رواية جنوبية برت حالي ولا دري وين ديرتها

29 - 5 - 2021, 10:15 AM

البارت 56

حست انها تورطت كيف تكشف وهي لمحت عيال عمها اربعه موجودين .!
علي وهو يشوف امه كيف حاضنه بنت اخوه وماسكه غطوتها تبيها تكشف تحرك وهو يسحب أمه : يمه الله يهديش بشويش هوني على روحش وعلى البنت
وهو يسحبها ويمسك يدها وبيده الثانية قرب من اشواق وهو يحضنها
وبحب : مرحبا مرحبا ببنت الغالي مرحبا.!
أشواق وكل وجع الدنيا اللي حسته راح في حضن جدتها وحضن عمها كان ودها تقول وينكم عنا من زمان بادلت عمها السلام : المرحب باقي فديتك جعلك سالم
فكها عمها علي وهو يأشر لها على الرجل اللي كان واقف من دخلت وكان خايف من ردت فعل ابوه قال لها سلمي على جدش محمد يااشواق.
أشواق وقفت وهي تناظر في جدها ملامح ابوها الحاده بكل شي يشبهون ابوها كلهم كل واحد فيهم مااخذ شي من ابوها حتى الكلب ولد عمها ابو لسان طويل قربت من جدها وهي توقف قدامه تحاول تبوس راسه ماعمرها سلمت على رجل الحركه الغير متوقعه من جدها انه حضنها زرعها في صدره رغم انها تشوفه كبير في السن إلا انه واضح انه يتمتع بصحه ممتازة .!
حضنها وهو مايدري ليش حضنها من دخلت وهو يحس قلبه بينفطر من الفرحه ايه بالله فرحان يحس كأنه احمد في حضنه اللي ماعمره حضنه .،!
اشواق وهي تفك يد جدها وتبوسها وتبوس راسه .! وترجع لورا وهي خايفة انها تطيح مرتبكه ولا تدري ايش تقول .!
اشواق وهي تلف بوجها ناحية عيال عمها وبصوت عادي : يامرحبا يامرحبا بعيال عمي واخواني الله يحييكم .!
ماانتظرت تسمع منهم اي رد لفت وهي تسمع جدتها تقول: تعالي اشواق تعالي جنبي اتنشدش عنش وعن اخواتش وينهم ابغى اسلم عليهم.!
أشواق وهي تاخذ ثلاجة القهوة واليد الثانية فناجيل وتتقدم من جدها قالت : لبيه ياجده ابشري بي خليني اقهويكم وابشري واخواتي شوي وبيجونش مدت الفنجال لجدها وهي تقول : سم ياجد
شافته ويده ترجف وهو ياخذ الفنجال وساكت .!
علي وهو يناظر في عياله اللي كل واحد يحاول يشغل نفسه بجواله ولا احد فيهم رافع عيونه لهم وقف وهو يمسك الثلاجه من يد أشواق بحب: والله مايقهوي إلا انا انتي اجلسي هنا جنب جدتش تبغااش شفقانه عليش انتِ واخواتش .
جلست أشواق بين جدها وجدتها وهي تشوف جدتها تمسك يدها : بشريني عنكم مالله قضى فيكم بعد ابوش.
أشواق وهي تتمنى انها تتكلم او تبكي على الأقل تحسد اخواتها انهم يبكون يفضفضون مسكت يد جدتها وهي ترفعها وتبوسها : بخير جعلش في خير والحمدلله .
مسكها جدها بيدها الثانية وهو يقول بوجع : اوجعتكم الدنيا عقب ابوش.
أشواق وعلى غير المتوقع منها سندت راسها على كتف جدها اللي تمنت انه كان سند لهم من زمان : اوجعتنا الدنيا ياجد وحنا في كل رمضان وعيد مجلسنا هذا خالي عقب ابوي اوجعتنا الدنيا ياجد و نار ابوي طافية عقبه وإلا غيره الحمدلله أمي ماخلت علينا خلاف ربتنا احسن تربية وقبل تكمل سمعت صوت تعرفه بين مليون صوت يقول باين التربية ماشاء الله .
قالت بكل بفخر : أمي ربتنا احسن تربية وابشرك بنات ولدك اللي يدوس لهم على طرف يوسمون خشمه وسم . وابشرك عندي خير كثير يارب لك الحمد ندى خريجة صيدلة وخزامى اصغر وحده فينا عمرها 17 ماتت أمي رقية بعد ولادتها
الجده /وهي تبكي الله يطعن قلبي عنكم يابنات احمد والله ماكنا ندري بكم الله علينا شاهد.
اشواق بحب لجدتها وهي تمسك يدها : جعلني قبلش ياجده كيفش انت من عمليتش ان شاء الله احسن وليش ماعاد عدتي للمراجعة.
الجده وهي تناظر فيها : وايش دراش اني سويت عملية.
اشواق /انا اللي سويت لش العملية ياجده ولاكنت ادري انش جدتي والله لكن من شفتش تعلق قلبي فيش حتى موعد مراجعتش استغربت اني ماشفتش.
عليوهو مو مستوعب بنات اخوه كانوا حولهم ولايدرون قال : سبحان الله ياأشواق اكثر من صدفة نلتقي ولانعرف بعض وحلم جمعنا تفسيره.
أشواق /الحمدلله وهي تقوم واقفه عن أذنكم بروح اشوف البنات وترى غداكم زاهب وهي تخرج.
محمد وهو ماصدق انها تخرج الكلبه جريئه ماكأن معها رجال جالسين ولا من قوة الوجه تبي تقهوينا لو انها سوتها والله ماغير احرقها بقهوتها حس بغيرة عليها مايدري ليش وهي ماخذه راحتها واخوانه موجودين .
وتسلم بعد وتقول عيال عمي واخواتي وعيال عمت عيونش يارب .
متعودة على مناطح الرجال والجلوس معهم حتى صار الوضع عادي.
فارس/ ياارباه عندنا بنات عم ولا تدري الحمدلله .
علي وهو يناظر في ولده بنظرة لها مغزى : فارس.!
فارس بخوف : سم يبه والله مااقصد شي اشبك متغير من لقيت بنات عمي .
احمد/يبه ايش ناوي تسوي انت وجدي.
علي/كل خير إن شاء الله وهو ناوي انه يوقف مع بنات اخوه مستحيل يسمح لأحد يأذيهم حتى لو كان ابوه صح انه غير راضي عن وظائفهم وخاصة خزامى

29 - 5 - 2021, 10:15 AM

البارت 57

ناظر في ابوه وقال وإلا يابو احمد ايش هو شورك.!
هيلة وهي تشوف زوجها الساكت وقفت وهي تجلس على ركبها قدامه وتخلع شيلتها وترميها في حضن زوجها وبصوت كله رجاء : تكفى يامحمد طلبتك بنات احمد لا يجيهم الضيم وانت حي تكفى وانا لك عصا لك اللي ماتعصاك وبصلح اللي راح والخراب اللي بيننا بنات أحمد عماره.
محمد(الجد)/انتفض وهو يشوف زوجته ترمي شيلتها عليه واول مره يشوفها تسويها او تخلي شعرها مفتوح قدام احد حتى ولدها وعياله.،؟
شاف شعرها الطويل المجدول نازل بحضنها قام وهو يمسك شيلتها يلبسها ويقومها ويبوس راسها ويجلسها ويجلس جنبها مسك يدها بقوة رفع عيونه لعلي ولده وعياله بنات احمد في وجهي
واول مرة تخذله قوته وعيونه تمتلي دمع : والله ياهيلة يابنت ولدي مايلحقهم ضيع وهذا الراس عايش.
هيلة وهي تستند على كتف زوجها وتبوسه : جعله يسلم راسك يا أبو احمد .!
الجد(محمد) جاهد ان دموعه ماتنزل بس ماقدر غمض عيونه اكثر من مرة هو غلط في حق ولده كثير غلط كثير ولا بيعيد نفس الغلط مع بناته مهما صار كان يتمنى لو يرجع ولده لحظه ويعوضه لكن ربي رحمه ببناته رغم ان صدره ضاق لما عرف ان ثنتين في مجال الطب والثالثة مشهورة وهو رجال يضربه العار ويغار على طرف محارمه كيف وبنات ولده في مكان مختلط.
حط يده على كتوف زوجته وهو يسمعها تدعي له هذا القرب اللي تمناه من سنين.

