رواية العابث ال خير في هذا الزمان

26 - 11 - 2020, 01:32 AM

البارت 166

ابو الماس : اقول توكل على الله ماقصرت
خالد هز راسه بالايجاب والتفت لختام
بملامح جامدة وهو يتكلم بثقه وهدوء : ختام إنتي طالق
ختام توسعت عيونها وتراكمت عليها انفاسها عاجزه عن الخروج
واقفه مكانها بصدمه وعيونها عليه
صد وركب سيارته وططلع بكل هدوء بدون مايلتفت عليها
تحس بعمها يكلمها وام الماس تضحك بالها مو معهم معه هو
اكيد لعبه ميتحيل
يسويها عمي فيني ولا يسويها خالد
كسره الخاطر ذي مستحيل يسويها
تتابعه بعيونها حتى خرج من الفله
وقفلوا الباب رمشت ببطء وهي تستوعب ماحدث او بالاصح تحاول ان تستوعب
انتظرت عودته لثانيه وثانيتن محاجر عينيها تكدست بالدموع وحرارتها مؤلمه ونبضات قلبها غير متزنه
ترتفع وتعود للانخفاض اوشكت على الجنون هي عاجزه حقاً عن الحركة وعن الكلام
شعرت بشيء يدفعها للخلف وحافظت على اتزانها وهي تبعده عنها
وتلتفت له بسرعه
ابو الماس : يلا ندخل شفيك بابا ؟
ختام بنظرات واهيه ماردت وهي تلتفت للباب اكيد بيرجع
ابو الماس / ختااام
التفتت له وانتبهت لام الماس تبتسم بسخريه
صدت عنهم ودخلت للبيت بسرعه وبدون النظر للخلف تشعر بالجنون حقاً وشيء مؤلم يحدث داخلها انهيار ورب البيت انهيار كل اللي بنيته طاح
قابلتها الماس واقتربت لتضمها وهي ترحب بها
لكن دفعتها بعيداً عنها وهي تتجه لجناحها
دخلت وقفلت الباب
وجلست بهدوء والموضوع يتكرر بداخلها الكلمه توجع صداها بقلبي
صداها هنا بقلبي
دائماً كنت اخشى هذا ان ننتهي مثل كل البدايات
ان تهزمنا الحياه وعاداتها
ان نسقط مثل ورقة شجر في شهر الخريف
او ان نُرمى مثل ورقه تقويم بمجرد انتهاء
اليوم
هل استعد الان لزوالك ! لذهابك وغيابك
كيف ؟
كنت اتمنى ان ننهي الحياه بهذا
الحب لا ان ينتهي قبل الحياه
احلامي وانت
الاطفال والحياه المستقره البعيده عن
الترف والاشياء المصطنعه
حتى الفرح مصطنع لم اكن احب حياتي وانا الان اكرهها اكثر
وانا اراك المغادر الاخير
ابي واخي ثم انت
لا شيء مهم انا اساساً اعتدت النهايات
اعتدت ان تتلاشى احلامي بمنتصف
الطريق
لكن هل سأعتاد نهايتك !

26 - 11 - 2020, 01:33 AM

البارت 167

في مكان قريب من ختام
خرج خالد من بيت ابوالماس
واتجه في طريق لا يعرف نهايته يسير بلا هدف
توقف على جانب الطريق لم يبقى اقل من المتر ليصل الى الشارع
الرئيسي لكن توقف
انزل راسه بهدوء و وضعه على المقود وفتح كفوفه يناظرها ببطء
واشياء كثيره ومشوشه ومُبهمه تدور في ذهنه
من اول ماوصل هنا للدقيقه هذي
رفع راسه واخذ نفس قوي واخرجه بزفير حاد كررها مره ومرتين وشعوره بالقهر يتزايد عليه
مرر لسانه على شفايفه
وهو يهمس : ماعليك اهلها واللي سويته صح
بلع ريقه الجاف وهو يتهرب من التفكير والحقيقه المُره ويعلم بكل قلبه وبكل شعوره ان
ماحدث لا يرضيه ..

في الرياض ..
ضحك وسعة صدر والوقت يمر عليهم بسرعه كباقي اللحظات السعيده لاتترك مجال لعيشها بصوره ابطأ
رفع رائد ايده واشر للمربيه تجيء والتفتت لريتان : يلا نرجع بعد العشاء طيارتنا لتبوك
ريتان وقفت : اوك
عدلت نقابها وشالت شنطتها ومشت مع رائد ووراها
الشغاله تشيل الاغراض وام محمد ماسكة البنات
حرك رائد واتجه لوسط الرياض
ووقف عند الفندق وهمست ريتان : لا تقفل السياره
ناظرها بأستغراب
وهي التفتت لوراء : اطلعوا للجناح وانتبهي للبنات ام محمد بنطلع شوي احنا
ام محمد ابتسمت : إن شاء الله
نزلوا وتأكد رائد انهم دخلوا للفندق والتفت لريتان : همم على وين النيه ؟
ريتان ابتسمت : ابي هديه لزوجة عُمر
رائد ناظر الساعه : بقى ثلاث دقائق على اذان المغرب
ريتان : عادي نصلي بالمول ونطلع ناخذ
وبسرعه نرجع عشان نروح للمطار
رائد ضحك : يارب تروح الطياره واشوف وجهك وش بتسوين
ريتان : لا إن شاء الله ..

مر الوقت بدون احداث مهمه تُذكر
فالرياض ..

اقلعت الطائره برائد وريتان الى تبوك وفرحــة ريتان لاخوها ماتنوصــف
'
وبالنسبه لاهل تبوك
الجو مختلف ربكة واستعداد وتجهيزات
سُعاد شعورها مثل اي عروس ماتقدر تجلس مكانها من التوتر بس تلف فب المكان وترتب مع امها
وكل شوي تفتش لايكون فيه شيء ناقص
وام سعاد مبسوطه حيل
رغم انها تكرهه سابقاً ساره ( ام عُمر )
لكن بمجرد ما اعتذرت لها سامحتها ورضت من كل قلبها
جيل طيبين مايحمل بقلبه حقد او حسد..

