرد صورة السكينة عن بالي

منظر الجرح افزعتني ..

شفت المناشف تحت يدي شوي شوي تتحول للون الاحمر

همست

رايد = يااااربي

حاولت اتمالك نفسي ... رفعت راسي وطالعت احمد اللي يضغط المنشفة على فخذ عمر

انا جالس بجهة من عمر واحمد جالس بين رجلين عمر ... مابي انزل نظري لعمر واشوفه وهو يسبح بدمه .. مدري وش اطالع ... ابي أي شي يشغلني عن المنظر

طلع ابو احمد من الصاله وصاح على محمد

ابو احمد = محمد رح لاخر الحارة واحتر الاسعاف ... بسرعة .. الحين يجون

ركض محمد وطلع من البيت ينفذ

راح ابو احمد يحاول يهدي ابو فهد اللي طوال الوقت يتكلم ولا نفهم عليه شي

وقدر ابو احمد يبعد ابو فهد عن الباب اللي ساده وصاروا بالحوش وانا اسمع او احمد يهدي بابو فهد ويكلمه

قرب احمد راسه مني وهمس

احمد = انت شفت اللي طعنه ؟

هزيت راسي بأيه وهمست

رايد بحزن = ايه .. نايف

قرب احمد راسه مني اكثر لين قرب عند اذني وهمس

احمد = المشكلة كان معنا بالثانوي ثنين اسمهم نايف .. مدري أي واحد يقصد عمر

نزلت نظري لعمر ولقيته يأن و صدره يرتفع و ينزل

احمد = ما اقدر اسأل عمر واجد عشان مايتكلم ... ابيك توصفه لي بعدين

وابعد راسه عني

احمد = الكلب طاعنه مرتين

التفتت لاحمد

رايد = اللي بفخذه بسبب حادث مو من نايف

فجأة سمعنا صوت الاسعاف

شوي وجا محمد يركض ووراه رجالين

قمنا انا واحمد وخلينا المجال لرجال الاسعاف

وعلى آذان العشاء اخذوا عمر بسيارة الاسعاف ..

وقفت بالشارع وانا اشوف سيارة الاسعاف تبتعد واحمد ومحمد بجنبي

طلع ابو احمد وهو يساند ابو فهد والتفت لنا

ابو احمد = انا ابوصل ابو فهد للمستشفى ..( والتفت لي ) تعال معنا يارايد

وقبل ارد تكلم احمد

احمد = لا يبه .. روحوا انتوا .. وانا اباخذ رايد بسيارتي

هز ابو احمد راسه بايه وتوجه لسيارته وهو يساعد ابو فهد على المشي

طالعت جد عمر بحزن .. وش جابه بهالوقت ... وليه جاي

ياربي وش هالحظ اللي لي ... يعني مايجي ابو فهد مع عمر الا بالوقت هذا

شكله تعبان مرة والى الحين منصدم ... انا ماأذيت عمر وبس ... انا أذيت للي يقربون له بعد ... امه وجده

الكل بيكرهني اذا عرفوا سبب اعتداء نايف على عمر

حتى مصعب يمكن يكرهني ... وابو فهد بيكرهني ... عمر بنفسه بيكرهني... انا عاله عليهم

نزلت راسي وبكيت بألم

حسيت بيد على ظهري

احمد = وش فيك انت طوال الوقت وانت تصيح .. يارجال ان شاء الله انه طيب .. ( ووجه كلامه لاخوه ) محمد رح هات ثوب عمر بسرعة

راح محمد ودخل بيتنا وجا ومعه ثوب عمر المقطوع نصفين

وانا منزل راسي وساكت

فتش احمد بجيوب ثوب عمر وطلع مفاتيحه وبوكه وجواله ومدهم علي

احمد = خذ خل اغراض عمر معك ...

رفعت راسي لاحمد

رايد = لا .. خلهم معك انت

احمد مستغرب = معي انا !! انت اللي ساكن مع عمر مب انا ... ياخي على الاقل دسهم بمكان لين يرجع عمر لا تخليهم طايحات بالارض كذا ... اخاف يرجع نايف ويسرق سيارة عمر والا جواله .. الاحسن تخليه معك

هزيت راسي بلا مصر على رايي ... مالي وجه ارجع لبيت عمر بعد اللي صار

لا والله مالي وجه

رايد = خلهم معك

طالع احمد اخوه مستغرب وحط اغراض عمر بجيبه

احمد = طيب يله امش خلنا نروح ..

و مشى لسيارته

محمد = احمد غير ثوبك

نزل احمد نظره يشوف ثوبه الملطخ بالدم وتوجه لبيته وهو يكلمني بسرعة

احمد = احترني الحين جاي ... رح انت بعد غير ثوبك والحين اجيك

ودخل بيته وهو يركض

نزلت راسي بحزن ... ماعندي ثوب غير اللي علي ... احس بصدري يغلي من القهر على اللي صار بعمر ... ماراح اسامح نفسي اذا صارله شي

وتوجهت لباب بيت عمر وسكرته ... خلاص لازم اترك بيت عمر وادور لي مكان غيره

بكيت غصب عني وين اروووووووح

اروح لعمي .. بس مابي ارجعله .. انا قلت راح اعتمد على نفسي واخذ اخواتي مب اخذلهم وارجع بدون أي فايده وفوق هذا مسوي مصيبة .. والمشكلة ابو فهد بنفس حارة عمي مالي وجه ارفع عيني قدامهم ... لا .. لا ... مب راجع لعمي ... لا يمكن ...

سمعت محمد يسألني

محمد = ماغيرت ثوبك !

مارديت عليه

غمضت عيوني بألم وصورة السكينة وهي تدخل وتطلع تتكرر ببالي عشرين مرة

طلع احمد من بيته وفتح سيارته ... رحت له وانا اجر رجولي جر وركبت سيارة احمد بصمت

احمد = ليه ماغيرت ثوبك ؟

سكتت ومارديت عليه .. ومسكت راسي بين يدي

حركنا متوجهين للمستشفى .. شوي و سمعت احمد يسألني

احمد = وصف لي اللي طعن عمر

رفعت راسي اطالع قدام وانا مالي نفس اتكلم مع احد

رايد بحزن = نايف ... اااا .... طول عمر ... ااااا ... ( وسكتت )

ما فيه شي مميز اوصفه فيه ... نايف شكله عادي

احمد = بس ؟ طوله طول عمر وبس .. وصفه لي .. عشان اعرف ... كانوا معنا ثنين بالثانوي .. وصفه لي عشان اعرفه ايهم

رايد = مادري مافيه شي مميز

سكت احمد شوي وبعدها سألني

احمد = نايف اللي طعن عمر فيه حبة خال كبيرة بشحمة اذنه ؟

سكتت وانا اتذكر نايف .. مااذكر فيه شي

رايد = لا ( والتفتت لاحمد ) ماعليه حبة خال

ابتسم احمد = اهاا عرفته ( وسكتت شوي وهو يسوق ) انت تقرب لعمر .؟

طالعت قدام بألم وهمست

رايد = لا

وكملت بيني وبين نفسي .. وياليتني ماعرفته .. كان عمر الحين مرتاح

احمد = انا وعمر الصراحة مانمون على بعض .. كنا زملاء ايام الثانوي بس ... وبيني وبينك الصراحة ما استغربت اللي صار لعمر

التفتت له وقطبت حواجبي مستغرب

التفت احمد لي وبعدها طالع قدام

احمد = عمر واحد موذي .. ايام الثانوي كان مشاغب مرررة ... يضرب هذا .. ويتطنز على هذا ... واذا شاف احد واقف على طاولته جاه من وراه وطيحه ... كذا بس .. يدور أي احد يتهاوش معه ... المدرسين ماسلموا منه ... يسوي حركات للشباب يخليهم يضحكون على الاستاذ... كنت اتحاشاه وما اكلمه ... ما احب اللي مثل عمر ... انا بنفسي وصلني اللي وصلني منه ... واكيد اللي صار اليوم ردة فعل ... شكل اللي صار واحد ماسلم من عمر وحب ينتقم ... اممم اذكر نايف هذا واظنهم على مااعتقد انهم دخلوا نفس الجامعة

والتفت لي وسكت

نزلت راسي ومارديت

صح عمر دفش وشري ومغرور حتى على ولد عمه مصعب ... انا اول يوم لي بااستراحتهم عطاني كف طير وجهي ... كل هذا اعرفه بس اللي صار اليوم من نحاستي انا ... عمر برئ ماسوا شي .. وماراح اسامح نفسي اذا صار فيه شي

17 - 4 - 2014, 09:20 AM

وصلنا المستشفى ولقيناهم مدخلين عمر غرفة العمليات

وجلسنا ننتظر .. انا واحمد وابو احمد وابو فهد

وقفت بعيد عنهم شوي وانا اسمع ابو فهد اللي فاق من الصدمة شوي والحين قاعد يقول لابو احمد على اللي صار وانه ما امداه يستوعب والا ونايف هج من البيت

جلسوا على الكراسي نحتري الدكتور وكل واحد جالس بصمت

وانا واقف بعيد عنهم شوي

التفتت لابو فهد وضميري يأنبني ... لقيته منزل راسه ويدعي بينه وبين نفسه

مدري ليه احسه يدعي علي ... ياربي وش بيقول اذا عرف اني السبب

= يبه وش صااااار

التفتت متفاجأ لمصدر الصوت اللي قطع صمتنا .. وشهقت ...

مصعب وابوه

غطيت وجهي بيدي .. منحرج من مصعب ...

ياربي اخر شي تمنيته اشوف مصعب الحين ... هو يعرف كل شي ... يوم يزورنا ببيت عمر علمته ان نايف مأذيني ويحسب انا اللي مبلغ الهيئة

بيكرهني .. بيكرهني

سمعت ابو فهد يعيد الكلام اللي قاله لابو احمد على مصعب وابوه

وانا اطالعهم وساكت واحتري ردة فعل مصعب اللي شكله ما انتبه لي

ابو مصعب = يبه هد شوي ... اتصلت انا على الشرطة اول ماعلمتني بالتلفون ... حسبي الله ونعم الوكيل ... هالشباب متعبنا ( ووقف بجنب ابوه متنرفز )

شفت احمد يمشي متوجه لي ووقف بجنبي

احمد = رايد هذا ولد عم عمر ؟ ( واشر على مصعب )

طالعت مصعب وولقيته منحني على جده ويكلمه

هزيت راسي بأيه

احمد = وشسمه ؟

رايد بتنهيدة = مصعب

احمد = اهاا ( وتوجه لمصعب وشفته ياخذه على جنب )

طالعتهم وهم واقفين بعيد عني و يتكلمون .. شوي وشفت احمد يطلع من جيبه اغراض عمر وعطاه مصعب

نزلت راسي ورفعت يدي اشوفهم ... مليانات دم يابس

فركت يدي ببعضهم وصورة السكينة وهي تدخل وتطلع تكرر ببالي

= رايد

رفعت راسي ولقيت مصعب واقف قدامي مباشرة

طالعته بخوف ... وحاولت ابرر لنفسي

رايد = نااايف ( وسكتت مدري وش اقول )

هز مصعب راسه بايه

مصعب = ادري .. من يوم علمنا جدي بالجوال جا ببالي نايف على طول

نزلت راسي وبكيت بندم

رايد = عمر كذب عليه امس وتهاوشوا ... واليوم ( وبكيت اكثر وعجزت اكمل )

حسيت بيد مصعب على كتفي

مصعب = ان شاء الله عمر يطلع بالسلامة ... ونايف هذا ماني ساكتله ..

جانا احمد وطلب مني على الاقل اروح اغسل ثوبي بدورات المياة .. يقول افزعت العالم بثوبك

أيده مصعب ورحت لدورة المياة اغسل وانا بالي ماهو معي

خايف على عمر .. ومحتار مدري وين اروح ... ما اقدر ارجع لبيت عمر بعد اللي صار ... يكفي عمر اللي جاه

بس وين اروح ويييييييين... ما ابي ارجع لعمي ... امس اول ماشافني ضربني بس لأني اخذت اخواتي ... كيف الحين لو ارجع

اروح لخوالي ؟ ( هزيت راسي بلا بقوة ) عمي ما كان كذا بحياة امي وابوي ... تغير علينا فجاءة .. ما استبعد خوالي يصيرون مثله .... مابي امر باللي مريته مع عمي ...

ما اقدر اروح لخوالي ... مابي اصير انا بديرة واخواتي بديرة

حطيت يدي على صدري .. ياربي وش اسوي .. وين اروح

دخلت يدي بجيبي وطلعت كل اللي معي

ثلاث مية ريال وكم عشرة والورقة الوحيدة اللي دايم معي

هذا اللي املكه بهالدنيا ...

فتحت الورقة بيأس .. مافيها الا رقم مصعب ورقم بيت عمر

ياربي هذا الرقم اللي عطيته مريم عشان اذا احتاجتني تتصل علي ... الحين اذا احتاجتني وين تلقاني ؟

وين اروح ... احس نفسي ضايع

كيف انفعها وانا ماعندي لو غرفة انام فيها ( غطيت وجهي بالورقة وبكيت )

بعدت الورقة عني وطالعت الفلوس اللي معي .. ثلاث مية بس .. الباقي من الخمسمية اللي عطانياها عمر ... وش اسوي بثلاث مية ياربي.. تأجرلي غرفة والا توكلني

دخلت الفلوس والورقة بجيبي ورحت للمغسلة اغسل يدي وثوبي

طلعت من دورة المياة والدم عيا يروح من ثوبي

رحت للبقية ولقيت الضابط عندهم .. واول ماشافني احمد ومصعب نبهوا الضابط

احمد = هذا اللي كان مع عمر وقت الحادث

مشيت متوجه لهم وانا منزل راسي

وعلمت الضابط بكل شي .. ولما سألني الضابط عن سبب الهوشة

رفعت راسي له بخوف وبعدها التفتت لجد عمر وعمه والبقية

اطالعهم واحد واحد بخوف ... كلهم بيكرهوني

كيف اقول قدامهم ان سبب الهوشة انا ...

التفتت للضابط ونزلت راسي

رايد بحزن = مدري

الضابط = عموما اخذنا اسمه وعنوان بيته .. ماراح يطول الموضوع ان شاء الله اتطمنوا .. بينمسك على طول بحول الله

ابو مصعب = حسبي الله ونعم الوكيل

شوي و راح الضابط يكمل شغله

عرفت ان عمر طلع من غرفة العمليات وقت ماكنت بدورة المياة

رحت لاحمد اسأله عن عمر

رايد = احمد .. سمعت ان عمر طلع من العمليات .. وش قالوا ؟ .. طمني

احمد = تطمن .. الحمد الله عمر بخير .. الحين اهله ( وأشر على جد عمر وعمه ومصعب ) يحترون الدكتور يسمح لهم يشوفونه

رايد = انا ابي اشوفه بعد

احمد = قل لمصعب .. انا وابوي بنروح الحين للبيت وان شاء الله نزوره بكرة

نزلت راسي بحزن

ابي اشوف عمر الحين واودعه بدون مايدري اني ماراح ارجع لبيته ... اذا عرف اني ابترك البيت ماراح يسمح لي مثل اليوم الصبح قبل يروح للجامعة

ياليتني ماسمعت كلامه الصباح كان ماصار اللي صار

راح احمد وابوه وطلعوا من المستشفى

وجلسنا نحتري

ابو فهد ومصعب وابوه جالسين على الكراسي وانا واقف بعيد عنهم شوي

ساعة

ساعتين

وحنا الى الحين نحتري

قام ابو مصعب بعد ما مل من الانتظار وسمعته يكلم ابوه متنرفز

ابو مصعب = انا ابروح للدكتور اكلمه ( وراح )

نص ساعة ورجع

ابو مصعب = يله يبه .. سمح لنا الدكتور ربع ساعة نشوفه ... عمر بغيبوبة ولازم يرتاح ومانقدر نطول ( وساعد ابوه على الوقوف )

ناديت مصعب قبل يبتعدون

رايد = مصعب

التفت مصعب لي وجاني

مصعب = اكيد تبي تشوف عمر

رايد = ايه .. ياليت

مصعب = طيب يله امش معنا .. ( وتنهد ) جدي تعبان بعد اللي صار .. الصراحة ماودي انه يشوف عمر الحين ...

سكتت وماعلقت

رحنا لغرفة عمر و دخلنا عليه ولقينا عنده ممرض يتابعه

طالعت عمر بألم .. ممدد على السرير .. وغايب عن الوعي .. والوايرات حوله

والشاش على راسه ومعالجين الكدمات اللي امس وخاصة الجرح الكبير اللي كان بشفته السفلية

وقف ابو فهد وابو مصعب بجهه وانا ومصعب بجهه

حطيت يدي على كتف عمر وانا اشوف ابو فهد منحني و يسلم على راس حفيده

ابو فهد وهو يعتدل واقف = حسبي الله ونعم الوكيل على اللي كان السبب

شهقت وطالعته .. مدري ليه حسيته يقصدني

اخذت نفس احاول اتمالك نفسي .. وانحنيت على عمر وسلمت على خده وخده الثاني وراسه

طالعت وجهه بحزن .. ماقصرت معي ياعمر ... دخلتني بيتك واكرمتني ... وجا الوقت اللي اودعك فيه واريحك مني ..