:

أشواق /
في المطبخ وهي تفتح قدر المزين أمها اصرت ان يكون غدا اهل ابوها من طبخهم السواق ذبح الذبيحه واعطاهم وهي وريم طبخوها مندي في قدر المزين قسمت الرز واللحم في صحنين
زينته بمكرونه وبيض مسلوق وزبيب وشرائح ليمون.!
شافت ندى تدخل قالت لها : خلاص رتبتي السفرة .!
ندى : خلاص جيت اخذ الصحون اخذتها وهي تخرج.
خزامى وهي تحط سلطات وايدام في صحون.
وريم تطلع الخبز من الصينية
أشواق قالت : انا بروح لهم وانتوا اذا خلصتوا تعالي ياخزامى انت وندى سلموا عليهم .
وخرجت تطمئن على امها وبعدين بتروح لهم تقلطهم على الغدا.

:

علي/ يبه انا لما جيت هنا زوجة احمد الله يرحمه اعطتني شنطة فيها اوراق كاملة تخص احمد وبناته وفيها وكالة شرعية ووصية لي ولك احمد يبه بعد ماخرج من عندنا ماقدر يتوظف اي وظيفة كان خايف ان احد يشوفه ويعرفه ويعلمك عن مكانه اخر شي اشتغل في الحلال مع منصور ابو زوجته الأولى رقية أم البنات لكن بعد موت رقية تزوج عايشة علشان يساعدها ويكون لها محرم اذا دخل البيت .!
الجده هيلة /ياضيم قلب ولدي تلقى المصايب كلها وحده الله يطعن قلب أمك عنك ياأحمد تزوج مرتين وحده وانجب ومحد فرح له وماتت زوجته وهي صغيرة وتزوج عجوز كبر أمه يارب ترحم أحمد وتعوضه خير ياكسر قلب أمك عليك.
علي/يمه أحمد كتب انه زواج كان على ورق بس ماعمره قرب منها ماتزوجها إلا علشان بناته وبس وهي في الحقيقة ماقصرت مع بناته بيض الله وجهها شالت حمول كثيرة .!
محمد بأندفاع : إلا سود الله وجهها رعية جماله ومعروف سيبت بنات عمي المفروض انها جتنا تسأل اي احد لين تحصلنا وتسلمنا بناتنا إلا شردت بهم ديرتها .،! وكل وحده مخليتها تاخذ راحتها اللي دكتورة وسنتين وهي في كنده وحدها تدرس والثانية تخصص صيدلة والثالثه مشهورة كل من هب ودب يعرفها ..
أحمد بأنصاف وطبعه الحكيم : تراك غلطان إلا بيض الله وجهها الف مرة الحمدلله بنات عمي من احسن مايكون لا خريجات سجون ولا رقاصات والحمدلله وحكاية ليش مادورت علينا إلا هو عمي ماقال لها عنا شي كيف هي تجي تدور ولما ابوي جاء يسأل عن البنات صح انها غلطانة بس نلتمس لها العذر ولا نجحد فضلها كانت تخاف نحرمها منهم وهي صاحبة التعب الكثير .،
علي كل واحد من عياله قال كلام هو بيقوله وكل واحد صادق في كل كلمه قالها .
ناظر في ابوه اللي ساكت وقال : يبه
وهو يمد بورقة له هذي وصية من احمد يقول ان بناته في ذمتي وذمتك لين تقوم القيامة لا يلحقهم ضيم والورقة الثانية صكه وكالة عامة لك انت يأبوي على البنات
الجد(محمد)
وهو يلبس نظارته فتح كل ورقه وهو مو قادر يركز في حرف واحد قفل الورق ومدها لعلي وقال : إن شاء الله بناته مايحلقهم ضيم وكل وحده من بناته زوجها بيكون وصي عليها .!
ست ازواج من العيون كلها تناظر في الجد
كمل بعد ماسكت موجه كلامه لعلي عيالك ثلاثه ياخذون بنات عمهم .
اول من ثاار محمد اللي وقف وهو يقول مستحيل والله مااخذ وحده منهم لو تنطبق السماء على الأرض.

29 - 5 - 2021, 10:16 AM

البارت 58

عبدالله اللي وقف مثل المقروص : لا والله ياجد مااخذ وحده منهم انا مالي دخل اصحح غلطاتك انت وعمي .!
فنجان القهوة اللي ارتطم بفكه كان جواب جده.!
وبعصبيه فز جدهم واقف وهو يقرب
من سميه محمد : والله لو سمعت واحد فيكم جاب سيرة بنات عمه بالشينه مايلوم إلا نفسه والزواج راح يتم واللي فيه خير يقول ماابغى..!
انفتح باب المجلس ودخلت اشواق اللي سمعت صوت هواش ولا قدرت تسمع بوضوح دخلت وهي تشوف جدها
واقف بعصبية ويضبط شماغه ،
قالت : معليش تأخرت عليكم تفضلوا على الغدا الله يحييكم.
وهي ترجع توقف عند باب المجلس وتقول : الغدا في المقلط
ابتعدت عن الباب وهي تشوفهم يدخلون المقلط والعصبية واضحه عليهم خاصة جدها
تشجعت وهي تدخل بعدها وهي تناظر في الأرض قالت الله يحييكم على واجبكم واعذرونا على قل الكلافه.
جدها وجدتها وعمها بحب لها قالوا لها بأصوات متفواته : الله يكرمش يابنت احمد وماقصرتي وكلفتي على نفسش
أشواق/جعلني فداكم اعز من جانا مابه كلافه الذبيحه من الشبك و طبخها في البيت عز من زارنا
وخرجت.،

محمد/
ماصدق انها خرجت يكره فيها جرأتها وهي تتكلم قدامهم جلس على السفرة بدون نفس بس ريحة الأكل خلاه غصب يشتهيه ،
الجده (هيله)بأعجاب : يالله انك تكثر خيرهم ويحفظه ماشاء الله تبارك الله .
فارس وهو يأكل : لذيذ ماشاء الله وحده دكتورة والثانية تخصص صيدله والثالث مشهورة بس سنعات ماهو أميرة الخبلة اللي ماتعرف تسوي شي.
عليبحب لبنته : فديت طاري أميرة وانت يعني ماترتاح إلا لما تجيب سيرتها.
الجد(محمد) وهو يأكل من الخبز والمرق قال : تسلم يد من سوته والله ماله شبيه إلا خبز يدش ياهيلة حس بألفه مع زوجته وهو يحاول يصلح شي بينه وبينها كان مجرد أمنيه او حلم والحمدلله انه رجع !
محمد/ والله ما اتوقع احد يجي يخبز مثل جدتي.!
فارس هو يناظر في اخوه قال: المشكلة انك تسب الخبز وتأكل منه انت مايعجبك شي مرة.!
محمد وهو بدون مايلتفت لفارس ويأكل : ممكن تنطم.
علي بطفش منهم انتوا ماغير مناقره ماتستحون : على وجيهكم .!
عبدالله /وقف وهو يقول جاد الله على من تكلف يبه انا ماشي المطار رحلتي 6 المغرب يادوب اوصل الدنيا مطر وزحمة وعندي اشغال بكره لا زم اخلصها قبل الظهر وهو يبغى يهرب من تسلط جده وقراره.!
محمد /وهو يقوم وانا بروح اوصلك المطار واروح عند أمي.
الجد(محمد) وهو عارف ان كل واحد منهم يهرب من سالفة الزواج قال بأمر : اسمع انت ويااه بنات عمك مايتعدونكم وخاصة انت يامحمد الدكتورة اشواق تاخذها وانت ماتشوف الطريق روح سلم على امك وبعد الفجر وانت عندي سامع.!
عبدالله عصب : وانا والله لو تنطبق السماء على الأرض مااخذ وحده منهم وخرج بعصبية.!
محمد ناظر في جده وفي ابوه وخرج بدون كلمة .؟

توضيح الشخصيات...