وفي البيت القريب منهم
العريس عُمر شوي ويطير من الفرحه لبس شماغه اكثر من عشرين مره وكل شوي ينزله ويرجع ينسفه بشكل غير يبي يشوف اللي وين احلى
وام عُمر ماتنكر ان هاليوم تتمنى ان ابو عُمر حيّ وعايش ويحضر زواج ولده
مايطري ببالها شيء غيره وكيف كان متحمس " اذا اعرست ياعُمر والله مايزفك غيري "
راح وضاعت الدنيا وراه
مو كل شيء زي قبل نفس هدوء الشايب ووقاره
لكن ماعندنا شيء نقوله غير الله يرحمه
والله يّيسر امورنا ويعدي هالايام على خير
في غرفه ثانيه بهالبيت
البنات وترتيباتهم المناكير والاحذيه " اكرم القارئ " والاكسسوارات
كل شيء مكركب ومرمي بالمكان
وينسقون على ملابسهم ويرتبون وضعهم مايبون يضيع الوقت عليهم
بكره بين تسريحة الشعر والميك اب
والتجهيز لاغراضهم .
'
'
اما في جده الوضع غيــــر ميه مره ومره عن اللي هنا
خِتام رفضت تشوف احد
سمعت ام الماس خلف الباب حاولت فيها تفتح لكن تركتهم منزويه على نفسها وتفكر وش السبب اللي ترك خالد يسوي كذا
مافيه شيء يغفر له
وخصوصاً اني ما اخطيت عليه او على اهله ورضيت فيه بكل شيء ..

26 - 11 - 2020, 01:34 AM

البارت 168

عند ختام ..

مشت ببطء وهي تتجه للشباك بعد سماع صوت غريب قريب منه مثل رمي حجر او ماشابه
وقفت عنده وتأملت المكان تحت بأستغراب
مافي احد !!
رجعت على وراء وتركت الموضوع
وهي تاخذ بجامه وتبدل
انتهت ورفعت شعرها على فوق وتنهدت ببطء وهي ترجع بخطواتها للسرير وتجلس بصـــــــمت
تربعت وهي تفكر في الجاي
تفكر في البعيد ويعود لها خالد
قهرها لا يمكن لشيء ان يصفه فالوقت الحالي
عقدت حواجبها وهي تسمع الصوت مره ثانيه
وقفت بســـــــرعه وقلبها ينبض بقوه وتحس انه خالد
قربت للشباك وتجــــــمدت من شافته
واقف تحت شباكها ويتلفت بخوف لايشوفه احد
ابتســـــــمت وهي متأكده انه ماراح يخليها هنا
طلعت بســــــرعه ووقفت تشوف المكان كل الاضواء مقفله
يعني ناموا !! طنشت الموضوع وهي تنزل الدرج بهدوء
وتركض للباب وتحاول ماتطلع صوت
فتحت الباب بس مع الاسف كان مقفل
تسللت بهدوء لباب الخدم الخلفي وفتحته وطلعت
وهي تركض بجنون للقسم الاخر
وقفت وهي تتنفس بقوه وتشوفه قدامها واقف ينتظرها
ماتحركت وعيونها بعيونه تقدم لها
بخطوات سريعه وسحبها بقوه لحضنه
وهو يلف كفوفه عليها ويبوس راسها
وشعرها وانفاسه عاليه
ختام بكت وهي تتعلق فيه
خالد بعد شوي عنها ومسك وجهها
تكلم وهو يحاول ان يلتقط انفاسه : انتظر من صلاة المغرب عند البوابه
طلع عمك واهله ولا قدرت انتظر اكثر
والنور المشغل فوق نور غرفتك صح ؟
ختام ماردت وهي تتأمله بحده وعتب
خالد ابتسم بحنيه : اسف ي عين ابوي ورب الكون مجبور
ختام صدت عنه وهي تمتنع عن الكلام
والغصـــــــه واقفه بحلقها
خالد لفها له ووهمس : تتوقعين قلبي يميل عنك !
ختام رفعت عيونها له وهي تهمس : مال وانتهى
خالد بأنفعال : والله ماحب غيرك
ختام جمعت شفايفها وتحس ان بترجع تبكي من قهرها
خالد سحبها معه وركض معها لطرف الحديقه وجلس وراء الاشجار
وسحبها له وجلسها بحضنه وهو يضمها بقوه
ثبتت راسها على صدره وغمضت عيونها :بتاخذني معك !
خالد تنهدت : ما اقدر
ختام ابتسمت بسخريه : كنت تلعب علي صح ؟ متفق مع عمي لا انت ولا هو انصدمتوا كثر صدمتي ولا حسيتوا بربع اللي حسيته ..
خالد سكت وهو يثبت راسه على راسها
ختام بحزن مرير : قول لي ليش ! واوعدك اطلع لك غير عذرك سبعين
الف عذر
خالد مرر لسانه على شفايفه وبلع ريقه بصـــــــعوبه : قلت لك انجبرت
ختام بهمس : بسألك سؤال وقول ايه او لا كان مهددك عمي صح
خالد صد بنظراته عنها : ايه
ختام ابتسمت بحسره : ومن بداية حفلة الخطوبه متفقين !
خالد نزل راسه دون رد
ختام رفعت راسه لها : رضيت علي ؟
خالد انقبض قلبه عليها وهو يشوف دمعتها تنزل بحراره حقيقه ختام ببحه : لو انا مارضيتها عليك
ورب الكون احارب لاجلك عمي وامي واهلي كلهم وانت خليتني نكته
عندهم
وقفت والغضب تنطقه ملامحها : انتهينا كذا ! خالد وقف بسرعه : قلت لك مجبور
ختام شدته من ياقة ثوبه بقوه لطيفه وهي تهمس بحده : اقسم بالله ان ماطلعتني من هنا زي مادخلتني ان تندم شوفني قسمت اخليك تتمنى ختام اللي تحبك ، الغبيه اللي صدقت اكاذبيك ولا تلقاها كفايه الخسارات اللي عشتها بحياتي ليش تجرب فيني شيء جديد تبيني اخسرك ..
خالد بصدق : اقسم بالله احبك
خِتام بغضب انثوي لذيذ : انا ماقدرت احارب لاجل ابوي واخوي ماتوا ورضيت بالقدر لكن انـــــــت لو تموت قبرتك عندي فالحوش مالك مجال تهرب
خالد بحُب : فداء راسك ورجولك
خِتام بلعت غصتها وبحقيقه : عدل غلطتك قبل تدمرني خالد ترى بموت
خالد رمش ببطء وقلبه ينبـــــــض بقوه وهو يشوفها تبتعد عنه
وتدخل للبيت بخطوات مهزوزه "لم تنصفني الحياه عندما ينظر كل شخص من العالم
الى مايملك وينظر الى حالتي يكتشف انه الغني وانا الفقيره
الفقيده لا ام ولا اب ولا اخوه ولا اخوات كل ما احب يُسلب مني بصدق ! حتى الكرامه الجميع الان
يريد التخلص مني فقط
انا لم ارغب بفعل اي شيء خاطئ
انا احب واحببت بصدق وبقلب نظيف
لكن الحب في زمننا لا يوجد له مكان
الحب هو الخداع والكذب ومشاعر مزيفه
اعلن استسلامي من قوتي
وكبريائي المندثر واعلن انسلاخي من
كل ماكنت اتمناه يوماً
لا يحق لي التفكير بالحياه او بالاشياء
الجميله وعلى رأس القائمه " خالد "
هو اكبر من ان يُظلم معي
هو مجرد تحت تهديد
سيذهب ويتركني بعد ان اغرق اكثر
اصابني طوفان بصدري وافقدني
اتزانـي " هذه الحقيقه " .