( سلمت على خده مرة ثانية ) اتمنى ماتكرهني بعد اللي صار ... سامحني ( سلمت على راسه ) واعتدلت واقف وانا أتأمله ومهموم... وين اروح ياعمر علمني ... ما اعرف احد هنا

سمعت ابو مصعب يسأل الممرض الفلبيني

ابو مصعب = وشلون جرح هنا ( واشر على بطن عمر ) ان شاء الله كويس ؟

طلع الفلبيني يعرف عربي

الممرض = ايوة كويس .. بطن مريض كويس .. رجل راس كلو كلو كويس

التفت ابو مصعب على ابوه وكأنه تذكر شي

ابو مصعب = صح يبه .. تدري وش قال الدكتور .. يقول انه عاد الخياطة القديمة اللي كانت بفخذ عمر ... طلع عمر يعرج من خياطة برجله ماهو كسر من لعب الكورة مثل ماقالنا عمر

التفت ابو فهد لولده منصدم

ابو فهد = خياطة بفخذه .. وش منه ؟

رفع ابو مصعب اللحاف عن رجل عمر لين فخذه وهو مستغرب

ابو مصعب = مادريت الا من الدكتور ... وانا مصدق عمر حسبته يعرج من كسر بساقه

.. وشفنا فخذ عمر ملفوف بشاش

جلس ابو فهد بتعب على الكرسي بعيد شوي عن السرير وهو ماهو مصدق

ابو فهد = حسبي الله ونعم الوكيل ... اشوف الدم قبل شوي يطلع من رجله كنت احسبه طاعنه مع فخذه اللي اسمه نايف

ابو مصعب = يبه شكلهم متهاوشين قبل هالمرة وطاعنه مع رجله ... وهذا ( وأشر على عمر ) مكذب علينا ( وكشف اللحاف عن بطن عمر وشفنا لزقة متوسطة )

ابو فهد منفعل = وليش يكذب .. كان بلغنا عليه قبل يصير اللي صار اليوم ... لا حول ولا قوة الا بالله ... هالولد متعبني

سمعت مصعب يضحك بصوت خفيف وهمس يسمعني
مصعب = مقرود ولد عمي .. الراس والبطن والفخذ كلهم ملفوفين بضمادات

تنهدت وانا اشوف عمر لما انتبهت لهالشي

انتبهت على ابو مصعب وهو منقهر ويوجه كلامه لابوه

ابو مصعب = الولد يعرج قدامنا من زمان وحنا مصدقينه .. حسبي الله ونعم الوكيل بس

رفعت راسي لمصعب مستغرب ...

رايد = مصعب اللي برجل عمر بسبب حادث سيارة ... هم فاهمين غلط

سمعت بجنبي مصعب يهمس

مصعب = حبل الكذب قصير .. جاك الموت يامعاذ

والتفت لي و انحنى وهمس باذني

مصعب = اسكت لا تعلمهم خلهم على عماهم الحين ... هذا بسبب اخوي معاذ بس تكفى لا تقولهم

رفعت حواجبي منصدم

رايد = وشلون ؟ عمر قال حادث سيارة ما قـ

وقاطعني

مصعب = ايه ادري انه حادث سيارة .. بس معاذ هو اللي غلط عليه ( واعتدل واقف وهمس بصوت واطي ) ماراح يعديها ابوي على معاذ اذا عرف

نزلت نظري لعمر وحطيت يدي على راسه

ويقولون عمر شري ويغلط على الناس ... طلع هم بعد يغلطون عليه ... والله انه طيب ... انا مادري وش سالفة معاذ هذا ولا اعرفه اللهم اني شفته مرة بحارة عمي وقتها اول ماشفته حسبته مصعب ... ولا ادري وش بينه وبين عمر حتى توصل بينهم انهم يغلطون على بعض بحادث

ولا يهمني هذا كله ... اللي يهمني اني اريح عمر مني .. عمر اكرمني .. بس انا جبت له مشاكل هو بغنى عنها

انحنيت على عمر وسلمت عليه سلام اخير واستاذنت من ابو فهد وابو مصعب وطلعت من غرفة عمر

طلع مصعب معي وعرض علي يوصلني

مصعب = خلني اوصلك

التفتت لمصعب وهزيت راسي بلا وحاولت اصرفه ..

رايد بحزن = لا .. اباخذ ليموزين

دخل مصعب يده بجيبه وطلع بوكه وفهمت عليه و قاطعته قبل يعرض علي

رايد = معي فلوس

مصعب = اكيد ؟

رايد = ايه اكيد ...

وعطيته ظهري وطلعت من المستشفى وانا اجر رجولي جر مهموم

وقفت عند الطريق العام .. وانا ادور حول نفسي واطالع البيوت حولي

ما اعرف احد ... وين اروح ... كل الناس بتدخل بيوتهم الا انا

طالعت السيارات اللي تمشي بسرعة ... كل واحد له مكان يروحله

طلعت دموعي غصب عني وانا اشوف السيارات ... خايف ... احس اني غريب ... وحيد

نزلت نظري لثوبي والدم الى الحين فيه

ما اقدر امشي بالشارع وانا بهالشكل .. لازم اغسله ... بس وين ؟

مالي بيت .. ولا حتى غرفة على الاقل

تلفتت ادور بعيوني على أي شي يحسسني بالامل بس مدري وش ادور ... مدري وش اسوي

قطعت الشارع العام ... ورحت للمحلات اللي قبالي

مدري ليه .. المهم امشي

اروح للرياض ؟ ... بس مابي اخلي مريم ودانه ... المشكلة اني عطيتها رقم بيت عمر ... اخاف تتصل ولا اجيها مثل ما اتفقنا ... راح تخاف علي ... بكيت غصب عني .. محتاجها

طلعت من بيت عمي .. على بالي اقدر ادبر نفسي واخذ اخواتي ... بس طلعت غلطان

انتبهت لنفسي و رفعت راسي ولقيت نفسي داخل حارة

تلفتت اطالع البيوت ... انا وين

مامر علي سنة ببريدة ... ولا اعرف حاراتها زين

رجعت و طلعت من الحارة ولقيت على شارع فرعي محل مغسلة

ايوة صح .. ماجا ببالي المغاسل ... فرصة اغسل ثوبي الحين ....

دخلت للمغسلة وطلبت من الهندي يغسل ثوبي غسيل مستعجل

سألته عن الساعة.. وقال 10 ونص

طلعت اغراضي .. ونزلت ثوبي وعطيته الهندي

وقفت عند عتبة المحل وانا ماعلي الا ملابسي الداخليه واحتري العامل يخلص

واقف عند باب المحل وعاقد يديني عند صدري واطالع السيارات القليلة اللي تمشي بالشارع وبالي مو معي واحس بضيق بالتنفس من الهم

يمه .. يبه .. انا بعدكم تعبااااااان ... ضايع

وين اروووووح ... على الاقل هالليلة وين اناام

* عمر *

تحركت منزعج من الاصوات اللي حولي .. حلقي نااااشف عطشاااااااان ...

فتحت عيوني بتعب وبديت اميز الاصوات .. تلفتت بعيوني احاول استوعب المكان اللي انا فيه

هذا المستشفى .. غمضت عيوني بقوة لما حسيت بألم فظيييييييع ببطني

= هييييه شوفوا عمر تحررررك

فتحت عيوني وشفت مها تطل علي من فوق .. وبعدها شفت راس امي بجنبها

شوي شوي وبدت الروس تطل علي واحد واحد

مها وامي ومن الجهه الثانية مصعب وسعود وعمي

طالعت امي بتعب ... تطالعني وتبكي وما اسمع منها الا ( الحمد الله .. الحمد الله .. الحمد الله )

حاولت اتكلم بس ريقي نااااشف مرة ... عطشاااااااااان

حركت فمي بدون صوت

عمر = ما

مها = ايه انا مها

غمضت عيوني بقوة لما حسيت بطني يتمزق

سمعت عمي

ابو معاذ = الحمد الله على سلامتك

وكرروا البقية نفس الكلمة

فتحت عيوني وطالعت امي يمكن تفهمني وحاولت ارفع صوتي

عمر بهمس = ابي ما

واخيرا استوعبوا طلبي

دفعت امي مها وجت بمكانها

امي = وخري يبي ما

مها بزعل وهي تبتعد عن طريق امي

مها بزعل = اثره يقول ماء احسبه يقول مها .. فرحت احسبه يهوجس بي

سمعت ضحك مصعب وسعود عليها

حطت امي الكوب عند فمي وشربتني

ابو معاذ = عطيه شوي يام عمر .. الدكتور ماينصح يشرب سوايل واجد

ابعدت امي الكوب على طول بعد كلام عمي ... مارويت وابي اكثر ... بس مالي حيل اتكلم

مسحت امي على شعري ودموعها على خدها

امي = حسبي الله عليه ... فجعني فيك ... الله لا يوفقه ... حسبي الله ونعم الوكيل ... مالي غيرك وش يبي فيييييييك حسبي الله علييييه

غمضت عيوني لما تذكرت نايف و اللي صار

فاجئني ... اول مافتحت الباب لقيته قدامي ...

حطيت يدي اليمنى على بطني ... ماتوقعت نايف يتجرأ ويطعني بسكينة

حاولت احرك يدي اليسرى بس ماقدرت بسبب المغذي

مها = الحمد الله انك صحيت بوقت الزيارة

فتحت عيوني وطالعت مها بصمت

مصعب = أي والله شوي وكنا بنروح

= وخروا عنه خلونا نشوفه

انتبهت .. هذا صوت جدي

صح .. جدي ... كان وراي .. وينه .. وش صار عليه

ابتعدوا كلهم عن السرير بعد كلمة جدي .. وجلس عمي على الكرسي وامي راحت للجهة الثانية من السرير ... ومها ومصعب وسعود واقفين بعيد عني شوي

التفتت لجدي ولقيته جالس على كرسي ويطالعني

ابتسمت براحة ..

جدي = الحمد الله على سلامتك

هزت راسي بايه وهمست بتعب

عمر = الله يسلمك

سعود = عمر وش يبي منك هالخايس

ابو معاذ بصرخة = سعود مو وقته ... خلوه يرتاح

طالعت السقف بصمت وانا اتذكر نايف

ماتوقعت منه هالحركة ... صح امس هددني بس على بالي ماتتعدى المسأله ضرابة وهواش ...على حسب كلام الشباب ان نايف مر بايام صعبة وابوه متبري منه وطارده والهئية تدور عليه ... بس انا مالي ذنب .. هو اللي جابه لنفسه

اذا كان يبي يلوم احد يلوم نفسه .. مايلومني انا

التفتت لجدي ولقيته يطالعني بحزم

لفيت وجهي عنه بضيق ... مااحب اشوف جدي يطالعني بهالشكل .. اعرف وش يجيني بعدها

الله يعيني عليه ... راح يستلمني تحقيق ... عاد الحين كل شي صار قدامه وش يفكني منه

انحنت امي علي تسألني

امي = عمر .. يعورك شي الحين ... اقول لمصعب ينادي الدكتور ؟

احس بطني يتمزق .. وكل ما اخذت نفس انشدت الخياطة

طالعت امي بتعب .. بحالتها هذي مااقدر اشتكيلها

هزيت راسي بلا و همست اطمنها

عمر = مايعورني شي

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

17 - 4 - 2014, 09:21 AM

* الجــزء الثــامن عشــر *

انحنت امي علي اكثر وضمتني وخدها على خدي وتدعي الله يحفظني لها بصوت باكي وتدعي على نايف

غمضت عيوني مستمتع بحنان امي ... من زمان عنها ... تزوجت وانشغلت عني

ابتعدت امي عني واعتدلت واقفة والتفتت لعمي معصبة

امي = ماني متطمنة على ولدي وهم مامسكوه ... ليه ماتمسكه الشرطة ؟ .. ليش هالاهمال ...

عمي = استهدي بالله .. هم يدورونه الحين ...

رفعت حواجبي مستغرب .. عليه حظ هالنايف هذا ... قبل الهيئة تدور عليه ومالقته .. والحين الشرطة ..

طالعت الدريشة ابي اعرف كم مر علي بالمستشفى

التفتت لمصعب اللي واقف فوق راسي وهمست

عمر = حنا الحين بأي وقت ؟

مصعب = الظهر الساعة 12 .. باقي ما اذن

طيرت عيوني منصدم .. الظهر ... يعني انا من المغرب امس الى الظهر ماني داري عن حالي

قام عمي واقف

عمي = يله قربت تخلص الزيارة .. خلوا عمر يرتاح ( والتفت لي ) عمر العصر بيجي جاركم ابو احمد وعياله .. واخوياك اتصلوا على مصعب يبون يجون يسلمون عليك

ردت امي على عمي منفعله

امي = انا ودي ازوره العصر .. يمكن يحتاجني

مها = ام عمر وحنا وشوله جايين الحين .. انا وانتي مانقدر الا الصبح .. العصر للي يبي يزور من الرجال

امي بعصبية = وانا ابي ازوره العصر .. يمكن يحتاجني والا شي .. اذا كنتوا ما انتوا جايبيني العصر ابقعد هنا

زفر عمي بطفش = انا لله ( والتفت لامي معصب وبصراخ ) وش فيك انتي يامره ... تجلسين عنده وهو بقسم الرجال ... خلاص زرتيه الحين ما حنا جايبينك العصر .. يله بس مشينا

قربت مها مني وهمست تعلق على امي

مها = وش يطلعها امك الحين هههههههههه

طالعت عمي بقهر وانا اشوفه يهاوش امي

امي بعصبية وهي تكلم عمي = امه اهـم والا هـ

قاطعت امي ... وبذلت مجهود عشان اطول صوتي

عمر = يمه

مابيها تاخذ وتعطي معه ... ما اتحمل اشوفه يصارخ عليها قدامي واتفرج .. اقنع امي باسلوبي احسن

التفتت امي لي

عمر = ماعليك يمه .. ترا فيه ممرضين اذا احتجت شي اقولهم

طالعتني امي وهي ساكته .. واضح عليها تبي تبقى معي .. و ماتقدر تقول شي

ابتسمت لها

عمر = وعشان تتطمنين ابتصل عليك كل فترة

ماردت علي ورفعت يديها تعدل شيلتها وتنزل نقابعا على وجهها وواضح معصبة

ياربي ... وش فيني .. تكلمت شوي وتعبت .. احس كل شي يعتمد على عضلات البطن .. اذا حركت رجليني عورني بطني .. واذا تكلمت بصوت عالي عورني بطني واذا حاولت ارفع راسي عورني بطني

حسبي الله عليك يانايف .. ماتوقعتها توصل لهالدرجة

حسيت بيد على كتفي .. رفعت نظري ولقيت مصعب واقف فوق راسي ويطالعني من فوق

مصعب = خذ ( وطلع مفاتيحي وبوكي وجوالي من جيبه ) هذي اغراضك عطانياها احمد ولد جاركم

قطبت حواجبي مستغرب بوكي ومفاتيحي وشوله يجبونها لي .. كان عطاه رايد عنده بدل مايجيبها لي هنا ... ما احتاجهم بالمستشفى

طالعت مصعب

عمر = ابي جوالي بس ( ومديت يدي بصعوبة واخذت الجوال منه ) بوكي ومفاتيحي عطه رايد يحطهم بغرفتي

وابتسمت لما تذكرت ان اثبات رايد بالبوك

مصعب = احمد امس قالي ان رايد عيا ياخذ اغراضك معه .. مدري ليه

استغربت بس ماعلقت

عمر = طيب خلاص اذا جا رايد العصر انا اعطيه الاغراض

فيه مفاجأة له بالبوك .. انا متأكد انه بيطير من الوناسة .. وابتسمت اكثر متحمس ابي اشوفه وش يسوي اذا شاف اثباته

لحظة .. صح وشلون بيجي رايد للمستشفى ومامعه سيارة ... اكيد بيحتاج مفتاح سيارتي

رفعت نظري لمصعب

عمر = والا اقول .. رايد مامعه سيارة .. انت رح لرايد بالبيت و عطه البوك ومفتاح السيارة .. ( وابتسمت ) وقل لرايد فيه مفاجأة له بالبوك

مصعب مستغرب = مفاجأة ! ( وطالع بوكي اللي بيده بفضول )

عمر = ياويلك اذا فتحته

مصعب = وش فيه البوك ؟

عمر = مالك دخل .. عطه رايد وبس

مصعب = طيب وش فيها اذا فتحت البوك ... مافيها شي

لفيت وجهي عنه .. بطني يعورني مالي حيل اخذ واعطي معه .. خله يتحرقص بمكانه احسن

مصعب = بتعلمني والا وشلون ؟

سكتت اطالع امي ومها وهن يعدلن عباياتهم ومطنشه

مصعب بقهر = اهب عليك ... وش فيها اذا علمتني ؟

مارديت عليه

مصعب بعصبية = طيب ابروح بس عشان رايد ... والا انت ماتستاهل

التفتت له يوم شفته عصب .. زين انه عصب من كيفه .. حلو ارفع ضغطه اكثر

عمر بهمس = قلت لك ما احتاجك ... ماتبي تودي الاغراض لا توديهم .. الاغراض بتوصل لرايد كان بك والا بغيرك

حط مصعب الاغراض بجيبه وهو يطالعني

مصعب = اكبر عقلي احسن ... ابروح بس عشان رايد ومنها اشوفه .. امس حالته حاله على واحد حقود ومغرور ومتكبر .. اخلاقك زفت

وتوجهه للباب معصب وهو يكلم البقية

مصعب = احتريكم عند السيارة

وطلع ... طالعت الباب مستانس ... ماعرفناله ... دايم احاول اخليه يعصب و مايعصب .. واذا كان ماببالي شي وكلمته عادي عصب

سلموا علي البقة وراحوا

فتحت جوالي ولقيت 4 رسايل واردة .. فتحتها ولقيتها من الشباب وكلها من نفس الوقت ( مشعل .. وعبد الله .. ومنصور )

ابتسمت مرسلين الساعة 10 صباحا وبنفس الدقيقة تقريبا ..