1/ الأب محمد احمد ال زايد
له من الأولاد اثنين أحمد وعلي التوأم
•علي اولاده محمد الكبير من زوجته الأول (مطلقها)
راح نتعرف عليها في البارت القادم.

ولده الثاني أحمد والثالث عبدالله والرابع فارس وأميرة .(أمهم جميلة )

أحمد المتوفي زوجته الأولى رقية متوفية بناته اشواق وندى وخزامى .!

•عائشة إبراهيم عيسى زوجها الأول سعيد وطلقها لأنها عقيم

زوجها الثاني منصور ناصر سعودي عنده بنتين رقية وريم وكل وحدة من أم مختلفة

وباقي الشخصيات راح تظهر وفق تسلل الأحداث ..

29 - 5 - 2021, 10:16 AM

البارت 59

محمد/
اللي منسدح في حضن أمه وهي تحرك يدها في شعره ضاق به الكون كله لما جده قال انت تاخذ الدكتورة اشواق جدي رغم اني اعرف ومتأكد انه زعلان من تخصص بنات ولده في الطب إلا انه يتعمد اذا ينطق اسم أشواق لازم قدامه يقول
الدكتورة اشواق وبفخر كبير ..
بعد قرار جده مستحيل يقول لا هو يعرف جده اذا قال كلمة مستحيل يتراجع عنها حس انه مخنوق ولاعاد بيده حيلة وهو رافض فكرة الزواج كلها خاصة بعد مارفضته بنت خالة وخالته رغم انه اختيار امهم وهو وافق على فكرة الزواج إلا علشان يطيب خاطر أمه اللي ضحت بحياتها وشبابها علشانه من طلقها ابوه وهي حرمت الزواج على نفسها علشانه رغم انها تعبت وانحرمت منه وهو صغير بسبب جده محمد اللي اخذه منها وهو صغير عمره شهرين وماعاد صارت تشوفه إلا لما كبر وعرف الحقيقة رجع لأحضانها.
غمض عيونه وهو ياخذ نفس عميق مختلط بريحة أمه المحببه لقلبه فتح عيونه وهو يناظر فيها مسك يدها كل ماجاء عندها لازم تفتح له سيرة الزواج
كل مااتصل عليها تقول تراني عاينت (بمعنى شفت) لك عروس فنانه مثل روحك كل مرة ماكلت ولا ملت تقول خلني افرح فيك وارتاح حتى لما اجيب لها ذهب هدايا ماتلبسه تقول علي محلوف ما البس ذهب إلا في زواجك.
اخذ يدها البيضاء وهو يبوسها قال: يمه.
فوزية (الأم) : روح وقلب وعقل أمك حبيبي انت .
محمد/فديت روحش وعقلش ابشرش اني خطبت يمه
وبدون اي مقدمات وفي اقل من ثانية حصل راسه محذوف على الجلسة الأرضية وامه اللي مايدري كيف وقفت تغطرف وشوي تسجد وشوي ترجع تمسك وجه بيدها وماخلت مكان في وجه إلا ما باسته حتى انها ماسألته من هي كأنها تقول يكفيني انك تتزوج.،

فوزية وهي تمسح دموعها : فديتك راعي بشارة في ذمتي اني صادقة وكأنها تذكرت وهي تخرج
جوالها من جيبها وتمده له هاك اتصل على رقم أبوي ابشره تحصله خرج من المسجد عند الحلال اتلاها البارح يقول فوزية متى ناوي ولدش يعرس.
محمد وهو يضحك ويمسك يد أمه ويجلس جنبها وهو يشوف الفرحه في وجه امه قال : اجلسي جعل عيني ماتبكيش
حاوطها بيده وهو يقول : يعني مابتسألين من هي وهي فنانة او لا .
فوزية وكأنها تذكرت قالت : والله من فرحتي فيك ولا بغيت الله يهديك من هي بنته.
محمد ولاهو داري كيف يفهم امه السالفة او كيف بتستوعب أمه اذا هم لحد ذحين مااستوعبوا كيف أمه.،!
قال : يمه تذكرين عمي أحمد الله يرحمه
وهو يناظر في وجه امه اللي تغير بمجرد مانطق اسم عمه
فوزية وكأنها انصفقت على وجها كيف تنسى احمد اللي خلاها قبل الملكه بيوم وخلاها علكة في حلوق الناس انه ماخلاها إلا لما عرف انها اكبر منه في السن.
ناظرت في ولدها وهي تقول : الله يرحم اموات المسلمين ماله عمك أحمد.
محمد هو يركز في تعابير وجه أمه وحركات جسمها المتوترة بمجرد ماسمعت أسم عمه مايلومها لما كبر وعرف السالفة حتى هو كره عمه بس يظل عمه مهما كان والدنيا نصيب.، بس كسرت أمه وجده باقي مانسوها رغم ان ابوه حاول يصلح الكسر فصار كسر اكبر.
قال : يمه عمي لما هج من الديرة اثاريه تزوج ولا احد درى عنه وعنده ثلاث بنات وابوي دري قبل عشر ايام تقريبآ وانا واخواني شفنا ان بنات عمي حنا اولى بهم انا اخذت الكبيرة حاول محمد يختصر السالفة بدون مايخوض في تفاصيل الموضوع.
فوزية رغم ان صدرها ضاق إلا انها ماحبت تخرب فرحتها في ولدها خاصة انها كانت تتمنى اللحظه ذي من زمان ودامها بنت عمه ولحمه ودمه ابركها من ساعه واختياره هو ريحها كثير لانها خطبت له من بنات اخوانها ورفضوه واللي تحط شرط تعجيزي بيت مستقل واللي امها تقول مانبغى امك تسكن مع بنتي ومضمون الكلام انهم رافضينه مرة يقولون عصبي ولا يتعاشر مثل جده.
حضنته بقوة وهي تقول : الف مبروك الله يتمم لك على خير وبنت عمك سترك وغطااك ومن ذحين اقولك اذا طلبوا بيت شرعي وافق وانا بيت ابوي قد وسعني وانا صغيرة ولا بيعجز بي ذحين.
محمد وهو يشوف الضيق بوجه أمه : والله مالها بيت إلا معش واصلا انا على الحد ومااجي إلا كل 6 ايام .
محمد حب يغير مزاجها قال : ولا سألتيني هي فنانه او لا .
فوزيه وهي تناظر في وجه ولدها وحيدها اللي خرجت من الدنيا به قالت : الزين يمك من زانت اخلاقه لا تتشرط وانا امك.
محمد مستغرب أمه على غير عادتها كان الجمال شرط لها اساسي .
قال : والله يمه ان شكل حظ ولدش ماش عروستي شينه الله لا يوريش لا وجه ولا عيون ولا طول ولا مقام ولسان طويل لكن قدها في وجهي وبنت عمي وهو يرسم الضيق على وجهه .
فوزية وهي تحس الضيق بصدرها يكبر يالله اللي كانت خايفة منه حصل كانت تدور زوجه جميلة لولدها تبغى وحده كاملة واجمل من بنات اخوانها اللي رفضوا ولدها كانت تقول ابغى وحده اذا دخلت معي اتفاخر واقول لهم هذي زوجة محمد

29 - 5 - 2021, 10:17 AM

البارت 60

ناظرت في ولدها وهي توقف وتقول: قد حكم الله يامحمد قد حكم الله ودخلت .
محمد وهو يحاول مايضحك وهو يشوف أمه متضايقة قال يمه الكلام لا يطلع لأحد وجدي لما اتتم كل شي راح اجمعه هو وخوالي واقول لهم .،!
قام وهو ياخذ مفتاحه ويقول : انا راجع ابها يمه عندي كم شغله وبخلصها استودعتش الله .