26 - 11 - 2020, 01:36 AM

البارت 169

خرج خالد من عند ختام بنفس طريقه دخوله من فوق السور
قفز ونزل ثوبه
واتجه لسيارته البعيده عن البيت فتح جواله وهو يفتش في الاسماء يدور لـ عُمر
وقف لثواني بحـــــــيره بكره خطوبته وادق ازعجه
ويمكن مايفضى يرد حتى
قرر يكلم بُشرى وهون على اخر لحظة ما احد بيحل مشكلته غير هو
ركب السياره
وجلس فيها وافكاره توديه وتجيبه
وش الحل اللي ممكن يسويه
فتح جواله مره ثانيه واتصل عليها
سبب داء وهي الدواء
ومثل ماسجلت اسمها ماغيره
" ختام الهوى "
انا اشهد انك هوى وجوى وخوى
ومادونك من البشر ماله بعيوني مكان
ولا مقام
ماردت وترك الجوال وهو يتنهد بضيق ويشغل سيارته ويستعد لجوله في شوارع جده حتى يجد حل لمشكلته .

في تبوك ...
وصل رائد وريتان للمطار واستقبلهم عُمر واخذهم معه للبيت ينامون ويرتاحون
لكن بنصف الطريق تكلم رائد معترض : نبي فندق لاهنت
عُمر التفت له : البيت يوسعكم ومافي وقت
رائد بإلحاح : لا ابي فندق
ريتان مدت ايدها من جنب المقعد وقرصته وهي تقرب راسها منه ومن جهه الشباك عشان مايسمع
عُمر : طرار ويتشرط
رائد رفع ايده ومسك راسها وثبته بالمقعد وهي تحاول تفكه ماقدرت
تكلم عُمر وهو يحس بسوء موقفه معهم : شكلي غلط هنا احترموا العزابي اللي جالس معكم
رائد ضـــــــحك وريتان انحرجت وابتعدت لمكانها وجلست بصمت
وقف اخيراً عند فندق ونزل رائد وثواني ورجع دخل راسه مع الشباك
: انزلي ورفع عينه لـ عُمر :مشكور ماقصرت
ريتان بصـــــــدمه : لا بروح لااهلي
رائد بنص عين : نعم !! ريتان تأففت ونزلت وهي تودع عُمر
ورائد اخذ الشنطه ودخلوا للفندق وريتان تتحلطم ..

دخلوا لجناحهم وقفل رائد الباب ونزل الشنطه قريب من الصاله
واتجه للكنب وهو يجلس بهدوء
وريتان واقفه مقابله تنزل عبايتها وجلست
رفع راسه لها وبهدوء : ماتبين تنزلين !
ريتان ابتسمت : لا
رائد ابتسم من شاف ابتسامتها
وقرب راسه لها : وليش !
ريتان رفعت سبابتها لراسها وبثقه : كيفي
رائد جمع شفايفه : بالله
ريتان وقفت وهي تناظره لثواني وصدت : انا بدخل انام مابي ازعاج
رائد ابتسم بذهول ومارد
ثواني ووقف وهو يشوفها تقفل الاضاءه تبعها بخطواته وشغل النور : دقيقه
طلع من عندها واخذ الشنطه ودخل نزلها على الارض وفتحها طلع له
بجامه ودخل يبدل وريتان ابتسمت بنصر : ايه كذا
طلع وهو يناظرها تاخذ بجامتها عقد حواجبه : توقعت نمتي !
ريتان ضحكت : ابيك تجيب الشنطه
رائد توسعت عيونه وهي ضحكت ودخلت تبدل
ابتسم بهدوء واتجه للشنطه واخذ مصحفه وبخطوات هاديه
اتجه للسرير وجلس
عليه وهو يفتح القران ويقرأ سورة الملك
ثواني وطلعت ريتان
وقربت له ناظرت وش يقرأ ووقفت عنده اشر لها وهو مازال يقرأ
جلست جنبه وسكتت
انتهى وقفل المصحف اخذته منه
وبدأت تقرأ بخفوت وهي تبتسم له
نزل راسه على رجولها
ورجوله صارت باتجاه الوسايد
غمض بهدوء ويحس بالنوم وريتان تقرأ بتركيز
انتهت ونزلت القران وناظرته : عدل نومتك
رائد تنهد وجلس وهو واضح عليه التعب
ابتسمت له ريتان ووقفت وساعدته يوقف جنبها سحبت المفرش
واستلقى رائد عليه بنوم
غطته واتجهت للجهه الثانيه رفعت المفرش واستلقت بهدوء وهي تردد اذكارها
حست بكفه تلتف حول خصرها ابتسمت
وهي تهمس له : نام
قربها له وهو يضحك بخفوت : عادي بأخر النومه شوي
ريتان ناظرته بعدم استيعاب
قرب لها : انتِ صايره تلفين لف بقلبي هاليومين شصار ؟!!!
ريتان استحت منه وهي تهمس : حظك من الدنيا تحمل .
رائد ضمها اكثر وهو يهمس : يازين حظي والله .