فتحت اول رساله .. رساله منصور
( سلامات يابو سعود
اجل صارت مخاوفك امس بمحلها )

قطبت حواجبي مستنكر ... مخاوفي ؟ صحيح نايف هددني بس قال بيسلم لي على احد ... الى الحين عجزت افهم قصد نايف بالشخص اللي يبي يسلملي عليه .. ووش دخل اللي صار بالشخص هذا

فتحت الرساله اللي بعدها .. رساله مشعل

( ابوي عرف من جدك وعلمني
وانا عاد سويت بالواجب وعلمت الشباب
سلامتك ماتشوف شر )

فتحت رساله عبد الله

( والله وطلع نايف ماعنده لعب
سلامتك ياحلو .. تراني ابزورك العصر انا والشباب
ماعمري شفت قربة مشقوقة .. واليوم تحققت امنيتي )

ضحكت بس قطعت ضحكتي وحطيت يدي على بطني بألم

افففففف حتى اذا ضحكت عورني بطني

ابتسمت على رساله عبد الله .. اجل صار بطني قربة مشقوقة

نزلت جوالي على صدري وطالعت السقف .. ودي اتصل على رايد .. ابي اعرف ليه سمح لنايف يدخل بيتي .. وكيف نايف دخل بيتي اصلا

فجأة جت رساله بجوالي

فتحت الرساله وكانت من مصعب

( اسمع ابوي وجدي عرفوا ان اللي برجلك
ماهو من لعب الكورة
اذا قلت انه من معاذ اباخذ بطاقاتنا منك وارجع
سيارة معاذ له – وانت كيفك )

اوووهووو ... وش يخلصني من جدي الحين ... ووش اقوله عشان يسكت عني ..
اممم اقوله حادث بس ما اقول انه من معاذ .. لازم ادور لي كذبه يصدقها جدي

اخذت جوالي متنرفز .. خلني اتصل على رايد بس

اتصلت على بيتي .. ولا رد

اتصلت مرة ثانية ولا رد

عادة رايد مايرد على طول .. ودي اعرف ليه سمح لنايف امس يدخل بيتي

اتصلت اكثر من اربع مرات ولا رد .... نزلت جوالي تحت مخدتي تعبااااااااان

احاول اتصل عليه وقت ثانية ...

العصر

قمت من النوم يوم سمعت باب غرفتي يفتح .. وطل منه احمد

احمد بابتسامة = السلام عليكم ( وفتح الباب بالكامل ودخل ووراه ابوه ومحمد ) سلامات سلامات ماتشوف شر ( وانحنى علي يسلم )

عمر = الله يسلمك ( حاولت ارفع راسي واجلس بس ماقدرت .. احس بطني يتمزق مع كل حركة ... اخر شي تخيلته اني اصير يوم من الايام عاجز )

وبعدها سلموا علي اخوه وابوه ... وبعد السلام والاطمئنان

احمد = عطيت الضابط اسم نايف بالكامل .. ويقول انهم راح يمسكونه .. هم شاكين انه برا بريدة .. وعمموا عنه

هزيت راسي بايه ... معقول هج برا بريدة .. بسم الله مسرعه

مرت ربع ساعة علينا بدون أي حديث خاص .. كلها سلام واطمئنان .. ماكان بيني وبينهم ميانة ... صح الجدار بالجدار بس انا قليل اجلس بالبيت ولا اختلط فيهم واحمد من يوم كنا بالثانوي وهو هادي وكل وقته جاد .. وانا مايعجبوني الجادين

فجأة سألني محمد واعتقد انه وصل صف ثالث متوسط

محمد = عمر .. رايد يقربلك ؟

تفاجأت من سؤاله

عمر = لا

ابو احمد مستغرب = ماهو ولد عمك عبد العزيز ؟

عمر = ولد عمي عبد العزيز اسمه سعود .. هو كبر رايد ومحمد

ابو احمد = ايه اللي اعرفه ان عمك عبد العزيز له ولد كبر ولدي محمد بس ما اعرف اسمه ( والتفت لاحمد مستغرب ) و حسبته هو هذا رايد

احمد = عمر .. اذا كان رايد مايقربلك ولا شي وش يسكنه عندك وهو بهالعمر .. اشوفه صغير يسكن بعيد عن اهله .. والا انا غلطان ؟

سكتت متردد شوي وبعدها جاوبته

عمر = رايد يتيم الاب والام .. وماعنده الا عمه وطرده قبل 4 شهور تقريبا

تفاجئوا كلهم .. شوي وتغيرت ملامحهم شفقة على رايد

ابو احمد = لا حول ولا قوة بالله

محمد = انا مرة حاولت اسولف معه وحنا طالعين من المسجد بس اشوفه يتهرب مني ومايطلع من بيتك واجد .. هو يدرس ؟

مارديت عليه

ابو احمد = ورايد وينه الحين ؟

عمر = بالبيت

احمد = لا مو بالبيت ... الوالدة اليوم ارسلت مع محمد غدا لرايد بس ما احد فتح له الباب ... والعصر قبل شوي بعد .. طقينا عليه الباب نسأله اذا كان يبي يروح معنا نزورك بس ماحد فتح لنا

قطبت حواجبي مستغرب

عمر = كيف !!

كمل احمد كلامه

احمد = امس رجعنا انا وابوي للبيت وهو قعد بالمستشفى مع ولد عمك اللي اسمه مصعب ..

طالعت السقف مستغرب .. الظهر مروا عليه ولا فتح .. والعصر مروا بعد ولا فتح

التفتت لاحمد وانا مستغرب

عمر = يمكن نايم

هز احمد كتوفه ماعنده جواب

ربع ساعة ودخلوا الشباب ( مشعل .. وعبد الله .. ومنصور )

استأذن احمد بهدوء وطلع هو وابوه ومحمد

احمد مايعرف من شلتي الا نايف حتى عيال عمي مايعرفهم .. كنا ندرس انا وهو بمدرسة اهليه ايام الثانوي وكان معنا نايف .. بعد التخرج دخلت انا ونايف نفس الجامعة وهو دخل جامعة ثانية

انتبهت على منصور يكشف اللحاف عني ورفع فنيلة المستشفى عن بطني

عمر = هيييييييييه وش تسوي

منصور وعينه على بطني = حسافة عليها هاللزقة ( والتفت لي وكمل ياستبهال ) تسمح اشيلها ؟

حطيت نفسي معصب عليه

عمر = مهبول انت

عدل فنيلتي وهو يضحك

منصور = ههههههههههه عبد الله يقول ودي اشوف قربة مشقوقة .. ياهو ضحكت عليك .. المشكلة قالها لي وحنا بالمحاظرة .. عجزت امسك نفسي وانا اتخيلك

التفتت لعبد الله ودي اتطنز عليه واهزءه على ضحكه علي بس شفته هو ومشعل يتهامسون وملامحهم جاده

عمر مستغرب = وش تقولون انتم ؟

التفت عبد الله لي بنظرات جاده سكت شوي وبعدها

عبد الله = عمر اظن انا ومشعل فهمنا قصد نايف يوم يقولك يبي يسلملك على واحد

جيت ابقول مين بس سبقني منصور بنفس السؤال متحمس

منصور = مين يقصد ؟

التفتوا عبد الله و مشعل على بعض ورجعوا التفتوا لي

مشعل = شف .. انا وعبد الله ربطنا تهديده لك قبل امس مع اللي سواه وقلنا اكيد هذا اللي قصده من السلام

عمر بملل = ادخل بدون مقدمات .. يعني مين . ؟

واستغربت لما شفتهم مرتبكين وكل واحد يناظر الثاني يحتريه هو اللي يتكلم

منصور بعصبية = بتكلمون والا وشلووووون ؟

وجه عبد الله كلامه لي مرتبك

عبد الله = حنا مو متأكدين وتوقعنا كله شك .. بس هذا اللي فهمناه

زفرت بضيق احتريه يكمل

عبد الله = عمر .. نايف طاعنك .. يعني الرجال كان ناوي يخلص عليك .. لولا حفظ الله لك كان انت رحت فيها ... وانت قبلها قلت لنا انه هددك بواحد .. تذكر وش قال بالضبط ؟

عمر بملل = قال انا ابي اسلملك على واحد

مشعل = وبعدها جا وطعنك

عبد الله = اظن وضحت

طالعتهم مستغرب ماني فاهم شي .. التفتت لمنصور اللي واقف فوق راسي

عمر = فهمت شي ؟

طنش منصور سؤالي ووجه كلامه لعبد الله

منصور = يعني نايف يقصد الدكتور .. ( وابتسم ) عمر ماراح الا للدكتور ماراح لواحد ثاني

مشعل = هذا لأن الله سلمه .. لو ما سلم وش بيشوف عمر ؟

شهقت كأني فهمت

عمر = يعني نايف يقصد ملك الموت .. بس الله سلمني وما مت .. هذا اللي تقصده ؟

هز عبد الله راسه بايه

عبد الله = هذا اللي اتوقعه ... بس مثل ماقلت ترا كل كلامنا شك وتوقعات

ضحك منصور

منصور = هههههههههههه نايف يسمع بالتهديد .. بس مايعرف

لفيت وجهي عنهم و سكتت ماني مصدق .. مو معقول نايف توصل فيه لهالدرجة عشان كذبة كذبتها عليه ..

التفتت لعبد الله وحاولت اغير الموضوع

عمر = اقول بس لا عاد تتوقع وخلك على القربة المشقوقة

ضحك عبد الله وبدينا نسولف باشياء جانبية .. وبالي مشغول بكلامهم

صح .. معهم حق ... نايف دخل بيتي وطعني بغفلة مني ليش مايصير كلامهم صحيح ...

ومع اذان المغرب دخل مصعب علينا الغرفة

صافح الشباب وبعدها وقف بجنبي من الجهه الثانية ومد علي بوكي ومفاتيحي

رفعت راسي له مستغرب

عمر = انت بعد مافتحلك رايد ؟

حط مصعب بوكي ومفاتيحي على صدري

مصعب = ما احد فتحلي .... طاحت يدي وانا اطق .. وقلت يمكن رايد اخذ ليموزين وجا عندك

طيرت عيوني منصدم .. لا يكون رايد سواها وطلع من بيتي

امس قبل اروح للجامعة قال يبي يطلع من عندي ... بس انا اقنعته انه يقعد .. ليش طلع الحين

وش هالتفكير اللي فيه ... اجل يقول يبي يطلع لانه سبب لي مشاكل على حد فهمه الغبي .. يوم ملى علي البيت و حسسني بمعنى الاخ الصغير يطلع .. ما ابي ارجع للوحدة مرة ثانية ... مابي ارجع لبيت موحش مافيه الا انا

مديت يدي واخذت المفاتيح ومديتها على مصعب

عمر = مصعب تكفى خذ المفاتيح وادخل البيت وشف رايد فيه والا لا

مصعب مستغرب = ليه يمكن هو اخذ لموزين وعلى وصول الحين ... او يمكن راح مشوار

عمر بترجي = تكفى مصعب .. رح وشف

سكت مصعب شوي وبعدها ابتسم ابتسامة جانبيه

مصعب بابتسامة = دايم تقول ما انت محتاجني .. والحين ترسلني

كشرت بوجهه متضايق ..

عمر = وانا الى الحين ماني محتاجك ( والتفتت لمشعل بعصبية ابي ارسله ) مشعل

بس قاطعني مصعب واخذ المفتاح مني

مصعب = لا لا خلاص خلاص .. انا ابروح

وطلع

17 - 4 - 2014, 09:22 AM

يارب رايد موجود بالبيت ... يارب انه ماطلع ... حاولت اتذكر اخر كلامنا مع بعض .. ما شفت اغبى منه .. وش المشاكل اللي سببها لي بزعمه .. انا اصلا راعي مشاكل من يوم كنت صغير .. انا راعي مشاكل من قبل اعرفه .. ليه يتوقع كذا ..

= عمر وش فيك

انتبهت على عبد الله اللي واقف بمكان مصعب ورفعت نظري له متضايق

عمر = رايد .. اظنه طلع من بيتي

استغربوا كلهم

مشعل = ليه وش مسويله انت .. ترا رايد حساس .. وانت الصراحة جلف حتى معنا

تغيرت ملامحي وانا احاول اتذكر معاملتي معه

ايه انا اتطنز عليه .. واسبه .. وارسله واجد .. وبعض الاحيان اضربه .. بس والله حبيته مثل اخوي الصغير ... رايد حسسني بمعنى الاخو اللي محروم منها

مديت يدي واخذت بوكي وحطيته تحت مخدتي بصمت

منصور = يمكن رجع لعمه ؟

رديت عليه بصوت مخنوق

عمر = احتري مصعب الحين يتأكد اذا كان بالبيت والا لا

وغمضت عيوني بألم .. ما اعتقد عمه الحقير راح يستقبله .. خاصة انه بزعمه ان رايد هو اللي كسر سيارته .. يااارب يحصله مصعب بالبيت

سمعت اصوات ضحكات خفيفة حولي وفتحت عيوني مستغرب .. ولقيت منصور ومشعل وعبد الله كل واحد ماسك ضحكته

استغربت والصراحة فرحت .. يمكن مسوين مقلب ويعرفون رايد وين

عمر = وش فيكم ؟

وانفجروا ضحك اول ماسمعوا سؤالي

احتريتهم يخلصون موجة الضحك هذي وانا اطالعهم واحد واحد مستغرب

عبد الله وهو يضحك = سبحاان مغير الاحوال ... عميران تذكر مين اللي كان معيي يسكن رايد عنده ههههههههههههههه

منصور = شوفوا شكله شوي ويصيح ههههههههههههه

مشعل وهو يتكم ضحكته = يارجال تلقى رايد راح مشوار هنا والا هنا .. لا تنسى ماله احد ببريدة .. ورايد حالف مايرجع لعمه .. يعني الولد ماله مكان الا بيتك

تفشلت من اكتشافهم لي .. وبنفس الوقت ماني متطمن لكلامهم .. وما اقدر اجادلهم اكثر عشان ما ابين لهم ان كلامهم صحيح

سمعنا يقوم للصلاة بس الشباب حالتهم نفس حالتي مع الصلاة

قعدنا نسولف وانا بالي ماهو معهم .. احتري مصعب

نص ساعة ودخل مصعب الغرفة علينا بسرعة وبدون سلام ولا مقدمات

مصعب = عمر رايد شكله مارجع البيت من البارح

شهقت وحاولت اجلس بس عجزت

مشعل = وانت وش عرفك انه مارجع البيت

التفت مصعب لمشعل

مصعب = دخلت بيت عمر ( والتفت لي ) وشفت الدم ومناشف عند عتبه الباب الداخلي .. لو رايد رجع كان على الاقل وخر المناشف عن الطريق

ليه يارايد ليييييييييه

ليه طلعت .. معي مفاجأة لك

عبد الله = معه جوال ؟

هزيت راسي بيأس

عمر = لا ( وهمست بألم ) ليتني شريتله

مشعل = يمكن رجع لعمه .. ماعليكم اذا رحت لحارتنا ابسأل ولد عمه بندر عنه واشوف

طالعت مشعل بصمت .. ما اعتقد انه رجع لعمه ... حتى لو رجع يمديه طرده مرة ثانية عشان سالفة السيارة ...

الثلاثاء ... الساعة 12 الظهر

منسدح على سريري لا شغل ولا مشغله .. تعبت من السرير ومليت

امي ومها وجدي عندي من الساعة 9 .. بالي مشغول برايد طلعوا الشباب من عندي ولا واحد اتصل علي يطمني

مشعل قال بيسأل بندر بس ما اتصل علي الى الان .. ومصعب اكيد وكالعادة يمر على بيت جدي .. بس ما اتصل علي اذا سأل والا لا

بالي مشغول .. الخوف اذا راح رايد للرياض عند خواله ... اكيد بيستقر عندهم هناك وارجع انا لوحدتي وارجع لهواجيسي والاشباح اللي اتخيلها بالبيت

طيب على الاقل يزورني ... ترا كل اللي انا فيه عشانه ... اخر شي يروح ولا حتى يسأل عن صحتي بعد اللي صار ( تنهدت بضيق ) وينك يارايد ؟

انتبهت على جدي يكلمني بس ما استوعبت كلامه .. التفتت له اتأكد

عمر = تكلمني ؟

مها = اللي ماخذ عقلك يتهنابه .. ابوي يسألك من اليوم

جدي = انت قبل هالمرة متهاوش مع نايف ؟

لفيت وجهي عنه بضيق .. ماني فاضي لتحقيقاته الحين

عمر بدون نفس = ايه .. تهاوشت معه

جدي بحزم = طيب ليه كذبت علي وقلت ان اللي برجلك من لعب الكورة

التفتت له مستغرب

عمر بعدم استعياب = هااه

جدي وبدا يعصب

جدي = ليه ماعلمتنا انك تهاوشت معه ... ليه قلت لنا ان اللي برجلك من لعب الكورة

قطبت حواجبي مستغرب .. وش جاب هذي لهذي ... انا احسب يسألني عن اللي براسي ... سكتت يوم تذكرت رساله مصعب .. زين جدي جاب كذبة جاهزة بدل ما اتعب نفسي وادور عذر

جدي بصراخ = ليش ماترد

مها = يدور كذبه

امي = مها خليك محضر خير

التفتت لجدي

عمر = رجلي من نايف بس وقتها ماحبيت اقولكم .. كنت اظن اني .. آآآ ... احل المشكلة بيني وبينه

هزت امي راسها بقلة حيلة

امي بتنهيدة = الله يهديك

مها = واللي براسك بعد منه ؟

هزت راسي بايه

مها = هذا يمشي ويطقك ( وضحكت )

كشرت بوجهي لها

عمر = بايخة

جدي = طيب سيارتك وينهي ... من زمان ماشفتها معك .. ما اشوف معك الا سيارة معاذ

التفتت مها لجدي تأيده

مها = ايه انا بعد مستغربة ( والتفتت لي ) اللي اعرفه عمر ومعاذ مايتدانون .. كيف يعطون سياراتهم لبعض ... وش صاير بالدنيا

التفتت لجدي ولقيته يطالعني بحزم ويحتريني ارد ... تورطت مدري وش اقول

مها = ماااااترد

التفتت لمها معصب

عمر بعصبية = انت وش تبين الحين ؟

جدي بنفاذ صبر = عمر سيارتك وينهي ؟

التفتت لامي اللي جالسة بجنبي وتحتريني ردي مثلهم

طالعت جدي وانا طفشان من هالتحقيقات اللي كل يوم

عمر = بالورشة .. خربانة ... خربت علي عند الجامعة ووديتها للورشة .. فيها شي هذي ؟ .. انتم الحين جايين تزورون والا جايين تحققون معي ...