:

بنفس الوقت علي وعياله (فارس واحمد) وابوه خارجين من المسجد بعد صلاة الفجر راجعين للبيت وكل واحد فيهم شايل من الهموم ما يعلمه إلا الله خاصة الجد محمد وعلي اللي على كتفه حمول ثقيلة وامانة عظيمة في رقبته .
شاف ابوه وعياله يدخلون بسرعة من البرد
وهو يقرب من باب البيت ويشوف السواق الشايب اللي كان يصلي معهم يمسح زجاج السيارة الأمامي رفع عيونه لبنتين يخرجون من البوابة ويركبون عرف خزامى والثانية اكيد انها ريم خالتهم لأنها قصيرة بس وين رايحين ذحين رفع يده وهو يشوف الساعة دوبها خمس الفجر وقف عند السواق ويسأله وين بتروح .!
السواق بودي ريم مدرستها علشان توقع ومعها خرامى .
قال : وليش بدري كذا.!
السواق المدرسة بعيدة مرة 130ك وعقبة ووادي لازم نخرج بدري .!
علي/انت كل يوم توصلها .
السواق / لا كانت مع نقل بس قبل فترة اثيوبي قتل السواق وماعاد حصلت احد يوديها .
علي وهو يسترجع كلام بنات اخوه البارح عن ريم وايش صار لها رفع عيونه لسيارة وقال روح قول لهم ينزلون انا بوديهم ولا تحرك اي سيارة من هنا إلا بعد ماتقول لي خاصة اذا البنات معك ودخل ..
:

اشواق

في المطبخ من قبل الأذان عجزت حتى تغمض عيونها تفكر في كل شي وبيصير لهم حياتهم الجديدة احساسها اللي ماعمره خاب بشي كبير بيصير ويمكن اشياء كثيرة من بعد العصر وهي جالسة هي واخواتها مع جدهم وجدتهم وعمها اللي شوي ويشيلونهم من الأرض الفرحة والخوف والحنان اللي شافته منهم خلاها تحس بأمان من كل شي كانت خايفة من لقائهم
خزامى الدلوعه نشبت لجدي وجدتي وعمي وانواع الدلع وكل شوي واحد يحضنها فيهم تقول لازم تعوضوني عن حضن ابوي اللي انحرمت منه قالتها كلمة عابرة بس شفت تأثيرها على جدي وهو يحضنها في صدره بقوة ويشد عليها
جلست معهم جلسه طويلة وكل سوالفهم عنها هي واخواتها قالت لهم كل شي عنهم حتى عن زواجها بماهر والظروف اللي تزوجت فيها والخلع اللي صار وما تنكر علامات الزعل والغضب اللي شافتها على وجه جدها وجدتها وعمها .
سألها جدها بغضب وقهر وقال : لا يكون يضربش والله ماغير اخليه يكره الحزة اللي فكر يمد يده عليش بناتنا ماينضربون ولاهي من سلومنا ولا عادتنا نضرب حريمنا .
مسكت يده بحب : فديتك لا والله بس ماعاد بيننا نصيب.
جدتها هيلة حست بحبها الشديد وحنانها لهم قالت : لاعاد تدعوني جده قولوا لي يمه عوضوني عن ابوكم وعن كلمة يمه اللي ماعاد سمعتها منه
جدتها اطيب إنسانه شافتها في حياتها كانت شايله هم ان اهل ابوها ماهم متقبلين وجود امهم مرة وفعلا تحس انهم يكرهونها بس جدتها غير طلبتها تروح تسلم على أمها وراحت وسلمت عليها وخرجت .!
خلصت العصيدة وهي تحط كاسه صغيرة في الوسط وتعبيها سمن وعسل وبعدها حطت قطع صغيرة من الشمع العسل .
حطت ثلاجة القهوة والحليب في صحن كبير مع الفناجيل وصحن فيه تمر سكري وحطت معه اقراص خبز اسمر رفعت عيونها لدخول خزامى وريم اللي مبين عليها العصبية وهي تنافخ : اشواق اطلعي ذحين قولي لعمش الملقوف ذا ماله دخل فيني وهي تصارخ.
اشواق وهي تناظر في خزامى : ايش صار
متجاهله ريم اللي صارت عصبيه مع الكل حتى جدتي طلبتها تسلم عليها ورفضت .؟
خزامى /عمي علي شافنا راكبين وسأل السواق وين رايحين قال له بودي ريم المدرسة قال خلهم ينزلون بعدين انا بوصلهم.
أشواق وهي تناظر في ريم : طيب ليش زعلانه كثر الله خيره بيوصلكم وهذي معش خزامى محرم بدال ماتروحين مع السواق.
ريم وهي تضرب بيدها بقوة على طرف الصحن وتتناثر الفناجيل في الأرض وبعصبية مستغربه من ريم على غير طبعها : الله لا يكثر خيره ذحين تقولين له ماله دخل فيني سامعه لا هو ابوي ولا عمي ولا يقرب لي.،!
اشواق ماعلقت بكلمة رجعت تبدل الفناجيل في الصحن وهي تقول لخزامى : انا بروح احضر الفطور لهم وانت الحقيني بحافظة العصيد وارجعي نظفي الأرض