26 - 11 - 2020, 01:37 AM

البارت 170

يوم جديد .. في تبوك .

هذا اليوم ليس كأي يوم اخر بالنسبه لـ عُمر الذي يتشربه الاشتياق
كل دقيقه وكل ثانيه وكل لحظة
سُعاد ياشيخة الغيد
وسيدة القلب
هذا اليوم كفاره عن كل مامضى
عن كل شعور اظهرتيه تجاهي
بالبرود والامبالاه
عن كل لحظة تركتيني فيها بين
الموافقه و الا موافقه
وانتِ كانت حتى اعظم اسألتي توقف
اجاباتها عندك
شفتي كيف ! حتى الطلب مايوقف الا على بابك.

خرج من غرفته ليلقي تحية الصباح بروح مبتهجه لوالدته الجالسه تكلم بجوالها
اشرت له وجلس جنبها
وهو يبتسم بخمول وقليل من النوم
اغلقت الخط والتفتت له بعينين حاده : اختك ماجات امس معك ليش ؟
عُمر ببساطه : زوجها يبيها معه اقول لا !
ام ريتان تنهدت ببطء وهي تضرب اخماس في اسداس : كيف وجهها !
باقي تعبانه وشاحب لونها ؟
عُمر ابتسم: لا شكلها مشكلة بينها وبين زوجها وانحلت
ام ريتان تنهدت براحه : الحمدلله قلبي ماكلني عليها
عُمر طلع جواله : وانا قلبي ماكلني على خالد
دق عليه وثواني ووصله صوته : هلا
عُمر : سلام
خالد : وعليكم السلام ورحمة الله
عُمر عقد حواجبه من نبرة خالد المبحوحه : فيه شيء !
خالد تنهد بضيق : ولا شيء ي صاحبي هاه ! جهزت لليوم
اكمل بكلمات حاول ان تخرج بمرح : بتصير عريس ي ولد !
عُمر بصدق : خالد لا تلف وتدور شفيه صوتك ؟
خالد تنهد بضيق وعيونه على سور بيت عم ختام : متضايق شوي
عُمر : من ايش !!
خالد بلع ريقه وحاول يتكلم بثقه : ماقدرت احجز على تبوك وشغلي هنا باقي مطول ودي اني حضرت معك
عُمر ابتسم وهو يدري ان صاحبه يكذب : خويلد ترى الدنيا بسيطه و ايد وحده ماتصفق اذا فيك شيء قولي يمكن نحله ي اخي
خالد انكتمت انفاسه من شاف سياره ابو الماس تطلع من البيت : بكلمك
بعدين
عُمر : انتظر ترى
قفل وهو مستغرب من حالة خالد ..

في جده .
اغلق خالد الخط ورمى جواله على المقاعد
الخلفيه وانزل راسه على المقود بهّم لا أحد يستطيع أن يدرك مأساة
شخص ما.
أن ينظر لها بذات النظرة التي تمسّ صاحبها، تلك هي الحقيقة ومادون ذلك من مشاركة الأحزان كذب
كنت بخير دون تلك النعمة التي ظهرت
في حياتي مؤخراً فبت قلِقاً من خسارتها خشية تلاشي سعادتي من الحياة
وفعلاً فقدتها وفقدت الحياه فقدتك ختام
رغم شعوري المتهاون بالامس
وظني انك بمأمن عند عمك
الان انا فعلاً استسلم لقلبي
واعلن انسلاخي من كل مُعتقد يصر على غيابك
ياربّ، إنّي لا أمتلك قوى خارقة
تُعيد لي كل الذي فقدت : لكنني أدعوا
ادعوا وانا اعرف ان هذه الدعوات لن تذهب سُدى وأنها ستمسح على
قلبي بلطفك
يارب ، يارب ، يارب .

نزل من سيارته وتوقف عند الباب ورجله ثبتها على المقعد
عقد حواجبه وهو ينزل النظاره لطرف انفه وسيارة ابو الماس تعود وخلفها سياره اخرى بيضاء
رفع يده وضرب باب السياره بقوه وركب وهو يتنفس بعمـــــــق
اغلق الباب وشغل المكيف والتفت للخلف واخذ جواله واتصل عليها الساعه الان الحادي عشر
ارجوا ان تكون مستيقظه
ردت بهمس : هلا
تكلم بلهفه : آخبارك اليوم
ختام كشرت : مثل امس
خالد تنهد : ختام
ختام بحده : لقيت حل ! او لا تكلمني
خالد نزل نظراته للمقود وسكت
ختام ببحه ويتضح فيها القهر : ترى طلقتني لا تجلس تزعجني
ابتسم خالد وحزنه يفيض : اشتقت
ختام وقفت بجنون وهي تدور على نفسها تبحث عن شيء تتمنى لو انه امامها وترميه بالهاتف وينفجر برأسه فعلاً يستميل قلبها
همست ببطء : قفل قفل
قفلت الخط وخالد يبتسم بهدوء ويشعر بتعب وخمول صوتها راحه !!!