مها = الاثنين

التفتت لمها هالسوسة

عمر = اسكتي انتي

فجأة سمعته يذن الظهر

عمر بعصبية = خلاص .. خلصت الزيارة

قامت امي وحطت يدها على صدري

امي = لا خلاص بنسكت عنك

مها بعصبية = تطردنا ياللي ماني بقايلة

رفعت نظري لامي ولقيتها تطالعني بنظرات حزن وخوف

زفرت بضيق .. وش فيني شاب ضو اليوم

حطيت يدي على يد امي

عمر بضيق = لا تزعلين يمه .. والله ماقصدت ( والتفتت لجدي ) جدي لا تزعل مني مــ

وقاااطعتني امي

امي = خلاص ياوليدي ماحنا مضايقينك .. الله يرضى عليك

مها = طيب و انا ما استسمحت مني

عمر = اهاا بس

قام جدي وجا عندي ووقف بجنب امي

جدي = الله يصلحك ويهديك .. انا اسألك من خوفي عليك

ابتسمت .. وقلت اغير الموضوع

عمر = جدي انت شفت ابو بندر ؟

قطب جدي حواجبه مستغرب من سؤالي المفاجئ

جدي = لا .. امس ماشفته

عمر = ولا شفت رايد بالحارة .؟

جدي = رايد ؟ مو انت قلتلي انه عندك بالبيت ... ورحت معك عشان اشـ

قاطعته

عمر = رايد طلع من البيت من يوم دخلت المستشفى والى الحين مارجع

امي مستغرب = مين رايد ؟

التفتت لامي

عمر = اللي ساكن معي

مها بصدمة = رايد اليتيم اللي بحارتنا هو اللي ساكن معك ( وجت عندي من الجهه الثانية )

جدي = لا ماشفته بحارتنا ابسأل عمه عنه واشوف .. هو مازارك ابد ؟

عمر = ايه

وسكتت ودي اقول لجدي يتصل على ابو بندر الحين ويطمني ... بس ما ابي ابين لهم اني مهتم مرة ... اخاف يضحكون علي مثل ماضحكوا علي الشباب

اخذوا شوي وطلعوا راجعين للبيت

اخذت جوالي و اتصلت على مشعل ولا رد ... اتصلت على مصعب ولا رد .. اتصلت على عبد الله ولا رد

رفعت حواجبي متنزفر وين ذلفوا هذولي

ابي اسألهم عن رايد .. ليش مايردون

افففففف .. مليت وانا بالمستشفى .. لازم اطلع

حطيت يدي على بطني بألم .. الدكتور مانعني عن الجلوس اسبوع كامل لين يلتئم الجرح على الاقل مبدئيا .. بس وش يصبرني اسبوع بالمستشفى

عناااد بهالدكتور ابحاول اجلس وامشي ... لو اسمع كلام هالدكاترة عز الله عفنت عندهم
جلست بصعوبة وببطئ على السرير .. شوي شوي نزلت من السرير ببطئ .. شوي شوي حاولت امشي داخل الغرفة وخارجها ادرب نفسي على شوي شوي .. الجرح اللي بفخذي متعبني ... مر عليها اكثر من اسبوع والى الان الجرح بفخذي ما التئم .. بسبب نايف وهوشاتي معه عادوا خياطتها ثلاث مرات ... يارب ما اتهاوش مع احد وتبرا ... تعبت وانا اعرج

العصر الساعه 4

منسدح على سريري تعبان من الم بطني .. بكل حركة احس الجرح ببطني ينفك ...

= السلام عليكم

التفتت على مشعل ومنصور وعبد الله اللي دخلوا فجأة علي بدون ما انتبه

عمر = وعليكم السلام

وبعد السلام والتعليقات اللي اكثرها من عبد الله .. التفتت لمشعل

عمر = هيييييه انت واياه اتصل عليكم ليش ماتردون

مشعل = اتصلت وانا عندي اخر محاضرة .. بتورينا انك باجازة.. يقالك نسيت جدولنا الحين وشوله تتصل بهالوقت

وضحكوا علي

رفعت حواجبي .. صح نسيت

التفت عبد الله يكلم مشعل ويعلق علي

عبد الله = ناوي يقهرنا هههههههه

طنشت تعليق عبد الله

عمر = مشعل سألت عن رايد ؟

سكتوا كلهم شوي وبعدها تكلم منصور

منصور = تونا مرينا انا ومشعل وعبد الله على حارتكم

هزيت راسي احثه يكمل

عمر = ايه وبعدين

منصور = سألنا الولد اللي اسمه بندر .. ولد عم رايد .. يقول ان رايد اخر مرة جاهم يوم يكسر سيارة ابوه ( وهز اكتافه ) هذا كلام الولد

مشعل = ابوي علمني قبل يومين ان سيارة ابو بندر الجيب مكسورة واللي كسرها رايد ..

انفعلت منقهر منهم .. ماجابوا شي جديد

عمر = ماجبتوا شي جديد هذا كله اعرفه ... كل اللي تقولونه صار قبل ادخل المستشفى .. وقبل يختفي رايد ( وسكتت اطالعهم واحد واحد ) اللي ابي اعرفه رايد عند عمه الحين والا لا ؟

منصور = بندر يقول اخر مرة جاهــم يوم يكسر سيارتهم ... و سألناه رايد موجود قال لا

لفيت وجهي عنهم متضايق .. وينه اجل .. لا يكون راح للرياض .. لا يكون بيستقر هناك .. مابيه يروح لخواله يمكن يعجبه الوضع هناك وينساني

ليه انا حظي كذا .. الوحدة وراي وراي

مشعل = انا متأكد انه راح لخواله ؟

منصور = اظن خواله بالدمام صح ؟

مشعل = لا .. بالرياض

عبد الله = طيب وشلون نتاكد ؟

التفتت لعبد الله .. صح سؤال وجيه ... وشلون نتأكد ؟؟

عمر = طيب كيف نعرف اذا كان عند خواله والا لا ؟

وسكتنا نفكر

مشعل بتفكير = اممممم مافيه الا نسأل عمه

التفتت بسرعة لمشعل

عمر = لا .. فكنا من عمه ... هذا واحد كذوب

عبد الله = اجل نسأل بندر

التفت منصور على عبد الله

منصور = هذا بزر وش يعرفه ؟

مها

مافيه الا مها ... عمتي مها ... ابطلب منها تتصل على اخت رايد وتسأل خوالها عن رايد .. مافيه الا كذا

التفتت للشباب

عمر = خلاص .. خلوها علي .. ابقول لاهلي يسألون اخته .. او ناخذ رقم خواله من اخته واسألهم بنفسي

التفتوا الشباب لبعضهم يتبسمون وكل واحد ماسك ضحكته

انقهرت منهم .. ليه يضحكون علي اذا شافوني مهتم برايد

اشرت عليهم بسبابتي

عمر بعصبية = والله تضحكون والا ماتضحكون ماني راااد عليكم

وكأني قلت نكتة ... انفجروا ضحك

ربع ساعة وتفاجأت بزيارة الشيبان ( 4 من جيران جدي بالحارة ومنهم ابو مشعل وعم رايد ) يدخلون علي وجدي وعمي معهم ... وتفاجأت اكثر لما شفت عم رايد معهم

سلموا منصور وعبد الله ومشعل علي وطلعوا ... تمنيت اطلع معهم ... حسدتهم الصراحة ... ماجلسوا مثلي يسمعون النصايح و المواعظ من هالشيبان

استلموني .. ومابلسانهم الا ( هذي اخرتها و ماجا من هالشباب الا المتاعب ) .. ومن هالكلام .. وكأنهم يحشون راس جدي علي ...

وتحاشيت الخايس عم رايد وماسألته عن رايد ابد ... لانه اولا كذوب ثانا الشباب سألوا بندر وقال لهم انه مو موجود .. اجل وشوله اتعب نفسي و اسأل هالشايب الكذوب

الاربعاء .. الفجر

منسدح على سريري وماجايني نوم ... هذا ثالث يوم لي بالمستشفى ... احس بتطلع روحي من الملل ... ما اقدر اتحرك واجد وتعبت من السرير ومليت من المسشتفى

امس بعد ماطلعوا الشيبان من عندي ... مرني الدكتور وترجيته يكتبلي خروج .. بس ماش .. رافض وبقوة ... والسبب الاصابة تحتاج متابعة

وطوال الليل وانا نايم .. كنت ناوي اتصل على مها امس بس غلبني النوم ... مافيه الا انتظرها اذا جتني وقت الزيارة ... المشكلة كيف اطلب منها .. اقولها اتصلي على البنت .. اخاف تفهمني غلط .. عاد مها مايحتاج لسان طويل

وقت الزيارة

دخلوا علي امي وجدي وجدتي ... طالعتهم مستغرب ادور مها

عمر = وين مها ؟

امي بابتسامة = بنات عمك جن معي من عنيزة .. يقولن يبن يزورن مها و مدام اني رايحه لبريدة رايحة .. راحن معي

التفتت متضايق .. شي اكيد .. اخوات معاذ مايجي منهم خير... لولاهم كان زارتني مها وطلبت منها تتصل .. وش يصبرني الحين ... قلبي ماهو مرتاح لين اعرف رايد وينه

التفتت لجدي و طلبت منه يلح على الدكتور يخرجني .. رفض بالبداية بس لحيت عليه واقنعته وراح يكلم الدكتور

امي = وليه تبي تطلع الحين .. انت تعبان .. لازم ترتاح

عمر = ارتاح بالبيت .. مليت وانا هنا .. طفشت

قامت امي وحطت يدها على راسي وانحنت علي

امي = ابيك تصير عندي بالبيت بعنيزة .. ابي انتبهلك بنفسي واشوف احتياجاتك ( وابتسمت )

رفعت حواجبي متفاجأ من عرضها

انا اجلس ببيت عمي ... احس مكاني غلط .. خاصة ان شقة امي فوق و صغيرة ..

وفوق هذا امي حامل .. راح اتعبها بوجودي واصاباتي .. اعرج وقربة مشقوقة على قولت عبد الله .. و الدكتور معطيني حمية خاصة لمدة شهر

نزلت نظري لبطن امي بصمت ... انا ملاحظ كبر بطنها ... امي بنفسها تحتاج راحة ..

رفعت نظري لامي احاول ادور لها عذر يعفيني عن اجلس ببيتها

بس امي فهمت صمتي على انه موافقه

اعتدلت واقفة وهي مبتسمة برضى

امي = ابجيب من بيتك ملابس غيار وارسله مع مصعب العصر

تذكرت الدم اللي عند الباب الداخلي .. وماحبيت امي تشوفه .. و بيتي ماحد دخله الى الان واكيد كل شي على وضعه

عمر = لا يمه انا ابتصل على مصعب واقوله

امي بابتسامة = ليه ... انــ

وقاطعتها

عمر = انا اصلا ابي مصعب بحاجة

هزت امي راسها بايه والتفتت على جدتي تسولف معها

شوي ودخل جدي

جدي = خلاص قلت للدكتور يكتب لك خروج على مسؤوليتي

فرحت وقبل اتكلم

جدي = بس بشرط

اوووووه بدينا بالذل ..

عمر = فيها شروط بعد ؟

جدي = تجي عندي ببيتي لين تتحسن وبعدها عاد بكيفك

جدتي = ايه والله ياوليدي ياليت

التفتت لامي وانا ساكت

عارضت امي ووجهت كلامها لجدي

امي = بس انا قلتله يجي عندي بعنيزة .. انا ودي انه يكون عندي

التفت جدي لامي

جدي = بس يام عمر وشلون تبين ولدك يركب الدرج وهذي حالته .. ولدك تعبان والحركة ماهي زينه له

صح ماطرى علي العذر هذا قبل شوي

همست امي باقتناع

امي بهمس = ايه صح .. بيتي فوق ( وسكتت تفكر شوي ) خلاص ابستاذن من ابو معاذ واجي عندكم لين يطيب عمر

ابتسم جدي = الله يحييك

طالعتهم بصمت وانا اشوفهم يتفاوضون عشاني .. وابتسمت

يُتبع ..

17 - 4 - 2014, 09:22 AM

العصر

جاني مصعب يزور بس على طول ارسلته لبيتي يجيب لي ملابس غيار .. نص ساعة ورجع ومد علي كيس

مصعب = جبت بنطلون وتي شيرت .. مدري يناسبك ؟

عمر = اللي يسمعك يقول انت اللي شاريه لي .. تراك جايبه من بيتي .. اكيد ماشريته انا الا انه مناسبني

واخذت الكيس منه ونزلت من السرير متوجه للحمام

مصعب = لا اقصد يعني غرفتك حوسه يالله يالله لقيت هذا

طنشته ودخلت الحمام

شوي وطلعت ولقيت مصعب جالس على السرير يحتريني

عمر = مارحت تكمل اجراءات الخروج ؟

مصعب = وليه انا اللي اكمل الاجراءات .. ليه مو انت .. مو انت دايم تقول مانت بحاجة احد ؟

وقفت بمكاني وانا اطالعه .. مسكها علي هذا .. كل شوي يعيدها علي

حطيت يدي على الجرح ببطني يوم حسيت بألم .. ورديت على مصعب بعناد

عمر = وانا صدق ماني محتاجك ... وآسفين غلطنا وطلبنا منك شي .. انا اللي راح اكمل الاجراءات .. انت خلك

اخذت اغراضي ( جوالي وبوكي والمفاتيح واوراق الموافقة من الدكتور ) وطلعت من الغرفة ومصعب يمشي بجنبي

انا بسبب رجلي والاصابة ببطني .. امشي ببطئ بالممرات واتساند على الجدار بتعب

ومصعب يمشي بجنبي وكلنا ساكتين ..لزقة مصعب هذا .. اذا كان مايبي يخدم وشوله جاي وناشب فيني

وقفت والتفتت لمصعب

عمر = خلاص رح لسيارتك .. اخلص اللي بيدي واجيك .. وشوله لاحقني ؟

مصعب = ماوراي شي

حطيت يدي على بطني لما حسيت بألم فظيع

غمضت عيوني .. احس الالم داخلي والمشي يتعبني بسرعة

مصعب = يعورك ؟

فتحت عيوني والتفتت لمعصب

عمر بعصبية = يا إما رح لسيارتك .. والا خلك ساكت

مصعب بعناد = ماني رايح لسيارتي وماني ساكت

سفهته وكملت امشي بممرات المستشفى الطويلة ..

ربع ساعة و خلصت الاجراءات وطلعنا من المستشفى وركبنا سيارة مصعب متوجهين لبيت جدي

وطوال الطريق ساكتين .. ولا واحد يكلم الثاني

تنهدت افكر بحالي ... والله حاله ... خاطوا الجرح اللي بفخذي للمرة الرابعه
وخاطوا الجرح اللي براسي للمرة الثانية
والحين بطني

صدق يعني صدق مليت .. صار جسمي كله خياطات

اعترف اني راعي هوشات وما ارتاح الا اذا رفعت ضغط احد بس عاد ماهو لهدرجة يرقع جسمي ورا بعض

طالعت الدريشة اللي بجنبي يوم تذكرت رايد

له ثلاث ايام مدري وينه .. وين راح ... اذا كان ماهو عند عمه .. وين يكون راح اجل ؟

معقول راح لخواله للرياض ... ودي اتأكد بس وشلون .. وشلون اقول لمها تكلم اخته .. لازم اخذها على جنب واقولها ...