1 - 6 - 2021, 12:09 AM

البارت 61

اشواق ماعلقت بكلمة رجعت تبدل الفناجيل في الصحن وهي تقول لخزامى : انا بروح احضر الفطور لهم وانت الحقيني بحافظة العصيد وارجعي نظفي الأرض .
شالت الصحن وخرجت وهي تحس بعجز ناحية ريم اللي صايرة مثل الكبريت محد يلومها بس في النهاية انا مابيدي شي اسويه لها كلنا تعبانين من الوضع الجديد بس لازم نتقبل اللي صار لان مابيدينا شي وهي مؤمنة ان اقدار الله كلها خير وكل محنة وشدة في طياتها منحه من الله.
خرجت من الصالة للحوش وهي ترجف من البرد.!
اخذت نفس عميق مشبع بروائح عطريةمن الأشجار رفعت راسها وهي تناظر في السماء قالت يارب يارب
دبرني انا واخواتي واختر لنا ماتراه خير لنا
وصلت باب المجلس وهي تشوفي حذيان عند مدخل المجلس كم تمنت بيوم ان المجلس ذا يكون عامر بأهله احساس ان عندك رجل في البيت بحد ذاته أمان بعد الله.
دخلت المجلس وهي تشوف جدها جالس قدام الدفاية ومتلثم بشماغه وعمها قاعد وقدامه اوراق كثيرة وحمدت ربي ان محد من عيال عمها موجود الغثيث عند أمه والثاني رجع الرياض على حسب كلام جدتي البارح واثنين نايمين في المقلط.
قالت : صباح الخير
وهي تنزل الفطور على الطاولة وتبوس راس جدها اللي من شافاها وهو يحاول يقوم
أشواق :عليك وجه الله ماتقوم جعلني فداك .
الجد(محمد) بحب : الله يصبحش بالخير ويعزش .
وراحت سلمت على عمها اللي وقف من شافها وهو يحضنها : هلا هلا ازين صباح قد مرّ علي في ذمتي اني صادق.
اشواق وهي تبوس كتفه : الله يسعدك ويحفظك لنا
فكها وهي تروح وتمد السفرة قريب من جدها وتناظر فيه بحب ان شاء اللهة رقدتو زين البارح .
ردو : الحمدلله وازين نومه والله وحنا عندكم .
حطت الصحن وزعت اقراص الخبز الأسمر
قامت واقفه وهي تلمح خزامى تأشر لها مستغربة حال خزامى اللي فجأة نزل عليها الحياء وهي البارح كأنها قرد ناشبه لهم
اخذت حافظة العصيدة ودخلت وهي تقول : هيا تفضلوا سويت لكم شي بسيط إن شاء الله انه يعجبكم احترت ايش اسوي لكم وقررت اسوي عصيدة واخبز بر أسمر علشان جدي اذا ماعجبته العصيدة وخفت لا يكون عندك سكر وضغط وتتعب .
جدها وهو يقرب من السفرة هو وعمها علي : ابشرش ان ماعندي لا ضغط ولا سكر باقي جدش شباب إذا تخبرين بنت حلوة تراني ابغى العرس.
أشواق وهي تضحك : ماشاء الله اما العروس لا ياجد وين بتلقى مثل جدتي محد
الجد(محمد) رفع عيونه لبنت ولده اللي اخذت من جدتها الشي الكثير في يوم وليلة اخذوا قلبه بنات احمد وهو يشوفهم كيف مهتمين فيه اللي اخذت ملابسه وغسلتها واللي تكوي واللي تعطر واللي تهمز واللي تدهن رجوله ويدينه واللي تحرص عليه يتدفى زين من البرد صدق من قال ان اللي عنده بنات مايموت .!
قال لها : ايه بالله انش صادقة في كلامش بس جدتش تتغلى علي وإلا وينها من البارح ماشفتها .
أشواق وهي تتذكر سوالف جدتها لهم عن حياتها مع جدهم وكيف انها جتها فترة ماعاد تطيق تسمع من بعد موت ابوهم : جدتي نايمه مع ندى مانامت إلا متأخر صحيتها صلت ورجعت تنام.
علي وهو يفطر : ماشاء الله انتي اللي مسويه الفطور.
أشواق / ايوه انا مسويته أمي فديتها معلمتنا كل شي
وماسمعت اي رد على كلامها تعرف انهم شايلين كثير على أمها وهي محتارة بينهم .
شافت جدها اللي قام وهو يقول : الحمدلله جاد الله عليكم يابنت احمد.
أشواق /بالعافية ياجد لكن ماتقهويت.
الجد(محمد)/بروح انام لي شوي مع عيال عمش واذا صحيت تقهويت مع جدتش اذا حصلتها،.؟

علي/
شاف ابوه يقوم من السفرة متوجه للمقلط علشان ينام حس انها فرصة ويقدر يتكلم مع اشواق قام وهو يمسح يده بالمنديل ورجع يجلس مكانه عند الشنطة والأوراق حولها وهو يحس بثقل من أمانة اخوه احمد حس ان اخوه حطه في خيارين كلاهما اصعب من الثاني بس لازم يحزم أمره من شاف الأوراق اللي في الشنطة وهو يصلي ويستخير ولا حس بشي.
ناظر في اشواق اللي قاعده ترتب المجلس من شاف بنات اخوه وهو اسعد إنسان صح ان أشواق تضايق من تصرفها مع ولده رغم انه يستاهل
علي/أشواق .،!
أشواق /لبيه وهو تلف لعمها وبيدها كيس جمعت فيه علب المويه واوراق كانت على الكنب والأرض.
عليبحب لها ولكلامها وتصرفاتها حب فيها قوتها وتحملها لمسؤلية اخواتها وكيف انها استقبلتهم : الله يلبيش تعالي هنا بغيتش في موضوع يخص خالتش ريم وهو يأشر على مكان جنبه.
أشواق/حتى انا كنت ابغى اكلمك عنها ..

1 - 6 - 2021, 12:09 AM

البارت 62

تحركت وهي تحط الكيس عند الباب وترجع تجلس جنب عمها وهي تدعى من قلبها ان يكون الأمر خير خاصة انه يتعلق بريم اللي صايرة مثل النار ولا تتقبل كلمة منهم ومنعزلة.!
علي/وهو يرفع مجموعة اوراق بيده اعاد قرأتها اكثر من مرة .
قال : أشواق هذي كلها اوراق تخص ريم خالتش
وهو يشوف أشواق تناظر فيه بأهتمام .
: مضمون الأوراق ذي كلها ان ريم زوجتي وعندي وكالة شرعية من ابوش الله يرحمه عليها لانه كان الوكيل الشرعي لها قبل يموت .
أشواق تحس بطنين قوي في راسها من كلام عمها حطت يدها تلقائي على راسها من هول اللي سمعته وهي تقول : كيف مستحيل ومتى ؟
علي قرب منها وهو يسمي عليها : اشواق ركزي معي والله حتى انا مصدوم مثلش لكن مابيدي شي اسويه ومحتار من سلمت لي عايشة الشنطة وشفت الملف اللي يخص ريم وانا ضايق صدري ومحتار ايش اسوي ولا احد يعرف إلا انت ذحين.
اشواق وهي قاعده تتخيل ردة فعل ريم لو عرفت راح تموت لا راح تذبحهم كلهم متأكده ريم لما تعصب او تزعل تتحول لوحش .
حطت يدها على قلبها وهي تقول يارب لطفك يارب.
سمعوا صوت صراخ يوصل لعندهم فزت واقفه وهي تعرف انه صوت ريم وقبل تخرج كانت خزامى جايه لهم وهي تصارخ أشواق الحقي ريم معها المسدس تقول خلي عمي علي يجي يكلم السواق يوديها ليش يمنعها تروح وإلا راح تقتل نفسها.
أشواق بدال ماتخرج تشوف ريم رجعت لعمها : عم الحق ريم والله ماادري ايش اسوي معها تكفى ريم مجنونة والله لتقتل نفسها او تقتل اي احد قدامها .
عليمن سمع صوت صراخها وهو مصدوم واللي زاد عليه كلام خزامى يالله معقولة وصلت فيها انها تنتحر علشان رفض تداوم مع السواق الله يسامحك ياأحمد على الوهقه ذي ومايستبعد تقتل نفسها هي قتلت اثيوبي يعني يتوقع اي شي .
خرج مع أشواق حتى بدون مايلبس حذيانه وصل عند البوابه وهو يشوفها واقفة والسواق قدامها وهو يكلمها وهي ماغير تصارخ وتتكلم كلام مافهمه قرب منها وهو يشوف عيونها كلها دموع والمسدس بيدها وحاطته على صدرها .
قال بصوت حازم : ررررريم .
بمجرد ماسمعت صوته لفت له بقوة وهي تقول بأندفاع : انت مالك دخل فيني ذحين كلم ذا يوديني ليش منعته..
علي بهدوء عكس الخوف اللي داخله : وين تبغين تروحين انا اللي بوديش خلاص نزلي المسدس من يدش .
ريم بأندفاع وهي تقرب منه كم خطوة وبعصبية : مين حضرتك علشان تتحكم فيني وتوديني مالك كلمة علي كلمتك على بنات اخوك بس ذحين كلمة يوديني وإلا قسم بالله افرغ المسدس بصدري ترى ماعندي شي اخاف اخسره وهي تبكي.
علي رق قلبه لها بمجرد ماشافها بالقرب منه يالله زوجته من 18سنه ولا يدري وهي ماتدري قال لها بقلة حيله وهو يقرب منها هاتي المسدس ياريم وابشري مايصير إلا شي يرضيش ما كان مقرر يقرب منها ولا يمسكها بس مايدري ليش راح لها ومسكها كان يبغى يحافظ عليها كان يخاف انها تقتل نفسها يخسرها وهي من سنين له بمجرد مامسكها وهي تثور وتتحرك تحاول تفك نفسها منه بقوة ..