26 - 11 - 2020, 03:06 PM

البارت 171

عند ختام .
بمجرد ما اغلقت رفعت كفها لصدرها وقلبها ينبض بشده وقوه
اتجهت للنافذه وفتحتها لـ تتسلل اشعه الشمس للغرفه
اخذت نفس عميق وتجمدت ملامحها
قبل الزفير حتى وهي ترى السياره المتوقفه هُنا
همست بخفوت : مروان !
رجعت على وراء من شافته يرفع عيونه على فوق وتعثرت وطاحت وهي ترجف : وش جابه هذا معقوله يدري باللي صار ؟
وقفت بسرعه وابتعدت لغرفة الملابس تبدل
ملابسها
وتفكيرها عند مروان
قررت تنزل وتسمع اللي يبي اكيد بيكلم اخته !" ام الماس "
سحبت البدي الاخضر الغامق
وادخلت اطرافه بداخل البنطلون الاسود
واتجهت للباب فتحته بهدوء
ونزلت للدرج بخطوات سريعه وهي تدعي انها تسبقهم وقفت وجلست بنص الدرج وهي تسمع ام الماس ترحب : حي الله الغالي
مروان بنبره ضاحكة متعاليه : المهلي مايولي ي عيون اخوك
باس راسها وختام شدت على كفوفها بخوف لا يشوفونها
ام الماس ابتسمت له وغمزت
ومروان ابتسم لها ومر من عندها وهو يهمس : فهمت
ابو الماس دخل بعده وهو يضحك : ادري انك يا مروان ماتخيب الظن
مروان التفت له وبصوت حاد : ترى خاطري مابعد رضى عليك بس جاي عشان وعدنا
ختام عقدت حواجبها
ابو الماس ابتسم : ايه ايه
مروان بخبث : كل ما اسرعنا ترى لصالحنا
دخلوا للصاله وجلسوا وصاروا جالسين قريب من الدرج
وختام تسمع بتركيز
مروان : وين الماس ؟
ام الماس : نايمه الله يهديها سهر بالليل ونوم النهار
مروان : اتركيها على راحتها
ابو الماس بخفوت : ترى برضيك يامروان بس شرطي عليك تكلم اختك ترضى علي الشرع حلل اربع حتى لو زعلت علي
انت وهي
مروان ابتسم وشبك اصابعه ببعض : انت خلص الموضوع اللي بيني وبينك ولك الرضى مني ومنها
ام الماس ابتسمت بمضض وهي كارهه ام ختام بس مروان بيحقق لها اللي تبي المال والثروه
مروان سند راسه على الكنب وتجمدت ملامحه وعيونه بعيون ختام ..
رمش ببطء ومانزل عينه
وختام حست اطرافها بردت مو قادره
توقف
مروان ابتسم واتسعت ابتسامته وبانت اسنانه : الا اقول اخبار ختام ؟
ختام نبض قلبها بقوه وهي تزحف راجعه على وراء وتطلع الدرج
ام الماس : مطلقه كيف تتوقع حالها
ختام غمضت بقوه ووقفت مكانها تنتظر رد عمها
مروان وقف : شكلي بطلع اصحي الماس
وقفت ختام بسرعه وطلعت باقي الدرج وتحاول ماتطلع صوت
ومروان يطلع درجتين درجتين
وقف وهو يبتسم لها
ركضت لجناحها وهو تبعها بصمت وقف وراء الباب وسمعه يتقفل
همس بخفه : ختام تسمعيني !
ختام بحده : انقلع
مروان قرب اكثر للباب وهو يهمس : مصيرك معي وقلتها من زمان ارضي وخلينا حبايب
ختام قربت للباب بســـــــرعه وضربته
برجلها
ومروان فز وابتعد : اعوذ بالله
ختام بحده : اعوذ بالله منك
ابتعدت تاركته وهو يبتسم : مُهره تحتاج من يروضها
صد لغرفه الماس دق الباب وماردت تركها ونزل
وهو يتكلم بأسف : مافتحت
ام الماس بضحكة : ايه سمعنا الباب
اكيد خافت من صوت الضربه
مروان بلع ريقه بتوتر " والله انا اللي خفت "
مروان : يلا استأذن الحين
التفت لـ ابو الماس : كلم بنت اخوك ترى الوقت راح والعمر راح شدعوى ننتظر !
ابو الماس وقف معه : ابشر ابشر
طلعوا وودعه ابو الماس ودخل
ومروان حرك وخرج من اسوار البيت تحت انظار ختام وخالد !

26 - 11 - 2020, 03:08 PM

البارت 172

ابتعدت ختام عن الشباك وجلست على الارض بقهر
اخذت نفس عميق ووقفت وبخطوات سريعه خرجت من غرفتها وهي
تنادي على عمها وواضح فيها صوتها الحده !
طلع الدرج و وراه زوجته : ختام يبه شفيك !
ام الماس ناظرتها بتفحص وصدت تاركتها هي وابو الماس
ختام تكتفت : ابي نتكلم ..
ابو الماس اتجه معها لـ الصاله اللي فوق وجلسوا فيها ختام ضمت كفوفها لبعض : انا مليت هنا
ابي ارجع الرياض
ابو الماس : إن شاء الله بنرجع كلنا بس يومين نكمل الحجز ونروح
خِتام : ابي اليوم نرجع
ابو الماس استغرب : شفيك ؟ اشتقتِ لامك ؟
ختام بسخريه : لا تطمن مخليتها لك
ابو الماس تجمدت ملامحه
ختام بحده : ابي ارجع بيتي اللي هو بيت ابوي
ولا اشوف زوجتك هناك ولا اشوف اللي تسميها امي ما ابي احد اعرف اعيش لحالي زي قبل
ابو الماس بحنيه : ختام بابا ليش كذا ترى امك تحبك بس ..
ختام برفض : قلت مابيها
ابو الماس عقد حواجبه : ابشري باللي تبين
ختام : مو بس كذا ابي اداوم بالشركة وابدأ اشتغل بقسم ابوي
ابو الماس بصدمه : تتوقعين اني بسرقه ؟
اكمل بصدق حقيقي :ورب البيت احفظه
لك
ختام كشرت : وانا ابيه ؟ فيه مشكلة
ابو الماس جمع شفايفه بتفكير : طيب اذا تزوجتي سلمت الشركة لك شرايك !
ختام رفعت حاجب : ترى سبق وتزوجت
ابو الماس بتفهم : اسمعيني زين بابا خالد ماكان نفسنا لا بالمستوى المادي ولا الاجتماعي ولا التعليمي ولا نصف الثقافي حتى اذا جمع ريالين راح وضيعها مايعرف مايعرف عشان كذا ماسلمتك الشركة وانتي على ذمته واحد فقير سربوت كيف اوثق فيه انا تحملته عشانك بس والا هو ماهمني القطوه كاتي حقت الماس بنتي بعيوني اغلى منه
ختام بهمس : بس
ابو الماس قاطعها : انا زوجتك خالد ابيك تشوفين اختياراتك شكثر فاشله وقد ايش عقلك صغير هو ماعمره حبك هو يحب فلوسك بس عشان كذا رفضت تعيشين بالبيت ورفضت تجين للشركة مو كره فيك والله غلاتك بقلبي مثل ابوك واكثر وانتي تدرين لكن خالد ذا ماتقبلته وانتي شفتيه
بنفسك خذاك يومين وطلقك وراح ما استفاد منك ، لو استفاد مارماك
عندي وجابك من الرياض لجده عشان كذا ، قراري وكلامي هو اللي.بيمشي من اليوم ورايح اعطيتك الوقت اللي تامرين فيه وماعمري قلت لك لا بذمتك ياختام قد رفضت لك شيء من كنتي صغيره الا زواجك من خالد ؟
ختام بخفوت : لا
ابو الماس : عشتي قراراتك وشفتي نتايجها
لو ابوك حيّ ماخلاك تنفذين ربع هالقرارات
كان رفض سفرك لحالك وكان رفض زياراتك
لصديقاتك تالي الليل
وكان رفض جلستك بالبيت لحالك وكان رفض خالد واهل خالد بس انا تركتك على راحتك ومالك حق تجحدين اي شيء من اللي قلته
ختام سكتت وعمها طلع وتركها وهي تكرر كلامه براسهـــــــا والاهم " خالد ما استفاد منك رماك علي ، من الرياض جابك لجده "