مصعب = عمر

انتبهت على مصعب والتفتت له بصمت

التفت مصعب لي وبعدها طالع قدام وهو يسوق

مصعب = دايم ودي اسألك بس كل ماجيتك القاك معك احد ( والتفت لي ورجع يطالع قدام ) وش بينك وبين نايف ؟

قطبت حواجبي مستغرب من سؤاله

عمر = بيني وبين نايف ؟

مصعب = ايه .. الرجال طاعنك يعني ناويها ذبح .. واللي اعرفه انه يبي رايد مايبيك انت ... يوم اجيكم انت ورايد ببيتك علمني رايد انه يطارده .. واللي اعرفه انه انت ونايف بنفس الشلة وتسهرون بنفس الاستراحة .. وش اللي خلاه يقلب عليك وهو اصلا يبي رايد مايبيك انت ؟

التفتت للدريشة اللي بجنبي بدون ما ارد عليه

مصعب = ادري انك ماتدانيني ولا تداني معاذ .. ياخي لا تعتبرني ولد عمك .. اعتبرني خويك .. زميلك بالجامعة .. أي شي ... بس جاوبني تكفى

مارديت عليه اطالع السيارات بجنبي وساكت

مصعب بترجي = عمر ودي اعرف وش يبي هالكلب منكم .. تكفى رد علي

تنهدت ... رايد ماترك بيتي الا بسبب نايف ومضايقته لنا .. همست

عمر = مدري

مصعب = وش اللي ماتدري ... تكفى علمني وش اللي خلى هالكلب يطعنك ؟

طلعت بوكي من جيب بنطلوني وفتحتها وطلعت منها بطاقة عايلة رايد اتاملها .. ولا شعوريا فضفضت لمصعب

عمر = من كثر نايف مايضايق رايد وادافع عنه .. خلاه يعاف السكن معي ... وش ذنبي انا يتركني رايد ولا يزورني ... ( تنهدت وسندت ظهري على المرتبه وانا اطالع قدام بألم ) آآآه بعد ماتركتني امي قعدت بالبيت لحالي... وكل مادخلت .. اتخيل حركات وجنون ... بعدها سكن رايد معي وماكمل شهرين الا وهو تاركني .. بالضبط مثل ماتركني غيره .. سويت كل شي عشانه بس نايف ماكان يخلينا بحالنا .. كل شوي وهو ناط علينا ... هددنا باخت رايد وسكـتنا عنه ومابلغنا ... ياليتني ماسمعت كلام رايد وبلغت عليه .. كان ماتركني واختفى ... ماكنت ادري ان كل شي بـينقلب علي ... مدري وش استفدت الحين ... نايف حاول يذبحني ورايد تركني .... و ما الخاسر الا انا ( واخذت نفس احاول اهدي نفسي وكملت ).. كنا تونا جايين انا ورايد من برا ولقينا نايف يحترينا عند الباب .. الكلب يشوف رايد ماله احد ومستقوي عليه ... جانا يلهث يبي رايد يعطيه فلوس .. ( وابتسمت بسخرية ) هه يشوفه بزر ويخاف منه ولا يقواه قال خلني العب عليه ... وعشان انهي هالمهزلة كذبت على نايف وقلت انا اللي بلغت الهيئة مب رايد ... ثار نايف وزعل وعصب ... بس وقتها ماهتميت .... ماكنت متوقع انها بتوصل لهالدرجة .. ( نزلت نظري للبطاقة وابتسمت بسخرية ) هه والحين شف .. واحد يطعني والثاني يتركني ولا يزورني

مصعب = صح رايد غلطان بس كأني اشوفه قدامي .. مايدري وين يودي وجهه منك ..

قعدت اطالع البطاقة بين يدي واتأمل الاسماء فيها

مريم
رايد
دانة

بالذات اسم رايد ... اللي حسسني بمعنى الاخوة وراح ..

تاريخ ميلاده .. مكان الميلاد .. سجله المدني ... اصغر مني بست سنوات

اربع شهور او اكثر وهو قدامي .. من يوم كنا بالاستراحة الين دخلته بيتي وهو معي وناكل بصحن واحد وننام بنفس الغرفة ... يوم بديت اتعود عليه يرجّعني للوحدة مرة ثانية ...

= من بطاقته هذي ؟

انتبهت من سرحاني على سؤال مصعب

مصعب = اشوف ( ومد يده وهو يسوق يعني عطني البطاقة )

دفعت يده بعيد عني

عمر = لا

ودخلت البطاقة ببوكي ودخلتها بجيب بنطلوني عنه

مصعب = ليه لا طيب .. ماني ماكلها ياخي

التفتت للدريشة بجنبي وسفهته

مصعب = مدري على وش تكرهني ؟ ما اذكر اني سويت لك شي ؟

تنهدت بألم وسكت مالي نفس ارد عليه

حظي النحس يكرهني بكل الناس

لا ابو شفته بحياتي ... ولا ام تتحمل معي معاناتي .. ولا اخوان ولا اخوات ... حتى الشخص الوحيد اللي اعتبرته اخوي تركني لأتفه سبب .. لو انا اللي مضايقه قلنا معذور بس مب انا .. وش ذنبي .... ليه مايصير لي مثل مصعب ومعاذ .. اخوان

حى لو بأخو مستعار

وصلنا الحارة ونزل مصعب وحاولت انزل بحذر عشان الخياطة

وانا احاول انزل وقف مصعب عند بابي ..

مصعب = امك تراها هنا

نزلت من السيارة ووقفت قباله

عمر = ادري

ولان مصعب واقف مباشرة قدام باب الراكب دفعته شوي على ورا عشان اقدر اسكر باب السيارة

مصعب = تبيني اجيب سيارتك .. اقصد سيارة معاذ ؟

عمر = ايه هاتها

مصعب بابتسامة = طيب وسيارتك متى اجيبها ... الصراحة اشوفك زودتها مع معاذ

طالعته شوي

عمر = مر الورشة وشف اذا خلصوا منها والا لا .. وعطني خبر

طير مصعب حواجبي

مصعب = افهم انها يعني ماخلصت .. معقول ؟

سكتت ... انا قايل للتركي ياخذ راحته على الاخر ويبدّي أي سيارة بعدي .. ان شاء الله انها ماخلصت الى الحين

فجأة حسيت بشي يجر بنطلوني من تحت وصوت صغير ينادي
= هيييييه هييييه

نزلت نظري للارض مستغرب ... وشفت دانة ماسكه بنطلوني من تحت بيدها الصغيرة وتجره عشان انتبهلها وتطالعني بعيون بريئة وعلى وجهها احلى ابتسامة وصديقتها اللي دايم معها وراها

ابتسمت بفرح وغصب عني ضحكت

عمر = ههههههههه دانه

رفعت دانه يدها يقالها بتصافحني

ضحكت اكثر ... ومسكت يدها الصغيرة

حاولت انحني واشيلها بس ماقدرت بسبب الاصابة والتفتت لمصعب

عمر = مصعب شيلها تكفى ووقفها على كبوت سيارتك .. ودي اسلم عليها

ضحك مصعب .. وشالها وحطها مثل ما قلت

مصعب = تقولك هييييه .. الحرمة جايه تسلم ههههههه

ضحكت مستانس ... عرفتني .. وجت خصيص لي .. احس قلبي يرفرف من الوناسة

وقفت قدام الكبوت ودانة واقفة عليه .. ولفيت ذراعي حوليها وضميتها

عمر = احلى هييه سمعته بحياتي ( وابعدتها عني اطالعها واتأملها .. ابعدت شعرها الحوسة بيدي عن وجهها وسلمت على خدها وخدها الثاني وقربت وجهي من وجهها وهمست ) قولي عمر

دانة = عمل

ضحكت مستمتع بنطقها لاسمي .. والتفتت لمصعب اللي واقف بجنبي

عمر بفرح = توني ادري ان اسمي حلو هههههههه

ابتسم مصعب بدون ما يرد

التفتت لدانة وضميتها مرة ثانية ... شكلها اخذت علي لاني دايم اكلمها واشتري لا من الدكان ... توني ادري ان كم ريال بيحبب البنت فيني .. ابشجعها وارغبها .. خلاص من اليوم وطالع كل ماشفتها ابوديها للدكان

اخذت شوي وابعدتها عني وانتبهت على بنطلونها البني .. وتصنمت بمكاني وانا اطالع بنطلونها

تذكرت .. بنطلونها هذا نفس بنطلونها يوم كان رايد يراسل اخته ويرسله مع دانه ... ايه ( طالعت احدى جيوب بنطلونها ولا شعوريا دخلت اصبعي باحد جيوبها الصغيرة يمكن القى ورقة من رسايل رايد منسية هنا )

فاضي ... دخلت ابعي بالجيب الثاني ونفس الشي فاضي .. اخذت نفس والتفتت على ورا اشوف بيت عمها ابو بندر ... كيف فاتت عن بالي هذي

ليه ما اسوي نفس الطريقة واراسل مريم اسألها عن رايد ... هزيت راسي اطرد الفكرة عن بالي .. لا لا ..

مصعب مستغرب = عمر وش فيك ؟

انتبهت على مصعب والتفتت له .. وبالي مشغول بالفكرة اللي طرت على بالي اول ماشفت بنطلون دانة

اللي ابسويه خطأ والا لا ؟

التفتت على دانة ومسحت على شعرها وانا اشاور نفسي .. اراسل مريم والا لا ؟

مصعب = عمر

التفتت لمصعب وملت اتجاهه و قربت وجهي لوجهه وهمست له عشان ماتسمع دانه

عمر = انت سألت عن رايد اذا ببيت عمه والا لا ؟

مصعب بهمس = سألت الولد اللي اسمه بندر ويقول لا مو عندهم

اعتدلت واقف .. والفكرة تلح براسي

مصعب = يله خلنا ندخل .. يحترونك

طالعت دانة وابتسمت لها وانا امسح على شعرها

عمر = دندون ابعطيك فلوس وروحي اشتري اللي تبينه من الدكان ( وطلعت بوكي من جيبي ناوي اعطيها عشرة بس تفاجأت ببوكي فاضي .. مافيه الا البطايق )

احم اثرني مطفر .. رفعت نظري لدانة وابتسمت متورط .. مو معقول ابروح اسحب من الصرافة الحين عشان عشرة .. التفتت لمصعب

عمر = معك عشرة ؟

مصعب بسخرية = والله مدري مين اللي معه بطاقتي

عمر = اهاا بس معك والا لا ... ارجعها لك ياخي لا تخاف

زفر مصعب بطفش وطلع بوكه وعطاني عشرة وعلى طول عطيتها دانة .. وقلت عشان اشجعها

عمر = هذا لك ... وكل مااشوفك راح اعطيك بعد واشتري لك اللي تبين

حسيت بمصعب ينغزني مع كتفي والتفتت له مستغرب

عمر = وش

أشر مصعب بعيونه لحاجة بجنبي من الجهه الثانية

التفتت وشفت صديقة دانة واقفة وتطالعنا بعيون بريئة من تحت

مصعب = اخذنا خويتها ونسنيناها ... احسها تحتري وقتها نعبرها ونسلم عليها مثل ماسلمنا على دانة

سألت مصعب وعيوني على البنت

عمر = من بنته هذي .. مااعرفها ؟

مصعب = ولا انا اعرفها .. عطها عشرة مثل دانة ..

التفتت لمصعب بعصبية

عمر = شايفني جمعية خيرية اوزع

مصعب = ياخي مثل ماعطيت صديقتها عطها ... يصير بنفسها بعدين ويمكن تغار من دانة

عمر = عطها انت انا ماني معطيها

مصعب بضيق = افففففففففف ( وطلع عشرة من بوكه وعطاها البنت ونزل دانة من الكبوت وراحن يتراكضن بمرح باتجاه الدكان )

التفتت لمصعب

عمر = ترا عشرة دانة بس اللي ابرجعها لك ... العشرة الثانية ماني مرجعها

مصعب وهو معطيني ظهره = هذا اذا رجعت عشرة دانة اصلا

دخلنا البيت ولقيت امي ومها وجدي وجدتي بانتظاري

وقت صلاة العشاء

جالس بالصاله سرحان وافكر .. جدي راح يصلي .. ومصعب راح لعنيزة وجدتي راحت تصلي .. وامي بالمطبخ ومها عندي بالصاله وتطقطق بلاب توبها و انا محتار

اراسل اخت رايد والا لا ... صح والا غلط

انا بس ابي اسألها عن رايد ...

مها = عمر

بس المشكلة اخت رايد ماتعرفني وشلون بترد على رسالتي ... هي صح تعرف ان رايد ساكن ببيت ورايد بنفسه طلب رقم بيتي عشان يعطيها اخته .. بس ماتعرف ان راعي البيت انا

مها = عمر

صح .. اكتب لها اني انا اللي رايد ساكن معه عشان تتجاوب معي بالرسايل ..

مها = عمر

لا لا .. يمكن رايد يزعل اذا عرف اني راسلت اخته من وراه .. لا لا ... اشيل الفكرة من راسي احسن ..

مها بصراخ = عووووووووومممممممممررررر

رفعت راسي والتفتت لمها اللي ازعجتني من اليوم ... اعوذ بالله .. الواحد مايقدر يفكر براحته

عمر = وش تبين ... وشوله تصارخين .. اسمع

مها = واذا كنت تسمعني ليش ماترد

عمر = اففففف المهم الحين وش تبين ؟

مها بتنهيدة = شف يمكنك ناسي شي

قطبت حواجبي مستغرب ...

عمر = ناسي شي ؟ وش ؟

مها = حاول تتذكر

نزلت راسي افكر .. وحاولت اتذكر وش ناسي .. بس ما اشوف أني ناسي شي ورفعت راسي اطالع مها

عمر مستغرب = ماني ناسي شي ..

مها = ابد ؟

عمر مستغرب = شي مثل وش ؟

اخذت مها نفس وانتفخت معصبة

مها = ماكأنك ناسي الصلاة ... ابوي من زمان رايح للمسجد .. وانت قاعدلي هنا

لفيت وجهي عنها .. اصلا ماطرت الصلاة ببالي .. زفرت بضيق من حالي مع الصلاة .. متى اتغير واحافظ عليها ... احس ماني مرتاح وانا تاركها بس مدري وش اللي يمنعني اصلي

نزلت مها الاب توب عن حظنها وطلعت

قمت بصعوبة ورحت اصلي بالمجلس ورجعت للصاله ولقيتها فاضية

جلست على الكنب وانا افكر والى الحين متردد وادرس الموضوع ... ارسل والا ماارسل

شوي وجت مها .. وجلست بالارض ممده رجولها واخذت لاب توبها وحطته بحظنها وبدت تطقطق

اخذت نفس والتفتت لمدخل الصاله اشوف اذا احد بيجي والا لا ..

فرصة اكلم عمتي مدام اننا لحالنا بالصاله

قمت بصعوبة وانا ماسك بطني وجلست على الكنبة عند مها وهي جالسة تحت بالارض

احم .. وشلون ابدأ افتح معها الموضوع الحين ... كيف اقولها تكلم مريم وتسألها عن رايد

دققت بشاشة الاب توب ولقيتها تكلم بالمسن ومندمجة

فكرة الرسايل ماهي مفيدة .. صعب اراسل مريم

مالي الا مها .. احم

عمر = آآآآآ ... مها ...

تطقطق ولا ترد

عمر = مها

ولا رد

اخذت نفس ابدا بالموضوع على طول احسن

عمر = مها لك والا للذيب

مها = للذيب للذيب (وهي تشر بيدها لي يعني رح بعيد )

لفيت وجهي بضجر .. غلطان اللي يطلب من مها خدمة .. المشكلة مالي غيرها .. رجعت اناظر مها من فوق

عمر = مها تعرفين اخت رايد الكبيرة ؟

واول ماخلصت كلمتي وقفت اصابع مها عن الحركة فوق الكيبورد .. شوي والتفتت لي تطالعني من تحت

مها = اخت رايد الكبيرة ؟

عمر بحرج = ايه ... اقصد يعني تعرفينها .. عمرك كلمتيها ؟

ابتسمت مها ابتسامة جانبية بسخرية

مها = وانت وش عليك اكلمها والا ما اكلمها ... وش تبي بالضبط ؟

عمر = ابيك تسألينها عن رايد هو عند خواله والا لا ؟

قطبت مها حواجبها مستنكرة

مها = رايد الى الحين مارجع لبيتك ؟

عمر = ايه .. وابيك تسألين اخته عنه

مها = لا عمر .. صعبة اسألها ... البنت حالتها تكسر الخاطر تبيني ازيدها واخوفها على اخوها

عمر = كيف يعني تزيدينها

مها بتنهيدة = اخته حالتها صعبة .. مرة عمها مشغلتها بالبيت وكارفتها كرف .. واسمع الحريم يوم يجن عند امي يقولن عمتها بس تهاوشها قدامنا وتهينها والحين تبيني اقولها عن اخوها انه ضايع .. تبيني ازيد همها هم

عمر = نبي نشوف يمكن عند خواله

مها = مو رايد طرده عمه من اربع شهور ؟

عمر = ايه

مها بحزن = هذا بحد ذاته هم .. صعب على الاخت تشوف اخوها الصغير مطرود ومتشرد بالشوارع ولا تدري وين ارضه .. كيف عاد باخو بعمر رايد مراهق ماتعدى 15 سنة

عمر = رايد كان يزور اخته بالدس

طيرت مها عيونها متفاجأة

مها = صدق ؟

عمر = ايه ( وكملت اترجاها ) تكفين اتصلي عليها واسأليها اذا كان عند خواله والا لا

سكتت مها مترددة

مها = بس انا ماعمري كلمتها .. مرة بس شفتها بمناسبة ببيتهم وكانت تجلس بعيد عنا بعد .. ماتختلط باحد هي

ابتسمت بألم .. مثل رايد .. كان يجلس بعيد عن الشباب ولا يختلط بااحد

عمر = اطلبيها بالتلفون الحين واسأليها .. مافيها شي

مها = الحين .. بهالليل

عمر = تونا مصلين العشا .. تونا بدري .. يله مها

التفتت مها لشاشة الكمبيوتر بتردد .. ولاحظنا نافذة المسن مليان كلمات ..( وينك .. وين رحتي .. الووووو )