صوت الرصاصة

اللي طغى على صوت صياحها وصوت صراخ بنات اخوه وهي تتراخى بين يديه وهو ماعاد قدر يمسكها او يتحرك من هول الموقف..
.
.
علي/
وهو جالس على طرف السرير وماسك يد ريم الصغير مقارنة بيده الكبيرة ويناظر فيها وهي غايبة عن الوعي يحس كأن اللي صار حلم او معجزة مو مصدق انها بخير وقدامه ذحين ناظر في أشواق اللي لابسه قفاز طبي وبيدها ابره وتحطها داخل المغذي الموصول بيد ريم اللي مو حاسه بشي حولها كان يحاول انه يمسكها علشان ياخذ المسدس وفجأه سمع صوت رصاصة حس ان قلبه انخلع

من مكانه وهو يحسب انها ضغطت على المسدس اثاريه ولده محمد اللي كان واقف عند الباب ويشوف اللي يصير وعلشان ينقذ الموقف اخرج مسدسه ورمى رصاصة في الهواء علشان ريم تخاف وتفك المسدس لان الإنسان مهما قال بنتحر يظل عنده حب البقاء لو انها صدق تبغى تنتحر كان انتحرت بمكان محد يشوفها فيه .
لما حسيت فيها تتمايل شلتها بقوة وهو يلتفت لولده اللي يأشر له بالمسدس اللي بيده وعرف السالفة .
لكنه شاف علامات الصدمة على عياله وابوه اللي قاموا من النوم على صوت الصراخ وصوت الرصاصة .
ماكان عنده وقت يبرر لهم يقولهم ذي زوجتي طنشهم وهو يقول بأمر اشواق تعالي باخذها المستشفى.
أشواق وهي ترتجف من اللي صار وترجف خوف على ريم وترجف خوف من اللي باقي جاي لهم قالت له : لا ياعم مايحتاج تعال حطها في الغرفة بركب لها مغذي وبتكون طيبة اكيد انخفاض ضغط.
دخل الغرفة وهو شايلها والمصيبه ان اول من شافته أمه اللي كانت نايمه مع ندى وقامت تشوف ايش صار مارد عليها وهي تضرب في صدرها : علي من هي ذي وايش صاار ..

1 - 6 - 2021, 12:10 AM

البارت 63

نزلها وهو خايف عليها خايف انها تروح من يده.
شاف أشواق اللي تفك غطوتها وطرحتها وجهها اللي منتفخ وعيونها من كثر مابكت كان يتمنى ياخذها في حضنه يحسسها بألامان اللي فقدته اللي صار لها ماهو هين لا أب ولا اخوان ولا اهل ولا شي .
شاف أشواق تقيس لها الضغط وبسرعة ركبت لها اكسجين ومغذي بيدها.
رفع عيونه عن وجها وهو يسمع اشواق تكلمه
أشواق /عم ترى جدي يبغااك في المجلس وريم اذا صحيت راح اقول لك .،!
علي وهو يفك يد ريم وهو يمسح وجها بنظره شاملة يبي يحفظ ملامحها وبدون اي كلمة خرج وهو عارف ان اللي ينتظره من ابوه شي كبير ومن عياله ومن جميلة اذا عرفت .
خرج من الصالة متوجه للمجلس دخل وهو يشوف ابوه وامه وعياله كأنهم في عزا ساكتين ولا احد من عياله ناظر له او وقف له بالعادة لما يدخل ابوهم وهم قدامه يوقفون له حتى لو انه خرج ورجع يدخل بداية المشوار صعب كذا .!
إذا كان عياله كذا ..؟
اجل ابوه جميلة وخاله وعياله كيف .
جلس على اول كنبه وهو يرفع عيونه لأبوه وماانتظر احد يسأله مستحيل يسمح لأحد يتدخل في حياته وقراراته يبغى لو مرة في حياته يتخذ قرار شخصي بدون تدخل من أحد يكفي انه ولا مرة هو اختار زوجه له رغم انه حقه .
اخذ نفس عميق يحاول يرتب عذر يبرر قال : يأبو أحمد العذر والسموحة منك
وسكت يحس لما ناظر فيه أبوه ضاع كل الكلام اللي كان بيقوله مازال يخاف من ابوه حتى وهو كبير وعنده عيال هيبة ابوه تخليه غصب يخاف منه بلع ريقه بصعوبه.،!
: يبه بعد ماتوظفت انا واحمد رحنا المحكمة وسوينا لبعض وكالة عامة شاملة لكل شي علشان اذا احد فينا مسافر او مشغول الثاني يخلص اشغاله وكلته وكالة عامة حتى في امور زواجي لاننا كنا مقررين مانتزوج إلا اخوات ماكنا نبغى نفترق عن بعض حتى بعد الزواج والوكالة عندي منها نسخة موجودة بصيغة صحيحة في وكالة الزواج .
ولما جيت عند زوجة أحمد اعطتني شنطة فيها اوراق تخص محمد وبناته وحصلت من ضمنها ملف خاص في ريم ..وقبل مايروح أحمد الحج راح المحكمة وعقد لي عليها واعطاني وكالة عامة عليها لانه هو كان الوكيل الشرعي لها
وكان اول من وقف ولده فارس ويقول : كذا يبه تتزوج على أمي تجازيها .
صوت جده الحازم هو اللي خلاه يبلع باقي كلامه.
الجد(محمد): انثبر مكانك ولا كلمة اسمعها .!
ناظر في ولده وهو يقول له : طيب ايش ناوي تسوي وايش ترجع زوجتك ذي.
علي/مابسوي شي زوجتي على سنة الله ورسوله وامس كلمت الشيخ وقال عقد الزواج صحيح توفر فيه كل اركان وشروط الزواج واعطيته نسخة من الوكالة اللي سبق وسويتها لأحمد وقال صيغة التوكيل صحيحة لأنك ذكرت اسم الموكل عنك في صلب العقد وريم اخت رقية زوجة احمد كلهم سعوديات اوراقها كلها معي تثبت انها سعودية ابوها سعودي وأمها سعودية وباقي امها عايشة في نجران ومن ال قاسي ناس معروفين ابوها طلق امها واخذها وبعد زواج أحمد من رقية ابوها قال انا راح اعطيك وكالة شرعية عامة على ريم
اخاف اموت وياخذونها اخوالها وكانت بينهم مشكلة كبيرة وصار احمد الوكيل الشرعي لها كمل وهو يناظر وجه ابوه اللي ماوضح عليه اي ردت فعل وتراها مارضعت مع بنات احمد لأن زوجته رقية كانت مريضة حتى بناتها ماارضعتهم واحمد كتب لي كل شي عنها .
محمد(الجد) هو قرر انه مستحيل باقي يدخل في حياة اولاده مرة كفاية احمد الله يرحمه.
بأختصار الله يبارك لك لكن قبل مايتم زواجك تملك لعيالك على بنات اخوك.!الليلة انا راح اكلم الدكتورة اشواق .
علي وكأن ثقل جبال انزاح عن ظهره كان خايف من ابوه قال : ماراح احصل افضل من بنات اخوي لعيالي وابركها من ساعة لكن مستحيل اغصب احد فيهم والأهم عندي بنات اخوي ماراح اجبرهم ابد .!
وهو يناظر في عياله محمد اللي ساكت
واحمد اللي يناظر في الأرض وفارس
اللي مانزل عيونه عنه كأنه يعاتبه
ايش رايكم تبغون بنات عمكم.
محمد : انا موافق لكن بشرط زوجتي مالكم دخل بيني وبينها لا من قريب ولا من بعيد.
محمد(الجد)/ بتوافق ورجلك فوق رقبتك وبلا شروط وانا دون بنات ولدي اللي بتجي تشتكي منكم والله اللي رافع السماء بلا عمد وباسط الأرض وقاطع الذرية والعصبه القوية اني مااخلي فيه عرق ينبض
وهو يأشر على سميه محمد انت تاخذ الدكتورة اشواق فاهم .
وانت وهو يأشر على احمد تاخذ ندى.
والداج عبدالله ياخذ خزامى وسالفة زواج ابوكم لاتخرج من باب هذا لجنس مخلوق.
لف يناظر في ولده وانت اول تروح لخالك وعياله وتقول لهم كل شي وتطيب خواطرهم وهذا شرع الله ماسويت شي حرام وبعدها تروح تطيب خاطر جميلة ام عيالك وترضيها وبعدها تجيني هنا انت وعيالك واللي يعز عليكم ونملك إن شاء الله .