..

مر الوقت سريع .. وابطالنا في تبوك جوهم مختلف وغير ، كله فرح .
باقي نصف ساعه عن اذان المغرب وريتان ورائد مازالوا في الفندق
'
انتهت من تجهيزاتها وابتســــــمت لنفسها برضا
التفتت لرائد كان جالس ويناظرها بصمت قربت له وبخفه سحبته ووقف جنبها وابتسم مسكت ايده ودارت على نفسها واصطدمت بصدره بخبث منه وهو يبتسم ويقرب
راسه لها : تبين الصدق ؟
ندمت ابي اخذ هذا لي والفستان البنسفجي البسيه اليوم
ريتان ضحكت : ماجبته تتذكر انك رميته فوق الدرج عشان ما الحق واخذه
رائد تنهد وهو يمرر اصابعه على خصرها : والله مجنون ذا
ريتان بعدت عنه : هيه ورانا زواج
ضحك رائد وتبعها بخطواته : مو لازم
ريتان بحده : اوقف مكانك لا تقرب
رائد طنشها وقرب ووقف قدامها ميل راسه لها وباس عينها اليسار : لله دُرك ما اجملك
ريتان ابتسمت بغرور : اعجبك !
رائد بلهفه : انتي اللي حلاه
ضحكت ريتان
ورائد نزل راسه لها : اقسم بالله حلوه
ريتان انحرجت وشهقت من سمعت رنين جوال رائد : رُد رُد
رد وهو يتنهد : هلا عُمر ، جاين بالطريق
لبست ريتان عبايتها بسرعه وهي تحمد الله على اتصال عُمر
رائد لبس ساعته : قريتي اذكارك
ريتان شهقت : نس ـــــــيت
مو مشكلة في السياره
رائد قرب لها وشدها له وثبت راسها على صدره وهو يهمس بالمعوذات
انتهى ونفث بين كفوفه ومسح راسها : الحين اقدر ارتاح
ريتان ابتسمت له ورفعت نفسها وهي تطبع قبله على اخر ذقنه : ما انحرم منك
رائد صد وطلع من الجناح وهو يتكلم بحده : بسرعه والا والله
ان اخلي اخوك وعرسه ..
تبعته وهي تضحك :ماتقدر
رائد التفت لها وبقهر :وشو له ماتكشخين عندي
ضحكت ريتان وبترجي :
بكشخ بس امشي بسرعه
رائد كشر وطلعوا من الفندق وهو يتحلطم ..

26 - 11 - 2020, 03:11 PM

البارت 173

بيت ام سُعاد

انتهوا من الترتيبات وكل شيء جاهز ..
وسُعاد ربكتها زادت الف مره كل شيء هادي حفله صغيره ومتواضعه بين اهلهم من اعمام واخوال
وبين اهل عُمر فقط بناءً على رغبة سُعاد .
اذن المغرب وصلوا ووقفوا ينتظرون اهل عُمر
ارتفعت اصوات الترحيب والطلق الناري والبنات بالبخور ينتظرون دخول
اهل المعرس

'
ام ريتان نزلت عبايتها ورتبتها والتفتت لبناتها واخواتها اللي حضروا معها : يلا ندخل
دخلوا
وام سُعاد ترحب فيهم والبخور والزغاريط
والبنات مستانسات '

فوق عند سُعاد ..
واقفه على الشباك وتشوف الرجال واستقبالهم
وقلبها ينبـــــــض بقوه من شافت عُمر
لا لا مو كذا عاد !! شفيني ؟
اخذت نفس عميق وابتعدت عن الشباك جلست على سريرها وفتحت جوالها وسكنت حركتها لثواني وهي
تشوف رساله منه
قبل ربع ساعه فتحتها بســـــــرعه " حّي منهو بقربي بيتهنى "
ابتسمت وهي تهمس : لا ي شيخ ؟ واثق من نفسه '

عند الرجال ..
دخلوا للمجلس ومرت عليهم القهوه والبخور
وعُمر متوتر ورائد هادي بمكانه بدون اي اهتمام
لولا ريتان ماكان حضر اصلاً
وخال سُعاد بداء يتكلم مع عُمر وعن طلبه
تنهد رائد بملل وفتح جواله
ارسل لريتان : " نص ساعه واطلعي "
ردت عليه : " باقي ماشفت العروس بسم الله "
مسك ضحكته وقفل جواله وهو متأكد،انها مابتطلع وبيجلس هنا
غصباً عنه يلا لاجل عين تكرم مدينه ونحضر ونتعشى ..

دخل خال سُعاد ومعه الشيخ وعُمر للمجلس الداخلي واكملوا كتابة العقد
تكلم الشيخ بلطف : ابي اسمع راي البنت
خال سُعاد : ابشر ، دقيقه اناديها
خرج من عندهم وعُمر مبتسم للشيخ ومتوتر ثواني ودخل خال سِعاد : تسمعك ي طويل العمر
الشيخ ابتسم ووقف وقرب للباب : السلام عليكم ورحمه الله
سعاد بربكة : وعليكم السلام ورحمة الله
الشيخ : يا ابنتي هل تقبلين بعُمر زوجاً لك على سنـة الله وسنـة رسول
سعاد : اقـ..ـبل
الشيخ بتأكيد : بدون اي ضغط او اجبار !
سـعاد : اي
ابتسم الشيخ وهو يبتعد ويعطي خال سُعاد الكتاب عشان توقع
وبارك لـ عُمر ودعا لهم .