شهقت مها

مها = خليتني انسى خويتي .. شكلها زعلت وطلعت اوف لاااين

عمر = ترجع بعدين ( ودفعتها مع كتفها احثها ) يله مها كلمي اخت رايد الحين

نزلت مها لاب توبها عن حظنها وجلست على الكنبة بجنبي

مها = وش اقولها طيب ... اقولها وين رايد ترانا مضيعينه ؟

عمر = لا .. قولي لها امممم .. اخوياه يسألون عنه هو بالرياض والا لا ... بس

سكتت مها مترددة

عمر = يله

مها بضيق = عمر اخاف نخوف البنت على الفاضي ... واذا طلع اخوها مو عند خواله وش نقول للبنت حزتها .. والله بتخاف عليه وهي مابيدها شي .. يكفي معاملت مرة عمها معها .. ما ابي ازيد عليها

عمر = اذا طلع مو عند خواله قوليلها راح ندوره ونحصله ان شاء الله ... وبعدين هي تراها تعرف ان رايد ساكن ببيت مع واحد .. بس ماتدري ان الواحد هذا انا

مها = وانت وش تراك انها تدري

عمر = رايد مرة اخذ رقم تلفون بيتي عشان يعطيه اخته تتصل عليه اذا احتاجته

مها بشفقة = ياعمري

عمر = يله اتصلي الحين قبل يجي احد

قامت مها وجلست عند التلفون ومسكت السماعة بتردد

عمر احثها = يله

تنهدت مها بضيق وضغطت ازرار التلفون بس فجأة دخلت امي علينا وجلست بجنبي

طالعنا بعض انا ومها .. ونزلت مها السماعة وقامت وجلست بجنبي من الجهة الثانية بصمت

قربت راسي من راسها وهمست

عمر = قومي اتصلي عليها من غرفة ثانية

هزت مها راسها باية وقامت وطلعت من الصالة

انتبهت على يد امي على ركبتي وبدت تسألني عن صحتي وتعلمني وش طبخت لي ووش جهزت ووين ابنام وكل شوي تذكرني لازم ما اتحرك كثير ولا انسى علاجي ووش اسوي ووش مااسوي

اجتمعوا جدي وجدتي بالصاله وانا على اعصابي احتري مها اللي طلعت تكلم والى الحين ماجت

اخذت ربع ساعة تقريبا ومها ماجت ... كل هذا كلام بالتلفون .. ماصارت

جيت ابقوم بس منعتني امي

امي = وين بتقوم .. قل وش تبي و انا ابجيبه لك .. ما قلتلك لا تتحرك واجد

زفرت بضيق من امي و من زود خوفها علي

جدتي = اسمع كلام امك الله يصلحك .. انت طالع(ن ) من المستشفى قبل يبرا الجرح وهذا مب زين لك

عمر = الجلوس بالمستشفى يجيب المرض ... احس كل امراض الدنيا فيني وانا بهالمستشفى .. اطلع احسن وش له اقعد

جدي = اسكتن عنه ... انتن تكلمن واحد مايفهم الكلام

لفيت وجهي بطفش

عمر = اوووووه

فجأة جت مها ووقفت عن المدخل و من دون مايشوفها البقية واشرت لي بيدها يعني تعال وراحت

اخيرا ... اكيد عرفت رايد وينه

قمت واقف بس وقفتني امي بسؤالها

امي = وين ؟

التفتت لامي وحاولت اصرفها

عمر = آآآآ ... للحمام

وطلعت ورحت للمطبخ ولا لقيت مها .. رحت للغرفة الثانية ولقيتها هناك جالسة على الكنبة وتحتريني .. وبلهفة جلست بجنبها

عمر = هاااه وش قالت ؟

تنهدت مها بحزن وسكتت

عمر = وش فيك .. تكلمي

17 - 4 - 2014, 09:23 AM

* الجــزء التــاسع عــشر *

قمت واقف بس وقفتني امي بسؤالها

امي = وين ؟

التفتت لامي وحاولت اصرفها

عمر = آآآآ ... للحمام

وطلعت ورحت للمطبخ ولا لقيت مها .. رحت للغرفة الثانية ولقيتها هناك جالسة على الكنبة وتحتريني .. وبلهفة جلست بجنبها

عمر = هاااه وش قالت ؟

تنهدت مها بحزن وسكتت

عمر = وش فيك .. تكلمي

جلست مها على جنب مقابلتني

مها بضيق = شفت ... اللي خايفة منه صار .. وش استفدت الحين .. خليتني اخوف البنت على اخوها ... والله حسيت من صوتها شوي وتبكي .. ويمديها تبكي الحين .. حرام عليك .. انت ماتدري وش يجيها من عمتها

عمر = وش فيك اكلتيني بقشوري ... رايد عند خواله والا لا .. علميني وش قلتي لها ووش قالت لك

مها = انتم كذا يالعيال ماهمكم الا نفسكم وبس

عمر = اووووه بتكلمين والا وشلون .. لك ربع ساعة وانتي بالتلفون

مها بصراخ = لي ربع ساعة احاول اهديها خليتني اخوفها على اخوها وهي مابيدها شي تسويه .. ( ولفت وجهها عني و اخذت نفس تحاول تهدي نفسها وانا ساكت واطالعها )

شوي ورجعت التفتت لي

مها بضيق = اتصلت على بيتهم وطلبتها .. اخذوا شوي على بال مايعطونياها اكلمها .. المهم كلمتها و قلت لها ان ولد اخوي .. اللي هو انت ( واشرت على وجهي بكش ) يسأل عن اخوك رايد .. وطلب مني اتصل عليك اسألك عنه ... قالت لي ان اخوها ساكن مع واحد اسمه عمر .. قلت لها ايه عمر هو ولد اخوي ويسأل عن اخوك هو عند خوالك والا لأ ... ( وضربت مها يديها ببعض بقلة حيلة ) ومير يوم قلت لها هو عند خوالك والا لا وهي تخاف .. ويالهو يالهل هديتها

عمر باستغراب = ليه ؟ .. نبيها تتصل على خوالها وتسأل بس

مها بحزن = تقول خالها اليوم الصباح متصل عليها وماجاب طاري ان رايد عندهم

طيرت عيوني بصدمه

عمر = وش ... اذا كان مو عند خوالها ولا عند عمه اجل وين ؟

كملت مها متحسفة

مها بضيق = ياليتني ما اتصلت عليها .. كانت غافله البنت .. تقول خالها يوم كلمها .. كان عادي بالعكس كان يسأل وشلونها ووشلون رايد ودانه ... لو كان رايد عندهم ماسألها عن حاله .. ياليتني مااتصلت .. على بالها ان رايد معك ... الحين يمديها شايله هم اخوها ماتدري وينه ... ياعمري عليهم ... المشكلة اخوها مراهق وينخاف عليه الصراحة .. الله يعينها

مسكت راسي بين يدي بألم ... وين راح اجل .. ليش طلع من بيتي اصلا

مها بحزن = كله منك ... ليتني ماسمعت كلامك وما اتصلت عليها ( وهمست ) حاسة فيها .. اكيد هي على نار الحين

فجأة ضربتني مها على كتفي وانا ماسك راسي بين يدي وماهتميت لضربتها

مها بصراخ = يله الحين ورني وش بتسوي .. خليتنا نخوف البنت وهي غافلة .. يقالك مهتم برايد ... اصلا انت عمرك ماهتميت باحد ... حنا وحنا اهلك ما تسأل عنا .. عيال عمك وهم عيال عمك دايم متهاوش معهم ... والحين جايني تسأل عن ولد لا هو اخوك ولاهو ولد عمك .. انا البقرة اللي سمعت كلامك وطاوعتك واتصلت على اخته

قمت متضايق وطلعت من الغرفة ابتعد عن مها وصراخها علي

طلعت للحوش ورحت لمجلس الرجال وجلست على الكنب متضايق وحطيت يدي على بطني يوم حسيت بألم فضيع ..

رفعت التيشرت عن بطني ابي اشوف الخياطة بس تفاجأت بلزقة كبيرة تغطيه

مسحت بيدي على اللزقة بتفكير سارح .. يعني رايد ببريدة .. طيب وين راح .. رايد مايعرف احد هنا .. لو كان بالرياض كان تطمنا عليه .. لا لا احسن انه ماهو بالرياض .. فيه امل يرجع رايد ويسكن معي مرة ثانية .. بس وينه ... له ثلاث ايام مختفي .. من يوم دخلت المستشفى ماشفته ولا زارني ...

معقول ساكن مع احد غيري .. تنهدت .. وليه مو معقول رايد سكن معي وهو مايعرفني

بس الخوف اذا كان مع شباب يعلمونه على الشر .... خاصة ان رايد يعطي شكله ضعيف ويُستغل بسرعه

اخذت ربع ساعة متضايق وافكر وين ممكن نحصل رايد

ياربي وش اسوي

رفعت راسي لما تذكرت الشباب .. صح مالي الا الشباب يدورون عنه

طلعت جوالي من جيب البنطلون واتصلت على مشعل

شوي ورد

مشعل = هلا بعمير

عمر بضيق = وينك ؟

سكت مشعل مستغرب من سؤالي بدون مقدمات ولا سلام

مشعل مستغرب = بالبيت

عمر = تعال انا جنبك ببيت جدي

مشعل بصدمة = طلعت انت من المستشفى ؟

عمر = ايه والحين انا ببيت جدي

مشعل مستغرب = وشلون سمحلك الدكتور تطلع بدري

زفرت بضيق افففففف

عمر = مو وقته الحين .. تعال مشعل احتريت بالشارع

سكت مشعل شوي

مشعل = طيب .. يله جاي

وسكرت عنه

قمت بتعب و طلعت عند باب الشارع احتري مشعل .. وتفاجأت بدانة جالسة على عتبة باب بيتهم بجسمها الصغير والنحيف وتتفرج على العيال اللي يلعبون كورة .. وخويتها هالمرة ماهي معها

وش قصتها دانة .. دايم بالشارع .. حتى ملابسها ووجها وشعرها وسخ ومبهذله ... مافيه احد يهتم فيها والا وش السالفة ... مادري وين اختها عنها

رفعت صوتي انادي دانه وانا الوح بيدي يعني تعالي .. انتبهت لي وقامت تركض ناحيتي

جلست على عتبه باب بيت جدي .. وفتحت يدي الثنتين لها استقبلها وارتمت بحضني

ضحكت وجلستها على فخذي السليمة

عمر بابتسامة = وش اسمي انا ؟

حركت دانة اكتافها يعني مدري

عمر = افااااا توني قلت اسمي لك العصر .. مسرع تنسينه .. اسمي عمر .. قولي عمر

دانة = عمل

ضميتها لصدري وانا مستمتع بنطقها لاسمي

عمر = قولي بعد مرة ثانية عمر

كررت دانة اسمي بنطقها المميز

عمر = امممم وش اسم صديقتك اللي دايم معك ؟

دانة = ليان

عمر = وين ليان .. مااشوفها معك .. وين راحت ؟

دانة = دخلت بيتهم تاكل عسى

عمر = صح .. الحين وقت عشى .. ليه ماتدخلين انتي بعد وتاكلين عشاك

رفعت نظرها لي وبرطمت

دانة = انا لحت بس ماما تقول بعدين

قطبت حواجبي مستغرب

عمر مستغرب = ماما ؟

سكتت افكر مين تقصد بماما .. اختها يعني والا ايش

سألتها عشان استوعب

عمر = وش اسم ماما ؟

هزت دانة اكتافها بـ مدري

عمر = اسمها مريم ؟

هزت راسها بلا

قطبت حواجبي مستغرب وسكتت ..

رفعت راسي وشفت مشعل من بعيد يمشي متوجه لنا وهو يدخن بتلذذ

نزلت دانة من حظني وقمت واقف ونزلت نظري لها

عمر = دندون تبين اعطيك شي داخل البيت ؟

رافعت راسها وتطالعني ببراءة وساكته .. البنت مهملينها .. واضح ما احد بيسأل عنها .. خلني ادخلها البيت واعطيها أي شي تاكله

رفعت نظري وشفت مشعل قريب عندنا

مسكت يدها ودخلنا الحوش بس سمعت صوت مشعل يصيح فيني اول ماوصل عند الباب

مشعل بعصبية = هييييييييييييه عميران... مطلعني من البيت واخر شي تدخل اول ماتشوفني

التفتت لمشعل وانا وسط الحوش وهو عند الباب

عمر = لحظة شوي .. جايك الحين

و دخلت انا ودانه الممر الداخلي

فجأة رجع علي الالم ووقفت عن المشي لين يهدأ الوجع .. ووقفت دانة معي

حطيت يدي على بطني ... حسبي الله عليك يانايف .. وش لي انا بهذا كله

التفتت لدانة ولقيتها تطالعني ببرائة ومستغربة ليش وقفنا

ابتسمت لها بألم

عمر بتعب = بطني يعورني

دانة = لوووح حمام

بغيت اضحك بس منعت نفسي بسبب ألم بطني الفظييييع

اخذت شوي احتري الالم يخف وبعدها دخلنا الصاله انا ودانة

ولقيت جدي وجدتي وامي طاقينها سوالف ومها جالسة معهم وتطقطق بلابتوبها والسماعات باذنها وماهي معهم ( عقليا )

اول ماشافوا دانة وهم يسكتون مستغربين

امي مستغربة = مين البنيّة هذي ؟

جدتي مستغربة = عمر هذي ماهي دانة ؟

التفتت لجدتي وابتسمت

عمر بابتسامة = الا هذي دانة .. البنت شكلها جوعانة وقلت خلهاا تتعشى عندنا

التفتت لجدي ولقيته يطالعني وساكت ..

جدتي = بس اخاف يدورن عنها اهلها ومايلقونها .. ياوليدي لازم تعلمهم انها عندنا

التفتت لجدتي ورديت بسخرية

عمر = من هالناحية اتطمني مااحد بيسأل عنها

اخيرا انتبهت مها لنا ورفعت نظرها عن جهازها وصاحت اول ماشافت دانة

مها = ياااااقلبووووو

و نزلت سماعاتها ولاب توبها بسرعة وجت تركض وشالت دانة وقعدت تحبحبها

عمر = مها عطيها أي شي

وعطيتهم ظهري ابطلع من الصاله بس وقفتني امي

امي = عمر وين .. انت ماتعشيت

التفتت لامي

عمر = شوي يمة .. خويي عند الباب ..

امي بخوف = الله يصلحك .. الحركة ماهي زينه لك .. وخويك لاحق عليه ( وكملت بضجر ) ووش استفدنا من اخوياك غير المتاعب .. يكفي اللي سواه فيك اللي مايخاف الله .. ابعد عنهم ياوليدي لا تفجعني فيك

عمر = هذا مشعل ولد جارنا .. شوي يمه ماني مطول

وطلعت من الصاله .. وقبل اطلع للحوش .. سمعت مها تناديني

التفتت لها ولقيتها تمشي ناحيتي وهي شايلة دانة بين يديها ووقفت قدامي وقربت وجها من وجهي وهمست بسخرية

مها بهمس = متحسف على اللي سويته عشان كذا جبت هالبنيه عندنا يقالك تبي تصلح غلطتك

اخذت نفس معصب

عمر = اولا انا ماسويت شي عشان اصلح غلطتي ...

مها بعصبية = انتم كذا يالعيال ماتهتمون الا بنفسكم .. خليتني اتصل على اخته وهي غافلة وتقول ماسويت شي

عمر بعصبية = اصلا هي غافلة حتى عن اختها ( واشرت على دانه ) شوفي البنت وشلون شكلها .. ملابسها وسخه وشكلها مبهذل وكل وقتها بالشارع .. ماحد يسأل عنها .. وفارقي عني .. الشرهة مب عليك .. الشرهة على اللي يطلب منك خدمة

وطلعت للحوش معصب

ولقيت مشعل واقف عند بابنا ويدخن واول ماسمع خطواتي التفت لي

مشعل = هلا هلا .. ( ومد السيجارة لي ) دخن بمناسبة خروجك من المستشفى

ابتسمت .. مشعل وعبد الله دايم يحاولون فيني وبمنصور ندخن مثلهم

بس انا اللي يمنعني الخوف من امي وجدي والا عادي عندي ادخن مثلهم ومنصور نس الحالة خايف من ابوه

ابعدت يده عني

عمر = ماتملون انت وعبد الله .. اقولك مااقدر اخاف جدي يشم ريحة الدخان معي .. عاد بعدين دبرني

مشعل = كيفك انت الخسران ( وحط السيجارة بفمه ونزل نظره لبطني واشر براسه ) اشوف

عمر مستغرب = وش تشوف ؟

مشعل = ورني عمايل نايف

رفعت التيشيرت وكشفت عن بطني

مشعل باستهبال = افتح الكبوت

اخذت نفس معصب .. الحمار يقصد اللزقة اللي ببطني

عمر بعصبية = تتطنز ( وعدلت التيشيرت )

مشعل = هههههههههه امزح معك يارجال

عمر = المهم .. انا تعبان ماني فاضي لمزحك .. ( ومسكت يده ابيه يساعدني ) مشعل رايد هنا ماهو بالرياض

ناظرني مشعل بجديه

مشعل = وشلون عرفت .. بالعكس احتمال كبير انه بالرياض عند خواله ..