1 - 6 - 2021, 12:10 AM

البارت 64

علي/
حاول يضبط نفسه وهو يحس قلبه يرفرف من الفرح قام ويبوس راس ابوها : بشر على ذا الخشم لكن عبدالله يبه ماله خاطر في الزواج من بنات عمه وقال لي انه يبغى احلام بنت خالته نورة وجميلة كلمت اختها من زمان وموافقين .
الجد محمد/اجل خزامى ياخذها الخبل ذا يأشر على فارس اللي صدع روسنا يبغى العرس.
علي /ابشر ابشر
رجع وهو يدنق ويبوس راس أمه ويدها : ليش ساكتة يالغالية .
هيلة/ايش تبغاني اقول ان تكلمت انفضحت وان سكت انغبنت وين اودي وجهي من اخوي وعواله وبنت اخوي.
علي/ابشري مالش إلا يرضون اهم شي انتِ راضيه عني.
هيلة/ومن متى مارضيت عنك انت واخوك الله يوفقك ياولدي واهم شي بنت خالك وأم عيالك لا ترضى فيها .
فارس بدال ماكان زعلان ومعصب على أمه كان بينط ويحضن جده لأنه من قال جده عبدالله ياخذ خزامى انقهر بس دامها تيسرت من حيث لا يحتسب الحمدلله قام وهو يرسم على وجه الزعل مر من عند ابوه وقال : كنت اتمنى انك تحفظ جميل أمي ولا تبدل بنات الشيوخ ب...؟ وخرج بدون مايكمل .
علي مارد على ولده والتمس له الف عذر ماكان يتمنى انه ينحط في الموقف ذا خاصة قدام عياله ذحين قدامه اكثر من مهمه صعبه كيف بيروح ويكلم خاله وعياله كيف بيكلم جميلة كيف بتكون ردة فعل أميرة .!
والأهم والأصعب ريم كيف راح تتقبل فكرة الزواج.
رفع يده وهو يمسح وجهه كامل غمض عيونه وريحتها تتغلل داخل صدره عطرها الهادي عكس شخصيتها لازم يروح يخلص كل اوراقها ضروري اليوم ويشوف باقي الأشياء اللي تخصها ..

:

محمد/
وهو يخرج من المجلس ماهمه زواج ابوه مرة علاقته في عمته جميلة شبه عادية ماله احتكاك معها كثير وماراح ينسى اللي صار قبل اربع سنوات في حفل تخرج أميرة من الثانوي
كانوا مجتمعين قالت: يبه انا ابغى ادخل تمريض
قام هو وعصب وقال والله ماتدخلين تمريض لو فيها قطع رقاب.
ابوه سكت ولا تكلم ولا اخوانه حتى هم رافضين فكرة التمريض معروف في عائلتنا بس كلهم مايبغون أميرة تزعل .
قامت جميلة قالت : ايش دخلك انت لاتنسى نفسك ترى انت اخوها من ابوها بس مالك كلمة على بنتي تدخل التخصص اللي تبغاه .
وكان صعب عليه انه يرد عليها يحترم ابوه واخوانه خرج من عندهم وهو مايشوف وراح لشخص اللي راح يوقف معه حتى لو كان غلطان وقال لجده كل شي قالته عمته جميلة .!
جده اخذ الجوال واتصل على جميلة وقال والله يابنتش ما تدخل تمريض لو ماعاد تدرس حياتها كلها واقصري الشر قبل يخرج مني محلوف ماعاد تشوفين عيالش مدى الحياة واعتقد انش تعرفين محمد ال زايد إذا قال كلمة مايتراجع عنها ومحمد اخو أميرة غصبن عنش وعنها وكلمته تمشي عليكم كلكم سامعه.!
ومن بعد الموقف هذا ماعاد بينه وبين عمته احتكاك ماغير سلام بارد..!
وأميرة نفس الشي وصار يستقعد لها على الطالعه والنازله عناد في أمها بس علاقته في باقي اخوانه مرة ممتازة وما تأثرت حتى فارس اللي دايم يناقره يحبه ويحترمه ولا يكسر له كلمة.!

سمع جواله يدق اخرجه من جيبه وشاف انه عبدالله اخوه الأتصال اللي ينتظره من امس!
محمد/
ارحب ملايين في ذمتي ولا تسد بشر.
عبدالله /الله يحييك ابشر بالخير تيسرت كل الأمور وصارت كلها في صالحك وانا صورت كل الأوراق وارسلتها واتس .! وتدري وين المشكلة.!
محمد /الله يبشرك بالخير اولآ وثانيآ ايش المشكلة عسى خير.
عبدالله /تدري ان جدي كلمني امس وارسل لي صورة من برنت قديم اخرجه لما راح يسأل في الأحوال المدنية عن عمي هل تزوج او لا تخيل اني رحت عند الأحوال وماقصر معي فيصل المقرن بحث لي واخذ الرقم التسلسلي
للبرنت المفاجئة انه طلع برنت وهمي مافيه اي بيانات مسجلة من الجهاز انا انجنيت كيف برنت وهمي وثلاث ساعات بحث وتدقيق على بيانات الموظف وطلعنا اسمه ولما سأله فيصل
كيف تطلع برنت وهمي ماله بيانات في الجهاز قال والله هذي سالفه قديمة بأختصار يقول جاه أمر من سلطه عليا بمنع خروج اي معلومة عن عمي انت متخيل ولما ضغط عليه قال لي أن الأمر جاه من الأمير .....) تخيل لما سمعت أسمه جتني أم الركب يعني عايشة ذي داهية تنافس عصابة المافيا في المكر والدهاء الله ياخذها ياخي عليها تفكير مصيبة تمشي على الأرض .
محمد/الله ياخذها اهم شي صححت اوضاع بنات عمي اوراقهم الرسمية.
عبدالله /كل شي الحمدلله تمام.
محمد بفرحه : الحمدلله وانت ابشرك ان جدي اسقط عنك بنت العم وحطها برقبة فارس .!
عبدالله بفرحه : الله يسعدك ياشيخ واصلا ماكنت راح اوافق عليها غير احلام مستحيل اتزوج وانت تعرفني زين يامحمد انا صح احب جدي واحترمه لكن مستحيل اخليه يتدخل في قرار مصيري لي معليش يعني بنات عمي على عيني وراسي بس يجبرني ارتبط بوحدة منهم مستحيل يااخي مالهم ذنب مساكين حرام والله على جدي وانت يامحمد نصيحة لا تطاوع جدي في قرار زواج ابد حرام عليك خل حبك لجدي على جنب .!