عند سُعاد استندت على الجدار ورفعت كفها
تتلمس قلبها ورجفتها ماهدت.انتبهت لخالها يفتح الباب
قرب لها واعطاها الكتاب
مسكت القلم وهي ترجف
وخالها همس : وقعي هنا
وقعت ونزلت القلم بسرعه
وخالها ضمها وباس راسها : الف مبروك الله يوفقكم ويرزقكم الذريه الصالحه
سعاد استحت وخالها طلع للمجلس وهو يتكلم : وين الشيخ !
عُمر ابتسم : طلع عند الباب
خال سعاد تبع الشيخ وهو يتكلم بصوت
واضح : بعطيه الكتاب وانادي سُعاد لك لا تروح
سُعاد شهقت وركضت للمطبخ وهي تهف على وجهها تحس بحراره
واحراج
سمعت خالها يناديها اخذت العصير ورتبته واخذت نفس عميق عشان تخفف من احراجها وهي خايفه تضحك او تبتسم من شدة
الاحراج والربكة
دقت الباب ودخلت للمجلس وهي منزله
نظراتها بحياء وهمست : السلام
عُمر ابتسم وهو يتأملها بنظرات طويله
ومو مصدق انها صارت له وقدامه !!
تقدمت ونزلت العصير
وبخطوات هاديه جلست جنب خالها
وكأنها تتخبى عن عيون عُمر
خال سُعاد وقف وهو يناظر جواله : عندي مكالمه دقيقه وراجع
طلع وهو متعمد يتركهم براحتهم ..

26 - 11 - 2020, 03:13 PM

البارت 174

عُمر رفع نظراته للباب اللي تقفل ووقف
وسُعاد بروعه وخوف وقفت
ضحك عُمر وهو يقرب لها ويشدها له وهي شـــــوي وتبكي باس جبينها بعمق وهمس : مبروك
سُعاد بتوتر : يبارك فيك
عُمر بخبث يلعب بأعصاب سُعاد وهو يعلم انها لا تفهم مايقوله من شدة توترها تكلم ببطء : عقبال عيالك
سُعاد بتوتر : امين واياك
ضحك عُمر بقوه وسُعاد تجهم وجهها
عُمر همس ببطء : ماهو امين لاني ما ابي غيرك ليش تقولين عقبالي ؟
سُعاد انحـــــــرجت وابتسمت بدون شعور
وعُمر تنهد بغرق حقيقي في شعوره معها مسك كتفها وجلسها بهدوء
وجلس جنبها وهو يناظرها
همست بتوتر : خلاص
عُمر ابتسم : خلاص ؟ مافي خلاص مني
سُعاد ارتبكت وهي تبي يصد بنظراته
عُمر بنبره لعوب : غش كذا انا ناظرتك وانتي ما طالعتي فيني حتى
سُعاد سكتت والهواء ينقص اكثر واكثر بالنسبه لها
عُمر رفع راسها بسبباته :حق لك تشوفيني يمكن ما اعجبك !
سُعاد تحس بغشاوه على عيونها من شدة التوتر وانفاسها ترتفع
عُمر ضحك ورحمها رفع يدها اليمين وباسها على مكان ابره التحليل " بقعه بنسفجيه"
ووقف وطلع تاركها وراه ترتجف برهبه وهي ماشافته ولا قدرت ترفع عيونها له وقفت بسرعه
قبل يدخل خالها واخذت العصير اتجهت للمطبخ نزلته هناك ورجعت قفلت اضاءه
المجلس لان هذا القسم ماراح يدخلون النساء
فيه والرجال بيجلسون برا
طلعت وركضت للدرج وطلعت للطابق الثاني
بسرعه
قابلت بنات خالتها لكن تركتهم وهي تدخل
غرفتها قفلت الباب ورفعت يدها لقلبها
وجلست على السرير وابتسمت رن جوالها وناظرته كان عُمر
قررت ماترد وتركته
ثواني ووصلها اشعار رسالتين في الواتس
منه
فتحتها وتجمدت ملامحها وهي تشوف صورته
وتحتها مسج " حلالك "
عضت شفتها وضحكت بقوه وهي ماتدري وش ترد قفلت الواتس بسرعه
ودخلت الصور وحصلتها هناك تأملتها بصمت
وهي تمرر اصابعها عليها
اندق الباب وفزت : هلا
ام سُعاد : يلا انزلي
سُعاد رمت جوالها وكفوفها ترجف ووقفت
عدلت روجها وزادت من العطر وطلعت ..

في جده ..
خالد وقف عند الصراف وهو يشوف مصاريفه وكم بقى عليه كان في حسابه الخاص الف ريال فقط وحساب ابوه خمس مئه ريال
تنهد وهو يتذكر الدين اللي كسر ظهره كانت اربع مئة الف قرض البيت اللي يعيش هو واهله فيه المصيبه مو هنا المصيبه ان القرض
بأسم حساب ابوه وينوخذ من راتب التقاعد الخاص فيه ولو ماسددوه ، للبنك حق انهم ياخذون البيت لان ابو خالد رهنه لهم
بالاضافه لسجن ابو خالد
وهذا الشيء والسر اللي هدد فيه ابو الماس
خالد
لان ابو الماس واسطاته كثيره وقادر يعدل في وقت القرض ومتى سدداه
وخالد المسكين لا حول ولا قوه اعطاه مبلغ مهر ختام وطلب منه يتزوجها
لفتره هو يحددها وبعدها يجيبها ويطلقها
او ينسى ان ابوه يطلع من السجن
خِتام راجعه لاهلها مو اغراب حتى لو ماتبيهم
بس ابوي كبير سن مريض بالقلب والزهايمر ومدري هو يعيش اكثر او يموت فـ ليش اضحي فيه ارميه اخر عمره بالسجن وهو اللي تعب علي !! يحتاجني اكثر منها من ناحيه الاهتمام ومن ناحية البِر
الحين احاول اعدل خطاي بس كيف
كيف !!! المبلغ لو اطير للسماء ماقدرت اجمعه
وخِتام مستحيل اطلبها
لان ماعمري اخترتها او حبيتها عشان فلوسها
خرج من البنك وهو تعبان نفسياً وعقلياً
وجسدياً وروحياً
ركب سيارته وتبادر لذهنه عُمر
عُمر عنده خير !! اكيد بيساعدني بس والله مستحي منه متى بردها والرجال توه بيعرس اكيد بيجهز نفسه اخرب عليه !!! اخذ نفس عميق وقرر يكلمه
ارسل له :" فاضي "
رد عليه : " وينك "
خالد : " في جده "
عُمر : " بتقول وش فيك ! "
خالد تنهد : " محتاج فلوس"
عُمر تأخر بالرد لثواني ثم انارت الشاشه بأتصاله ..