عمر = انا خليت الاهل يتصلون على اخته ... تقول اخته انها توها مكلمها خالها وما ذكر انه عندهم

طير مشعل عيونه فيني

مشعل بصدمة = وشلووووون .. كيف ماهو عندهم .. اجل ثلاث ايام وين رااااح ( وسحب يده مني وحطه على ذقنه يفكر ) انا الصراحة ماهتميت بموضوع رايد مرة .. كنت متوقع انه بالرياض ( والتفت لي مستغرب ) عمر تهقى رجع لبيتك وانت ماتدري ... رايد بزر اصغر حتى من اخوي ياسر اللي مايعرف يدبر شي كيف عاد رايد .. اذا كان ماهو عند عمه ولا عند خواله ولا عندك اجل وين ؟

عمر بترجي = تكفى مشعل خذ الشباب ودوروا عليه .. ودي ادور عليه بنفسي بس تعبان

مشعل = وين تبينا ندوره هذا ؟

عمر = شف .. اذا طلعتوا من الجامعة بكرة رحـ

وقاطعني مشعل يصححلي

مشعل بسخرية = وش عليك غايب لك اسبوع .. يالحبيب بكرة خميس مافيه دراسه

انتبهت

عمر = آآآآ صح .. طيب حلو فرصة .. رح انت دور عليه بالاستراحات .. وعبد الله يدور عليه بالمستشفيات .. ومنصور بمكان ثاني السوق مثلا .. المهم دوروا عليه بكل مكان

طير مشعل عيونه فيني

مشعل = يرحم امك .. تبيني انا ادور عليه بالاستراحات .. صاحي انت .. استراحات بريدة كثر النمل ... الاستراحات اكثر من السكان

عمر بضيق = اوووه مشعل .. مافيه الا الاستراحات .. تذكر يوم تجيب رايد لاستراحتنا .. جلس معنا رايد عادي وهو مايعرفنا .. اكيد الحين نفس الشي .. اكيد جالس باستراحة مع شباب مايعرفهم

قطب مشعل حواجبه يفكر بهالاحتمال

مشعل = معقول !!

حسيت بالالم رجع مرة ثانية .. حطيت يدي على بطني بألم وتعب

عمر بتعب = اتوقع .. بس الخوف انه يصير جالس مع شباب يستغلونه

سكت مشعل يفكر .. وانا احتريه يرد علي بس طول وهو ساكت ومارد .. وماني قادر اوقف اكثر

عمر بألم = هااااه .. اعتمد عليك .. قل للشباب بكرة يطلعون يدورون عليه .. وانا ابتصل بمصعب يدور عليه بعنيزة بعد

هز مشعل راسه بايه وراح وهو يكلم نفسه ويعدد الاستراحات .. شكله انلحس مخه يوم قلت له يدور بالاستراحات

معذور

دخلت الحوش وسكرت الباب ومشيت اعرج بتعب لداخل البيت .. وقفت عند الباب الداخلي وانا حاط يدي على بطني بألم

عمر = آآآه بطني ...

احس كل حركة تعتمد على عضلات البطن .. وماني قادر اتحمل اكثر

تحاملت على نفسي ورحت للصاله وانا اتساند على الجدار

وماصدقت وصلت الصاله .. على طول تمددت على اقرب كنبه

واستلقيت على ظهري و يدي على بطني و رجلي السليمة على يد الكنبة ورجلي اللي اعرج منها على الارض .. وماقدرت امنع صوتي يطلع بـ آآآه

قامت امي بفزع يوم دخلت عليهم بهالطريقة .. وجلست بثقل على ركبها بالارض قدام الكنبة

امي بخوف = عمر وش فيك ( وحطت يدها على يدي اللي فوق بطني ) يعورك شي ؟

عمر بألم = بطني يمه بطني

وعلى طول تجمعوا جدي وجدتي ومها عندي

جلس جدي على الكنبة الثانية عند راسي .. وجدتي بجنب امي واقفة.. ومها واقفة ورا امي

جدتي بخوف = الله يهديك .. انت ماطبت الى الحين وطالعـ(ن) من المستشفى قبل يسمحلك الدكتور

جدي = لا حول ولا قوة الا بالله ( وحط يده على الشاش اللي براسي ويمسح على شعري بحنان ) ليتني ماطاوعتك وطلعتك من المستشفى ..

التفتت امي لجدي

امي = عمي خلنا نرجعه للمستشفى

التفتت لامي بتعب

عمر بألم = لا يمه مابي ارجع .. شوي وبيخف العوار

مها = ملقوف والا وش يطلعك وانت ماوراك شي

وراحت واختفت عن انظاري .. شكلها جلست بنص الصاله .. ماشوفها من امي وجدتي اللي قدامي

جدي = قم ارجعك المستشفى

رفعت نظري لجدي اطالعه من تحت

عمر = مابي اروح .. خلاص .. شوي ويخف العوار .. ومب متحرك بمكاني خلاص بس مابي ارجع المستشفى ..

ضغطت امي على يدي كانها ماعجبها الكلام

حاولوا فيني شوي .. بس اصريت برايي

قامت امي بثقل بسبب الحمل وجلست على كنبه بعيدة شوي

وجدتي راحت برا الصاله وجدي الى الحين بمكانه

سكتت .. توني شفت بقية الصاله منهم

ابتسمت لا شعوريا لما شفت دانه جالسة بالارض بنص الصاله وقدامها صحن متوسط تاكل منه وتطالعني ببرائة تشوف على ايش متجمعين .. ومها جالسة بالارض بجنبها وماده رجلها

نزلت نظري لصحنها واشوف الرز متنثر بالارض من اكلها

17 - 4 - 2014, 09:23 AM

دانه = عمل

انتبهت على دانه اللي نطقت اسمي وهي تشر باصبعها الصغير علي وعيونها على مها .. كأنها تعلمها

التفتت مها لي ورجعت التفتت لدانة وهي تضحك

مها = ايه هذا عمر ابو بطن

نزلت دانه راسها لصحنها ورجعت تكمل اكلها

رايد هنا ... بيلقونه الشباب ان شاء الله .. بيرجع لبيتي .. والله ماضايقته ولا زعلته .. ليش طلع من عندي .. اذا كان عشان نايف طيب مافكر اخوك انا وش ذنبي .. يوم لقيت الشخص اللي يحسسني بمعنى الاخ يتركني بدون أي سبب .. بس شكلي اضحك على نفسي يادانة

الاخوان مايتركون بعضهم لاتفه سبب .. بس رايد مايعتبرني اخوه ... مو مثلي متعطش لكلمة اخو

حتى التفكير بالزواج نسيته يوم دخل رايد بيتي .. الله ماكتب لي اخوان بس ان شاء الله يكتب لي عيال يملون علي حياتي المملة

شكلي ابرجع افكر بالزواج مرة ثانية .. مع اني اشوفها صعبة وانا ادرس .. الله يسامحك يارايد .. وش سويت انا عشان تخليني

= عمر عمر ... الله يصلحك قم

فتحت عيوني بكسل وانا اسمع اللي يناديني وشفت امي واقفة ومنحنيه علي ويدها على صدري

التفتت لمكان دانة ولا لقيتها .. والصاله اصلا فاضية ومظلمة .. استوعبت و فركت عيني بكسل شكلي نمت وانا افكر

شفت علي بطانية .. اكيد امي لحفتنياها وانا نايم .. رفعت راسي لامي مستغرب

عمر = كم لي وانا نايم ؟

امي = الحين حنا الفجر .. قم ابي اجيب لك شي تاكله انت نمت قبل تتعشى .. قم الله يصلحك صل الفجر وانا ابروح احرر عشاك ( ووخرت البطانية عني تحثني اقوم ) يله قم صل انت متأخر

جلست والتفتت لمكان دانة ثم رفعت راسي لامي

عمر = وين دانه ؟

امي = رجعها جدك لبيتها بعد ماتعشت .. خفنا يدورون عليها اهلها وهي عندنا

ابتسمت بسخرية بس ماعلقت وقمت وطلعت من الصاله

الخميس

المغرب

جالس بالصاله .. ومعي جوالي اكتب رساله ابي ارسلها لمشعلوه .. الحمار مارد علي وش سوا .. علم الشباب والا ماعلمهم .. طلعوا يدورون رايد والا ماطلعوا

وانا اليوم ماطلعت من البيت ابد ... الجرح ببطني متعبني .. وامي صايرة مثل الرادار علي ... أي حركة اسويها تحذرني منها

بجنبي مها تطقطق بالاب توب وامي وجدتي مندمجات بالسوالف

( مشيعيل وش سويت
علمت الشباب ؟ )
وضغطت زر الارسال لرقم مشعل ونزلت جوالي بجنبي احتري رده والتفتت اطالع لاب توب مها اتفرج على اللي تشوفه

مها = عمر شف شف .. مقطع رهييييب ( ونزلت السماعات من اذنها ومدته علي )

زفرت بضيق من مها .. هذا ثالث مقطع توريني .. اذتني بمقاطعها .. بالبداية حسبتها توريني شكل تصميم المقاطع والصور اللي فيه .. طلع تبي اسمع نفس المقاطع .. وكلها مقاطع عن سوء الخاتمة وحسنها او مقطع عن بر الوالدين وماني عارف ايش

سمعت المقطع بملل لين خلص ونزلت السماعات وهزيت راسي لمها مجامله

عمر = حلو

مها = سمعت القصه اللي قالها الشيخ ؟

اخذت جوالي وانا اهز راسي بايه .. سمعت بالمقطع ثلاث قصص على ما اعتقد ومادري أي قصه تقصد مها بس قلت ايه تسليك لها عشان تسكت عني

فتحت انشاء رساله و كتبت رساله لمصعب اطلب منه يدور رايد عندهم بعنيزة

دقايق وجتني رساله رد من مصعب

( وش يجيبه لعنيزة ؟ )

رديت عليه برساله

( مجرد احتمال .. قلت لخوياي يدورون عليه ببريدة
وابيك تدوره انت بعنيزة )

شوي وجاني رد

( اكيد بالرياض عند خواله )

رديت عليه

( لا
انت سو اللي قلتلك عليه
واذا شفتك علمتك بكل شي )

رد علي برد احرجني الصراحة

( ماطلبت .. تامر امر ياولد العم )

تنهدت من اسلوبه معي .. على كثر ما اسوي فيه .. مايزعل

مادري ماعنده احساس هذا والا وش قصته

= انتم كذاااااااااا ... النتايج الزينة على طوول تنسب للرياجيل والنتايج الشينة تنسب للحريم

التفتت مستغرب لمها اللي تكلم بعصبية مع امي وجدتي

امي = يابنت الحلال هذا اللي اشوفه

حاولت اعرف بدون ماسأل واركز معهم احاول اعرف على ايش يتناقشون

جدتي توجه كلامها لمها المعصبة

جدتي = اخوك عبد العزيز رجال وعادل بين حريمه عشان كذا نشوف ام عمر وام معاذ مثل الاخوات .. الله لا يغير عليهم

مها بعصبية = لاااااااااا ... الحين ام عمر وام معاذ هن طيبات مع بعض .. المدح وشوله تنسبونه لعبد العزيز .. عااااد شرط لو نشوف ضراير قشرات مع بعض السب بيصير عليهن هن .. وزوجهن بيقولون عنه الناس مسكين ويكسر الخاطر .. واذا صارن الضراير حليلات مع بعض .. قالوا الناس والله زوجهن والنعم فيه مسيطر على الوضع .. شي يقهر الحين هن اللي محترمات بعضهن وصايرات مثل السمن على العسل وش دخل المدح يصير للزوج

امي = الله يهديك يامها ... عبد العزيز ماهو مقصر علي بـ

وماكملت امي كلامها من مها وصوتها العالي

مها بعصبية = ماقلنا شي .. بس طيبكم مع بعض وشوله تمدحون رجالكم فيه .. ام معاذ طيبه معك وانتي طيبه معها ومع بناتها ابي اعرف اسلوبكن مع بعض وش دخل عبد العزيز فيه .. عشان هالمدح هذا كله ... مدري ليه المجتمع العربي مايحب يمدح الحريم ابد .. أي شي زين نسبوه للرجال حتى لو مالهم دخل فيه

اخذت الاب توب من حضن مها وحطيته بحضني وقعدت اطقطق و مطنش نقاشهم

شوي ودخل علينا جدي الصاله وجلس بجنب امي و قبالي انا ومها

جدي = عبد العزيز واهله بيتعشون عندنا الليلة يبون يتحمدونلنا على سلامة عمر ( والتفت لي يسألني ) عمر معاذ مازارك ابد ؟

نزلت نظري للاب توب وهزيت راسي بلا

عمر = لا .. ماشفته

سمعت همسة جدي

جدي = لا حول ولا قوة الا بالله .. الله يهديه هالولد متصلن عليه وانت بالمستشفى ابيه يزورك .. بس ما دري وش اقول .. ماكأنكم عيال عم

رفعت راسي ابرد على جدي بس سبقتني مها

مها بسخرية = ترا عمر ومعاذ مايتدانون تربية امهاتهم .. وسعود ومصعب هذا حليلهم تربية ابوهم

ضحكت امي وجدتي على نغزة مها بالكلام

ربع ساعة واذن لصلاة العشا

وهالمرة ناوي اروح للمسجد عذر اطلع من البيت وامر مشعل على طريقي بما ان بيتهم جار المسجد

وطبعا ولأن الصلاة ماهي اكبر همي رحت للمسجد والامام يصلي

.. صليت الركعات الاخيرة معهم بصعوبة وعلى طول طلعت من المسجد وانا اعرج ومريت بيت مشعل واتصلت عليه معصب منه ومن تطنيشه لي

شوي وجاني رده

مشعل = الووووووه

عمر بعصبية = اطلع الحين انا عند بابكم ( وسكرت بوجهه )

التفتت لباب المسجد اللي قدامنا وقعدت اتفرج على الرجال وهم يطلعون منه ..

طلع من المسجد ياسر اخو مشعل الصغير تقريبا باول او ثاني ثانوي

سلمت عليه وطلبت منه يشوفلي مشعل وينه

بس فجأة طلع مشعل لنا وعليه ملابسه الداخليه ..

مشعل = هلا هلا بعميران

التفتت لمشعل معصب

عمر بعصبية = ياحمار ليه مارديت على رسالتي ..

التفت مشعل لياسر

مشعل = ياسر رح هات مفتاح سيارتي

ياسر = بتروح مشوار وانت كذا ؟

مشعل = ماني رايح بس بنجلس بالسيارة شوي ... رح هات المفتاح اركض

راح ياسر يركض داخل بيتهم

التفتت لمشعل

عمر = ياخي قلي وش سويت بموضوع رايد .. علمت الشباب ؟ ارسلـ

وقطع كلامي وهو يجرني لسيارته ووقفنا عند باب الراكب

مشعل = يااخي وش فيك معصب ..

جا ياسر وطل علينا وهو عند بابهم وحذف المفتاح على اخوه ودخل

فتح مشعل باب الراكب واشر لي يعني تفضل

مشعل = اركب

عمر بعصبية = ماني راكب عمي واهله بيجون عندنا الحين لازم ارجع للبيت .. ليش مارديت علي .. وش سويتوا ؟

مشعل = اول شي ( ودخل جسمه داخل السيارة من عند باب الراكب وفتح الدرج وطلع منه بكت الدخان وطلع سيجارة منها ومدها علي ) خذ روّق وهد اعصابك

وعلى حظي وحظ مشعل .. طلع جدي صدفة من باب المسجد اللي قبالنا بالوقت اللي مشعل ماد يده علي بالسيجارة .. التفتت لجدي اللي واقف عند باب المسجد ويطالعني بنظراته الحازمة وهالمرة اكثر حده

التفت مشعل للمكان اللي التفتت له واول ماطاحت عينه على جدي خاف

مشعل مرتبك = احم ( وحط يده اللي فيها السيجارة ورا ظهره وهمس بصوت مايسمعه الا اللي بجنبه ) هلا هلا ابو فهد .. تبي وحده ؟

بغيت اضحك عليه وانا اطالع جدي بخوف .. ودخلت يدي لا شعوريا بجيوب بنطلوني .. احتري ردة فعله ونهاية هالنظرات

طالعني جدي معصب ولا خلصني من نظراته الا رجال طلع من المسجد وسلم على جدي اللي واقف قدام الباب

سلم عليه جدي وعطاني نظرة وراح معه يمشون لبيوتهم .. زفرت بضيق وش يخلصني منه الحين ... التفتت لمشعل نكمل سالفتنا

عمر = مااااارديت علي .. وش سويت

التفت مشعل لي وهو يحط السيجارة بفمه

مشعل = ماسوينا شي .. علمت عبد الله ومنصور واتفقنا بكرة الجمعة نطلع وندوره

عمر = وين بتدورون بالضبط ؟

مشعل = عبد الله ومنصور عليهم الاستراحات وانا ابدور عليه عند سوق الخضار وسوق البهايم واذا مالقيته هناك ابدور بالمستشفيات

تنهدت ... يعني ماسووا شي اليوم وانا جالس على اعصابي

عمر بضيق = طيب ليه مارديت على رسالتي ؟

مشعل = ماعندي رصيد

هزيت راسي بايه واستاذنت من مشعل وعطيته ظهري ابرجع

بس وقفني مشعل

مشعل = لحظة عمر قبل انسى

التفتت له بصمت

مشعل = جاني خبر ان سعد طلع

طيرت عيوني متفاجئ

عمر = طلعوه ؟

مشعل = ايه .. قالولي الشباب طلع

تنهدت ماعندي كلام اقوله .. هزيت راسي بايه ورجعت البيت وانا افكر ...