1 - 6 - 2021, 12:11 AM

البارت 65

محمد/الله يبلغك تفرح في احلام ياارب وبعدين مستحيل ارفض لجدي وجدتي طلب مهما كان .
عبدالله /ياخوفي انك حتى انت بديت تميل لبنت العم ترى عادي تعترف انك تحب وهو يضحك .!
محمد/اقول ايش عنده فارس الثاني قال حب قال خلينا الحب لك ياقيس بن الملوح ويله توكل على الله مع السلامه وقفل منه .؟

قفل من اخوه وهو يفتح الواتس ويشوف الصور اللي ارسلها اخوه.
ضحك وهو يسوي لها تحديد ويرسلها على رقم جوالها اللي اخذه من جوال جده بدون مايدري.
خرج من تطبيق الواتس وهو يقفل جواله ويحطه في جيبه والله يااشواق ما غير اجيبش على وجهش غصبن عنش وياقهري كله ما غير اخرجه دفعة وحده فيش انتي والعجوز.
دخل المجلس وهو يشوف اخوه احمد جالس قدام الدفاية وعنده صينية فيها فناجيل قهوة وصحون حلا جلس جنبه وهو يشوف الضيق على وجه اخوه واحب اخوانه لقلبه.
حط يده على كتفه وهو يقول : لا يضيق صدرك يالعضيد تتيسر الأمور وكذا وإلا كذا حنا بنتزوج وبنات عمي اولى من الغريبة .!
احمد وهو يناظر في اخوه وهو يصب له قهوة ويمد له الفنجال اخذه من يده وقال : ليت ماهمني يامحمد إلا زواجي انا مو رافض فكرة الزواج ابد انا شايل هم أمي كيف راح تتلقى الخبر يامحمد أمي مريضة ولا احد يعلم بوجعها إلا الله ثم انا انت متخيل كيف بيكون وقع الخبر عليها افهمني انا مو معارض زواج ابوي لا والله من حقه يتزوج لكن أمي واللي قدمته له.
محمد حس في اخوه وهو يقول : تتيسر صدقني ايش راح تسوي طيب.
احمد/قلت لأبوي لا يكلمها ابد إلا بعد ما اكلمها انا وفارس وعبدالله ابغى امهد لها اخاف يصير لها شي.
محمد/زين مابتسوي وانا معكم وحاضر في كل شي.
احمد وهو يمسك يد اخوه / الله لا يخليني منك.؟
محمد/ولا منك يارب وين جدي وابوي مااشوفهم ولا فارس.،!
احمد/جدي وجدتي عند بنات عمي داخل وابوي يقول عنده مشوار وطلع وفارس نايم ..

:

اشواق/
وهي تحس بتعب الكون كله يسكنها لا نوم ولا آكل .!
الواجب عليها انها تهتم وتراعي الكل وهي محد يحس فيها خرجت من عند ريم بعد ماتطمنت عليها وعارفة ان المواجهه معها باقي طويلة .
دخلت غرفة أمها وهي تشوف الممرضة جوالها بيدها.
سألتها كيف ماما .؟!
الممرضة/كويس خلاص فطور وانا اعطي علاج كله سكر ضغط كله كويس انا اعطي جلسة اكسجين بعد ساعة.،
خرجت من غرفة أمها وهي تتمنى بس يمر باقي اليوم بسلام بدون أي شي .!
تحتاج حبوب منومة وتنام شهر قدام وتقوم وتلقى ان كل شي صار طبيعي .
وصلت غرفة الحريم وهي تشوف جدها وجدتها جالسين على نفس الكنبة ما تنكر ان وجودهم يخفف عنها كل شي .!
بس صارت تخاف لما احد فيهم يناديها على تعرف ان في مصيبه جايه.!
أشواق وهي تجلس : سم ياجد انت وجدتي .
الجد(محمد) / سم الله عدوش يابنت احمد والله انش انت واخواتش في يومين اخذتوا قلبي واخذتوا غلا فوق غلاكم وفرحتي لما شفتكم اكثر من فرحتي لما جاني ابوش وعمش علي .
أشواق وهي تناظر في وجه جدها وهو يتكلم عيونه الكبيرة خشمه الطويل بشرته السمراء لحيته الكثيفه البيضاء تحس ان بعد الكلام هذا كله شي كبير بيقوله
: عمش علي جاني هو وعياله وقال يبه بنات احمد ابغاهم لعيالي وعيال عمش قالوا بنات عمي لنا.
أشواق غمضت عيونها بقوة وهي تسمع كلام جدها سمعت منه الشي اللي استبعدت انها تسمعه اي زواج يقصده جدها وعمها وبسرعة كذا كأنهم حمل يبون يتخلصون منه.،؟
أشواق وهي تقوم تجلس على ركبها قدامه وتمسك يده :جد انت جيت تشاور وإلا تأمر ،
الجد(محمد) لما سمع كلامها انقبض قلبه وهو يشوفها جالسة : لا ماعاش من يأمر بنات احمد وراسي حي لكن جيت اشاور ولا في عيال عمش شين يعيب وابغاكم عند عيني وحولي ماعاد اقدر اصبر عنكم .

أشواق /
يعيش راسك ياجد ويدوم لنا وعيال عمي محشومين من العيب لكن ان كنت جيت تأمر فأنا واخواتي طوع يدك لو تحب ذحين نملك ونروح معهم مااكسر لك كلمة وان كان جيت تشاور فأنا واخواتي مالنا خاطر في عيال عمي ابغاهم اخوان وعز وسند لا جارت علينا الدنيا نكون تحت ظلهم.؟
الجد(محمد)
وهو يحس ان البنت ذي سكتته بكلامها ولا عاد عنده شي يقوله ابد. شافها وهي تقوم وتبوس راسه وهي تقول : العذر والسموحة منك ياجد لكن قلت شين في خاطري لا يضيق صدرك منا انت وجدتي وعمي..
الجد(محمد) : لابالله يابنت احمد حقكم وانا لكم محزم مليان انا وعمش وعياله لكن فكري انت واخواتش وانتظر ردش .
وخرج بضيق وهو ينزل شماغه من راسه ويحطه على كتفه.
اشواق وهي تقرب من جدتها اللي ساكته ولاقالت كلمة رغم انها تشوف في وجها كلام كثير انسدحت جنب جدتها وهي تحط راسها بحضن جدتها اول مرة تسويها حتى مع أمها ماعمرها حضنتها او نامت في حضنها غمضت عيونها وهي تحط يد جدتها على صدرها وتقول جده كلمي جدي انا واخواتي مانبغى زواج مرة .

المواضيع المتشابهه لموضوع: رواية جنوبية برت حالي ولا دري وين ديرتها لموضوع: رواية جنوبية برت حالي ولا دري وين ديرتها
الموضوع	كاتب الموضوع	المنتدى	مشاركات	آخر مشاركة
تحميل رواية خالي العزيز نابليون pdf	همسه الشوق	قسـم البحوث والكتب العلميه او التعليميه	13	11 - 2 - 2021 07:28 PM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
حمود السمي يخربها مع حبيب محاورة حفل تكريم الشاعر حامد محمد	جروح الم	همس للعرضات و المحاورات الشعريه القلطات	5	9 - 10 - 2015 05:45 PM
مشاعر لم يجربها الرجل هع	إنكسآر ♪`	همس للألغاز والنكت والضحك	6	28 - 10 - 2012 11:04 AM
رواية قمر خالد من اروع الروايات	الحب ياسمين	همس للقصص وحكايات وروايات	2	5 - 6 - 2012 04:13 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية جنوبية برت حالي ولا دري وين ديرتها

همس للقصص وحكايات وروايات