26 - 11 - 2020, 03:15 PM

البارت 175

اخذ خالد نفس ورد : هلا
عُمر بحده : يا حمار وعز الله الحمار عنك انا ماقلت وش فيك ؟!! ماقلت لك اذا احتجت كلمني ؟
من الصبح وانت تدوج في الارض كان قلت لي ي اخوي
خالد سكت شوي ثم اردف : المبلغ كبير
شوي
عُمر بأنفعال : رقبتي سداده
خالد : ماتقصر فديت راسك
عُمر التفت لخال سُعاد اللي يناظره بأستغراب
طنشه وهو يكلم خالد : كم ؟
خالد : اربع مئه الف
عُمر تكلم بسرعه : بكره الصبح تكون عندك اول ماينفتح البنك
خالد ابتسم وبحرج : تسلم
عُمر ببحه : اذا احتجت شيء قولي على طول ترى احنا اخوان انا من لي غيرك هاه !! قل لي
اذا طحت واحتجت سند عندي غيرك ! خالد انت اخوي اللي ماجابته امي
لا تتصرف بتصرفات طفوليه محتاجك معي ي اخوك
خالد : ابشر بي
عُمر : فديتك يلا توصي شيء
خالد : سلامتك ومشكور عُمر مدري وش اقول والله
عُمر بحده : مابيننا استح ي رجال
قفل بوجهه ورجع للمجلس وهو مرتاح انه عرف وش فيه .

في مكان اخر عند خِتام '
كان البيت شبه مظلم وهادي مره
طلع ابو الماس عندها طلبها تنزل تتعشى معهم ورفضت بحكم انها تبي تفكر بهدوء بحياتها الجايه
طلع عشاها وتعشت لوحدها قبل صلاة العشاء ! شفيه مستعجل !؟؟ قررت تترك موضوع العشاء وترجع للامر الاهم تحس ان كل شيء قاله عمها صح الا في نقطه وحده
خالد ! خالد هو الخطا في كلامه يحبني وعيونه تشهد وكل شيء يشهد
كلامه وحضنه وكل شيء كل شيء تنهدت وهي تمنع دموعها من النزول ..

في الاسفل ..
كانت ام الماس تضحك وتسولف مع مروان
والماس تطقطق بجوالها
وابو الماس يكمل بعض الملفات
مروان رفع عيونه للدرج وناظر اخته : ختام مابتنزل ؟
ام الماس ؛ لا ، كلمها عمها ورفضت وطلعنا عشاها
مروان عقد حواجبه : بدري !
ام الماس : لا لا مو بدري ولا شيء نبي نطلع نتعشى برا وناخذ راحتنا
وهي تتعشى وتنام
مروان سكت لثواني وابتسم : ايه صادقه
الماس وقفت : ماما بطلع ابدل وحاولوا تجهزون بسرعه عشان الزحمه
ماتأخرنا
ام الماس وقفت معها : صادقه وانا بعد بطلع البس عبايتي
طلعوا وابو الماس فتح جواله وحصل مكالمه من ام ختام وقف واستاذن مروان : عندي مكالمه عشر دقايق وجاي
مروان : خذ راحتك
طلع ومروان تنهد وهو يطقطق اصابعه
ابتسم بجنون وهو يفكر بختام
وقف وتاكد ان ابو الماس طلع تبعه بهدوء وشافه في الحديقه
قفل الباب بالقفل وطلع الدرج بسرعه
واتجه لجناح ختام
فتح الباب وكانت جالسه عند الشباك ولا التفتت : خير ! شتبين ؟
تتوقع انها الماس او اختي ! ابتسم مروان وتقدم لها بهدوء
وختام تجمدت ملامحها من شمت ريحة عطر رجاليه وعيونها على عمها في الحديقه
فتحت فمها بتناديه لكن يد مروان
كانت اسرع وشـــــــدها بقوه وطاحت على ظهرها
قفل الشباك ووقف مقابلها وهو يبتسم
بنشوه ونصر : اشتقت
ختام فزت واقفه وهي تتنفس بقوه
مروان رفع كفوفه : اششش اهدي لا تخافين
دقيقه واطلع
ختام انكتمت انفاسها : خير !! انت ماتفهم ؟ كم مره اقول بعد عني بعد عن طريقي
مروان ابتسم : اهدي انا اقول دقيقه بس
ختام تكتفت : بسرعه شتبي !
مروان قرب لها وبعدت عنه وهي تتوعد: خطوه واصارخ وانادي عمي
مروان تنهد : مابقرب خلاص
وقفت وهي مرعوبه منه بس تظهر القوة ..

المواضيع المتشابهه لموضوع: رواية العابث ال خير في هذا الزمان لموضوع: رواية العابث ال خير في هذا الزمان
الموضوع	كاتب الموضوع	المنتدى	مشاركات	آخر مشاركة
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
تعرفوا بالصور على الغابة المنحنية في بولندا	همسة الشوق	همس للصور والغرائب	8	16 - 7 - 2015 06:55 AM
فندق على شكل فقاعة في الغابة	نظرة عين	همس للسياحه والسفر	8	22 - 2 - 2015 09:05 PM
شوف كيف بيتحمم ملك الغابة	لك مشتاق	همس الشعر و الشيلات الصوتيه	9	6 - 10 - 2014 10:21 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية العابث ال خير في هذا الزمان

همس للقصص وحكايات وروايات