مشكلة سعد ونايف بسيطة بس نايف كبرها وهي صغيره .. خوفه من الهيئة خلاه يهج ومايسلم نفسه لهم .. لو انه متعوذ من الشيطان من البداية كان يمديه طالع ...
الحين مو بس الهيئة تدوره حتى الشرطة تدور عليه وهاج برا بريدة وحالته حاله بس وين يروح مصيره يطيح بيديهم

بس يااارب الشباب يلقون رايد .. اسبوع تقريبا مادري وينه ... وين اختفى هذا ... ماله مكان ببريدة الا بيتي

وقفت عن المشي وانا افكر .. صح يمكن رجع لبيتي وانا مادري ... ليه لا ... انا بعد الحادث مادخلت بيتي ابد .. ابتسمت متأمل بهالاحتمال وان شاء الله يكون احتمالي بمحله

طلعت جوالي من جيبي واتصلت على احمد

واول مادخلت حارتنا رد علي

احمد = هلا عمر

عمر = هلا بك .. كيف الحال احمد

احمد = الحمد الله بخير ونعمه .. وشلونك الحين .. ان شاء الله طيب .. ان شاء الله قريب يخرجونك ؟

عمر = الحمد الله تمام .. انا طلعت والحين انا ببيت جدي

احمد مستغرب = صدق .. ماشاء الله احسهم طلعوك بسرعة والا انا غلطان

عمر = طلعت على مسؤوليتي ( وكملت عشان ادخل بالموضوع ) اقول احمد .. ابسألك ماشفت رايد .. قلت يمكن رجع لبيتي .. مادري ماشفته عندكم بالحارة ؟

احمد = لا ماشفته .. والصراحة انا مستغرب بس قلت يمكن راح لاحد يعرفه غيرك

سكتت متحطم

يااااربي ويييين رااااح هذا

انتبهت على سيارة عمي السوبربان واقفة عند بيت جدي

احمد = عمر معي ؟

عمر بتنهيدة = ايوة معك ... آآآ .. طيب مشكور احمد مع السلامة

احمد = ياهلا مع السلامة

سكرت عن احمد وانا مستغرب وين اختفى رايد

وقفت بمكاني منصدم من اللي قدامي .. توني انتبه على دانه .. جالسة عند عتبة بابهم وشكلها تبكي وتمسح دموعها بانكسار ومجتمعين عليها بنتين صغيرات .. وحدة صديقتها والثانية شكلها باولى ابتدائي او ثاني

مشيت متوجه لهن ووقفت قبالهن وباب بيتهم مفتوح على الاخر

ابتعدت عن واجهة الباب ووقفت على جنب وانا اسمع البنت اللي شكلها باولى ابتدائي تمسح على شعر دانة وتحاول تسكتها

= خلاص دانة تعالي نلعب

عمر = دندون ليش تبكين ؟

ماردت علي تشاهق وتمسح دموعها بيديها الصغيره

حطيت يدي على بطني وانحنيت بشويش ومسكت يدها ووقفتها

عمر = تعالي عندي دندون وعلميني وش فيك

ابعدنا عن باب بيتهم شوي ووقفنا عند احد السيارات والبنيات معنا .. ودي اشيلها واحطها على الكبوت بس مااقدر .. مسحت على شعرها وانا واقف احثها على الكلام

عمر = الحلوة ليش تبكي .. قوليلي وانا اضربه لك

تكلمت بكلمات مافهمتها ولفت يديها حولين رجلي وغطت وجهها بفخذي تبكي .. حسب طولها بالنسبة لي

التفتت لبيت جدي .. افففف الناس يحتروني وانا هنا

نزلت نظري للبنات اسألهن

عمر = وش فيها ؟

تكلمت البنت اللي باولى ابتدائي

= امي ضربتها ..

قطبت حواجبي مستغرب .. امها ؟

عمر مستغرب = ليه ضربتها ؟

= هي كسرت لمبتنا

عمر مستغرب = وانتي وين بيتكم ؟

اشرت البنت على باب بيت عم رايد المفتوح

= هذا بيتنا

اهاا الحين فهمت ... شكل هالبنت بنت عم دانة ورايد

سألتها وانا امسح على شعر دانة

عمر = وش اسمك ؟

= شهد

عمر = اخوك اسمه بندر ؟

شهد = ايه

سكتت وانا اطالع شهد .. امك مستقويه على هالضعيفة اجل ..

وابتسمت بنذاله وانا اطالع شهد وافكر كيف اخلي امها تعرف كيف تمد يدها على دندون مرة ثانية

تلفتت يمين ويسار اشوف اذا فيه احد يشوفني والا لا

وماشفت الا بزارين هنا وهناك وكلن لاهي ورجعت التفت لشهد

مديت يدي فوق وبحركة سريعه فاجأتها .. ضربتها على خدها كف

شهقت شهد بصدمه .. وحطت يدها على خدها وباقل من الثانية تجمعت الدموع بعيونها وبكت وهي تطالعني بخوف

مسكت اذنها احفظها كلامي

عمر = روحي ياحلوة وقولي لامك اذا كنتي قويه فيه اللي اقوى منك ( ولويت اذنها بشويش ) وش تقولين ؟

صرخت شهد من اذنها وهي تبكي

ابتعدت صديقة دانة عني خايفة مني .. اما دانة ابعدت وجهها عن فخذي وقعدت تطالع بنت عمها وتطالعني مستغربة

عمر = هاااه وش تقولين لامك ؟

ردت علي شهد ودموعها اربع اربع ..

شهد وهي تبكي = اقول انت قوي

اممممم مو هذا الرد اللي ابيه يس بعد هذا رد حلو .. يفي بالغرض

تركت اذنها

عمر = يله انقلعي

دخلت البنت تركض وهي تبكي

التفتت لدانة ومسحت على شعرها

عمر = خلاص دندون اذا ضربتك الخبلة اللي داخل علميني

رافعة راسها وتطالعني بعيون دامعة .. ابتسمت لها ودي اضمها لصدري بس صحتي الحين ماتسمح اشيلها .. ان شاء الله مرة ثانية

تركها ورحت لبيت جدي .. اذا جا عم رايد فازع عشان بنته مافيه احلى من الكذب اصرفه فيها ومثل مايكذب على الشيبان اكذب عليه ..

( واشرت على نفسي ) ضربت البنت انا ؟ .. وابتسمت بنذاله .. ماضربت احد .. اتحداه يثبت

فجأة لقيت باب بيت جدي مسكر .. وعلى طول تذكر بنات عمي .. اكيد موجودات والا وشوله سكروا الباب الا عشان ما ادخل فجأة عليهم

اففففف .. من زينهن عااااد ... ضربت الباب .. دقايق و طلعت لي مها

مها بفرح =هلا عمور ... ماشاء الله هالمرة رايح للمسجد ؟

دخلت الحوش وانا اكلمها وهي تسكر الباب وراي

عمر = مليت من جلسة البيت ومنها مريت على خويي ابيه بشغله

جت مها ووقفت قدامي معصبة

مها = مالت عليك والله مالت عليك .. يعني رايح للمسجد مو لله ؟

سكتت ومارديت عليها .. احم وش اقول بالله .. وش اللي خلاني اصارحها انا الحين .. لساني يبيله قص

مها بعصبية = يالتيس لا تدخل لين انبه البنات ( وعطتني ظهرها وهي تكلم نفسها بعصبية ) فرحت على بالي المقاطع جابت نتيجه .... مالت عليييك والله

وقفت احتري يأذنون لي بالدخول .. انا بنفسي متضايق من حالي مع الصلاة تجي تزيد علي هذي

جاني سعود وسلم علي ودخلنا الصاله وهو يسالني عن صحتي

ولقيت الكل مجتمعين بالصالة الا مها واخوات معاذ

جالسين بالارض ومافيه الا الدلال بالنص

جلس سعود بالارض بجنب مصعب وسحب صينية الدلال وبدا يصب للجالسين

التفتت لجدي ولقيته يطالعني وعلى طول تذكرت سيجارة مشعل ونظرته لي عند المسجد .. لفيت وجهي عنه و سلمت على عمي ومرة عمي .. ولما وصلت عند معاذ ..

وقف وصافحته وسلم علي وهمس باذني وخدي على خده

معاذ بهمس = ابصم بالعشرة ان اللي طاعنك معذور

ابعدت وجهي عن وجهه اطالعه وحاولت ابتسم اغيظه وهمست

عمر بهمس = ايه طبعا معذور .. نفس عذري وانا ماخذ سيارتك لي اكثر من ثلاث اسابيع .. وانت جالس بدون سيارة وبدون مكافأة الجامعة ( وكملت اغيظه ) افااا تشحد من ابوك ؟

سحب معاذ يده من يدي بغيض

معاذ بهمس = سيارتي بترجعلي غصب عنك.. ما اكون معاذ اذا مارجعتها بكرة وتشوف ياعمير

قربت وجهي من وجهه وهمست بابتسامة احاول اغيظه

عمر = تبطي عظم

مارد علي يطالعني ومنقهر .. حسيت الود وده يلفعني باي شي بس ماسك نفسه قدام الجميع

ابعدت وجهي عن وجهه وعطيته ظهري بتعالي وجلست بجنب امي

امي جالسه بالارض وانا على الكنبة .. رفعت راسي لمعاذ ولقيته واقف الى الحين بنص الصاله ويطالعني بقهر وساكت

تكلم مصعب اللي حس باخوه

مصعب وهو ياخذ الدله من يد سعود = معاذ خذ فنجالك ووسع صدرك وماعليك من احد ( والتفت لي )

رجع معاذ لمكانه بجنب ابوه وجلس واخذ الفنجان من مصعب

طالعت مصعب وهو يصب للبقية .. نزلت راسي بحزن .. ياحظك يامعاذ لك اخو حس فيك على طول

شي طبيعي يوقف معك ويحس فيك .. مع انك انت اللي تحرشت فيني بالبداية .. بس مالي اخو مثلك يحس فيني

واحد بس حسيت انه مثل اخوي بس كنت اضحك على نفسي وطلع من بيتي لأتفه سبب

انتبهت من سرحاني من دخلت مها ومعها صينية كبيرة فيها حلا وفطاير

واول مانزلتهم بالارض .. اعتدلت واقفة وحطت يديها على خصرها ووجهت كلامها لعمي عبد العزيز

مها = وشلوووون الحين ابي اجلس معكم وابي اجلس مع البنات

عمي عبد العزيز = خليهن يتغطن ويجن .. عمر ولد عمهن ماهو غريب

التفتت مها لمعاذ ورفعت خشمها بانتصار

مها = ايه كذا

وطلعت برا الصاله .. دقايق وجن اخوات معاذ بعباياتهن وجلسن مستحيات

وبدت السهره بسلام بدون مااتبادل مع معاذ أي كلام

نزلت راسي بتفكير سارح ... مدري .. احس بتعب وبالي ابد ماهو معهم

من جهه الاصابة ببطني متعبتني ومن جهه رايد اللي مادري وينه ومن جهه وقفت مصعب مع اخوه بكل شي .. ليه يضحك علي اجل ويحاول يتقرب مني اذا كان بكل شي يوقف مع معاذ .. شكله يطبق ( انا واخوي على ولد عمي .. انا وولد عمي على الغريب )
غمضت عيوني بقهر لما تذكرت حواري مع مصعب ببيتي وهو يدافع عن معاذ

))))))))))((((((((((
عمر = لا تطول صوتك علي ... شف اسلوب معاذ معي ثم تعال كلمني .. ( والتفتت له ) عمرك وقفت بوجه اخوك عشاني ؟
مصعب بتحدي = هذا انت قلتها اخوي
طالعته منجرح بس تكمتها بصدري ( والتفتت للتلفزيون ) صح معه حق اخوه .. انا وحيد واببقى طول عمري وحيد
مصعب = معاذ على الاقل مايغلط على احد وماهو مغرور مثلك
ابتسمت بسخرية
عمر = هه صح مايغلط .. لدرجة اني ما انقلبت بسيارتي ابد
مصعب = ذيك المرة كانت مزحة وماكان يقصد ... وفوق هذا انت حشرتني مع معاذ واخذت مكافئتي وانا مالي ذنب ( وسكت شوي ) عمر انا ولد عمك وامد يدي لك ومستعد افزعلك للي ضربك او لأي شي تبيه .. بس لا تردني
)))))))))))(((((((((((((

رفعت راسي وطالعت مصعب اللي يسولف مع مها ...

اسلوب التقرب والتلزق مايمشي علي يامصعب .. وسالفة سيارة معاذ والله لاطولها وهي قصيرة .. عناد فيكم

ونشوف من اللي يمشي كلامه بكرة .. انا والا معاذ

بعد العشا وانا واقف عند المغاسل وعمي بجنبي بالمغسلة الثاني

عمي = عمر .. عمك ابو سامي يسلم عليك ويتحمدلك بالسلامة ويتعذر منك مشغول بجدة ولا يقدر يجي يسلم عليك

عمر = الله يسلمه .. مايحتاج يتعب نفسه .. انا ابتصل عليه بعدين

هز عمي راسه بايه ونشف يديه وراح

طلعت من المغاسل بس سد طريقي مصعب بمرح

مصعب = هاااه ياولد العم ماقلتلي وش سالفة رايد .. وليه توقعت انه بيصير بعنيزة ؟

طالعته بصمت شوي وانا احس اني متحطم من كل شي

من رايد اللي تركني ومن مصعب اللي يبدي اخوه علي

دفعته بيدي على ورا عشان امر

عمر بضيق = تبي تدوره دوره وانت ساكت .. ماتبي فارق .. ماني محتاجك

ومريت بجنبه بس هو مسكني مع يدي يوقفني

مصعب مستغرب = طالع .. مو انت قلتلي برساله جوال انك بتعلمني بسالفة رايد اذا شفتني

سحبت يدي منه وعطيته ظهري ومشيت عنه مطنشه

قلتلك اسلوب التقرب والتلزق مايمشي علي

رجعت الصاله ومالقيت مكان فاضي الا بجنب جدي اللي جالس على الكنبة وجلست بجنبه .. وعلى طول استلمني

التفت لي وقعد يكلمني بصوت بيني وبينه

جدي = وش تبي من مشعل ؟

تأففت ورديت عليه بضيق

عمر = مابيني وبينه شي .. خويي

جدي بشك = انت تدخن ؟

عمر بملل = لا والله ياجدي ماادخن ( والتفتت له متضايق من هالتحقيقات اللي كل يوم ) عمرك شميته معي ؟

لف جدي وجهه عني وسكت بس شوي ورجع التفت لي

جدي = صح قبل انسى .. ابو بندر يسأل عن كرت عيال اخوه

تفاجأت

عمر = وش قلتله ؟

جدي بتنهيده = ياوليدي ابو بندر بعد الحادث اللي صارلك درا عن كل شي وعلمته ان رايد كان ساكن معك

تنهدت و سكتت

مو مهم .. درا والا مادرا هالشايب .. بس المشكلة الحين مالي عذر يصير الكرت معي .. نزلت راسي افكر مدري وش نرد عليه بخصوص الكرت

هالكرت بصعوبة طلعناه من عينه .. اقوم ارجعه له ورايد اكيد يحتاجه

جدي = هاه ياوليدي وش اقوله .. بتعطيني الكرت ارجعه له والا وشلون ؟

حطيت يدي على ذقني افكر .. ان شاء الله الشباب بيلقون رايد .. مابي ارجع الكرت لهالشيبة .. الكلب مابيه يستفيد من راتب رايد ودانه .. بس وشلون ؟

رفعت راسي ولقيت مصعب جالس قبالي و يطالعني وهو ساكت .. لفيت وجهي لجدي

عمر = عطيته رايد

طير جدي عيونه فيني مستغرب = وشلون ؟ .. متى عطيته رايد ماهو انت تــ

قاطعته

عمر = خلاص قله الكرت مع رايد وخل ابو بندر يبلط البحر ( وكملت بتطنز ) يمكن يتحمس عشان الكرت ويدور رايد معنا هههههههههه

بس جدي ماضحك وقعد يطالعني مستغرب وكأنه موعاجبه الكلام

= عمر شوي ابيك

التفتت لمصدر الصوت ولقيت معاذ واقف بنص الصاله

قال كلمته وطلع برا الصاله يحتريني

قطبت حواجبي مستغرب والتفتت لمصعب اللي قبالي .. احاول اعرف وش يبي بس هو قام على طول وطلع ورا معاذ

المواضيع المتشابهه لموضوع: يمسح الدمعه بشكوى للكاتبه هدوئي لموضوع: يمسح الدمعه بشكوى للكاتبه هدوئي
الموضوع	كاتب الموضوع	المنتدى	مشاركات	آخر مشاركة
خاطره اما للجنة ثمن للكاتبه	همسة الشوق	همس الصوتيات و المرئيات الإسلامية	6	19 - 8 - 2015 01:16 PM
اصبح هدوئي سرا من اسراري	إنسااانة عنيدة	همس موبايلات الاندرويد	8	23 - 1 - 2014 04:39 AM
تنكس بنوتته هيوني	أحساس أنثي	همس الشعر و الشيلات الصوتيه	8	27 - 8 - 2012 05:04 AM
حبيبتي انتي تسكني في اعماقي	عاشق الرومانسية مودي	همس عذب الكلام والخواطر المنقوله	6	4 - 9 - 2011 10:34 PM
انا كلي في هدوئي وفي جنوني وفي صفاتي معجزة	غموض انثى	همس للترحيب بالاعضاء الجدد والتعارف	6	21 - 11 - 2010 08:50 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

يمسح الدمعه بشكوى للكاتبه هدوئي

همس للقصص وحكايات وروايات