وان علّمتني الفاتنه وشلون اسير ابلا بصر
علّمْتَها الفنجال وشلون اتحدّى واشربه

وعلّمْتَها إنّي كذا طال الزمن ولاّ قصر
وان اعذب الحب اصدقه وان اعذب الشعر اكذبه

بانت نجوم الصبح واللي في عيوني من عَصر
ما هوب دمعٍ لا تضايقت آتنهّتْ واسكبه

لا والله الا حلم شيخٍ عن طموحه ما قِصَر
لو قصّرت سود الليالي من يمينه وشْنبه

وانا لو اني ما تعلّمت الهزيمه والنصر
ما كان ذقت من الهوى القتّال مرّه واعذبه

شاعر وعصري فاتني واعيش في أغرب عصر
لا الوقت وقتي والزمن ما بيني وبينه شبه

لكن هنوفٍ مثّلتْ دور العزيزه في مصر
قدّتْ قميصي واسرفت في وصلها قبل انتبه

يوم انْتبَهْتْ استشهدت ضدّي بحرّاس وقصر
قلت ارحمي عزيز قومٍ ذل وارخى منكبه

ماني نبي الله اقاوم حسن خصرك لا انهصر
انا بشر عبدٍ ضعيف وكل برقٍ يجذبه

قالت وهي تُوّي تثنّى كنْ ما فيها خصر
الشعر يا ضيدان ورث جدود ولاّ موهبه

قلت الشعر سحرٍ يسخّر لي القلوب ويختصر
عمر المسافات الطويله والسنين المجدبه

والحب شيٍ لو حصرته في ضلوعي ما انحصر
يطغي على حدْب المحاني لين ابيحه واكتبه

وان علّمتني الفاتنه وشلون اسير ابلا بصر
علّمْتَها الفنجال وشلون اتحدّى واشربه

وعلّمْتَها إنّي كذا طال الزمن ولاّ قصر
وان اعذب الحب اصدقه وان اعذب الشعر اكذبه

ضيدان بن قضعان