\r\n
\r\n
\r\nالموعد اللي عليه الشوق وداني
\r\nياحيه وحي منهو فيه. لاقاني
\r\n
\r\nابطيت عنه وانا داري به وخابر
\r\nاني مثل ماتباطيته تباطاني
\r\n
\r\nاسابق الوقت والموعد على شانه
\r\nمشتاق والشوق سراني وعناني
\r\n
\r\nوصلت للموعد الراقي قبل وقته
\r\nودي اشوفه واشوف ايشلون يلقاني
\r\n
\r\nولقيته من الحنين وصادق اللهفه
\r\nتسابق الريح خطواته على شاني
\r\n
\r\nوضميته لصدري ودمعي نزل مني
\r\nيامجمل الشوق لامن صار متفاني
\r\n
\r\nوحارت حروفي وعيني بس تناظرله
\r\nومن الخجل ماعرفت اقول وش جاني
\r\n
\r\nوحاولت ارتب كلامي وانطق حروفي
\r\nوذكرتلي بيت قلته قبل يجفاني
\r\n
\r\nارحب هلابك عساك بخير وشلونك
\r\nيالغايب اللي خذيت القلب واشجاني
\r\n
\r\nتعال وقرب وسولفلي عن اخبارك
\r\nوعن غيبتك وينها يالقاطع الجاني
\r\n
\r\nماهزك الشوق محدن جابلي طاري
\r\nماسمعوك اخر ابياتي وقيفاني
\r\n
\r\nمن دونك الناس ماتسوى ولا حاجه
\r\nماغيرك اللي سكن قلبي وشرياني
\r\n
\r\nفي حبك انا غديت العاشق الهايم
\r\nانا جنون الهوى ياكل وجداني
\r\n
\r\nتعال ودي عن غيابك اسولفلك
\r\nوشلون عشته وكيف البعد شقاني
\r\n
\r\nكني غريبن يعيش الغربه المره
\r\nيقضي الوقت والايام وحداني
\r\n
\r\nولا يتيمن نزل دمعه عشان امه
\r\nفاقد ومن جور ماهو فاقد يعاني
\r\n
\r\nاساير الوقت لو هو دوم يهزمني
\r\nولو ثقل حملي تشيله عني امتاني
\r\n
\r\nيكسرني الشوق لامن غبت عن عيني
\r\nوادورك واعرف انك ساكن اجفاني
\r\n
\r\nكتبت فيك القصيد اللي يسريهم
\r\nالين صرت الحزين بواقع احزاني
\r\n
\r\nواليوم ياحيك وياحي هالموعد
\r\nياللي خذيت الغرام وصادق اشجاني
\r\n
\r\n